بقلم : دنيا زاد
ريان صحت الصباح بدري و زي كلو يوم اتوضت وصلت الصبح وقعدت تقرا قران لحدي ما الشمس طلعت بعدين مشت تشرب الشاي في المطبخ شربتو كلو جغمة وحدة لانها تقريباً البت الوحيدة في السودان الما بتحب شاي اللبن،مشت استحمت ولبست للجامعة وختت تلفونها في الشاحن وبعد سرحت شعرها وجهزت طلعت التلفون ويلا على الجامعة ما فكرت تمشي لي دلال لانها متاخرة شوية ركبت المواصلات وقعدت في كرسي النص، ما بتتضايق هي من كرسي النص لانها اصلا ضعيفة بتكون مرتاحة فيهو عادي بس المشكلة الراجل العلى يمينها دا قاعد يتلصق فيها وعامل رايح هو سمين واي حاجة لكن الحتة واسعة لانو في فرقة كبيرة بين الكرسيين بس هو مصر يتلصق جنبها وخاتي شنطتو في الجهة التانية من الكرسي وعامل فيها بتكلم بالتلفون هي ما عرفت تتصرف في الموقف دا لانها ما بتعرف تتكلم في المواصلات عكس صحبتها دلال لو كانت معاها ما كان حصل كدا لانو دلال مع انها ناعمة ومدلعة لكن في المواصلات دي ما بتهظر وحركة زي دي كان كوركت في الراجل ولفتت الحافلة كلها عليهو، ريان زعلت شديد وحست بالحقارة و(في نفسها)يعني هم لي بعملو كدا الرجال ديل ما البنات الصايعات قاعدات ما يمشو يشوفو حياتهم العفنة دي معاهم ويخلو بنات الناس والمشكلة رجال كبار المفروض يكونو محترمين لكن هم بالعكس مستغلين الحاجة دي عشان ماف زول بسالهم مع انو في الدين ربنا قال القلم مرفوع من الزول الصغير الما بالغ واتكلم عن الحريم الكبارفي حتة معينة لكن ما جاب سيرة الرجال نهائي ولا قال انو كبر عمرهم بشفع ليهم حاجة الزول بتحاسب من يوم يبلغ لحدي ما يموت بنفس الطريقة ربنا ما ختا العمر عذر، لي الناس بتختو؟ ،يحترمو الكبير ايييي طالما انو ما بعمل في معصية او غلط غير كدا المفروض يحاسبو اي زول يغلط ،النصيحة دي ما قلت ادب ،انا بقيت حاسة انو الدنيا دي بقى ما فيها خيير،الراجل الحمار قرب منها تاني شوية زحت منو لقت نفسها خلاص زحت على الزول الجنبها شديد قبلت وشها قرفانة دايرة تشوفو يمكن الزول دا يبدلها عاينت ليو كدا لقت شكلو شماسي شماسي حست انو ما حيبدلها نهائي فجأة قام هو انتبه ليها واستغرب نظرتها دي وكانها خايفة واستغرب انها قريبة كدا من كرسيو عاين في الراجل الجنبها وفهم الحاصل وفجاة بقا هو والمعاهو بكوركو في الراجل :ههووووي انت يا حبيبنا دا شنو خاتي شنطتك في الكرسي وعاصر البت دي بي جاي والجنبو برضو بردح معاهو ،الراجل كان دايرة يتلاءم معاهم لقا الحافلة كلها قبلت عليهو وزلوهو زلة الكلب والسواق وقف العربية والكمساري نزلو ،هي في اللحظة ما قادرة توصف احساسا انبسطت شديد عشان شاكلوهو وكانهم كلهم اهلها ،لا انا غلطانة اكيد الدنيا دايما بيخيرا ،ريان شكرت الولدين الجنبها ونزلت من الحافلة مبسوطة ومنتظرة متين تصل الجامعة عشان تحكي لي دلول .
