مثل كلشي بعده بالبداية..
مليان حيرة, واسئلة.. وشوية تفاصيل مرهقة..
هو هيج الحزن.. بس يختلف عن المشاعر الباقية بأن يسبب حركة بالكلب ودموع تنبجي بدون مانلكه سبب الها..
يبقى الحزن ياكل بينا مثل آفة تأكل بنبات اخضر صغيرة.. وعنده حلين لو يقاون لو يموت..
واني قررت اقاوم.
-تقى-
بقيت ساعتين ادك بالباب وابجي لحدما تعبت وكعدت يم الباب باوعت على الساعة المعلكة بالحايط صارت ب2 ونص الفجر.. نعست وتعبت ومحد فتحلي الباب, كمت من مكاني دايخة كلش احس الدنيا تفتر بيه.. واني امشي حتى اوصل للجرباية مريت من المرية البصف الجرباية باعت على نفسي شصاير بيه.. الكحلة نازلة من عيني بسبب البجي وخشمي احمد وعيوني نازلات.. ياربي يعني يوم الاريد اتونس هيج يصير بيه ؟ ليش هل ناس ميخلوني افرح؟ ليش بكلشي تطلعلي سالفة بدلت وحطيت مكياج وحاولت اتأقلم واتونس وماسمحلولي.. كعدت على الجرباية وره شويه مددت ماتغطيت ردت بس انام جان التبريد مشعول ومطفيته.. يارب انت تشوف كلشي احميني منهم كلهم.
نمت ومحسيت على نفسي الا من هاجر تكعدني..
-تقى... تقى يمعودة اكعدي
فتحت عيوني واحس متكسرة اكثر.. حطت هاجر ايدها على كصتي..
