مرامي (مكتملة)

٢

مرامي💕 ٢💕

💕بقلمي/هيام أديب💕

ختيت يدي علي ظهرها و بحاول اهديها :يا بت ما تخافي شديد انتِ عارفة الشبكة عاملة كيف 😹
ما حركت عيونها من التلفون و لا التفتت لي..كأني ما قلت شيء..
فجأة جاها اتصال تاني لكن من شاهين...قلبت عيونها قبل ما ترد عليه بزهج..
-ايوا نعم ؟
-شاهين:كيفك يا مرمر..عايني ابوك قال لي اجي اسوقك لبيتنا..
-بخلعة :لشنو ؟؟
-...ما تقاطعيني!! هو مرق و قال ليك تقعدي مع اختي لحد ما يجي...
-ما دايرة انا قاعدة مع ريهام
-ما علي كيفك و اصلا انا قربت 🙃يلا اجهزي بلا ما دايرة..
اتأفأفت منو و قفلت التلفون و عاينت لي :العبيط دا جاي !.
-يعني ح تمشي 😥
-معليش..لكن انتِ عارفة ابوي ما بخليني اقعد برا البيت لمن يكون ماف... لسه شايفني شافعة.😹
-اي عارفة لكن تجيني تاني
-انا جيتك دورك 😹.
______________________________
بعد مدة جا شاهين و مشت مرام...حاولت اشغل نفسي بالتلفزيون شوية لكن فجأة من دون ما احس لقيت نفسي نمت...
-------
حسيت بيد بتهز بقوة فيني...فتحت نص عيني كانت اختي الصغيرة اريام واقفة و شايلة تلفوني كانت
-قالت و هي بتمد التلفون في وشي :مرام ضربت ليك..
شلتو منها و رديت و صوتي لسه فيهو نعاس
-ايواا
-ريهام قاعد...لقيتو قاعد معاه الحمد لله.
-منو
-حسام ياخ.
-ليه الجابو شنو ؟
-جا مع شاهين ما صحبو..
-اها مصحياني عشان تقولي لي كدا ؟؟
-انتي نايمة هسي مالك دا المغرب !
رديت عليها و انا بمسح وشي: مفروض تعتذري عشان صحيتني
-مفروض تفرحي عشان لقيتو..
-المهم هسي انتي هسي رجعتي ؟
-لا انا مع رزان 💁‍♀️
-رزان ؟؟؟؟!!!
"رزان دي اخت شاهين الصغيرة المتفاخرة العاجباها روحها و نفسها هو اكتر موضوع بتحب تتكلم عنو كانت بتقرا برا السودان و جات لامتحان الشهادة 💁‍♀️"
-ااي هي زاتها...طبعا زهج و البت ما دايرة تسكت ياخ 😣
-بركة عشان تاني تصحيني 😒.
_________________________
قفلت التلفون و رجعت من الحوش..كانت في بيت عمتها ام شاهين و رزان..للغرفة الكانت فيها رزان

