Aku Tomboy & Dia Sutung (Completed)

Part 6

Aku Tomboy & Dia Sutung

BY : TESCY DESCY

Base On True Story

Part 6

Sia balik saja pigi Semanangjung. Sia mulai balik kehidupan di Hostel. Ni kali, si Nani dulu sampai Hostel. Masa sia sampai di Hostel, sia masuk saja dalam tu bilik kan, terus sia rasa macam panas ni, macam sia kana bakar.

Sia tingu si Nani kan, macam be’sinar muka dia. Macam lawa butul si Nani sia tingu masa tu. Si Nani senyum saja tingu sia. Sia macam mahu paluk si Nani bah. Sia jalan capat-capat pigi dakat si Nani. Tiba-tiba sia rasa macam sia sayang butul si Nani, macam sia rindu dia ni.

Sia pigi paluk si Nani. Sia paluk kuat-kuat si Nani. Sampai sia nangis ni. Macam gaya urang gila saja kalau sia ingat balik oh. Sia macam jatuh cinta ni sama si Nani. Si Nani puai-puai kapala sia.

Dari sia balik pigi Hostel tu, sia macam berubah. Sia bukan macam dulu. Sia pandai takut kana tinggal si Nani ni. Masa kulia, sia macam mahu nangis ni kalau tidak jumpa si Nani. Masa di bilik, sia ba’kapit saja sama si Nani.

Sia sama si Nani tidur 1 katil sudah. Masa tidur kan, sia tidak dapat tidur kalau si Nani tidak paluk sia. Aduii.. Macam urang be’cinta lah kami kana nampak bah. Sampai si Bella sama si Annell tingu sia kan, macam yang ada tidak kana ni.

Lain gaya sia dari mula-mula sia masuk tu Hostel, sampai lah sia balik dari Sabah. Sia ni jenis Tomboy yang kasar bah. Jadi, masa tu sia tiba-tiba jadi orang yang paling manja. Sia manja butul sama si Nani. Capat sia manangis kalau sia tidak jumpa si Nani. Maka sebelum tu, mana sia pandai macam tu.

Si Bella mahu bawa sia jalan sama-sama pigi kelas, si Nani tidak mahu. Sia pun tidak mahu jalan sama orang lain. Sia mahu juga kana hantar sama si Nani bah.

Siapa saja dakat sama sia. Sia pandai rasa panas. Sia rasa rimas. Tidak kira, lelaki atau perempuan. Paling sia banci, si Bella. Sampai sia pindah tampat duduk bah. 1 urang sudah sia duduk di bahagian balakang.

Sia dalam sedar juga masa tu. Tapi sia tidak tahu, kanapa gaya sia buli jadi macam tu. Aduii.. Macam sia lupa sudah yang sia sama si Nani tu sama-sama perempuan bah. Macam butul gaya lelaki si Nani sayang sia bah.

Durang si Bella sama si Annell perasan perubahan sia. Butul-butul jauh beza sudah gaya sia dulu. Capat sia nangis sama marajuk, kalau sia kana tinggal si Nani. Sia macam tidak pandai duduk diam, kalau si Nani balik pigi bilik terus sia rasa macam bahagia butul. Bah, masa kelas kami gia tidak sama gia.

Masuk malam jumaat, si Nani bawa sia diam-diam keluar pigi sana tandas di tingkat atas punya. Sia ikut saja macam karabau kana tarik hidung bah. Sia tidak banyak cakap, sia ikut lagi.

Sampai di tandas, si nanti kunci tu pintu utama. Sia bediri saja tingu si Nani. Si Nani bawa sia pigi sana tandas di hujung. Tu tandas kan, yang buli duduk punya bah. Si Nani kasi duduk sia, baru si Nani kunci tu pintu.

“Sorry baby. Sekejap saja k. Sorry k. Sikit saja saya mahu ambil darah baby.” - Bilang si Nani. Emmm.. Dia panggil sia baby kama😪.

Sia diam-diam saja. Si Nani ambil pisau cukur dari poket dia. Si Nani bungkus pakai kain kici tu pisau. Baru si Nani ambil tangan sia. Si Nani pigi hiris tu pisau cukur di tapak tangan sia.

Sia tingu saja tu darah keluar. Sia tidak rasa sakit. Terus si Nani pigi bediri di sudut dakat pintu. Sia rasa tangan sia macam ada pigi isap tu luka. Sia tidak nampak apa-apa. Sia dapat rasa macam segala tenang sia macam kana tarik.

Sia tingu si Nani, si Nani senyum saja tingu sia. Sia rasa macam mahu pingsan. Macam mahu sajuk badan sia. Lama-lama sia dapat rasa, macam ada pigi genggam pergelangan tangan sia. Macam tu tangan barabis takan tangan sia, macam yang mahu kasi keluar tu darah.