بالجد قفلت معاي من كل الجهات وخلاص تاني المواجع فتحت بابها،،،يعني انا م عارفه حياتي د.ح تستمر بالطريقه د لمتين؟؟،،لمتين المصائب د تجري وراي كدا؟؟،،حتى بعد م مشيت منهم وخليت ليهم اي شي لسه لاحقني؟؟،،بالجد كان نفسي اقول للدنيا د وقفي خلااص انا تعبتا،،م تديني دروس تاني والله والله انا اتعلمتا بما فيه الكفايه💔
اتحركنا بالعربيه والجو مكهرب بينا شدديد،،وصلنا البيت ونزلنا الحاجات،،،خالتو اشراقه استقبلتنا من الباب وقالت لينا اهلا اهلا واخير نورتو😂💜،،،انا حتى ابتسامه مجامله بس م كنت قادره اديها ليها،،هي لاحظت لاننا م طبيعين فما حاولت تسألنا،،بس انجم واحمد دخلو لي الحاجات ف غرفتي وأنجم رتبتها لي وقالت لي يلا ارقدي ارتاحي وطلعت،،،بقيت راقده ،،،حرفيا انا تعبتا من حياتي د،،تعبتا والله،،م فيني حيل استحمل كل د،،م فيني حيل استحمل الصدمات والاندفاعات والكسور البتجيني دي،،م قادره انا💔،،انا مرهقه شديد نفسيا وجسديا،،تعبانه وعايزه انوم بس،،وف نفس الوقت انا من الألم الجواي م قادره انوم،،،متين حياتي د ح تتصلح؟؟،،انا ح اموووت والله لو استمرت بالطريقه د💔،،،خلاص ي ربي والله انا م فيني حيل لاي شي تاني😭،،خليني افرح واحب الحياة د ولو شوية بس💔،،،بقيت بتكلم مع نفسي وببكي لحد م نمتا💔
صحيت بصوت اذان المغرب،،قمتا غسلتا وشي واتوضيت صليت وبعدها لبستا توبي وطلعتا،،لقيتهم قاعدين وبحضرو ف التلفزيون،،كانت شغاله كوره،،خالتو اشراقه قالت لي تعالي اقعدي،،جيت وقعدتا جمبها،،وانا بعاين لي احمد،،بالجد م عارفه اقول ليهو شنو،،وهوو ليه متنرفز فيني؟،،انا م عملتا شي ،،،بقيت سرحانه فيهو،،بالجد فينا شبه مبالغ فيه،،،عيونا زي بعض واسعه،،ورموشنا وحواجبنا غزيرة وحتى نفس الانف العمودي،،ونفس اللون القمحي💜،،،لمن هو انتبه لي بعاين ليهو ،،رفع لي حاجبو وقال لي بتعايني لي مالك🤨،،طبعا م عرفتا اقول ليهو شنو🙂،،طوالي قبلتا وشي منو،،خالد قال ليهو يمكن معجبه،،خليك ظريف ياخ،،م تتعامل مع معجبيك كدا😂😂،،انجم قالت ليهو هو انت لاقي أنها تعاين ليك ي احمد😒
((اسأليني تاني عليك الله ي أنجم))
احمد عاين ليهم بطرف عينو وتابع كورتو،،،((م بتهضم نهائي🙂،،ديل عايشين معاهو كيف)) خالتو اشراقه بقت تضحك بس،،قالت لي م تزعلي ي تسنيم،،اااا معليش قصدي ناهد،،احمد د ظريف والله م كدا،،لكن عشان م متعود عليك ،،مع الايام بتعود عليك وح تحبيهو شديد،،،وهو زاتوو ح يحبك،،احمد قال ليها م اظن...،،طبعا اتجاوزتا رد احمد وقلتا لي خالتو اشراقه،،ناديني تسنيم تاني خلاص،،لانو شايفاكم كلكم اتعودتو على الاسم د،،ف خلاص م مشكلة. نادوني بيهو مدام هو اسمي الحقيقي😂،،قالو لي تمام💜💜💜،،،ف اللحظه د الحكم قال قووووووون،،احمد د طار فووووووق وبقى بصفرر وبصفق وبضحك بطريقه عجيبه،،،زي مصاصين الدماء لمن يلقو ليهم فريسه😂،،مسك خالد من رقبتو وقال ليهو قوووووون ي معلم قوووون💃💃💃،،انجم قالت ليهو والله دي صدفه ساي ،،م كان مفروض تتحسب،،قال ليها اسكتي ي حاااقده😆😆😆،،خالد قال ليهو اي د حاقده ساي خليها ،،م عايزانا نجيب قون،،،طبعا المبارة كانت بين ريال وبرشلونه،،واحمد وخالد مشجعين ريال،،وانجم برشلونه،،قلتا ليهم لو م سواريز باسا ((pas)) لي مدريتش بالغلط م كان جات قون،،ف بإعبتارو صدفه م قون عدييل🤣،،،أحمد قال لي ف زول قال ليهو يباسي غلط،،ي زولة قووون وياها مكتوبه فووق،،كلامكم م بغير شي😂😂😂،،قلتا ليهو لو ما 1:0 ،،،اسي بنعدلا ليكم شنو يعني🤣🤣🤣،،خالد.قال لي مشجعه برشلونه،،ياهو الاتسمبكتي🤣🤣🤣،،احمد قال ليهو وريها عليك ،،،وزاتو كوره شنو الأنتي بتشجعيها د،،،البنات ديل بتحشرو ف تخصص م تخصصهم،،،امشو شوفو فلة وباربي وسندريلا بي وين
