لستِ وحيدة || سارة مزهر
البارت الرابع
***
شبيها هسه لو صار النريدة؟
زين هو شنو النريدة.. حياة سعيدة! بيت وفلوس..
اصدقاء..
انسان يحبنا.. يبقى ويانا.. يلزم ايدنا بالوقت نفسه من يعوفونها حتى اهلنا..
هذا الانسان هو بس راح يكللنا..
أنت مو وحدك.. أني وياك.
-تقى-
طلعت من البيت لابسة تنوره كبس سوده و بدي اسود راهي ويه حد التنوره .. شعري لميته وشديته كله كعكة.. ما اخذت شي ويايه لا ملابس لا جنسية.. بالبداية عبالي طالعة اتمشى بس مجنت اعرف وين اريد اوصل بالمشي بقيت ساعة اتمشى.. تعب بجسمي كله حسيت حتى وكفة بعد مابيه اوكف, صرت قريبة على شقتنا القديمة من جان ابويه عايش. رحت عليها.. دخلت للعمارة.. صعدت بالمصعد ودست على الطابق الثاني.. نزلت من المصعد ووكفت يم باب الشقة.. الطابق ضلمة كله وماكو صوت.. بقيت اباوع على بابها.. ماعندي المفتاح سلمناه وره موت بابا.. وماعرف اذا جانو ناس مأجريها وكاعدين بيها.. مشتاقه لابويه اريد مكان احس هو بيه موجود بس ماكو عفت الشقة ونزلت على الدرج لحد ما طلعت من العمارة.
