#قطايف_رمضان 11
#سحر_الاستغفار !
مش دى اول مرة احس بمعية ربنا ليا بس المرة دي كانت مختلفة والتمستها وحسيت اد ايه ربنا قريب ومجيب وكمان ادركت معنى انه يبتلينا احيانا بعقبات تخفف صعوبات أكبر منها..
قِصتى من رمضان اللى فات والدتى كانت تعبانه جدا وكنت انا دايما برعاها ومعاه لحظه بلحظه فى كل وقت بشوف وجعها والمها ومش قادرة اعملها حاجه تخفف عنها كنت بفضل ابكى وادعى ربنا يخفف عنها.. كنا وقتها فى رمضان وروحنا لدكاترة كتير بس كانت من غير نتيجه لحد ما بفضل ربنا ناس قالولنا على دكتور كويس ف روحناله بعدها طلب مننا اشعه وقال ان والدتى ممكن يكون عندها #حصوة فى الكلى وتحتاج عمليه جراحيه واكد الكلام ده وطلب منها تانى يوم نعمل الاشعه..
سمعت الكلام ده وانهارت تماما لان والدتى مش هتتحمل اى عمليه فى السن ده حرفيا وقتها كنت متدمرة نفسيا فضلت طول الليل سهرانه جنبها وادعي ان ربنا يخفف عنها وميكونش فى عمليه مش هكدب وأقول كان عندى يقين فى ربنا لان وقتها كنت مضغوطه جدا واعصابى تعبانه وخايفه بس كنت #عشمانه فى ربنا..
وجه يوم الاشعه والمفروض انا اروح مع والدتى كنت اتمنى مروحش واشوفها وهى بتتألم بس دى كانت إرادة ربنا انى اروح..
كنت لابسه خاتم التسبيح بتاعى وعزمت النيه انى #استغفر الله عشان يخفف عن والدتى لما والدى شاف خاتم التسبيح قالى سيبيه دلوقتى مالوش لازمه بصيت عليه وقلت له ده #العكاز اللى بتسند عليه !!
دخلنا المستشفى وغرفه الاشعه وكنت انا مع والدتى بساعدها وجه الدكتور عشان يعمل الاشعه ودى كانت بدايه المعاناه بالنسبه ليا بس دى كانت بدايه #الاستجابة والكرم م ربنا لما دخل الدكتور قال والدتك مينفعش تعمل الاشعه كده لان الكلى مش نضيفة ولازم تاخد حقنة عشان الاشعة تبان كويس وخرجنا من غرفه الاشعة على الغرفة التانية عشان الحقنة وقفت جنب امى ومسكت ايدها وشوفتها وهى بتتألم وانا مفيش فى ايدى غير انى ابكي واقول والله يارب ما قادرة الوجع ده لو فيا مش هتكلم لكن ده فى اغلى الناس على قلبي.. يارب هون!
خلصنا وروحنا مرة تانى لغرفة الاشعة وبرضوا كنت معاها وبشوفها وهى بتتنقل من السرير ده لده ووجعها اللى باين فى عينيها وهي خلاص عاوزه تبكي وقفت آخر الاوضة وفضلت ابكي كان جسمى بس كان واقف وروحى خرجت منى وفضلت اقول ليه يارب سامحنى مش قادرة اتحمل وفى اللحظه دى الدكتور نادى عليا وممكن يكون لاحظ دموعي لاقيته بيقولى حطى ايدك على انف امك عشان نفسها ميخرجش وانا بدون اى رد فعل بمد ايدى لقيت الدكتور بيضحك بهيستريا وبيقولي لما انا انسان وطلبت منك كده ف انتِ عارفه ان الوجع اللى هتسببيه لامك ده هينفعها فى الاشعه فما بالك #بربنا لما يكلفنا بشويه وجع اكيد بيخفف عنا وبيشيل من علينا ذنوب وسيئات كتير..
استغربت اوى من كلام الدكتور واتكسفت جدا من ربنا انا من شويه بعترض وهو سبحانه بيسخر عبد من عباده يخفف عنى فرحت جدا وقتها وحمدت ربنا حسيت وقتها اد ايه ربنا قريب منى وسامعني وخرجنا من المستشفى وتانى يوم والدى جاب الاشعه والدكتور شافها وقال فعلا ان والدتى كان عندها حصوة والحصوه دى نزلت بسبب الحقنه اللي خدتها يعنى بسبب الألم البسيط اللى اتألمته لأنها لو عملت الاشعه على طول مكنتش الحصوة هتنزل وكانت هتحتاج عمليه ووجع أكبر الموقف ده عدى بس استفادت منه حاجه للحظه دى بتعلم منها لان كل ما احس انى فى محن او مشكله بقول ان ده تخفيف من ربنا لحاجة أكبر من كده ممكن تحصلى فالحمد لله القريب المجيب اللطيف 💜
🌸🌸🌸🌸🌸🌸🌸🌸🌸🌸🌸🌸🌸
كام واحد منا اتزنق جامد في موقف صعب وكان شايف اني مفيش مخرج ولجأ #للاستغفار ف ربنا نجاه من الموقف دا
اعتقد كتير بس احنا كالعادة بننسى
#قريب #مجيب #لطيف سبحانه ❤
#من_الرسايل
#حكاوي_هدير
#هدير_ابراهيم
