ها يشيعة هالله هالله بالوصيه
واليخالف هذا شيعي بالهويه
كلمن يخالف امامه .. مايحبني
انا حيدر واليحبني واجبه يعرف خصالي .. خله يقره
واليحب ايصير اول لايحسب ماكو تالي .. انا احذره
والي رايد ارضى عنه خل يجيني وراسه عالي .. بيهه عبره
كون يملي جفوف غيره يرد لاهله وجفه خالي .. عنده فقره
الما يوقر شيبه امه وامه حره .. كل مسيه هذا يطبر راسي طبره
والي ما يبدي احترامه .. مايحبني
_________
مذهبي هذا البنيته ابدمي وبضلع الزجيه .. كلشي عندي
تالي جم واحد يشوها ينحسب شيعي عليه .. هوه ضدي
اني ابرء من فعاله وما احضر بالمنيه .. هذا وعدي
وما اريده يكول شيعي وينحسب ع الرافضيه .. بالتعدي
والمنافق والمجامل مااريده .. والكضاها بالمعاصي من يفيده؟
والاكل حق اليتامه .. مايحبني
________
مذهبي انطيته الغوالي حتى تتثبت قيمكم .. في مماتي
لاجله ضحيت ابخيمنه حتى ماتوكع خيمكم .. امنياتي
وانسبت بنتي العقيله وغايتي استر حرمكم .. تضحياتي
وبرمح راسي ابني عفته حتى ماتنزل همكم .. ياجزاتي
وينه حقي ياغياره ابهذا فعلي .. والمصيبة اسمه شيعي ومايصلي
وادري باليكره صيامه .. مايحبني
________
اني حامي الجار اسمي مااحب الخان جاره .. ما احبه
والغني وجيرانه جايع لايجيني بالزياره .. هذا ذنبه
البلاد البي مظالم يعني بي ازمة غياره .. ادري صعبه
واليعيش ابلا قضيه هذا ع الأمة خساره .. وينه دربه ؟
واليخلصها اشعلينه وشبدينا .. لاينادي بالشدائد ياعلينا
والذي باع الكرامه .. مايحبني
________
الشرف ابيض يلالي لاتهينه ابنقطه سوده .. لاتفضحه
والبشر مهما يبالغ حتماً اتكشفه وعوده .. اي توضحه
شوف ابوفاضل اشسوه ابكربله وثبت وجوده .. آ يجرحه
دينه من احتاج دمه اتقدم ابنحره وزنوده .. بيهه ملحه
هوه ضامي بيده جوده وماتروه .. هذا درسك بالمواقف والاخوه
الما يسل للحق حسامه .. مايحبني
_______
كربله خليهه عبره والنصر مو بالسهوله .. إلا بالدم
كلمة الكلا ثكيله اتصير بحلوك الخجوله .. ترضه بالهم
لاتكول الطاغي طاغي انته وقعت ابقبوله .. يعني تأثم
غلطه الحاكم جبيره هذا ذنب الصفكوله .. تالي تندم
واني كلمن ينتمي لي ادري طبعه .. مايصافح ايد ظالم لوتكطعه
والسكت عن الظلامه .. مايحبني
________
كلمات ذرية الزهراء الشاعر السيد :- عبدالخالق المحنة
