هكذا تغيرت أقدارنا ( روايات ليبية )

حلقة 11 🔥 النهاية 🔥

رواية #هكذا_تغيرت_أقدارنا حلقة 11 🔥 النهاية 🔥
( رايكم بعد الحلقة بليز ❤️ ) .... بقلم الكاتب #أحمد_عبدالله
.
( الهادى و بنته )
( طلعوا يجروا للمستشفي و مصدومين و كيف وصلوا لممر الطواري كان سرير متحرك موجود فيه ريان )
الهادي : بنتي بنتي
امه : ريان ريان يا بنتي
الدكتور : البقاء لله
الهادي : لا لا لا لا لا لا لاااااااااااااااااااااااالالل
( يجري شد ريان و بدي يقيم فيها )
الهادي : بنتي حية لا يا ريان نوضي يا ريان لا بنتي نوضي يا ريان . ابعدوا عليا بنتي حية
امه : ووووووووووه علي بنتي ووووه
سند : 🥺💔 ( يبكي علي اخته )
الهادي : بنتي قوية و تقدرها . نوضي يا ريان نوضي ررريييييييياااااااااااااالننننن
✨ يتذكر ✨
ليلي : حرام عليك عندك بنية عيب يلي ادير فيه
الهادي : امشي امشي
.
ليلي : حسبي الله و نعم الوكيل فيك ، نشوف فيك يوم
الهادي : 😂
.
الهادي : 🥺💔 ريان حبيبتي نوضي نوضي بنتي لا ابعدوا عليا
( بدو الدكاترة يبعدوا فيه و هو يقاوم و فجاءة طاح عليهم )
سند : بوي بوي 💔
امه : هادي لا لا لا
( قاموه الاطباء و رفعوه )
.
( اياد و نادر )
( بعد ما ضحكت عليه هناء السكرتيرة و خديت الفلوس كلها و حس انه فقد صديق عمره و فقد يلي بني هو وياه كل شي ، و طعنه في ضهره )
( رجع اياد و الدموع في عيونه و مش عارف وين يوري وجهه لنادر )
( خش للشركة لقي نادر مقعمز قدام باب الشركة و ايده علي راسه و يبكي علي خوانت اعز صاحب عليه و فقد كل يلي بناه في لحظة )
اياد : اسف يا خوي
نادر : ( راسه لوطة والدمعة في عينه )
اياد : غرني الطمع يا نادر ، الشيطان شاطر يا نادر ،
( نزل علي رجليه )
اياد : نبوس رجلك سامحني سامحني
( ناض نادر و مشي و خلا باب الشركة مفتوح و اياد طايح قدام الشركة يبكي )
( خوانة الصحاب اصعب شي ، و بدات لما يكون هذا الشخص كأنه خوك و يلي خدمت انت و ياه و بنيتوا كل شي . في لحظة يخونك و يخنبك و يبيعك )
( فقد اياد كل شي و اهم شي هو نادر ، الصاحب يلي عمره ما يتكرر )
.
( ابتهال )
( ابتهال تعيط و تتوجع من كتر الالم ، و ما فيش حد معاها ابدا و ما فيش يجيبلها حتي طاسة امية بعد ما باعتها اعز وحدة ليها رويدة )
.
( الهادي )
( سند و امه مقعمزين قدام باب المستشفي )
طلع الدكتور
امه : طمني طمني
الدكتور : الحالة تعرضت لجلطة
امه : 🤭😱 للللااااااااااااااااا💔
سند : ياربي ليش ياربي 🥺💔
( بعد ما فقد بنته حياته و اعز وحدة عنده في الدنيا ريان ،وجع موتتها كان كبير و حس الهادي ان حياته بعد ريان زايدة )
( انجلط الهادي و حتي الكلام مش قادر يتكلم )
.
( في الشقة )
( قاعدين في الشقة طول اليوم بعد ما اكرام و براءة ارتفدوا من شغلهم فا قعدت سناء و وعد بس يلي يمشو للشغل )
( كل وحدة فينا شادة دارها و تبكي )
( وقفت نوال في الصالة و بصوت عالي )
نوال :  خيركم
الكل : 🥺
( سمعنا صوت نوال طلعنا ا
نوال : خلاص انسو عيشوا حياتكم ، غيروا اقداركم
الكل : 💔
نوال ؛ طحنا هلبا و شفنا هلبا ، لازم نرجعوا نوقفوا لازم
ليلي : و بنتي
نوال : حتشوفيها ، زي ماقلتلكم لازم نغيروا اقدارنا
.
