#رواية_أبي_والغزلان_الجزءالثاني
#للكاتبة___REEM___ريام_هادي
#البارت_الرابع_والعشرون
اسألك يـاگمر وبگلب مجروح
هـم تشوف ولفي وتعرف أخباره
أحترگ گلبي احس بنـار الاشواگ
وراح إلي يطفي من الگلب نــاره
وراح ومــاسئل لايـدري بـالحـال
وعلى حالي بقت الناس محتاره
ومثل حال اليتيم العـاشر النوح
حزين ويبجي وحـده وگـاعد بداره
ومثل أعمـى صـرت غدرتـه دنيــاه
المـايعـرف الليـل وضيع انهــاره
هيج اني صـرت هجـرتني الافـراح
وبقـت بس الدمــوع بخـدي تتجـاره
ريم : قروا اليوم الفاتحه وكطعو حقي ثاني مره تصير بس وين الاولى وين الثانيه بالاولى جنت فراشه طايره بين الورود مالكه الورد كله الها واليوم طيره مذبوحه بس يحاولون يداون جرحهه كاعده بصف رجال غير حسين غير الي تمنيته غير الحلمت بيه انسان مااعرفه ولا اكو مشاعر تربطني بيه ولا حتى لغه حوار بس مجرد قسمه وصارت
لبسني الحلقه كل حركه تصير ينعاد عليه يوم المهر مالتي ويه حسين بس الفرق هناك الضحكه تشك وجهي والفرحه اطير من گلبي وهنا هادئه وبس ابتسامه مجامله جنت دوم اكول شلون الوحده تتزوج المتحبه شلون تكعد يم رجال غريب متعرف شى عنه ويلزمها ويحجي وياها وتتسمى على اسمه شلون تكدر تنام وتكعد وتاكل وتشرب ويااه وهي متعرفه قبل وعادي حياتها ماشية وساكته ومتقبله الوضع سؤال شكد جنت اسأله واليوم داعيش مثلهن
سامر : مبروك
ريم : الله يبارك بيك
زينه : صرتي مرت اخويه وحضنتني وتبوس بيه
ام سامر : بلخير بنيتي مهنايه ان شاء الله
ريم : شكراً خاله
اباوع على خواتي الي مفضوحه عيونهن القهر كاتلهن عليه ولا وحده منهن تجاملني كلهن مقهورات صحتهن تعالو اريد صوره وياكم
انطيت الموبايل لزينه اخذيلنا عفيه
كعدو يمنا سليل ورشا وغزل واخذنا صوره واشرت لجنات تصيح عمه وتجي وهم نفس الكعده كلنا بس ويانه جنات وعمه باركولي بس الدمعه بعينهن
ام سامر : بنتي تردين مهر حفله جبيره ونجيب النيشان
سامر : اني اشوف ماله داعي منا لشهر نتزوج شتكولين
ريم : براحتكم
سليل : مو بسرعه
سامر : اني كلشي كامل عندي بس غرفه النوم تختارها ليش بعد نأجل العرس
نهر : شتكولين بنتي
ريم : براحتكم
هاي الكلمة الوحيده الي جنا نسمعها من ريم بكيفكم وبراحتكم وعلى هذا الاساس مشت الايام
نركض ونجهز للعرس وهي ويانه بس جسد بلا روح هادئه بشكل عجيب
واجت رشا من الكوت حاولنا نفرحها بس هي مثل كل مره تبتسم بسمه عاديه وتسكت نريدها بيوم تفرح ماكو
باجر زواجها واليوم الحنه بيناتنا سويناها
رحنا للصالون كلنا ردنا نشجعها واجرنا بدلات حتى جنات نزعناها الاسود كافي صار سنين لابسته واستلمتنا ام الصالون وحده وحده من خلصنا نباوع الوجوه انگلبت وحده احلى من الثانيه بس جان التركيز على ريمو كلنا تسريحات اله غزل مقبلت تنزع الحجاب رغم بس نسوان لحد مقنعتها ام الصالون تسوي بلربطه جانت ستن على شكل عنق يغطي الحرق وفتحت شعر غزل الجان اطول شعر بينا نازل جوه ظهرها
ام صالون مباشره كالت والله شعر يخبل ومباشره عاطت رشا بيها صلي على محمد
ام الصالون : اللهم صلِ على محمد شكلت عيني
رشا : ماكلتي بس شهكتي
ام الصالون : هههه لا عيني ماشهكت
رشا : ذكرني من نرجع انطكطك حرمل اكو ناس عينها مالحه تحسد
سليل : ااخ منج رشا ولا تسكت
وبدت تشتغل بشعر غزل الي طلبت تسريحه على طول شعرها وتضفر هنديه براسها جانت تسريحه تخبل وغريبه
رشا : اجه شعلان وسجاد ياخذونا يله ولجن عمه وحدها
أنت تقرأ
رواية ابي والغزلان للكاتبة ريام هادي (REEM)
Lãng mạnالقصة منقولة للكاتبة ريام هادي (القصة حقيقية)
