#اعويزه
لقيت رساله من نسرين صاحبتي
معاي في الجامعة
نسرين :شخبارك ياامشفشفه رايفت عليك تجديد القيد الاحد الاسبوع الجاي نجك لي نرجا في الجامعه عشان نشوفك....
انا:يانعلي كأنها قالتلي جنازتك في خاطري نكمل الجامعه لكن كيف يبي يسير مع ايهم اه يانعلي نرد لحقراته ولائمته اه ياربي كرهت الجامعه وكرهت البلاد كلها كرهت كل شي ...
دزيتله رساله :نجك لي وانا اكثر مرايفه علي ايامك وعلي جونا جونا طبعا صياعه ومياعه وقلت حياء وضحك وسفتره ومكياج واغاني واطلوع مع الشباب عادي ياي اللي مش دايره علاقه معناها معقده ...
المهم كلمت محمد خطيبي وقتله ع موعد تجديد القيد قالي خلاص انتلاقو غادي ...
محمد :عيوني بكره نبي نجيك
انا:خلاص حبي توا انتلاقو بالمره يوم التجديد(طبعا نا شايله الهم ماعندي مانضيفه واصلا حتي كان جاني وقاري فاتحه الجبهه اللي عندي مستحيل تخلينا ناخذو راحتنا )
محمد:عيوني جايبلك دبش وفلوس لجامعه انتي مرتي ومسؤوله مني ...
انا :حبي والله مانبي نتعبك
محمد:تعبك راحك يانور عيوني.
جا ثاني يوم ولبست ودرت جوي وضيفته عصير وشكلاطه وتورتة اللي جايبهن هو..
باتي عيطلي وقالي تعالي ل راجلك نا فرحت وخشيت للمربوعه من غير محرمه ..
باتي :اوحيده اقعد معاهم
انا:😢😢😢😢 في عقلي يانعلللالاااي اه ياربي شن هذا
خشيت ...
انا :السلام عليكم
محمد:عليكم السلام ورحمة آلله وبركاته هلا ومرحبا
المهم قعدنا نحكو وخوي اوحيده ماعدلش علينا وخلانا ع راحتنا سهاري بس طبعاااا حاجه اخرى لأ
بعدها مدلي كيس راقي بكل ...
انا:عليش تعبت روحك ❤
محمد :تعبك راحه ياقلبي هديه بسيطه لمرتي وحبيبتي...❤
انا:يسلملي راجلي ياربي ربي مايحرمني منك ❤
خلاص عدا الجو ونا من جوا قاعده نفكر في الهديه بس متحشمه والفضول يبي يقتلني الكيس كبير بكل 😍
نبيه يقعد وفي نفس الوقت متشوقه نشوف الهديه ❤😍
ماصدقت عدا وعديت جري لدار فتحته وكانت هناااا الصاعقه ....
لقيته جايبلي خمار وعبايه واسعه وحاطلي 300جنيه ...
انا :انرن ع محمد
محمد:الو
انا:معقوله هكي شنووو هذا اللي جايبه لي تبيني نقعد زنديقه الايمان في القلب
محمد:اسمعي حبيبي نا راجلك ونخاف عليك
انا:شن تحق في نا والخمار مايلبسن فيه غير اللي مش تمام ..
محمد :اسمعي بالعقل لو انا راجل مش غاير عليك راه خليتك عادي وخليت الشباب يشبعو بيك لكن انتي ملكي نا ونا نبي نشوف
انا :انبرد علي روحي اصلا الخمار ماتلبس فيه غير فتانه الجمال بس
محمد :بالله عليك ياروحي شباب توا معقبين فاتنه ولا قبيحه
انا :بس نا مانبيش نلبسش
محمد:نا مانبيش نفرضه عليك فرض نبيك تقتنعي (اني نحبك بجنون ومانبي حد يحقك غيري وانا توا مسوؤل منك ولا متت اكيد ح حنتحاسب )
انا :بعيد السو عليك 💚ياروحي خلاص توا نلبسه
محمد:نجيهااا اللي تسمع في الكلام...
عدن الأيام ....وجا الأحد ونزلت مع باتي ونزلنا عند خالتي ونا قلبي يتقطع يانعلااااي ولقيت ارجوان وردن الاجواء بينا ورديت العن من قبل حتي نا مخطوبه ..شفرتي القديمه درتها لساقطه وطخ الأرقام وتكسيد ع الشباب ... ..
ارجوان:نبي نعرف ليش متخمره وانتي 😂😂 اكبر.......