( فاتت ايام و كل وحدة فينا بدت ترجع لحياتها ، فقدان وحدة منا كان صعب و مكان ندى موجود بيناتنا ، و بدات ان قضية قتلها تحولت ضد مجهول ، و ضاع حقها و حتي حقنا معاها و هو للان ما عارفناش من يلي دار فينا هكي )
.
( رجع الهادي لحوشه و داروا عزاء كبير ، مشينا و عزينة امها مع ان ريان دارت فينا كل سوء و ممكن تكون هيا يلي دارت كل هذا ، الهادى كان علي كروسة و مش قادر يتكلم )
( ابتهال حالتها كل يوم اسوء من قبل و ما فيش حد معاها و فلوسها كلها عن رويدة و من كتر ما مريضة لما سمعوا الجيران بدو يخشوا للحوش و يخنبوا و هيا تشبح بعينها )
( نادر سكر الشركة و كل يوم اياد يجي لحوش نادر يطق و يبكي و يمشي )
.
( فات اسبوع تاني )
( كان يوم خميس و كنا مقعمزين نشربوا في الشاهي و فجاء جي اتصال لاكرام خشت تجري بعدها بزبط جي اتصال لبراءة و حتي هيا نفس الشي )
سناء : خيرهم هاذم
( رن تليفونها )
ليلي : 😂 حتي انتي
سناء : 😍 حسين
( ناضت للدار حتي هيا )
.
( اكرام )
( بعد ما شافت رقم ابتهال خشت تجري للدار و فتحت الخط )
ابتهال : اكرام اكرام اني بنموت
اكرام : الو ابتهال امعاي
ابتهال : اكرام تعاليلي
اكرام : شن تبي مني
ابتهال : تعاليلي لو تبي تعرفي من يلي دار فيكم هكي بسرعة يا اكرام بسرعة
اكرام : 👁👁🔥
.
( براءة )
( خشت تجري بعد ما شافت رقم اياد )
براءة : الو
اياد : براءة صح
براءة : تفضل معاك
اياد : براءة انا اياد نبي نقابلك ضروري
براءة : 👁👁
اياد : عارف انك زعلانة مني بس اني نفضحت يا براءة لو حابة تعرفي من يلي دار فيكم هكي تعالي
براءة : 🔥
.
( سناء )
اول ما شافت رقم حسين وعشت )
سناء : الو
امه : الو
سناء : 👁👁🔥 اهلين عمتي
امه : سناء معاي
سناء : ايه
امه : حسين محتاج يشوفك يا سناء
سناء : 🤭 ليش فيه شي
امه : حسين عنده مشكلة صغيرة و محتاج يشوفك يا بنتي
سناء : 👁👁🥺💔
.
( طلعت كل وحدة فينا من الدار تجري )
ليلي : ان شاء الله خير
( فتحنا الباب لقينا الولد يلي يخدم مع الهادي قدامنا )
اكرام : 👁👁 تفضل
الولد : نبي وعد شوي في موضوع
براءة : يا وعد تعالي شوي
( نزلت براءة و اكرام و سناء و كل وحدة مشت لمشوارها )
وعد :تفضل
الولد  : ممكن تنزلي معاي للمحل يبيك الهادي
وعد : يبيني اني
الولد : ايه
( تلفتت )
وعد : شوي و جاية
نوال : باهي
ليلي : كل وحدة فيهم مشت لمكان
نوال : يارب معاهم
( رن تليفون ليلي )
نوال : مني يكلم فيك
ليلي : رقم غريب
نوال : ردي ، من يلي ناويكم هذا اليوم
( فتحت الخط )
ليلي : الو
الضابط محمد : الو ليلي
ليلي : الو من معاي
النقيب محمد : معاك محمد
ليلي : اهلين نقيب محمد
محمد : استاذة ليلي في فيديو من كاميرا وحدة من المحالات نبيك تشوفيه
ليلي : فيديو شني
محمد : فيديو ليلة الحادتة متع الدعارة
( نضت من مكاني )
ليلي : يعني عرفتوا من دار هكي
محمد : لو سمحتي نبيك في مكتبي
ليلي : حاضر 🔥
.