وصلت الجامعة ضربت لي دلال سالتها هي وين ومشت ليها،حكت ليها الحصل كلو ودلال خلت القصة كلها وبقت تشاكل فيها انتي جبانة مالك كان طعنتيو بالدبوس
ريان:هههههه ما مشكلة المرة الجاية
دلال طلعت دبوسة وادتا لي ريان:هاك
ريان:(في نفسها)سجمي البت جادة
ريان:انتي المحاضرة مالها ما بدت
دلال:لغوها
ريان:شنووووو ياخ ما ممكن انا جاية من البيت ساي ما قادرة اصدق بعد الدراما دي كلها
دلال:تعالي الكفتريا نشتري ونشوف الباقين وين
ريان:يلا ارح
مشو اشترو من الكفتريا سندوتشات وبارد وضربو لي هدى لانو دلال عارفاها جات وصفت ليهم مكانا ومشو لقوها بتفطر قعدو معاها يفطرو ويتونسو ريان حكت لي هدى موقف قبيل
ريان:انا خفت من الولد ما قدرت اقول ليهو يبدلني
هدى:لي
ريان:ما عارفة اداني احساس
هدى:غرابي؟
ريان:بسم الله الدخل الغرابة شنو
دلال:شكلو شماسي نفس استايل اخوها حركات الاولاد ديك يعني
ريان:لا دقيقة انتي سالتيني كدا لييي
هدى:هههه دايرة اعرفك عنصرية ولا لا
ريان بي صرة وش:لي كدا يا هدى انتي عارفه زول عنصري معناها مريض وجاهل بس يعني انتي قصدك انا كدا
هدى:لا والله انا بس بهظر معاك اصلا العنصرية دي عند الكيزان بس الله يسخطهم عملو الحرب في بلدنا
ريان:عند الكيزان والجيل الفات عشان تربية كيزان هم
هدى:ههههههه انتي عندك ممشكلة مع الجيل الفات
ريان:وانتي عندك مشكلة مع الكيزان
هدى:كلنا عندنا مشكلة مع الكيزان
ريان:مممم صاح ،وقعدو يضحكو التلاتة
دلال: يعني انتي يا هدى من الغرب
هدى:اييوة من منطقة دارفور
ريان: قاعدة تمشي الاجازة لاهلك
هدى:لا هم اغلبهم ساكنين هنا في الخرطوم بمشي اغير جو بس
ريان ودلال في نفس الوقت :تغيري جو وين
هدى: قاعدين نمشي جبل مرة ما شفتو الصور البرسلا ليكم في الجازة
ريان وودلال عاينو لي بعض مخلوعين
ريان:انا قايلاك منزلاها من النت ما قايلاها حتة في السودان اصلا ومتخيلاك بتهظري لمن تقولي لينا انا قاعدة هنا
دلال: واحلى حاجة لمن تقول لي اجيب ليك عسل بقول ليها لالا كفاية نفسي ،لا انا ما بعرف دايرة عسلي
هدى:ههههههههه والله كلو سنة بنمشي
في اللحظة دي جاتهم لميس ومنى وهديل سلمو وقعدو
لميس عانو يا بنات اها حتسعادوني في الشغل الليلة
دلال:اليوم الثقافي؟
لميس:ايي
منى:حنعمل شنو نحنا؟
لميس:بس زينة وحاجات زي دي انا رئيسة لجنة التزيين لكن ما لاقية ناس كتار معاي اي زول بسالو بلاقو عندو حاجة تانية والمشكلة الزينة حقت الحفلة كلها علي حتى المعرض
هدى:لا حول ولا قوة الا بالله دا شغل كتير ي بت
لميس:اسوي شنو انا غبية مسكت اكتر شغل في اليوم الثقافي
ريان: يعني ما معاك ولا زول؟
لميس:معاي خمسة اولاد من دفعتنا وواحد فاينل
ريان: يعني كدا نحنا12ما بطال لكن مفروض نشتغل كتيير
منى:الحاجات جبتوها؟
لميس:لا الادوات جاهزة بس باقي نشتغل
دلال:يلا خلاص نبدا من هسي اضربي ليهم
لميس:ضربت ليهم قالو نص ساعة كدا بجو
ريان: الاولاد ديل منو من دفعتنا
لميس:انتي بتعرفي منو
ريان:ولا زول
لميس:طيب ما تسالي
