Aku Tomboy & Dia Sutung (Completed)

Part 2

Aku Tomboy & Dia Sutung

BY : TESCY DESCY

Base On True Story

Part 2

Sebelum sia ni pigi kunun sambung study sana Semanangjung. Sia mau ba’jalan dulu di KK. sejak sia sambung tingkatan 6 kan, sia kurang sudah kawan tau. Semua kawan-kawan 1 team sia main bola dulu, durang tidak sambung masuk tingkatan 6.

Habis saja SPM, durang ikut haluan masing-masing. Emmm.. Sia terpaksa lah cari kawan baru. Tapi sia ni jenis yang suka sendiri-sendiri juga bah ni. Sia tidak suka pigi ba’campur sama perempuan yang kaki minta puji sama suka butul bo’gosip.

Biasa lah, masa zaman-zaman surang sekolah pun. Ramai sumandak yang macam tu gaya diva-diva. Mau kana minta perhatian lah bah tu. Lapas tu bo’gosip saja karaja dalam kelas. Lapas tu, pandai mau ba’gaduh pasal lelaki saja.

Sebab tu lah sia tidak suka campur-campur yang macam ni punya team. Sanggup sia sendiri-sendiri dari mau join ni team minta puji.

Jadi, sepanjang sia sambung STPM, sia tiada kawan yang paling sia rapat. Sia tiada kawan mau bawa lepak-lepak. Sia duduk pun, sendiri-sendiri sana bahagian balakang. Sia kawan juga sama kawan 1 kelas sia, tapi kawan macam tu macam tu saja.

Habis saja exam STPM sia tu, sia duduk di rumah. Sia kasi jadi bosou pantat sia di rumah. Kalau sia bosan, sia jalan lah tu. Tapi tidak best sia rasa mau jalan sendiri-sendiri bah.

“Nad, kau mau ikut kah pigi rumah durang anty?” Mami sia tanya sia. Sia baring-baring di sofa sambil tingu tv.

“Tidak lah. Malas sia mau pigi sana tu.”

“Kanapa juga?”

“Tiada, malas sia mau pigi. Kamu pigi saja lah.”

“Surang lambat balik ni.”

“Emmm… Okey saja bah.”

“Bah, kau pandai-pandai saja lah cari makan.”

“Okey. Mom, sia mau jalan pigi KK bah. Buli kah.”

“Siapa kawan kau?”

“1 urang lah bah.”

“Bukan kau lambat-lambat mau pulang.”

“Ya bah.”

Mami sia jeling saja sama sia 😂. Malas mami sia mau cakap sama sia kadang-kadang bah ni. Pasal kan, asal dia cakap, sia kasi masuk telinga kiri, sia kasi keluar telinga kanan🤣.

Memandangkan sia ada lampu hijau mau jalan pigi KK, sia pigi lah be’siap. Sikijap saja sia mau be’siap. Siap saja sia, sia jalan kaki saja pigi simpang.

Emmm.. Ada kurita juga bah di rumah. Tapi kan, sia tidak kana suruh pakai. Pasal bukan kurita sia sendiri. Kereta durang abang-abang sia bah semua. Durang mami sia bulum lagi mau kasi beli sia kereta. Tunggu sia butul-butul habis study dulu, baru sia dapat kurita kunun.

Bah, jadi kalau sia mau jalan pigi mana-mana. Sia naik bas saja. Sia okey saja bah. Sia suka lagi jalan naik bas. Cuma tu saja lah, kalau pigi tingu wayang yang tangah malam punya tu, susah lah. Pasal tiada sudah bas kan.

Sia tidak kana suruh pigi pakai-pakai kereta durang abang sia, pasal sia perna kasi masuk parit kereta mami sia sama dady sia bah😂😂. Dari sana, durang abang-abang sia bagi amaran sama sia, durang tidak suruh sia pandai-pandai kasi jalan tu kereta.

*** Okey sia kasi skip ***

Sia sampai saja di KK. Sana sia terminal Wawasan Plaza turun. Dulu sana bah terminal bas. Jadi, lapas sia sudah turun dari bas, sia terus jalan mau pigi masuk tu Wawasan Plaza.