( اكرام )
وصلت للحوش لقيت الباب مردود خشيت لقيت ولاد في الحوش يخنبوا في الاتات
اكرام : 👁👁
( زدت قدمت شوي لقيت دار مفتوحة و ابتهال في السرير و ولاد يفكوا في الشاشة )
ابتهال : عيب اتحشموا عيب
اكرام : ( وجعني قلبي علي ابتهال كيف كانت و كيف ولت ، لدرجة انها راقدة و حوشها ينخنب قدامها )
( المرض و هد الحيل يطيح الانسان و بدات لو ما كانش معاه حد )
ابتهال : اكرام اكرام جيتي
اكرام ( قعدت نشوفلها و مش مصدقة كيف ولت )
ابتهال : شفتي يا اكرام كيف وليت
اكرام : 🥺
ابتهال : انتي تبكي عليا يا اكرام
اكرام : ربي يشفيك يارب ، تبي اي مساعدة
ابتهال : لا بنتي شكرا ، ربي يكتبلك كل خير لانك طيبة ،
اكرام : 🥺 ممكن نروح بيك معاي او نقعد معاك لو حابة
ابتهال : اكرام افتحي الكجر هذا
اكرام : ( مشيت فتحت الكجر )
ابتهال ؛ فيه ورق جيبيهم
اكرام : تفضلي
ابتهال : هاذم اوراق المحل ، هاتي نوقع
اكرام : اني ما نبي منك شي نبي من يلي دار هكي
ابتهال : استني يا بنتي
( و كانت تتكلم بصوت تعبان هلبا )
ابتهال : هذه اوراق المحل الاصلية ، و كتبته بأسمك و نبيك تكسري عين رويدة زي ما كسرت عيني و غرت بيا
اكرام : 🥺 و اللهي ما نبي حاجة
ابتهال : لا اكرام اني غلطت معاك و انتي تستاهلي
اكرام : من يلي دار هكي
ابتهال : ( بدي النفس يهرب عليها هلبا اتكت علي السرير )
اكرام : نجيب دكتور ، اي حد يساعدك
ابتهال : ( شدت ايدي ) خليني نموت نرتاح ليش تعدبي فيا ، خليك معاي ، لازم تعرفي من يلي دار فيك هكي
اكرام : 🥺
ابتهال : يلي دار فيكم هكي واحد اسمه ،،،،،،،
اكرام : 👁👁🔥
ابتهال : سامحيني يا اكرام سامحيني
( و فجاء طاح راسها بلقوة علي المخدة و عرفت ان ابتهال ماتت )
اكرام : سامحتك . ( غمضت عينها ) و شهدت ليها
" الانسان مهما كان قوي و جبروت حيجيه يوم و يكون اضعف شخص في هذا الكون " " لا قوة الا بالله "
" الله يرحمها يارب "
.
( براءة )
( نزلت من التاكسي و اني متوترة )
مشيت لقيته مقعمز في الجردينة علي كرسي )
( جيت قعمزت بحداه )
اياد : براءة
براءة : نسمع فيك
اياد : اني خنت نادر يا براءة
براءة : من اول ما شفتك . شفتك خاين
اياد : مشيت وراء كلام هناء و في الاخير باعتني
براءة : رد بالك حد يخش بينك و بين صاحبك ، و لكن طول ما انت نفسك طماعة في رح تسمع لكلام يلي بيخش بيناتكم
اياد : اني نحب نادر و اللهي نحبه ، هذا خوي
براءة : اذا خوك ليش طعنته من ضهره
اياد : مش عارف
براءة : نقولك اني ، كيد الرجال ما فيش من اصعب منه و انت غرت من نادر
اياد : 🔥💔
براءة : شن مطلوب مني اني توا
اياد : نبيك تقوليله سامحني يا براءة
براءة : و من قالك اني حنمشي لنادر
اياد : نادر محتاجك هلبا الايام هادي يا براءة ، نادر بروحه ، لازم تمشيله ، اني جيتك اليوم باش نقولك اسم يلي دار فيكم هكي ،
براءة : نسمع فيك
اياد : يلي دار فيكم هكي حد اسمه ،،،،،،،،،،
براءة : ( اول ما قالي الاسم انصدمت )
اياد : توا تكوني عرفتي من دار فيكم هكي ، نبي منك ترجعي لنادر ، و تقوليله يسامحني
براءة : و ليش مش انت يلي تقوله سامحني
اياد : لاني مش حنكون اهني
براءة : وين بتكون
اياد : عند يلي خالقني
براءة : رد بالك ادير في روحك شي يا اياد ، مهما صار رح يسامحك
(وقف و مشي مسافة صغيرة و تلفتلي )
اياد : رد بالك تنسي ، قوليله خوك اياد قالك اسف ، اوعديني
براءة : نوعدك
اياد : معرفة طيبة براءة
براءة : 🥺
.