هدى:اجي ونشتغل معاهم ساي قوليهم يمكن نكسر حنك ونخليهم يشتغلو براهم لو ما كسارين
لميس:هل سمعتي بحاجة اسمها اولاد جامعة كسارين
ريان:عادي في ناس كدا بس قولي ما في جامعتنا دي لكن الجامعات التانية الناس بتجكس وتعرس من الجامعة
منى:بري البعرسو ناس الجامعة ديل متخلفين بس اوعة وحدة فيكم تعمل كدا يا بنات
البنات كلهم بهبالة:حااضر
منى:اها يا لميس ديل منو
لميس:طيب الولد الفي السنة الاخيرة دا اسمو ايمن بتكونو بتعرفو متحمس كدا وداخل في اي حاجه في الجامعة وبعرف الناس كلهم تقريباً
دلال:اييي بعرفو دا متوفر بكثرة
لميس:ما تقاطعيني ،دلال حمرت ليها
لميس:تاني في احمد ولد دفعتنا ومعاهو ماهر صحبو ومتوكل ثلاثي كدا ما ظاهرين شديد بتعرفوهم؟البنات قعدو يضحكو فجأة،لميس:مالكم؟
ماف زول ردا عليها
هديل :بي رزانة كدا لمن حنت على لميس لانو شكلها اهبل وهم بضحكو:بضحكو على متوكل دا
لميس:بتعرفوهو؟
دلال بشماتة :في ولد في دفعتنا اسمو متوكل ههههههه عارفاهم ما نافعين لكن ما قدر دا، البنات كلهم هههههههههه
لميس:ليي يعني مالو الاسم؟
هدى:اسم عجايز
لميس:لييي ياخ ما قدر دا اسمو عادي
ريان:انا غيتو اعمامي واهل ابوي كلهم اسماءهم كدا فانا اتففق مع دلال
دلال:ما يكون شين كمان
لميس:لالا ياخ سمح
هدى:سمح كيف زي اسمو
البنات تاني قعدو يضحكو
لميس:انتو دايرين تضحكو بس والله
منى:وانتي مالك يعني زعلانة ليو ما تكوني معجبة بس
لميس:معجبة في عينك المهم يا بنات تاني في ولدين ادم وعبدالله
ريان:طيب ما عرفت ولا واحد فيهم لكن ما مشكلة هم لي اتاخرو هسي
دلال:بكون متوكل دا ضهرو واجعو
البنات هههههههه
لميس:رسلو قالو قربو
منى:يلا نشوفهم يطلعو كيف تعالو نراهن فيهم الاحلى منو والبتطلع كلاما صاح تفطروها بعدين وتركبوها المواصلات
هديل:انتي بتفطري كم مرة
البنات ضحكو على منى وقبلو التحدي
ريان:انا براهن على ماهر اسمو حلو
دلال:لميس انتي برا لانك شفتيهم
لميس:حرام عليك والله ما حافظة اشكالهم انا شفت احمد بس من قريب سجل لي اسماءهم
دلال:كويس انتي احمد دا
لميس :البت دي حقارة خلاص واقفة لي في حلقي
هديل:انا عبدالله
هدى:وانا ادم
دلال:انا ايمن
عاينو في منى وقعدو يضحكو فيها لانها حتختار متوكل
منى:هيييي دا ظلم انا ما راضية و...دايرة تردح كدا الاولا ظهرو
احمد سلم على لميس وعليهم وبقى بعرف فيها
احمد:ديل شلتي يا لميس ماهر ومتوكل وايمن وادم وعبدالله
كلهم كانو عاديين ووجيهين حبا ما عدا متوكل والبنات اتصدمو فيهو لانو كان سمح سمح لابعد حد ونضيييف، لمن اتخلعو انو بقرا في الجامعة اصلا لانو شكلو احساس موظف طيران بس
عاينو كلهم مغيوزين لي لميس الهبلة الما بتعرف تعبر وبعدين عاينو لي منى المصدومة
منى طلعت من الصدمة وقبلت عليهم متبسمة: بعدين ما تنسو اتفاقنا يا بنات
البنات ضحكو مع نفسهم بعدين ركزو مع لميس لانها بدت تشرح ليهم يعملو شنو
وبدو الشغل البنات بقصو الزينة والاشكال والاولاد بعملو في بوسترات تعريفية لاي قسم .