رزان كانت خالفة رجل علي رجل و ماسكة كباية
-اها جيتي ؟
-اي
رجعت تمت كلامها و مرام ممشياها و عاملة انها مهتمة بكلامها...و مخها في حتة تانية...
فجأة و هم قاعدين شاهين و حسام دخلو ليهم...مرام ما قدرت ما تسرح فيه و شبه اتجاهلت وجود رزان..
-شاهين:رزان وين الكتا...
قاطعو حسام بضربة صغيرة و همس ليهو بشيء في اذنو
غير كلامو و قال و هو متوجه لبرا:لا...لا خلاص
رزان عاينت لمرام السرحانة و ابتسمت ابتسامة غرور و هي بتخت الكباية:ااي انا اخوي دا بعجب اي زول 😏.
-مرام بتمشيها:اا اي الله يخليه ليكم 🙃
مرام كانت عيونها مع حسام لحد ما طلعو من الاوضة..
و رزان رجعت تتكلم تاني و تسألها و هي لسه راسمة علي وشها ابتسامة صفرة...
-- --
اتهز تلفونها جنبها شالتو و قرت الاسم لقتو ابوها ردت بسرعة اخيرا حاجة ح تسكتها
-الو ؟
-مرام ؟خلاص قولي لشاهين يرجعك..
-وقفت من الحماس :اي طيب
قفلت الخط حولت نظراتها لرزان و قالت ليها و هي بترفع شنطتها بزعل مصتنع:معليش بابا قال لي تعالي سريييع..
-لا ابدا ما تعتذري..
-قالت و هي بتديها ظهرها و تطلع :يلا عن اذنك..
طلعت برا الحوش كان فيهو شاهين و حسام قاعدين في كراسي الحديقة و بتكلمو..
سكتو لما شافوها بتقرب منهم كأنو في شي سلمت عليهم بخجل قبل ما تقول:ما قصدي اقاطعكم لكن..انا...مفروض..
-شاهين :ارجعك ؟طيب دقيقة اجيب المفتاح اقعدي هنا انتي..
-لا لا بنتظرك واقفة..😅
-انا ما عارف المفتاح وين احسن تقعدي 😹
مشت عليهم بخطوات بطيئة و قعدت في المكان الكان قاعد فيهو..
كان في صمت تام بينهم..لمدة و الاتنين ما كانو مرتاحين للصمت دا..
-حسام :ابوك وامك اشتاقو ليك...
-اي..ابوي اشتاق لي..
-و امك ما دايراك يعني 😹
-اخدت نفس و طلعت و هي بتقول:الله يرحمها...
-😳😳😳لا معليش ما كنت عارف..
-لا عادي انا ما متذكراها شديد كنت صغيرة😊..
-ااااا...
تاني سكتو....و الاتنين كانو عايزين يتكلمو و في نفس الوقت عايزين شاهين يجي ينهي الغرابة دي..
فجأة سمعو صوت شاهين من جوا بتكلم مع الحبشية :يا بت الناس المفتاح دا كان هنا ذالو جن يعني تفتشي لي انتي !!!!
الاتنين برا ما قدرو يمسكو ضحكتهم و فكوها ضحك
-مرام :حركات شاهين متعودين عليها 😂
-مهمل و بشبكها في الباقين !
مشت مدة قصيرة جا شاهين طالع بكشكش في المفاتيح..
-ارح..
حسام وقف :انا زاتي ماشي يلا مع السلامة..
- لا لا كيف انا بوصلك...
لونو اتختف و ظهرت عليه علامات توتر لاحظتها مرام :لا لا بمشي براي شكرا...بيت مرام بعيد لمن تجيني الوقت بكون متأخر شديد يلا مع السلامة
و طوالي قبل منهم و طلع...
راقبتو بعيونها لحد ما طلع من البيت
-شاهين:يلا نمشي...؟
-طيب.
______________
و هم في طريقهم بعد صمت طويل..
-مرام:انت بتعرف حسام من متين قلت لي؟
-منننن ايام الثانوي..
-و دايما بتصرف كدا ؟
-كيف كدا ؟
-يعني حسيتو....متوتر و هو بتكلم..
-لا بس بتوتر لمن يكون جنب بنات حلوات ☻..
ضحكت ضحكة خفيفة لمزحتو السخيفة و سكتت بعد كدا..
_______________
في الوقت الكانت هي بتمدح
فيهو انا كنت بغسل في العدة و بسمع بتلفون فجأة سمعت صوت رنة التلفون نشفت يدينها بسرعة و ردت
-ريهام:يا بت انتي ما عندك شغلة غيري ؟
-مرام:و الله ما عندي زول احكي ليهو عشان كدا اي شيء دايرة اقولو بقول لي يا عالمي و صدقتي الاولى و الوحيدة 😍..
-اها دايرة شنو...😂حسام مالو المرة دي ؟
-الليلة ما عارفاهو اتخلع لمن شافني..يعني كانت خلعة خوف..كان ظاهر عليه خايف من شي و لمن شاهين قال ليهو خليني اوصلك معاي لونو اختفى كأنو قال ليهو انا ح اقتلك ولا شي 😕
-اممممم
-مالو في رايك ؟
-و الله ما عارفة ما بشوف ناس زي دا..
-ان شاء الله يكون خير..
فجأة علا صوت امها من برا :يا بت ريهام بطلي كلام كتير و تمي شغلك دا...
-مرام:* ضحكة خفيفة *
-براك سمعتيها..
-اي خلاص مع السلامة
-باي..
قفلت الخط و عاينت للسقف بتفكر براها و بتحاول تخلي افكارها السودا بعيدة...