( وعد )
( نزلت من الشقة و خشيت للمحل لقيت الهادي مقعمز علي كرسي متحرك و مش قادر يتكلم )
( اشرلي بأيده )
( فهمته قربت عليه )
( قعمزت بحداه )
الهادي : ( كان يتكلم كلام رزين شوي بس فهمت ) سامحيني يا بنتي
وعد : ( شديت ايده ) و ضحكت في وجهه بمعني عادي يلي صار صار
الهادي : اني درت فيكم هلبا حاجات و نستاهل اكتر من هكي
وعد : لالا ما تقولش هكي
الهادي : نبي منكم تسامحوا ريان بنتي
وعد : مسامحينها و اللهي مسامحينها
الهادي : عارفك تبي تعرفي من يلي دار فيكم هكي
وعد : ريحني و قولي
الهادي : واحد اسمه ،،،،،،،،،،،
وعد : 🤭🥺🔥
الهادي : نبيكم تعرفوا ان عطاني فلوس و قالي ما تقولش ،
وعد : 🥺
الهادي : زي ما قتلك يا وعد سامحوني اني و بنتي بالله عليكم
وعد : 💔
.
( سناء )
( مشيت نجري لحوش حسين و خايفة عليه هلبا )
( وصلت للحوش طقيت فتحت امه )
امه : سناء ، سامحيني يا بنتي
سناء : من غير سماح انتي ما غلطيش
امه : تعالي حسين يبي يشوفك يا سناء
( خشيت لقيت اخته تبكي )
( خفت يكون فيه شي خشيت لداره لقيته مقعمز و يبكي )
حسين : سناء
سناء : حسين
( نضراتنا لبعض كانت كلها شوق و كان خاطري نضبطه و نبكي في حضنه و الله )
سناء : خيرك يا حسين شن فيه
امه : حسين يشم يا سناء
سناء: ( عيوني نزلوا دموع ) تشم يا حسين ، ليش
حسين : نحبك
سناء : تحبني تشم ، تحبني تأذي نفسك يا حسين
حسين : 💔
سناء : اني معش نحبك ، كرهتك
حسين : لا سناء
سناء : نحي ايدك ، مش رح نرجع ليك الا لما تتعالج يا حسين
حسين : تتعالج
سناء : لما تتعالج تعرف مكاني وين ، تعالي و تلقاني نستني فيك ، و زي ما قتلك قبل ، مش رح ناخد حد غيرك
امه : 💔
اخته : 💔
حسين : 🥺
سناء : حسين رد بالك تظلم روحك زي ما انظلمت اني
حسين : بس اني نعرف من ضلمك يا سناء
سناء : 👁👁 شني
حسين : نعرف من دار فيكم كل هذا ، و اني جاي لعندك شفته
سناء : مني
حسين : .............
سناء : 👁👁🔥 انت متاكد
حسين : متاكد
سناء : ( مسحت دموعه ) زي ما قتلك لازم تجيني و انت صحيح
حسين : 💔
سناء : ( تلفتت و كيف طالعة من الدار تلفتت و شفتله ) حسين اوعدني
حسين :نوعدك
سناء : نستني فيك 😍
.