انا:سخيفه الله غالب الكبيده شن ندير (بالفعل واقعنا يلبسن في الخمار عشان خطيبهن او حبيبهن ونسن رب العالمين )..
ارجوان :نعليااااا منك ياطوط 😁
قعدت اسبوع عند خالتي من غير مانمشي لجامعه لأنها مازالت مابدت رسمي ....
......
انا نفكر كيف نبي نمشي لجامعه اه ياربي اه بكره ايهم توا يزرني ..وفعلا جتني رساله منه ...
ايهم:بكره بأنتظارك
انا :حيوان تافه حسبي الله ونعم الوكيل فيك ....
جيت لجامعه وحضرت اول محاضره وبعدها كلمني وطلعت ....وعدينا لمكان جديد...
وع الحال هذا نين كملت السنه هذي....
وجت سنة 2015 احلا سنه في حياتي.. تغييرت فيها حياتي ❤
سنة التخرج اللي بعدها علي طول ح يطلع فرحي ....بس فرحتي ناقصه وغصه في قلبي سببها ايهم حسبي الله ونعم الوكيل فيه كرهني في الحياه ونا شاركت في روحي كان بيدي حلول بس نا تماديت في الغلط ...
انا :ها يامي
امي :ياحنه هي خشي بركي ديري لابراك وحطيه في البرمه علي النار ...
انا:هيا يامي كبرتو النار
امي :اكبريها قبل عشان تهفا وابدي بركي
انا:هالعيشه السوده والله عيشه تقرف وكنه ابراك الغاز مانيش يحس سي السيد متاعك مغير يشحط
علي خشت باتي
باتي :انعن جضار بوك يابنت الكلب انعبوك تربيه تربيتك يادابه ...وضربني بالمفتاح
لكن نا بلدتها 😁
ومشيت جبت سماعتي وقعدت نسمع في اغاني ودرت الغدا ...
وجا الليل كلمني شلتي الطوط وقالن يوم30.1تبدا الجامعه
طرت من الفرحه😍❤ لأني نبي نرد لضلالي ونبي ننهي السنه هذي وانتريح.. وانتريح من ايهم خلاص معش عنده كيف يحصلني ...
الأسبوع اللي قبل الجامعه ...
جاني مقطع فيديو من ايهم فتحته لقيت نا وياه في وضع مش تمام 😢😢😭
ايهم :رايفت عليك اه وخلاص
انا:حيوان تافه حقير
...طلعت لأمي
امي :اليوم مشنا نا وبوك ودرنا اجراءت السياره نبي نطلعه نشري بيه بتاتك وندير بيها الفرح باتك قال والله ماني دافع قرش
انا:ع اساس عمره دفع
امي :لكي فك راه يسمعك
انا: وباه سكتنا😏
جا خوي عبدالهادي اصغر مني بسنه .
عبدالهادي : يامي يامي
امي :ها
عبدالهادي :عرفتي عيت صالح عرب يقربو لأمي
امي :كنهم كنهم شنو ساير عندهم
عبدالهادي :بنتهم افطومه لقو معاها واحد
امي :يانعلااااي
عبدالهادي :لاقنهن مش متربيات الله يسامح تربية باتي لاقنه رباهن وخواتي ينضرب بيهن المثل
انا:انكبت علي اميه ساخنه من جوا قلبي وقعدة يانعلاي ياخوي الغافل يانعلي ياباتي وطيت روسكم يانعلي درت العار اي مثل هذا يانعلي العيب مش في تربية باتي العيب في نا يانعلي..
قعدت علي الحال هذا 3 ايام وانا اغاني ف وذني وخلاص لاصلاه ولاخوف من الله حتي لوصليت صلاتي من غير خشوع هك وخلاص
وقبل موعد الجامعه ب 3 ايام وانا حالتي حاله نحكي مع خطيبي ويقولي كنك ونا نقوله متضايقه ....
محمد :حبيبي نبي نسألك
انا : نعم
محمد :لما تقعدي متضايقه شن تديري
انا:نسمع اغاااااااني ونضلم الدنيا ونحط راسي تحت المخده
محمد:وحولت ضيقتك
انا:لا 😢😢
محمد: انا حبيبك وعندي لك حل عشان معش تضايقي ..
انا :كيف قولي (في عقلي كان تعلم اه ياعيوني)
محمد: توا ندزلك تسجيل اسمعيه
انا :باهي حبي
جني 3 تسجيلات وكانت التسجيل الأول ........
يتبع 💖
