#لستِ_وحيدة
البارت الثاني
مرات هوايه نسأل.. ليش هيج يصير ويانا؟
مرة نسأل نفسنا, ومرة نسأل الحوالينا, ومرة نسأل الظروف, ودائماً نسأل الله.. محد يجاوب بس الجواب المتداول من زمان هو كل شي يصير النا بيه صالح.. شنو هو الصالح مانعرف بس الايام كفيلة بأن تراوينا ياه.
بيت خال تقى الساعة ستة..
-تقى-
كعدت على صوت امي من البارحة اني نايمة من القهر بقيت نايمة وماعفت فراشي النهار كله..
وسن: تقى يلا اكعدي ب6 صارت يلا حتى تلحكين
كمت من المخدة مغمضه عيوني وشعري مكفش وتشيرتي نازل من على جتفي رفعت التيشيرت وسألتها بنعاس: على شنو الحك؟
وسن: تنظفين البيت قبل لا ترحين للدوام الاء البارحة هواية حجت وسمعتني كلام واني مابيه حيل لكل هل حجي
فركت عيوني وباوعت على امي للحظة عبالي تشاقة..
تقى: صدك تحجين؟ مكعدتني ب6 الصبح حتى انظف الهم البيت
وسن: من الحجي يمه.... مو تعب كلبي بس من الحجي الميخلص
كعدت يم رجلين نورس وكامت تبجي بصوت ناصي..
وسن: تعبت منهن ثنينهن يسمعني حجي واللكمة حصرة عليه راتب ابوج التقاعدي بالكوة يكفينا كلنا سوه افكر اصفن شلون تكضي الايام بعد واني وحدي وثنين بركبتي...
عفت فراشي وبدلت تشيرتي وبجامتي بدشداشه عادية مال تنظيف شديت شعري كله كباية قبل ما اطلع من الغرفة كتلها: بعد ما اخذ فلوس من التقاعد وانظف قبل ما اطلع للشغل وانتي لا تبجين.
عفتها وطلعت, انتي تعبانة ماما زين اني متعبانة؟ مو هموم الدنيا فوك راسي دائماً من تحجي امي تحاول توصلي فكرة ان اني حمل عليها حتى لو متكول هيج بس اني هذا الافتهمه من كلامها نص كسرتنا بسببها.. نزلت للبيت الجوه رحت للحمام غسلت وجهي باوعت على نفسي بالمراية عيوني كلها مورمة من البجي.. كافي بجي تقى لشوكت تبقين تبجين اني ما اكرهه واحد بيهم بس فراس وكرهته بسبب تصرفاته السووها ويايه بس اني ما اكرههم ليش هيج يسوون ويايه لو اني احتمال متحسسة زايد و واجبي ان انظف ويحجون عليه بدون ما اجاوبهم..!
حتى لو عيوني بجت كلبي ساكت ابد ماحجه طول الخمس سنين واني ادري بيه يريد يبجي.. يعني مثل ميكول مظفر النواب
ادري بيك تريد تبجي
ابجي وحدك وانا ساكت..
بس حتى البجي ميطلع هل حركة البصدري.. واني افكر ومهمومة كملت تنظيف بحدود السبعة ونص صعدت للطابق الفوك بيه ريحة منظفات ديتول ومعطر ارضيات, دخلت للغرفة جانت نورس تاكل بلفتها وكدامها كتاب الرياضيات تراجع..