( ليلي )
( كانت الدنيا زحمة هلبا و وصلت متأخرة هلبا خشيت نجري )
ليلي : السلام عليكم نقيب محمد حاب يقابلني
ضابط : استني شوي من فضلك
( خش شوي و قالي خشي )
ليلي : السلام عليكم
محمد : و عليكم السلام تفضلي استاذة ليلي
ليلي : شكرا
محمد : اني الحق حاب نكلمك في موضوع مهم
ليلي : ايه تفضل
محمد : فيه فيديو اليوم وصلني من صاحب وحدة من محلات جيهتكم
ليلي : ايه 👁👁
محمد : يبين من دار فيكم هكي
ليلي : مني
محمد : استني نوريك الفيديو
ليلي : ( توترت و عيوني يرجفوا )
( فتح الفيديو )
محمد : فيه حد لابس اسود خش لمحل الهادي
ليلي : 👁👁🔥
محمد : و بعده جت وحدة للمحل تجري
ليلي : هادي ريان بنت الهادي الله يرحمها
محمد : و بعدها خشت امراة عندها سيارة فخمة
ليلي : لا ما نعرفهاش هادي
محمد : و بعدها جت مراة تانية خشت للمحل
ليلي : ( مني هاذم ) 👁👁
محمد : و بعدها طلعوا كلهم و خشوا الولاد يلي خشو عليكم للمحل و طلع الراجل هذا
ليلي : 👁👁 ما فهمت شي ، يعني الهادي يلي دار هكي
محمد : لا مش الهادي
ليلي : امانا هذا كله في محل مني
محمد : فيه حد جي للهادي و خلاه يدير هكي و جاب كل هاذم و اتفق معاهم عشان يدير هكي
ليلي : و من هذا
محمد : للاسف وجهه مش باين
ليلي : و شن الحل
محمد : زيدي ركزي علي شكل الجسم و الضهر
ليلي : 👁👁
.
( رجعت كل وحدة فينا و الصدمة غالبة فيها ، رجعت كل وحدة فينا و هيا مش عارفة شن بتقول لما توصل ، رجعت و في دماغها سوال ، هل يلي سمعته صح او لا )
( وصلت كل وحدة فينا للحوش و تقريبا في نفس الوقت )
( خشينا و قعمزنا و احني روسنا لوطة )
نوال : خيركم ان شاء الله
الكل : 👁👁🔥
نوال : اللطف من كل لسانكم
الكل : 🔥 وين ليلي
نوال : مشت مشوار لقسم الشرطة
الكل : 🥺
نوال : حقا شن قال يبيك الهادي
وعد : يبي يقولي من يلي دار فينا هكي
الكل : 👁👁
نوال : و قالك
وعد : ( سكتت )
نوال : معناها يكذب و انتم
براءة : مشيت لصاحب الشركة يلي نخدم فيها و قالي علي دار فينا هكي
نوال : 😂 و قالك
براءة : ( نزلت راسها )
نوال : و انتي
سناء : نفس الشي
نوال : حتي حسين يعرف من يلي دار فينا هكي
سناء : 👁👁
نوال : 😂 حد مشهور هذا و انتي ما اتقوليش حتي انتي نفس الشي
اكرام : هزت راسها
ليلي : و قالولكم
الكل : ( هزوا راسهم  )
نوال : و مني الشخص يلي يعرفه الهادي و يعرفه صاحب الشركة متع براءة و تعرفه صاحبة الصالون و يعرفه خطيب سناء هذا
( و في نفس الوقت قلنا الاسم مع بعض )
نوال : 🔥
.
( ليلي )
ليلي : لا للاسف ما عرفتاش
محمد : هو هذا يلي دار كل الليلة هديكا ، انتي مش شاكة في حد
ليلي : لالا من ناحيتي اني ما شاكة في حد لكن توا نشوف البنات
محمد : تمام سامحيني شحطك معاي
ليلي : لالا انت سامحنا تعبناك معانا
( نضت و كيف طالعة وصلت للباب رن تليفوني وكانت نوال )
ليلي : الو نوال شن فيه
نوال : عرفت مني يلي دار فينا هكي
ليلي : للعلم مش اي حد شكينا فيه
نوال : انتي وين
ليلي : اني في مكتب محمد
نوال : يا ليلي يا دار فينا هكي راجلك
ليلي : 👁👁
نوال : ايوب يا ليلي
( فجاء طاح التليفون من ايدي و تلفتت و الدموع في عيني )
( و اني نقول الضهر هذا وين شايفاته )
محمد : شن فيه يا ليلي
( قام التليفون )
ليلي : عرفت من دار هكي
محمد : مني قولي
ليلي : ايوب
محمد : من ايوب
ليلي : طليقي 🔥
✨ نتذكر ✨
ليلي : مش قادرة مش قادرة و اللهي يعني انضلمت في الحبس و نزيد برا الحبس ، ايوب بنروح معاك
ايوب : ما ينفعش
ليلي :ليش 🥺
،
ليش : لييييييشششششش ليييييييششششششش
( انهرت بدموع و نضرب في روحي ، كانه موس خش في صدري ، ليش دار فيا هكي ليش )
.
( وتا سيارة الشرطة و ركبني و اني دايخة و مصدومة )
.
