#قطايف_رمضان 13
#بعد_محنة_تيجي_منحه 💙
حبيت أوي طريقة سرد صاحبة القِصة ف هنزلها زي م هي بإيموشناتها بتريقتها ع حالها بكله 😃❤
🌸🌸🌸🌸🌸🌸🌸🌸
كان نفسي اكون بعتلك قصة زي اللي بشوفهم اللي صبرت صبرت لحد ما لقت اللي بيحبها بس شكلها مش مكتوبالنا😂💔ع العموم انا راضية لان ربنا اداني حاجة حلوة اوي
بدأ الموضوع وانا في إبتدائي طفلة شبه العيال اللي في الكرتون قاعدة في جنب كده والدبان ملموم عليها😂كنت فاشلة وفشِلة في نفس الوقت ومبتحركش ومبحبش الا التلفزيون وعايشة عمري بجيب درجات ما يعلم بيها الا ربنا ويادوب كده بنجح وسمعتي اللهم صل على النبي مسمعة القريب والبعيد بفشلي لدرجة اني بقيت مشهورة بلقب البت #السرحانة في المدرسة 🙂
لما دخلت اعدادي صاحبت واحدة من البنات اللي واخدة بالها من نفسها اوى اوى يعني😎واوبا بقى واخر حلاوة ووسسسسع يا جدع💅 وكنت منبهرة بيها اوى وبحب اقلدها على طول كده لحد ما حالي اتعدل شوية بقيت اخد بالي من لبسي وشكلي ولما ده اتحسن ثقتي بنفسي زادت شوية وبقيت اشطر شوية في الدراسة لكن بردو لسة فشولة ولأجل قضاء ربنا البنت دي مكملتش صاحبتى لان دخلت علمي وهي دخلت ادبي من سنة أولي ثانوي(ما احنا أزهر بقى) بس في ثانوي كنت خلاص عرفت ازاي اتعامل مع بني ادمين وبقى ليا أصحاب كتير ومهتمة بنفسي وبدأت اخس واعمل رياضة ودايت ودايت ورياضة لحد ما بقيت رشيقة كده وطبعا ده زود ثقتي بنفسي ومستوايا بدأ يزيد اصل انا بعيد عنك مستوايا الدراسي متعلق بالتخن والرفع اه والله زامبقولكدة 😂جت بقى تالتة ثانوي واللي انا خايفة منها طول حياتي وطبعا لاني واحدة فشولة سقوطة فبديهي ماجبش كلية عالية وخصوصا يعني اني أزهر وقليل لما حد يجيب مجموع عالي أزهر بس انا بقى يا ستي كنت عاشقة هندسة🤤 ليه معرفش بس كانت تيجى سيرتها كده قلبي يتنطط كده وساعات اعيط من كتر ما نفسي فيها بس نظرا لما حكيناه ونظرا لان أصحابى دايما سابقني مهما عملت وانا في الاخر الله اكبر عليا بردو ونظرا لان ظروف البيت كانت مدربكة وقتها لان كنا بعنا بيتنا وسكنا في إيجار ف انا وفي وسط كل الظروف دي كنت عارفة اني مش هجيب مجموع لا ومتأكدة كمان..