لميس انتو يا جماعة قاعدين في الدفعة دي من زمان اصلا ما قاعدة اشوفكم
احمد: قاعدين انتو الما ظاهرين
لميس:لا والله انا غيرك انت ما بعرف زول وانت زاتك شفتك بعد اشتركت في اليوم الثقافي
منى:بكونو شلة الحفارين الغتيتين ديك
متوكل جا قعد جنبها عشان يشيل المقص :غتيتين منو احنا وضحك عارفين ضحكة الناس السمحين كيف
منى اتبكمت
دلال بتوسوس مع ريان:عان منى عاملة فيها مهترشة وكهربتها زايدة عان ليها مسكينة ومودبة كيف هسي
ريان: عشان قعد جنبها ههههههه ما قادرة تتكلم
ايمن:انتو كلكم يا البرالمة ما ظاهرين دفعتكم دي ميتانة شديد
دلال:انتو الدفعتكم فايرة
البنات كلهم ضحكو على قصف الجبهة
ماهر:دفعتهم عادية
البنات عاينو ليهو بطرف عينهم
كمل كلامو:ايمن براهو فاير
كلهم ضحكو
ايمن:انتو ما قريتو لائحة الجامعة
لميس:فيها شنو كمان
ايمن:فيها شنو فيها انكم لازم تبرو بسنايركم
هدى:اول مرة اسمع بيها بر السناير دي
ايمن: عشان انتو برالمة مستهترين ما بتمشو تقرو اللائحة
عبدالله:انت تبع اتحاد الطلاب ولا شنو من وين جبت الكلام بتاع اللائحة دا
ايمن بخلعة:انا ....انا كوز يا برلوم يا حشرة انت وانفعل شديد وبقا بكورك انت تشبهني بالكيزان انا........
عبد الله مبتسم وباقي الاولاد بضحكو فيهو والبنات خافو وما فاهمين حاجة لانو بكورك ومنفعل
احمد بصوت واطي :هو بكره الكيزان شديد لمن نكون دايرنو ينفعل بنقول ليوكدا،عبدالله دايما بعمل الحركة دي
البنات فهمو الحنك وبقو بضحكو لانو لسا بكورك وبردح وما هاميو نظرات الناس
البنات تقريباً كملو شغلهم والاولاد فضل ليهم حبا ولانو الوقت اتاخر قررو يكملو الباقي في البيت قامو الاولاد لمو ايمن دا اول حاجة عشان يرجعو البيت وادو ارقامهم لي لميس عشان تعمل ليهم قروب واتس للجنة الزينة اللهي عبارة عنهم ال12 واستاذنو من البنات وطلعو من الجامعة مع بعض
البنات مشو يصلو العصر ومشو يشترو لي منى فطور وشبسيات وبارد واتفرقو بعد داك واي واحده مشت البيت
في البيت ريان بعد غيرت هدوم الجامعة ولبست بجامة ومشت المطبخ اكلت شوية وطلعت رجعت الاوضة رقدت في سريرها ربع ساعة كدا بتحاول تنوم،قعدت تفكر كدا من الملل الهي فيو قررت تمشي لي دلال وتبيت معاها، المرة دي شالت هدوم الجامعة معاها واستاذنت من امها ومشت.
