المرأة الحديدية ❤️

البارت الأول

احس نفسي تورطت بموضوع القصة
بس جان لازم ابطل توتري ناحية الكتاب
لذلك قررت اكتب قصص بس منو ممكن
يثق بيه ويحجيلي حياته القصة الأولى جانت
عني ومجرد شي سطحي ولازم مو اي قصة
اكتب لازم شي بي هدف يفيد القارئ

اتذكرت اييييييي ماكو غيرها حراسلها

اجيتي أبالي

مـريـم : شلون 🥺

اترددت بالأول افاتحها كبل بالموضوع
كلت ممكن ترفض
مـريـم جمعتني بيها الحياة من سنين
شفتها اول مره بنيه عصبيه تنفعل طفوليه
عفويه رغم ما مبين عليها هالشي وبعدها
ابتعدنه لان بينه محافظات اتذكر آخر مره
شفتها بيها من رحنه لحفل تخرجها
جانت وحده ثانيه الجذبني الها تفكيرها
وصارت ما تهتم لشي تحولت لبنيه ناضجه
تحس بالمسؤولية تجاه أهلها ومعتمده على
نفسها بكلشي حتى اسم القصة اني اختاريته
على ضوء شخصيتها، كلت احجيلها عن
موضوع القصص وادزلها قصتي تقراها
وإذا عجبها الفكرة افاتحها بالموضوع

أكول شفتي آخر منشور الي

مـريـم : لا والله حسابي تهكر وكله الأخبار كورونا
كلت أضل بدون فيس هالفترة احسن

- تمام اني اسويلج حساب عود

مـريـم : ما كلتي شناشره آخر شي

-حكتب قصص بس قصيرة وبيها
أهداف ونصائح هاي اول قصه الي وعن
نفسي هذا الهدف منها و دزيتلها القصه
شفت اعجابها بالفكرة وهالشي شجعني
احاجيها و بدون تردد حجيتها

اريد اكتب قصتج بعنوان المرأة الحديديه
لأن شفتج انسانه قويه، بصراحه اختياري
لمريم مجان من عدم، مريم عبرت كومه
مطبات وتجاوزت أشخاص وأشياء
وماكو شي يأثر بيها رغم قوتها طيبه
وحنيه عدها بس ما تبين هالشيء
وكلش ايجابيه بالحياة وحسيت
قصتها ممكن تفيد كومه بنات هي
مثال للشخصية المتزنه بالنسبه
إلي حتى اني ماوصلت الاتزان إلي هي بي
طبعا ما حجيت الها كل الاسباب الي
خلتني اكتب عنها اكتفيت
بـ اكو نقطة تحول بحياتج وتغيرتي
وانسانه ايجابيه

مـريـم : إذا حبيتي ح كون سعيدة اكيد
ومشوقة اقرأها بكيفج شوكت تبدين
وشنو المطلوب مني احجي

اكثر شي زاد حماسي تقبلها للموضوع
رغم نوعا ما جنت متوقعه هالشي
شرحتلها الوضع وتجاوبت وياي و
بدت تحجيلي..

مـريـم
حياتي جانت خالية من اي شيء يخص
العاطفة جنت مركزة بدراستي
فترة طفولتي جنت مرحة واحب الشارع
ونوعا ما مغرورة حسب مايكولون
مجنت متخيلة حياتي ح تصير هيج ولا
جنت متخيلة اصير مهندسة من جنت
بالابتدائية جانت عندي صديقة وهي اول
صديقاتي اسمها رنا جنت اموت عليها
ومتعلقه بيها لدرجة احسها روحي
جان المفترض الحياة تمشي بسلاسه
وياي بس ماكو حياة كاملة لو مثل
مانريد فجأة صارت مشاكل بيت جدي
وقررنا نترك البيت ونعيش وحدنا
لذلك أنقلت من المدرسة عشت فترة
وحدة وانو ماعندي صديقات وجنت مو
هلكد شاطرة صح اقرأ بس حتى انجح
جنت أعاني من الرياضيات وفعلا دمرني
بمرحلة وصار عندي عقدة منه
حاولت اتأقلم ويه الوضع كونت صداقات
بس ما استمرت فترة وتنتهي لو انقل
لغير مدرسة لو يفضلن وحدة عليه
بس جنت محبوبة من المدرسات
اول اعجاب الي مدري حب
جان ابن جيرانه بغداد رغم جنت مو
عاطفية وطفلة العب بالشارع بس جان
صديق اخوية وجنت هوايه اشوفه 
دا اذكر واضحك اسمه علي اسمراني
جان يعيب عليه ومرات يحشش لو من
نصعد للسطح اشوفه ومرة قرالي
قصيدة المعماري الصغير جنت متخيلة
هذا راح يصير حبيبي ومن اكبر اتزوجه
بس علي شال هو وعائلته بيومها
انقهرت وبجيت ويمكن هو السبب الي
خلاني ما اتورط بعلاقة ابد اذكر من بديت
اكبر  علـي ماموجود انقطع التواصل
وصلت سادس ابتدائي امتحانات وزاريه
هنا صار عدي مثل الأمل التقيت بـ رنا
صدفة  جانت مدرستنا  ومدرستها
رجعت طفولتي وذكرياتنه سوه وكلشي
تصرفي عبالك وحده حتشوف حبيبها مو
صديقه جنت كلش متشوقه اشوفها
و مشتاقه الها مرتبكه حيل و اسأل
البنات عنها بس من شافتني هنا جانت
الصدمه مجانت اكو ردة فعل
مجرد انتي مريم علاء؟

رغم حجتلي طفولتها و شي بسيط
بس صرت اعرف شلون شخص يبطل
يتعلق بشخص، الأول علي الاقل تأثير
من رنا على اعتبار اطفال والصار مو بيده
و لحد هاليوم ممكن مجان متصور مريم
حبته بطفولتها، اتوقعت حتحجي عن رنا
ردة فعلها بس ما ضافت شي جديد، بيومها اتعمقت أكثر بشخصية مريم، مرات واحد
من الصدمة صعب يرد بس بعد كل هالايام والسنين العدت ما شفت مريم تعلقت بوحده
ابد اتوقع هذا جان ردها على الثقة والمبالغة
بحب الأشياء صح صار كومه صديقات عدها اتعرفت عليهم بحفل تخرجها بس شي على
شي ما وصلت لمرحلة التعلق و الهوس حتى
احلام ورديه اتوقع آخر حلم جان علي وراح
أصعب شي من يكون هالتعلق والهوس بهيج
عمر حيكبر الواحد عشر سنين لكدام
...... يتبع ⬅️