لستِ وحيدة || سارة مزهر
مهم كلش ان تركز شنو دتخسر بحياتك بس الاهم تفتهم ليش أنت بالذات تخسر دائماً..
كملت تبديل لبست تنورة طويلة بيضة بيها شدة من البطن على شكل وردة وقميص أصفر فتحت شعري ورفعته بس من الجوانب وخليت بيه شريط ابيض, حطيت كونسيلر شوية جوه عيني وحمرة بصلية وماسكارة و احمر خدود وطلعت من الغرفة, طلع تعييني الحمدلله بعد انتظار سنة بالصحة بمستشفى الشيخ زايد للطوارئ درست تمريض حتى بس اتعيين بالصحة وللأسف امكانيتي ماجانت تسمح ادرس طب ولا حتى وضعي مع العلم اني جنت كلش شاطرة, بنفس السنة مال السادس ابوية مات الرجال اليتسمى اب بكل معنى الكلمة راح وعافنا اتعرضت لصدمة قوية كلش بس مع ذلك بالكوة درست وطلعت معدل حتى ادخل كلية حكومية مو اهلية لان وضعنا المادي مايسمح وهسة الحمدلله طلع تعييني وصرت رسمياً موظفة واكدر اعيين امي واختي.. نزلت جوه مريت بغرفة سما بنت خالي بعدها نايمة من اشوفها واشوف نفسي الاحظ فرق شاسع بيننا من هواية نواحي مرات اقارن نفسي بيها ومرات اكول لا ميهم كل واحد واله قدره ونصيبه و وضعه..
اذا احجي عن سما شوية مجنت اعرفها قبل مايموت والدي قبل خمس سنين وره ما مات ابويه اجينا عشنا يم خالي هوايه كلش لح علينا حتى مانبقى عايشين وحدنا بيت ايجار من عشنا يمهم جنت اني انظف وهي لا متنظف اني اطبخ وهي لا, امها تحجي البيت وصخ امي تكول كومي نظفي انتي خطار وهي صاحبة بيت لازم احنا نشتغل.. اني ادرس وحدي وهي مدرسيين خصوصي لكل المواد هي رسبت وعادي عد ابوها وامها اني جانت امي تضغط عليه حتى انجح واجيب معدل, هي تشتري كل شويه ملابس وسوي شعرها يم مراكز التجميل اني اذا اريد اهتم بنفسي لازم انتظر امي تنطيني 10 الاف مصرف بالشهر واشتري جرجير واسوي شعري خلطة حتى اجمع فلوس واشتري ملابس او اي شي اني اريده.. الفرق الشاسع بيني وبينها خلاها تنام لحد هسة بغرفة وحدها واني ويه امي واختي بغرفة.. مو حسد هذا الي احجيه بس وضع صعب طول عمري عايشة بيه.. نزلت للمطبخ امي جانت كاعدة تسوي ريوك لان اني راح اروح للشغل كعدت من الصبح علمودي..