كنت بذاكر بس من حبي للهندسة وعشان خاطر ماما اللي مقصرتش معايا في قشاية طلبتها ووالله كانت بتقعد تذاكرلي لما تلاقيني تعبت حرفيا انا عديت سنة صعبة بكل المقاييس ضغط ١٨ مادة وانا مستوايا على ادي وضغط المدرسين وتعاملهم معايا على طول اني واحدة فاشلة حتى بابا كان يقوللي انتي اخرك هتدخلي الكلية اللي جنبنا دى مع احترامي لكل الكليات طبعا الا اني فضلت احارب وابذل في جهدي وكنت باكل بغباء ورجعت اتخن تانى مهمنيش فضلت ابوظ في الدايت اللي عملته طول عمري تخنت ٢٥ كيلو في الثانوية دى سنة كاملة مش بنام كويس وبعك في الأكل ونفسيا متدمرة ومرمطة دروس كان في مواد باخد فيها ٣ دروس من كتر ما كنت بسرح عشان يكملوا بعض وبصلي ادعي بس مفوتش سجدة من غير دعاء كنت دايما اقول يا ذا الجلال والإكرام انا عرفت ان ربنا ده احب اسماءه ليه☺️ كنت اقول يا رب انا بدعوك بأحب الأسماء إليك اجعل #لقبي احب الأسماء اليا💛 يا رب انا نفسي بس بابا ميبقاش حاسس انه عيال اخواته احسن من عياله في حاجة 💛مش عاوزاه لما يبقى بينصح الطلبة بتوعه يقولولوا كانت بنتك فلحت💛 يا رب مش عاوزة تعب امي يضيع وانا أملها 💛عاوزة اخواتي ياخدوني قدوة في التعليم💛
كنت بدعي في كل الأوقات اللي تستجاب دعوتها انا فاكرة مرة جه يوم جمعة فضلت ادعي كل ساعة فيه اتحرى ساعة الإجابة واصحى من النوم ادعي وانام على كده طول ال ٢٤ ساعة كمان كنت بصلي تقريبا كل يوم ركعتين قضاء حاجة واصحى قبل الفجر اقعد ادعي ادعي واصلي لحد الفجر وانام كنت اطلع صدقات بنية ربنا يديهالي بس للأسف حصلت مشكلة معايا الشهر الاخير اني مكنتش حافطة القرآن كويس ف أجلته (عندنا التأجيل بعذر بتاخدي الدرجة الكاملة عادي) ولأجل النصيب كان معاه حديث في نفس اليوم قالوا لازم الاتنين يتأجلوا وقتها اهلي حاسوا اني هضيع طالما دخلت الدور التاني بس ميأستش وفضلت ادعي وادعي لحد يوم النتيجة بس طبعا الماجلين بتتاخر ٣ ايام بعد النتيجة العادية بس للأسف النتايج كانت وحشة اوى وحتى الناس اللي أعلى مني جايبين درجات قليلة قضيت ايام رعب وعياط بس مبطلتيش دعاء لحد يوم النتيجة لما ماما دخلت عليا بتصرخ وتقوللي انتي جبتي ٩٦ % متخيلة جبت ٩٦^ من أزهر ده لو قفلت الدور التاني طبعا😁 انا اللي كنت بقول يا رب اعدي ال٨٠% والله ربنا ما خذلني ولما دخلت الدور التاني نقصت درجة وفي الاخر مجموعي كان ٩٥.٧% وشوفت كرم ربنا كله عوضني عن سنة مرمطة وعذاب ليا ولاهلي ودخلت #صيدلة واخدت لقب #دكتورة ده انا دعيت ربنا بأحب الأسماء اليه اداني لقب احلى من اللي طلبته و احسن ما كنت عاوزة كمان وبعدها أدركت اني ممشيش في هندسة خالص و الحمدلله وجبت امتياز اول سنة كمان مانا عرفت سر الخلطة بقى😉دعواتكم ليا بقي امتياز السنادي كمان
تعبت واتمرمطت سنة بس لحد دلوقتي بيتقال لي دكتورة من البت السرحانة للبت الضاكتورة😁♥️كل القوانين الطبيعية والفيزيائية والفزلوكية كانت تقول مش هجيب بس كل حاجة تخر قدام قدرة الله عز وجل🌹
ربنا عوضنا عن البيت اللي بيعناه بفرحة زي دي
بجد نفسي اقول لاي حد عنده #حلم امسك فيه بايدك واسنانك حارب العالم عشانه ماتسيبش
حلمك لاي سبب ولا لكلام ناس ولا لظروف ولا للعقل الدعاء بيعمل #معجزااااااااااات وعن تجربة😉ربنا يوفقكم جميعا يارب♥️🌹
🌸🌸🌸🌸🌸🌸🌸🌸🌸🌸🌸🌸🌸🌸
أول م خلصت قراءة القِصة دي قولت انها اكيد ان شاء الله هتكون رساله لحد.. بس هي في نفس ذات الوقت رسالة #لصاحبة_القِصة انها تعيد النظر في أول سطرين م تاني وتجدد يقينها وحسن ظنها بالله انه زي محقق #المستحيل في تحديد خط سير تعليمها ف اكيد بإذن الله هيرزقها الزوج #الصالح 💜
ودا تذكير لكل واحد فينا كالعاده انه يدور في الذاكره هيلاقي ان اكيد حصل موقف معاه وربنا حقق مستحيله
دورنا نذكر بعض ف نثبت قلوب بعض على حسن الظن واليقين ❤
#من_الرسايل
#حكاوي_هدير
#هدير_ابراهيم
