Aku Tomboy & Dia Sutung (Completed)

Part 4

Aku Tomboy & Dia Sutung

BY : TESCY DESCY

Base On True Story

Part 4

Masuk saja si Tescy offday. Sia turun pigi KK. Sia bawa si Tescy jalan pigi Wisma Merdaka sama di KK Plaza. Si Tescy tulung juga bah sia pilih baju yang nampak macam sumandak pakai. Paham juga si Tescy, yang sia tidak mau yang ta'lampau punya sitail.

Lagi pun, si Tescy sendiri pun tidak pakai gaun-gaun kan, jadi dia tau lah bah mau pilih baju yang ngam sama cita rasa sia. Kalau si Tescy ni mau tulung sia kan, dia tidak main-main ni, serious saja muka dia mau pilih-pilih yang terbaik untuk sia🤭.

“Babe, kiut ni baju kan.”

Si Tescy kasi tingu sia tu baju. Baju kodok kana panggil. Yang baju sama seluar 1 set tu. Ada tangkai buli buka2 tu. Tapi, mau pakai baju lapis dulu baru buli kasi pasang tu baju yang si Tescy kasi tingu sia. Kalau kana pakai, sampai paha panjang tu kaki seluar.

“Eeee.. Tidak mau tu.” - Soriwit lagi sia.

“Tiada alasan. Sia nampak kiut ni. Kau pigi dulu cuba.” - Aikk.. Sia yang mau pakai kama. Dia pula marah sia, kalau sia tidak mau.

“Eee… Sia tidak mau macam tu.”

“Kanapa kunun? Bagi sia 10 sebab.” - Odoiiii.. Si kitut lah bah kan😑.

“Sebab pindik bah. Sia tidak mau.”

“9 sebab lagi.” - Macam ni sia tingu si kitut 😑. Tidak jalan bah utak sia mau pikir sebab-sebab untuk bagi si kitut.

“Titt.. Titik. Tiada alasan aarr. Kalau sia bilang ni kiut. Kiut lah tu. Pigi kau cuba dulu.” - Silaka ni kitut. Barabis lagi dia tulak sia, mau suruh pigi cuba tu baju.

“Babe, cari yang panjang sikit lagi bah.” - Sia pujuk kunun si kitut.

“Tiada alasan!”

Si kitut tulak saja sia mau suruh pigi cuba tu baju. Mau tidak mau, sia cuba juga. Sudah sia pakai tu baju. Aduiii.. bah. Butul, kiut tu baju😂. Tapi sia malu bah mau pakai kalau macam tu pindik 🤭. Sia bukan perna pakai seluar malakat, lapas tu pindik lagi. Nampak lagi paha sia.

Tok.. Tok.. Tok..

“Murai, siap sudah kau.” - Kitai ni anak. Tidak dia sabar mau tingu keseksian beta😂🤣.

“Jap bah.”

“Punya lama kau. Buka seluar kau saja bah tu. Bukan sia suruh kau talanjang baru mau pakai tu baju.”

Ayaaaa.. Ni manusia aarr… nasib sia sayang ni kitut, kalau tidak, sia ikat lah bah dia ni lama-lama. Macam mama-mama bah mulut si kitut. Emmm.. Yang kanal dia saja ni tau, macam mana mulut si kitut kadang-kadang😂. Ada masa dia macam mama-mama, ada masa pandai sot🤣🤣. Anu bah, sot yang suka kasi hibur urang.

“Ishh.. Kijap bah. Tidak juga sia talanjang ni gila! Sabar!”

“Sapat lah. Sia cabut lama-lama ni pintu ni.” - 😂😂datang gila si kitut oh. Katawa sia di dalam fitting room.

“Jap.. Jap..”

Sia buka saja tu pintu. Paluk tubuh tu kitut dapan fitting room. Sia kasi keluar separu saja kapala sia. Sikit sia kimik kana impit tu pintu😑. Si kitut tulak saja tu pintu bah. Baru si kitut tarik tangan sia mau suruh keluar.

“Punya seksi kau macam ni babe. Lawa babe. Ngam sama badan kau yang panjang bikin juluk jambu air mami sia.”

🤣🤣🤣 Ada-ada saja mulut si kitut ni. Kalau bukan panggil sia mulut murai. Dia panggil sia bikin juluk jambu air lah. Trip lelaki lah. Mulut longkang lah. Macam-macam dia panggil sia ni, tapi sia okey saja kalau sama si kitut.