( البنات في الشقة )
نوال : بسرعة اطلعوا قدامي لقسم الشرطة ، بسرعة
( طلعنا و الدموع في عيونا و حاسين بوجع ليلي )
.
( ليلي )
( راكبة في سيارة الشرطة و الدموع في عيوني ، مشينا للدكتور صاحبه و ركبناه معانا و وصلنا للحوش يلي دلنا عليه )
( نزلت و اني نشوف في حوش فخم و اتاري كل هذا بفلوسي ، اول ما طقوا عليه و قمت عيوني ، شفت البنت يلي حطت في شنطي المخدرات و نحبست 3 سنين ظلم  )
( وقفت مكاني و هما خشوا و نستني نسمع صوت نور بنتي )
( طلعوه هو و البنت هادي و للان ما هناش بنتي )
.
( رجعنا لقسم الشرطة )
( وصلنا لقيت البنات يبكوا قدام الباب و يستنوا فيا )
( خشينا و دخلوه و بدي يعترف و بدو يدخلوا كل مرة حد فينا )
.
( طلع في الفيديو رويدة و هيا جاية تتفق مع ايوب في محل الهادي و ريان بنت الهادي و السكرتيرة  و الهادي )
.
( مشت الشرطة تجيب فيهم واحد واحد ، جابوا رويدة من الصالون و جابو الهادي اما السكرتيرة فا لقوها مسافرة )
.
رويدة : اني كنت جاية نسأل عليهم فا لقيته يتفق انه يفضحهم فا ساعدته اني نجيب الولاد يلي بيخشوا
.
الهادي : اني جاني لما عرف اني نكرهم و اتفق عليا و هذاكا الوقت كنت ما نعرفش ربي و وافقت و خديت فلوس منه و اني يلي ركبت الولاد للشقة
محمد : و السكرتيرة شن دارت
الهادي : السكرتيرة هيا من نشرت الخبر في كل الصحف
.
( اما ايوب فا فلاول نكر كل شي و طلب محاميه و بعد ما واجهوه للاشخاص يلي معاه اعترف ، بعد التدقيق في ملفاته ، اتضح انه تاجر هروين كبير ، و هو الوكيل الاول لاملاك ليلي متل الارض و العيادة و هذا السبب يلي خلاه يلفق تهم عليها )
.
( تم رفع ملف القضية للمحكمة و بلفعل مسكت القضية المحامية الليبية المشهورة شرف نصر الدين و رقم القضية كان " 2010 " )
.
نزل قرار من القضاء الاعلي
" حكمت المحكمة حضوريآ بحبس المتهم ( ايوب خيري عبدالله ) 45 عامآ بتهمة تاجرة الهروين و ادعاء كاذب و تلفيق التهمة لزوجته السابقة  ( ليلي علي غفور) و حبسها ضلمآ 3 سنوات و حكمت المحكمة ايضآ بمدعوة ( رقية عبدالسلام ) زوجة المتهم الحالية بسجن 20 هامآ بتهمة تاجرة الهروين ايضآ
كما حكمت المحكمة بسجن المتهمة ( رويدة يوسف ادريس ) بلحبس 30 عامآ بعد تزويرها اوراق محل مملوك للمرحومة ( ابتهال الشافعي ) و ايضآ بتلفيق تهمة كاذبة ، و حكمت المحكمة علي المدعي ( الهادي محمد جمعة ) بلبراءة بظرآ لضروفه الصحية الحرجة ، كما حكمت المحكمة ايضآ بلسجن غيابيآ للمدعوة ( هناء يونس هويدي ) بتهمة سرقة املاك رجل الاعمال ( نادر الورفلي ) .
المحامية : شرف نصر الدين ...قضية 2010
.
