لتكُن لي وحديّ......

Part 3

* لِـتَكُن لـي وَحديّ *
* لـِ سَمَا العُبَيدي *
* الـبارت الثالث *

* ‏اللَمعة بَعيونَك مَواويل وَقَصيدة
أنتَ وِلفي ألما أريَده وَحيَل أريَده *

*______________*

نارين

مرت ايام عديده واحنا بـعلاقه نلتقي ونتواصل اغلب الاحيان ولاول مره احس بـمشاعر حُب اتجاهه شخص وكُل شيء يمشي مثل ما اتمنى وعلاقتنا اروع ما يكون تعلقت بي لـدرجه صار جزء لا يتجزاء من يومي صار شيء مهم بـحياتي وكُل شيء بـخصوصه يهمني واحب كُل تفصيله صغيره وياه

اني و زينب مستمرين بالـدوام سوه بس اشوفها بعض الشيء منزعجه من علاقتي باخوها ما اعرف شنو الموضوع دائماً تستفسر باسئله مو مفهومه واعجز عن اكتشاف اسبابها دائماً احسها بس تريدنا نتعارك او تصير مشكله بينا حتى ننفصل وتنتهي علاقتنا

بـيوم ما اتحملت وكفت كدامها وحجيت
_انتِ ما فرحانه الي ما ترديني بـحياة اخوج
_لا والله العظيم لا اتمناج وكُل يوم اسئله شوكت ناوي تتقدملها بس اكو اشياء لازم تفتحين عيونج عليها وما اكدر افصحلج عنها حتى اخوي لا ينجرح مني
_ عجزت افهمج زينب عجزت اكو شيء لازم اعرفه حسن ما يرضى يكوله الي انتِ احجي وريحيني خلينا كُلنا نرتاح
_ ما اكدر اني احجي نارين الافضل انتِ تسئلين حسن وهو يجاوبج
_ شنو اسئله شنو اكُله ؟

باوعت عليه بـحيره وجاوبتني بعد ثواني من السكوت
_ بـبساطه يحجي كُل الي خافي عنج
_شنو الي خافي شنو الشيء السيء لـهذه الدرجه وهو ما يقبل يحجي الي

ما جاوبتني اكثر رجعت للـبيت نفسيتي متأزمه وناويه اليوم اسئله عن كُل شيء واعرف مصيرنا شنو اخذت شاور ريحت جسمي ودخلت غرفتي ما كدرت اكل شيء وبـسبب القلق والتوتر الي عشته تأزمت حالتي بـسبب مرضي المزمن بالـمعدة

تخربط وضعي وما حسيت على نفسي الا واني افقد الوعي بـسبب التشنجات الي اجتني بعد ساعات التقيء المستمره فتحت عيوني لكيت نفسي بالـمستشفى واهلي يمي وبيدي مغذي شافني بابا صحيت ركض ناحيتي يبوس بـراسي وايدي ويستفسر مني ما جان عندي جواب غير بـسبب لود الامتحانات

تطمنوا عني اخواني وراحوا بقت بس ماما عندي فتحت موبايلي لكيت اتصالات ورسائل من عنده ومن زينب جاوبتها الها اني بالـمستشفى وشرحتلها وضعي كالت جايتج ما ردت اتعبها بس ما سمعت مني
مر الوقت كاعدين اني وماما بالـغرفه اندكت الباب ماما كالت تفضل دخلت زينب وهو خلفها انصدمت صدمه عُمري ما عرفت شنو اسوي تلبكت ماما انتبهت عليه تركتنا ثلاثتنا وطلعت بـحجه تجيب ضيافه