Casanova's Club #2: Unwritten Rules

Chapter 2

"Can we just end this pain
and rest forever?"

NARITO kami sa reception. Nasa isang bilog na table kaming magkakaibigan. Kanina pa natapos ang program at nagsasaya nalang ang lahat.

"Ang kapal ng mukha, nakakainis!" Sabi ni Kelly pagkatapos kong i-kwento ang nangyari kanina sa parking lot with Jero.

"Hayaan nalang natin siya." Sabi ko.

"Argh! Gusto ko siyang sabunutan!" Sabi pa niya.

Huminga ako ng malalim. I should be happy today dahil kakakasal lang ng kaibigan ko pero ang hirap kasing maging masaya kung dinudurog ka ng sarili mong puso.

"Maleha."

Tumingin ako kay Rocky sa tabi ko. Inabutan niya ako ng tissue.

"Ano 'yan?"

"Umiiyak ka na naman."

Kumunot ang noo ko. Hinawakan ko ang pisngi ko at may luha akong nakapa.

Grabe naman, sa sobrang sakit na nararamdaman ko, namanhid na ako at hindi ko man lang mamalayan pa na umiiyak na naman ako.

"Hay, Maleha, alam mo? You should take a rest. Tapos na naman ang wedding and program." Sabi ni Kelly.

Ewan ko ba. Gusto ko rin namang magpahinga pero sa tuwing nasa condo na ako, mas nalulungkot ako.

Iyong dating maingay na unit dahil sa kulitan namin ni Jero, wala na. Iyong unit na punung puno ng pagmamahal, wala na rin.

"Maleha, uy."

Napahawak ako sa dibdib ko. Hindi ko na napigilan pa ang sarili kong mapahagulhol. Sa tuwing maaalala ko iyong mga times na magkasama kami ni Jero... sobra akong nasasaktan.

"Rocky, ihatid nalang natin si Maleha sa condo niya. She really need to take a rest." Sabi ni Kelly.

Umiling ako saka pinahid ang luha ko. "K-Kaya ko naman e. Naaalala ko lang kasi..."

Hangga't maaari, mas gusto kong nasa labas ako dahil mas lalo lang akong nasasaktan kapag mag-isa lang ako sa condo ko. Lahat kasi ng alaala, bumabalik. Lahat lahat.

"Maleha naman. No, you should take a rest."

Inalalayan ako ni Kelly sa pagtayo. Hindi na ako tumanggi. Gustuhin ko mang manatili rito, pakiramdam ko ay naaabala ko na rin sila sa halip na nagsasaya sila.

"Kelly, kaya ko namang umuwi mag-isa. I-enjoy niyo nalang ang gabi, okay?" Sabi ko.

"Hindi, Maleha. Ihahatid ka namin."

Hinawakan ko siya sa mga kamay niya. "Thankful ako sa pag-alalay niyo sa akin. Pero okay lang talaga ako. Luha lang 'to. Sanay na sanay na akong umiyak. Wala lang 'to. Nasa katinuan pa ako ng isip kaya kaya kong mag-drive."

"Ihahatid ka namin, Maleha." Sabi pa ni Rocky.

"Please, guys?" Pakiusap ko.

Kaya ko namang mag-drive e. Hindi naman ako lasing para hindi kayanin. Saka ayoko talagang alalahanin pa nila ako.

"Maleha..."

"Sige na guys, mauuna na ako, okay? Enjoy the night. Kapag lumabas pa si Cath, just tell her na umuwi na ako kasi sumama ang pakiramdam ko."

Niyakap ako ni Kelly. "Please be fine, okay?" Aniya.

"Maleha, magsend ka ng message kapag nasa condo ka na." Paalala ni Sam.

Tumango ako sa kanila. Ngumiti ako at ipinakita sa kanilang maayos lang ako. I grabbed my pouch under the table.

Umalis na ako sa reception area saka dumiretso sa parking lot kung saan naroon ang kotse ko.