المحمية شرف : و بهذا يكون حقك وصل
ليلي : شكرا ليك
المحامية شرف : العفوا حقا بنتك عند عمتها رحاب و خديت مكانها من ايوب
ليلي : ممكن نطلب منك طلب
شرف : تفضلي
ليلي : ممكن نقابله
شرف : ايوب
ليلي : ايه
شرف : تفضلي
( خشيت للمحكمة عشان نقابله بعد الجلسة ،  قبل ما يتحول للحبس و يقضي عقوبته )
( اول ما خشيت نزل راسه )
قعمزت قدامه
ليلي : شوفلي خيرك منزل راسك
ايوب : 💔
ليلي : عندك علم نحبك يا ايوب
( قام راسه )
ليلي : و في نفس الوقت نكرهك ، ليش يا ايوب ليش
( رجع نزل راسه )
ليلي : ليش كل هذا ، ما سدكش حبستني 3 سنين ضلم و زيادة تبي تحبسني دعارة ليش
ايوب : 💔
ليلي : حرمتني من بنتي طول المدة هاذي و قعدت تعذب فيا بكلامك الجارح يلي انت درته
ايوب : 💔
ليلي : و هذا كله علي خاطر ارض و عيادة ، يلعن الطمع يلي خلاك تعدب مرتك و تهينها و تخليها عبرة علي كل لسان ، انت تحساب روحك راجل ، انت تحساب روحك بني ادم ،
ايوب : اني ندمت اني خديتك
ليلي : ندمت انك خديتني، يلي ندمت انك خديتها خلاتك الدكتور ايوب ، خلاتك باشا ، دفعت عمري كله علي خاطر حبك ، بعت كل الحياة و الدنيا لما شفتك ، حسيتك امان ليا . بس طلعت خاين ، طلعت شيطان ، كسرت نفسي يا ايوب كسرت نفسي ، الله لا يسامحك الله لا يسامحك ، حنربي بنتي علي كرهك ، حنربي بنتي انها ما عندهاش اب من الاساس ، لانها اكيد مش رح ترضي يكون بوها بهذا الشكل ، هذا زي الكلام يلي قلتهولي ، ذوق المر يلي ذقته يا ايوب
( نضت شد ايدي )
ايوب : ممكن تسامحيني
( دفيت ايده )
ليلي : جملة وحدة رح نقولهالك ( ليك رب كريم خليه يسامحك ، سماحه افضل من سماحي )
( طلعت و خليت الدمعة في عينه ، زي كل مرة يطلع و يخلي الدمعة في عيني )
( طلعت من المحكمة لقيت خواتي يستنوا فيا ، خواتي يلي ما جابتهمش امي . يلي يخافوا عليا و يحبوني زي ما اني نحبهم )
محمد : مبروك حقك يلي رجع
ليلي : شكرا استاذ محمد
محمد : خليها محمد بس ، عندي ليك مفاجاءة تعالي معاي
ليلي : 👁👁
( فتح السيارة )
( شفت بنت صغيرة تشوفلي )
( وجع كبير لما ما تعرفش بنتك و هيا تعرفك )
البنت : ما ما
ليلي : ( بعد الكلمة هادي رجعت نتنفس ) 💔🔥 يا روح ماما
( اضبتها و بستها ، هيا تعرفني كويس ،بس اني نسيتها ، كبرت نور )
ليلي : نور حبيبي
نور : استحشتك ماما
ليلي : ( قمت راسي شفت رحاب اخت ايوب )
رحاب : بنتك كانت امانة عندي يا ليلي و هادي امانتك
ليلي : ( ضحكت في وجهها ) و حافظتي علي الامانة
( نضت اضبتها و بستها )
البنات : 💔🥺
.
✨ اما بعد ✨
( اكرام رجعت فتحت صفحة جديدة في حياتها و فتحت المحل لكن عمر ما نساهاش ابدا )
( و في يوم و هيا فاتحة الصالون )
عمر : ( و في ايده ورد ) نحبك يا كريمة
اكرام: 😂 طول ما انت تقول كريمة مش رح نحبك 
عمر : بلحقا
اكرام : تعبتك معاي و خليتك تجري وراي اني حنجرب نشوف حياتي معاك
عمر : البيبي قاعد
اكرام : اس اس 🤭 في الشهر التاني
عمر : 😂😍❤️
اكرام : 😂😍❤️
.
( اما براءة فا بعد ما سمعت ان اياد انتحر ، حاولت تتقرب من نادر و تقوله علي قاله اياد و تقنعه ان الفلوس مش كل حاجة ابدا و رح يبني كل شي من الاول و بأساس صح ، و قرر ان يسمع كلامها و يرجع يفتح الشركة هو وياها )
.
( اما سناء فا قعدت تستني في حسين و عندها امل انه يتعالج من المخدرات و يرجعلها و في يوم من الايام طق باب الحوش )
( فتحت لقت امه )
سناء : وين حسين 🥺
امه : وراي يا عروسة 😍
اخته : وووووووللللووولليي
حسين : مش قتلك حنرجع
سناء : 😍
.
