#قطايف_رمضان 6
#كتف_اتسند_عليه !!
القِصص كلها تقريباً الشهر دا برعاية اليقين في الدعاء هو سر الإستجابة💜
🌸🌸🌸🌸
عجبني جدا النظام اللي انتِ ماشيه بيه في رمضان وحبيت أوي حوار القطايف دا ف حبيت أشارك فيه بقِصتي البسيطة مع الدعاء..
أنا طبيبة وصلت لعمر 38 سنه بدون زواج.. كنت زي معظم البنات حاليا ما بيرددوا إن الجواز مش كل حاجة وفضلت مهتمة بدراستي واني ازود درجتي العلمية وبس،
بس لو هتكلم بصراحه ف أنا مفيش مره حطيت فيها راسي ع المخدة قبل النوم إلا واتمنيت من كل قلبي إن يكون ليا بيت وزوج وأطفال خاصة وان كل اللي حواليا بدأوا يتجوزوا ومنهم اخواتي الأكبر والأصغر وقرايبي اللي بيني وبينهم عُمر ومفيش حد وقف حياته عليا ودا حقهم طبعا..
بس اللي قهرني ووجع قلبي بجد اني قعدت حوالي 15 سنه مفيش حد دخل بيتي لدرجة إن الكل قال إن معمولي سحر وأعمال وخلافهم..
والدتي متوفيه ووالدي كبير في السن ف مفيش حد اهتم والكل تقريبا استسلم للأمر الواقع وهو اني مش هتجوز وكانوا بيقولولي ي هيجيلك مطلق وعنده عيال ي مش بيخلف ي تكوني زوجه تانيه...الخ واعتقد بنات كتير غيري بيسمعوا وسمعوا الاختيارات دي..
وبصراحه في مره من يأسي دعيت يارب ابعتلي أي واحد وخلاص بس رجعت تاني استغفرت ودعيت بإنه يبعتلي اللي يعوض سنين صبري ويجبر كل كسر في قلبي..
بس جيت في وقت بردو ويأست ف بطلت ادعي خالص واستسلمت واللي هو يعني اللي يحصل يحصل بقى..
وفي يوم كنت في المستشفى في الشيفت المسائي لقيت راجل كبير في السن داخل متسند ع زوجته اللي هي بردو قريبه م عمره..وقولت لنفسي دا هما الاتنين محتاجين اللي يسندهم
وبسرعه الاكتئاب اشتغل وفضلت اتخيل نفسي واقعه ع الارض في البيت لوحدي وهموت من غير م ايد تمسك ايدي ولا كتف اتسند عليه!.
رجعت مكتبي وعيطت وبعد شويه خرجت ع صوت هرج ومرج بره بشوف في ايه لقيت التمريض بيزعقوا لحد ولما قربت لقيت الراجل الكبير في السن واقف ي عيني لا حول ليه ولا قوه وربنا يعزك يارب كان عمل حمام ع نفسه..
وزوجته واقفه جانبه لا حول ليها ولا قوة هي كمان.. اتدخلت بسرعه وبهدلت التمريض كله ووقفت معاه بنفسي وكانت زوجته جايبه لبس احتياطي معاها ليه ع اساس لو اتحجز في المستشفى
اخدتهم معايا وحجزتلهم اوضه ودخلنا معاه انا وزوجته وظبطنا حاله وغيرناله
انا مش بقولك الموقف دا علشان ابين اني حد عطوف ومفيش زيي بالعكس والله انا استغربت نفسي وكل اللي في المستشفى استغربني اصلا لان دي مش عادتي اني بتدخل في شغل غيري ودايما واخده جانب من الكل..
المهم لقيت زوجته بتدعيلي وبتقولي تقعدلك في جوزك وعيالك يارب.
قولتلها بضحكه منكسره اني مش متجوزه
لقيتها شهقت وضربت بإديها ع صدرها وقالت ليه عميوا الجدعان ولا ايه؟!
انا ضحكت بصوت عالي من طريقتها وكلامها..ف لقيتها بتقولي دا يا هناه والله اللي تكوني من بخته ونصيبه
قولتلها بخت ونصيب مين بس يا حجه دا انا داخله ع الاربعين.. قالتلي ولو حتى داخله على التسعين ومكتوب في رزقك انك تتجوزي هتتجوزي..مفيش حد بيدخل قبره وناقص من رزقه حته..المهم بس اتوكلي ع اللي خلقك وادعي
قولتلها دعيت وعملت كل حاجه!
قالتلي ادعي بقلبك يا بنتي مش عقلك..قلبك بيتمنى بس عقلك متحكم فيه شيطان بيقنعك ان اللي قلبك بيتمناه مش هيحصل..
تصدقي بالله يا هدير اني قعدت فتره لحد م استوعبت كلامها وفهمته..
