Aku Tomboy & Dia Sutung (Completed)

Part 8

Aku Tomboy & Dia Sutung
BY : TESCY DESCY
Base On True Story

Part 8

Heran sia tingu si kitut senyum-senyum tingu hp sia. Macam si kitut sibuk bersms. Tapi, si kitut pakai hp sia. Sia tingu jam. Astagaaa… jam 11 sudah pula🤣. Sia tingu lagi si kitut.

“Apa kau buat sama hp sia?” - Si tanya si kitut.

Si kitut senyum-senyum saja tingu sia. Suriga sia sama gaya si kitut ohh.. Si kitut pusing membalakang dari sia. Sia pigi cubuk apa si kitut buat. Astagaaa!! Si kitut sibuk sms sama urang.

“Itut, siapa kau sms tu? Napa kau pakai hp sia?”

“Diam-diam kau. Bau napas kau Babe. Bau napas sapi. Bagus kau pigi burus gigi.”

Kurang ajar punya kawan 😤. Buli-buli dia cakap napas sia bau napas sapi 😑. Perna kali si kitut ni pigi hidu-hidu mulut sapi baru bangun kan. Napa dia buli tahu bau napas sapi.

“Itut! Sama siapa kau sms tu!” - Sia mahu rabut hp sia.

“Ishhh.. Bau munyit ohh kau babe!! Sana kau!! Pigi kau mandi! Bau oh kau!” - 😣😩😭 kanapa sia ada kawan macam ni aar??

“Tiada pun bau ni!” - Sia pigi hidu-hidu baju sia.

“Hidung kau panuh dungot. Tu lah kau tidak te’hidu. Pigi kau burus gigi dulu bah. Ishhh.. Pingsan ohh karabau te’hidu napas kau.”

“Sendiri pun bulum burus gigi. Kali gigi kau yang bau sapi!”

“Alu.. Kau buka dulu mata kau tu Babe. Baju sia warna apa?”

Sia tingu baju si kitut. Aikkk.. Lain baju si kitut yang sa’malam punya. Sia tingu rambut si kitut, macam ada lembab-lembab lagi. Si kitut kasi embun napas dia pigi muka sia. Silaka!!!! Bau Nescafe!!!

“Itut!!!! Pigi kau burus gigi!!! Bau Nescafe gigi kau!!” - Sia barabis lagi tulak si kitut mahu kasi jatuh dari katil. Barabis si kitut katawa.

“Hahahahahaha… mimang lah bah mulut sia bau Nescafe. Pasal sia ada minum Nescafe tadi. Urang awal lagi bangun dari dia. Dia yang macam urang mati. Tidak ingat mahu bangun.”

Barabis sia kana kasi katawa si kitut. Okey, sia akun kala sama ni budak kitut. Sia malu sama dia. Maka-maka, sa’malam kami sama-sama juga lambat tidur kan. Tapi, awal pula si kitut bangun dari sia. Sia tidak tahu, jam barapa si kitut bangun.

Sia turun dari katil, sia terus tarik tuala mahu pigi mandi. Siap sia mandi, sia masuk dalam bilik. Sia tingu si kitut katawa-katawa sambil guling-guling di tilam. Sia mahu tahu, sama siapa juga si kitut sms.

‘Aikk.. Takan sama si abang?’ - Sia cakap dalam hati saja.

Bahh.. Dalam hp sia, mana ada numbur lelaki luar. Selain numbur abang-abang sia sama dady sia saja. Terus, sia senyum-senyum saja bila ingat abang bungsu sia.

‘Emm.. Biar lah si kitut kuntik si abang.’ - Sia bilang dalam hati.

Bah, abang sia ikut durang mami sia gia pulang kampung. Ada urang susah (meninggal) bah di kampung. Tu lah durang mami sia pulang kampung dady sia.

Sia kasi biar si kitut pakai hp sia mahu sms, pasal banyak juga keradit sia bah. Sia paham juga hp si kitut, jarang dia dapat relod hp dia tu. Pasal, dia kasi utama dulu tu kara dia gia.

Siap sia pakai baju. Sia bawa si kitut keluar bilik. Si kitut ikut juga. Anduii bah, mimang awal si kitut bangun. Ada sudah sarapan si kitut masak. Nasi guring sama Nescafe si kitut kasi sedia di mija makan.

Sia makan 1 urang. Si kitut sudah makan duluan. Kejam ni kawan. Dia tidak kasi bangun sia bah. Sia tingu saja si kitut katawa-katawa sms. Sia pun ikut senyum-senyum bila nampak si kitut katawa.