( اما وعد فا بعد ما مات الهادي حاولت تقرب من سند اكتر بعد ما حست انه وحيد )
وعد : زي ما كنت معاي في كل شي ، اني معاك
سند : اني السبب في كل شي
وعد : انت ما خصك في شي و مش انت يلي تتحمل العواقب في الاخير من حقك تعيش ، و تكمل امتحانات الجامعة و تتخرج
سند : انتي معاي
وعد : و اللهي معاك 😍
.
( اما ليلي فا بعد ما رجعت ارض بوها و عيادتها و الاهم بنتها ، قعد محمد معاها في كل لحظة و ساعدها في كل شي و دار ليها اوراقها و حست انه زي السند معاها )
محمد : تذكري لما قتلك اني محتاج حياة مع شخص  ، مش لازم يكون حب ، مرات حتي صداقة
ليلي : ايه
محمد : علي ما اظن لقيته
ليلي : و لقيته حب او صداقة
محمد : الاتنين
ليلي : ( ابتسمت )
محمد : و انتي
ليلي : مش عارفة الحق شن نقول بس رح نختار الاتنين حتي انتي ❤️
محمد : ❤️
.
( اما نوال كانت فرحانة ان كل وحدة فينا شافت حياة تانية ليها و هيا قاعدة محافظة علي وصية ✨ ندى ✨ و محافظة علي بنتها ، كا انها بنتها هيا )
( بس احني عمرنا ما ننسوا حد وقف معانا و المراة هادي عوضت مكان الام في حياتنا و مش جزاتها اننا ننسوها ابدا )
( قررنا اننا ✨ نغيروا اقدارنا ✨ و نشوفوا حياة افضل لينا ، عانينا و شفنا ضلم و كل شي مش حلو و الحمد الله طول ما في ربي اكيد مش رح يخلينا ابدا )
بعد الحكاية الطويلة العريضة هاذي نقدروا نقولوا ان اكتر اسم يليق علي حكايتنا هو 🔥 هكذ تغيرت أقدارنا 🔥
.
( صوت اغاني و زغاريت )
نوال : بسم الله ما شاء الله عليكم
( و تحدف في الورد علينا )
نوال : ربي يحرسكم ،🥀✨
( خشينا و ايدينا في ايدين بعض كلنا ، كنا نتمنوا ان اب او اخ او سند يوصلنا لعريسنا بس الدنيا ما كتبتلناش )
( خشينا 5 عرايس شادين في ايدين بعض و كل وحدة فينا شدت في عريسها و العروس السادسة كانت قدام عيونا وهي ندى ، بس عروسة في الجنة بأذن الله
و من هني اتفقنا اننا ننسوا كل شي و نرجعوا نبنوا حياة جديدة ، ❤️ )
.
( بهذا تكون " هكذا تغيرت أقدارنا " وصلت لنهايتها ، شفنا مصير الضالم ، مصير الكذاب شني ، شفنا ان ربي عمره ما يضيع حق ابدا ابدا )
( شكر خاص للكاتب يلي كتب القصة و كأنه كان معانا ، أحمد_عبدالله )
.
حكمتنا ( انتي من تحددي مصير حياتك و انتي من تقرري انك تكوني ضالمة او مضلومة ، نصيحة كوني دائما مضلومة لان نهايتك مضمونة سعيدة اما الظالم في نهايته زي نهاية كل يلي ضلمونا و ممكن يكون اسوء )
..............................................................
( بدت حكايتنا ب 7 بنات و انتهت ب 6 بنات ، نتمني عجبتكم و استفدتوا منها ، كنا معاكم ، بنات بنسيون نوال ❤️
.
✨ النهاية ✨
بهذا تكون الرواية الخامسة في مسيرتي الكتابية انتهت نتمني انها كانت في مستوي الروايات السابقة ، نتمني اني قدرت نوصل مشاعر المراة المكسورة بجدارة ، نتمني انها نالت اعجابكم ،
( يلي قري رواية " ضمير شرف " عارف المحامية شرف نصر الدين كويس )
كنت نتمني انها توصل لفئة اكبر من هكي ❤️
.
رايكم في الرواية و حاب نشوف تعليقاتكم و تكون طويلة و معبرة و رايكم من اول حلقة لاخر حلقة ،،، و شكرا ❤️
.........................بقلم " أحمد عبدالله