وسبحانك يا ربي دا كان في دخلة #رمضان
قعدت شهر رمضان كله ادعي بدعاء واحد بس طول الشهر في كل سجده وصبح وليل وطول م انا صاحيه واجاهد اني فعلا ادعي بقلبي زي م الحجه قالتلي وكان دعائي هو:
"اللهم يا ربنا و رب كل شئ بقدرتك على كل شيء يا ودود يا ودود،يا ذا العرش المجيد،يا مبدئ يا معيد، يا فعالا لما يريد،أسألك بنور وجهك الذي ملأ أركان عرشك،وأسألك بقدرتك التي قدرت بها على جميع خلقك و أسألك برحمتك التي وسعت كل شيء أن ترزقني الزوج الصالح..
ربي أَمَتُك قد ضاقت بها الأسباب وأغلقت دونها الأبواب وبعدت عن جادة الصواب وزاد بها الهم والغم والاكتئاب وانقضى عمرها ولم يفتح لها الى فسيح مناهل الصفو والقربات باب وانت المرجوّ سبحانك لكشف هذا المصاب يا من اذا دعي اجاب يا سريع الحساب يا رب الأرباب يا عظيم الجناب يا كريم يا وهّاب رب لا تحجب دعوتي ولا ترد مسألتي ولا تدعني بحسرتي ولا تكلني إلى حولي وقوّتي وارحم عجزي فقد ضاق صدري وتاه فكري وتحيّرت في امري وانت العالم سبحانك بسري وجهري المالك لنفعي وضري القادر على تفريج كربي وتيسير عسري"
واتحققت المعجزه واتفك نحسي بسحر الدعاء وقبل ما اخرج من رمضان كان اتقدملي دكتور لسه منقول عندنا في المستشفى مكملش اسبوعين عندنا واتقدملي وكأن ربنا ساقه ليا بدون حول ولا قوة مني.. وبفضل الله متجوزين دلوقتي وعندنا بنتين وولد رغم ان بعد زواجي كنت بقول يارب مش عارفه هل لو دعيت بالخلف هبقى طماعه ولا لا وافتكر كلام الحجه وادعي يارب لو دا رزقي اكيد هشوفه وبفضل الله شوفته فعلا ورزقني ولادي..
وجوزي وولادي ربنا بعتهم عوض ليا علشان يرمموا كل كسر في قلبي واصبح زوجي الكتف اللي بتسند وبرمي كل حمول قلبي عليه❤
بعت احكيلك لاكتر م سبب بصراحه منها اني اشارك معاكي قطايفك واني ادي لغيري الأمل واربط ع اديهم ويمكن ربنا بعت رسالتي دي لحد زي م بعتلي الحجه وزوجها
وكمان علشان بالله يا هدير تقولي لكل اللي عندك يدعوا للحجه وزوجها اللي بقوا بين ايدين ربنا واللي عرفته ان ربنا لم يرزقهم الخلف..ف لعله بعتهم ليها علشان ادعيلهم انا وابعتلك ف كتير يدعولهم واحنا في افضل شهور السنه عند الله..
وجزاكِ رب العباد ما تتمني واكتر يارب❤
🌸🌸🌸🌸🌸🌸🌸🌸🌸🌸🌸🌸🌸
القِصة في بداية ما قرأتها قولت اني نزلت شبيه ليها قبل كدا لحد م وصلت لكلام الحجه اللي قابلتها..
هي كان معاها حق وسبحانك ي ربي مكتوبلها هي كمان دعوات ناس كتير وهي حتى مبقتش في الدنيا وولا نعرفها ولا تعرفنا.. ربنا يرزقها الفردوس الأعلى من الجنة يارب هي وزوجها ويعوضهم عن أي حزن مروا بيه في الدنيا..
#رسايل_الرحمن اللي بتطمن قلوبنا ان ربنا قادر يسخر ناس لناس وان مفيش عمل خير بيضيع عند ربنا.. وان فعلا مفيش حد هيدخل قبره قبل ما ياخد رزقه كامل مكمل..احنا بس اللي صبرنا قليل وسخطنا اكبر..ف ربنا يعاملنا برحمته ويهدي قلوبنا ويرزقها الصبر وفهم حكمته من تأخير اللي قلوبنا بتتمناه💜
انا المرادي اعتبرت ان الاصحاب الحقيقين للقِصة هما الحجه وزوجها اللي تبارك الله رغم انه ربنا مرزقهومش الخلف في الدنيا إلا ان قلوبهم فضلت عمرانه بحب الله واليقين انه بيعوض وبيرزق في حاجات تانية والأهم العوض بتاع الآخره..
دعيت ربنا من قلبي انه يرزقني الكتف اللي اتسند عليه وان دا فعلا خير متاع الدنيا❤
#من_الرسايل
#حكاوي_هدير
#هدير_ابراهيم
