#قطايف_رمضان 5
#علمني_ربي_فأحسن_تعليمي_وتأديبي !!
كنتوا بتقولولي اني بخليكم تبكوا من القصص لكن القصة دي هتبينلكم ان اللي فات كله كوم ودي كوم تاني خالص.. لدرجة اني مقدرتش والله اكمل كتابتها وهنزل باقي رسايلها في الكومنتات تحت..
طبعا بفضل الله فيها #جبر عظيييم جدااا رغم انه بعد وجع وقهر وصبر💔
🌸🌸🌸🌸🌸🌸🌸
ابدأ حكايتي بسم الله والصلاة والسلام على رسول الله..
انا بنت اتربيت في وسط مسلم على الفطرة..أمي الله يرحمها وأبويا بيصلوا وبيصوموا ويتصدقوا وربوا فينا كل دا من واحنا صغيرين الحمد لله..ويمكن تربيتهم دي هي اللي ثبتتني إني اعدي من كمية الابتلاءات الصعبة اللي مريت بيها.
حياتي كانت كأي إنسان طبيعي فيها #تقلبات في القرب من ربنا..شوية ابقى فوق وأحس بلذة القرب وشوية ابقى تحت واستغرب أنا ايه اللي حصل وبعدني؟! وبعدين ارجع اقرب تاني وهكذا.
بدأت سلسلة ابتلاءاتي وانا في 3 كلية..
كان اتقدملي شخص ليلة امتحاني وكأي بنت كنت فرحانه جدا لانها اول تجربه بس للأسف لا اتوفقت مع الشخص دا ولا عديت من مادة الإمتحان بس بفضل الله خرجت من الموقف بحاجتين
اولهم إني بدأت استوعب معنى اختيار الزوج بناءً ع تمسكه بالدين..كمان السنه اللي بعدها ربنا وضعني في اختبار صعب وهو ان الماده دي كان جاي وقت امتحانها وسط مادتين جدا.. يعني 3 مواد في اسبوع واحد وكلهم اصعب من بعض.
قعدت ادعي ربنا دعاء #المضطر واقوله يارب كان بإيدي أغش السنه اللي فاتت بس انا معملتش كدا علشانك..يارب ماليش غيرك ينجدني..يارب باركلي في وقتي وفي فهمي وفي استيعابي..وسبحان الله اذاكر الثلاث مواد في يوم واخد ومتسألنيش عملتها إزاي أنا نفسي وقسما بالله م اعرف..
لا وكمان ادخل امتحان الماده اللي كنت شيلاها واجيب امتياز والمادتين الجداد اجيب جيد جدا واطلع بإجمالي تقدير السنادي جيد مرتفع..
ودي كانت أول مره ألمس مقولة عظم الأجر بعد #اختبار..
اتخرجت من الكلية واتخطبت الخطوبه الأولى وركزي معايا علشان عديت بخطوبتين والتالته الحمد لله انتهت بجواز..
المهم الخطيب الأول ليا كان انسان يبدو عليه الصلاح..
نسيت اقولك اني كنت دايما بدعي ربنا وبقوله يارب ما تفتح قلبي غير لزوجي وبس يعني يوم م الاقي نفسي مكتوب كتابي وألبس الفستان الأبيض افتح قلبي ليه..كنت خايفه من التعلق جدا !!
بالتالي كل خطوبة كنت بحاول التزم بضوابط الخطوبة يعني مكانش في خروج ولا كلام عاطفي ولو هو قال كنت بصده واللي ساعدني ع كدا ان مكانش في مشاعر اصلا جوايا ناحيته بس كنت بقول طالما هو كويس خلاص هكمل معاه لحد م بدأت المشاكل تظهر وبدأت ملامح شخصيتة تبان
هو شخص عصبي جدا وكان بيتخانق معايا دايما وعاوز يسيطر عليا وع كل تصرفاتي وخلاص لدرجة انه مره حلف ان واحده صاحبتي م تدخلش بيتي خالص وكل دا ومش مكتوب كتابنا حتى
والأصعب لما لقيته بيقولي انه متضايق اني مش بتجاوب معاه وإن اصحابه اللي خاطبين بيخرجوا وبيبوسوا كمان مش بس بيقولوا كلام عاطفي واني محبكاها زيادة عن اللزوم..
بصي ربنا كان عمال يبعتلي رساله ورا التانيه اني مكملش وانا كنت بعدي لحد م في مره اكتشفت انه كذب عليا في حاجه لو كنت عرفتها م الاول مكنتش وافقت اقعد معاه م الاول خالص وهي انه طلع بيشرب #سجاير.. ممكن حد يشوفه سبب تافه بس دا كان القاضيه بالنسبالي خاصة بعد تصرف ليه تاني كنت شيفاه #مقرف جدا ودا لما في مره قالي ع بلوزه كنت لبساها انها #ضيقه وقالي متنزليش بيها الشارع تاني بس البسيهالي لما اجيلك انا البيت..قولتله لا طبعا مش هيحصل قالي لو جيت ولقيتك مش لبساها همشي قولتله بالسلامه
متخيلة الحقاره والوضاعه؟!!!
خلصت منه ومن خطوبته بالعافيه بعد رفض والدي اللي كان شايف اني بتبطر!!
وتعدي فترة ويتقدملي كذا حد وميحصلش نصيب لحد م جالي الخطيب التاني
وغلطة عمري بجد اني وافقت عليه ولغيت جرس الانذار اللي كان في قلبي وهو ان مفيش #قبول خالص بس مشيت ورا عقلي اللي كان بيردد ان المهم انه يبدو شخص كويس
وطبيعي رجعت أعاني تاني لأني مكنتش بطيق اليوم اللي بيزورني فيه واول م بيمشي كنت بقعد اعيط واقول يارب لو هو دا نصيبي يارب انا راضيه بس راضي قلبي أنا مش بتبطر والله يارب بس قلبي مش حاسه خالص..
3 شهور عدوا عليا جحيم لحد م قولت لوالدي رغبتي اني مش هكمل وفضل يردد اني كدا بتبطر ومش هنخلص م كلام الناس..
ومفيش فايده عياط ووجع قلب وخلاص لحد م جيت في ليلة وصليت ركعتي استخارة ونا ببكي بكاء شديد..بكاء بقول فيه يارب انت بس اللي في ايدك الحل وخلاصي كله وراحة قلبي.. انا مش عارفه ارفض علشان مش لاقيه سبب مقنع من وجهة نظر والدي..يارب لو هو قدري انا راضيه بس راضي قلبي ..يارب حلها من عندك يارب..
تاني يوم اقسم بالله لقيت الشخص دا بيكلم والدي وبيعتذرله وبيفسخ الخطوبة..وقتها والله العظيم وقفت وزغرطت من الفرحة..