دقت الباب وفتحت زينة
ريان:زينة كيفك تمام
زينة:تماااام كيفك انتي اتفضلي
ريان دخلت ولقت دلال جاية عليها
دلال:خير انشاء الله كلو تلاتة يوم ناطة في بيتنا
ريان:كتر خيري ما دايراك تموتي من الوحدة
دلال:ما محتاجة ليك عندي اولادي فوفو وتوتة وريان الاخير دا مسمياهو ريان عشان ضعيفوني حقارة وتريقة في ريان
ريان:هم لسا ما ماتو بالله
دلال بحقد :تموتي انتي ان شاءالله ما تفولي على اولادي
(اولادها ديل سواسيو بتربيهم لمن يبقو جداد بعدين بترجعهم لي بتاع الجداد الي هو عمو من ناس الحلة زاتا، بضحك عليها دايما في هوايتا الغريبة دي قال يديها عصافير قالت ليهو ما دايرة عصافير الزينة هي بتحب الكتاكيت بس)
دخلو اوضت دلال
دلال:اها نعمل شنو نقرا ولا نحضر ولا شنو
ريان:انا زاتي ما عارفة قراية ما عندي ليها مزاج ومسلسل هسي ماف عشان نتابعو دايرة اشتغل بتلفوني بس
دلال:طيب تعالي نشوف ديلك داخلين ولا لا
ريان فتحت الواتس ولقت كلهم متصل ما عدا هديل كالعادة:قاعدين بس هديل ماف
دلال رسلي ليهم رايكم شنو في اولاد دفعتنا
ريان رسلت
هدى:ما مزز وما شينين عاديين اللهم الا الاسمو متوكل دا
منى:اييي الغريبة ما شفتو قبل كدا مع انو لميس قالت لي مكسر بنات الجامعة كلهم حتى السناير
ريان :متين قالت ليك كدا
منى:هسي في الخاص بتونس معاها
ريان:متين لحقتو ترجعو البيت عشان تقطعو فيهم
لميس:وانتي اسي بتعملي في شنو😠
ريان:بعمل في ملاح 😂😂😂😂
لميس:دي دلال القالت ليك كدا صاح
ريان:ههههه عرفتي كيف
لميس:عارفاها دي ما بتفوت فرصة
منى:ههههههه غيتو انا بختي الراهنت عليهو
هدى:اصلا لو ما الغبية الاسمها لميس كان قلتو انا
منى:هوي تاني ما تجيبو سيرتو انا ختيتو في راسي😍😍😍
ريان:السوال هل هو ختاك في راسو؟
هدى:الجواب لا😂😂😂
منى:انا متفائله ما عندي شغلة بيكم بختني يعني بختني
دلال دخلت بي تلفونها:بختك في فتيل بس
لميس:ههههههه اول مرة تردمي زول وما يكون انا
دلال:قلتا انوع
منى:انتو اتمسخرو كدا وبعدين تعالو اتذلو لي عشان اعزمكم عرسي
ريان:انتي مش قلتي ما بتعرسي من الجامعة
منى:دا كان قبل المتوكل😌😍
دلال:نشوف واذا عرسك نذرا علي قروش مكياجك علي
من:انتو لسا بتراهنو ما تبتو
ريان عبدالله دا شكلو ما زيهم شكلو متدين حبا صاح
هدى:اييي عامل دقن انصار السنة دا
لميس:هو وادم أصحاب والتلاتة ديك تقريباً براهم
دلال: خلاص انا عرستهم ليكم عشان انا قنعانة من بورتكم وبما انو منى قالت حجزت واحد بختار ليكم الباقين
هدى:اختاري لنفسك
دلال:انتي بعرس ليك عبدالله عشان يعلمك تحترمي الاكبر منك بشهرين
هدى:انتي حتزليني بالشهرين ديل
ولميس انتي عرسي ادم عشان انتي صحبتا عرسي صحبو
لميس:بري انا ما بعرس حبشي
دلال:هو حبشي!
ريان:وما يبقي حبشي
لميس:ايييي حبشي اثيوبي ما سوداني انا بعرس سوداني بفيلا وعربية برادو وامو ميتة واخواتو برا وانا اسافر معاهو برا تانية غير كدا ما بقبل
دلال:ما على كيفك تعرسي دا بس وهديل نعرس ليها ايمن
ريان قالت لي دلال:يمكن يحركا شوية بدل باردة كدا
دلال:ههههه كنت دايرة اكتب كدا اتذكرت انها في القروب
دلال:وريان لي احمد
هدى:اها وانتي تعرسي منو يعني ماهر
دلال:لا انا بعرس القالتو لميس دا لمن يجي
لميس:شوف بالله شركتي لي عشان تعرسي راجلي
البنات ضحكو وواصلو ونسة وقطيعة في الاولاد عكس الاولاد المن رجعو البيت نسو ايي حاجة عملوها من الصباح ومشو نامو بس وانتهى اليوم دا على القروبين على خير وريان نامت مع دلال وباقي البنات نامو كمان
https://www.facebook.com/روايات-نور-ولجين-108149510945200
