ولفيتي بيا يادنيا

بدايه سخط

لايك قبل ما نقرا وكومنت قول فيه رايك ❤قراءة ممتعـةه..
#ولفيتي_بيا_يا_دنيا
الحلقةه :الاولى
بقلم :فاطمه سالم الورفلي

ممنوع اقتباس او اخد فكره الروايه 🚫
......
...........
في يوم من الايام بدت مسيرتنا في السخط والضياع...كنا شي وصرنا شي..تحولنا 180درجه ...وهدا بسبب الخلطةه...ويومياتنا قعدت تمشي ضروري بي البافرةه...وبافره الصبح وبافرةه الليل...ومواضيعنا لي نفدوه بيها بي الروج ..."لي هو حطلك نص حبـةه تحت لسانك واطلع تم موضوعك"...وكل ليلةه نفدو فيها بي تشنكيشةه مليحةه ...وضروري نقيموها شوي... بلمكرشم والـروج واكس تي سي "حبـةه الجمجمةه تسوى بي 150دينار "...والبودرةه الكيس " بي 3700"...وقلوب سير 200نوطو اكحل زي سواد الليل......وديما بوخـةه الحشيش والدخـان لين تصندل.. وتقطيع خلق الله...... وحلف الحانت.... والقمار...و النفـاق كان سيد المـواقف...ونهايتنا وبدايتنا في السخط لي بلاهم بيبنا ربي فاقت الإرهاصـات ولا على الخاطر ولا على البال.....
. . . . . .
...
اني برفعـةه حاجب:ها عرفي شن صار في لي ناوي تشنكشها.... احسبنا معاك ازف مكسـورةه لسقف

فهد :والله ياصديقي لتوا ماشدت الحق.... و وحدة وحدةه مايحشمك شي

اني : لعند امتى ياراجل... والله عندي سيارةه بنسلفرها وتبيلها باسطه وللد ومنظومةه ليزريـةه... وتبيلها سيريةه جديدةه... بندلعوها شويه الكبيدةه

فهد :باهي يا وخي اصبر عليا شوي.... حتى اني عندي ما ندير... عندي البلجيكي لي واخده لعند توا ماخلصتاش

اني :باهي لما توزق دورني..سلام

"وصكرت الخط "
....
وطووول مداهمة لداري..وتخش امي

امي :هي سلم وليدي هي وصلني

اني:تي وين يما...خلي ننخمد شوي على اقل

امي :تحشم على وجهك ياولد... وصلني وراوح تمرقد.. هوينا خليتلك عشاك باش تروح تتعشى... ره مرات نبات

اني :اخخخ به باه ... "خديت التليفون ومفاتيح السيارة وقلت "... هي يما نراجي فيك لوطا وتي روحك ما بين سخنت السياره

امي خدت الفرشيه ولبستها :ماعندي ما نلبس هي هي سقدلي روحك بس يا محسن ايواه ... وراك تنسى مفتاح الحوش حتى انت زي بوك الله يرحمه كان زمان ينسى فيه ويجيني في حوش هلي في خيال الليل يطقطق لين نقول " يا ساتر غر ان شاء الله مش وفاة ".. ومخمل فيا ويرعشني كل ما نبات في حوش هلي لين كرهني في البيتان

اني بضحكه :مرات نديرهلك حتى اني 😂😂

امي بشهقه وهي تصكر في باب الحوش:فكني يا ولد من رعايش راني فيا السكر سادني عاد ما تجيبلي حتى الضغط

اني :بعيد سو عليك يا غاليه

امي بعصبـيةه :غر هيا بس سقد روحك.. وهاك مفتاح الحوش راك تنساه قلنا

اني:حاضر حاضر

....
وركبنا السـيارةه واستنيت شوي تسخن.. ومشينا

امي بصوت عالي:بالشوي ياهم الاحرف وووه بشوي ياولد بشوي

اني نضرب على ستيرسو:تي يما درتي العار اسكتي الناس يشبحو فينا

امي :منك يا متروشق... خفف السرعـةه  ره خيرلك ره ياولد ونقص الصوت مسجل لي قالب دنيا

اني:تي باه به تقول ماشي لي جنازه

امي دفتني :وووه تحرك من مكانك

اني نلاطع بيديا :يمااا تي لصقتيني في الباب انتي ازف

امي :وووه شد الدومان ياولد كلب شد

اني :بااااه

وما وصلت امي الا بعد طلوع الروح وشرطت عليا ننزل عاد واللهم طولك ياروح 🌚.. نزلت من السيارة وخشينا حوش جدي وسلمت وعاد امي المسموعة مدفوعه وقالت كل شي صار في السيارةه لين وجهي تقشر.. وبدينا عاد في الهزايب

حناي ضربتني بالعكوز :هك ادير هك يا محسن عفنه رايح كيف هزقول

جدي بعصبيه:حولي عن ولد يا مرا

حناي :هدا انت ودلعك لين يبدا كيف عجينه تحت ايدين ايي حد

وشوي وتخش  تبكي وتجري بنت خالي...طرف اغبر على رغم صغر سنها... الا انها طرف اغبر تي صااارووخ ... " وحتى هي سلمتش مني ولا من شري"
...

بيان تبكي لين وجهها احمر :ج جديي

جدي رفع ايديه :غر تعالي تعالي... خيرك شن في من كلمك 

بيان جت في حضن جدي:ب بابااا يبيش يخليني نمشي لي لرحله

جدي يمسح على شعرها :به خلاص معاش تبكي.. خلاص تو نقوله يخليك

وشوي وخش خالي يسلم..

خالي :السلام عليكم.. كيف حالك يا للاهم

امي "للاهم ":باهي حمدالله وانت كيف حالك وكيف حال صغيويره

خالي قعمز :باهي في نعمه .... اهلا محسن شن الامور يا خال

اني :ماشيه يا خالي

خالي :باهي به... تخرج من جامعه وجيب الزرده ها

جدي بعصبيةه :تي خلك من محسن وكلمني هنا

خالي مستغرب:نعم يا بوي!

جدي اشر على بيان لي في غمره تبكي وتشهق:مش عيب عليك كاسر بي خاطر البنت؟

خالي بضحكه :اهااا على الرحله... تي مافيش داعي مشي على فاضي واصلا رافعينهم للوادي... وكان تريح بعدين؟

جدي :اياااه توا مش ح تريح الا بيان من دون الصغار!... قعمز واركح وخلي البنت تمشي زيها زي الصغار

خالي تنهد :ان شاء الله به باه

حناي بنبرة حنينه :يا وليدي.. كل شي مكتوب ما تخافش على البنت واجد... صح بنت وحده وما حصلتها الا بعد خليني ونخليك... لكن هدا مش في صالحك ولا صالحها لي ادير فيه خليها تمشي زيها زي الصغار

خالي فرك راسه بحزن :خايف عليها حتى من دغه الشوكه يما خااايف

جدي يمسح على راس بيان :ربي في الوجود.. وان شاء الله تفرح بيها

اني:..... يتبع

.....
زعما شن ح يدير محسن في بيان!!... وشن ح يصير... انتظروني ولو لقيت تفاعل قوي ح نزل حلقه تانيه في الليل ❤