بقلم : دنيا زاد
احمد لقا فكرة عشان يزوغ بيها من مقابلة مرة ابوهو ديك من غير ما ابوهو يشاكلو،ببساطة قرر انو يمشي لي صحبو ماهر يقيل معاهو وما يرجع الا متاخر ويقفل تلفونو على اساس انو شحنو كمل ،فكر انو ابوهو ما هين ويمكن يخليهو يفتح التلفون ويتاكد من الشحن عديل فلازم يكمل شحن التلفون حقيقي اتذكر حاجة وطوالي كورك لي ورد
احمد:وررررد وروووودة
ورد:ما جاية اشرب مويتك براك
احمد ضحك في نفسو: تعالي هاك
ورد:ما جاية انت كذاب
احمد: والله ما بكضب عليك تعالي هاك دا
ورد:ماااااا بجيك
احمد: يعني ما جاية كويس خلاص
طبعاً اسلوب الحرب النفسية دا بس البنفع مع اختو غير كدا ما كانت حتجيو
ورد جاتو واداها التلفون تلعب بيهو ما صدقت وانبسطت شديد ،وكاي شافعة عبيطة فهي ما حتفكو الا البطارية تخلص ودا الدايرو احمد
احمد مشا يحضر التلفزيون واستناها لمن كملت البطارية وقفل وشالو منها من غير ما يسالها شحنو كم عشان بعدين يعمل رايح وطوالي لبس وطلع لي صحبو ماهر وما كلم زول غيرها هي لانها في الغالب حتنسى تكلمهم الا لمن يسالوها بعدين لمن يكون هو مشا وخلاص.
احمد ركب العربية حقت اخوهو وحرك لي صحبو ابوهو عندو عربيتين وحدة حقتو ووحدة حقت اخوهو محمد ،جابها ليهو لمن دخل الجامعة كان مفروض يجيب لي احمد برضو لكن حصل الحصل وبقا ما فاضي مع مشاغل مرتو الجديدة واحمد ما اتكلم لانو عربية اخوهو كفاية وهو ما زول بتاع مظاهر وحركات، عربية اخوهو بتكفيهم الاتنين واصلا اخوهو مشاويرو ما كتيرة هو بركبا اكتر ،وصل لي ماهر دقاا الباب فتح ليهو سلم عليهو وقعد بالصدفة الجمية طلع اهل صحبو كلهم بايتين برا وهو ما بات معاهم عشان ما بحب اللمات العائلية فالبيت فاضي ليهم الاتنين يعني حياخدو راحتهم
احمد:قللتي لي يا مان ما طلعتا مع اهلك لي
ماهر:ياخ ناس البيت ديل ما جادين ياخ ماشين بايتين عند ناس خالتي الكانو بايتين معانا امبارح فاهم انهم طلعو من هنا ديك مشو وراهم
أحمد:ههههههههه ما موجزين الشفع ما عندهم قراية امك ما قادرة تصدق
ماهر: والله بيني وبينك شكلو عشان كدا لانو لمن المدرسة تفتح امي دي ما بتلقا فرقة بالجلالة بتلقا زمن تصلي
احمد:اخوانك زاتهم صعبين الزول ما بقدر على ولد واحد هم جايين تلاتة ماشاء الله
احمد:اييي ياخ والله جنس ازعاج التيمان بي حتي ومجتبى الفقر بي حتة تانية وجوطة شديدة ياخ
احمد:اها برنامجك شنو الليلة قاعد معاك لي المسا
ماهر:في شنو كمان ما تكون مرة ابوك جات انت ما بتقعد معاي لله في الله
احمد:ايي ياها استغفر الله العظيم
ماهر:انساها يا زول عليك الله ما تشتغل بيها يعني هي بتقدر تعمل شنو وانت بتصلي وبتتحصن ما بتقدر تعمل اي حاجه
احمد: والله انا يا ماهر ما خايف على نفسي ولا على اخواني لاني بشغل الرقية دايما ومراقبها ما بتقدر تخت ولا تشيل حاجة من البيت لكن انا خايف على ابوي دا القاعد معاها براو وما عارفها
ماهر:انت ما جربت تكلمو
احمد:عبد المعطي قال لي ما اكلمو لان يمكن يقول انا بقول كدا عشان بكرها وما يصدقني واحتمال كمان يكلمها تقوم تعمل حسابها مني قال لي دا حيضركم انتو زاتكم لو هي عرفتك عارفا انت بس اتحصن وقرا وادعي لي ابوك وربنا بفضحا ليهو في النهاية
ماهر: والله قصتك عجيبة ياخ ما كنت قايل السحر دا عادي كدا في السودان متخيل الناس بتطق عين بس
احمد: والله يا ماهر انا زاتي اتصدمت زيك لكن انت عارف الشيخ المشا ليهو عبد المعطي يفك ليهو العمل قال ليهو الحاجات دي كتيرة شديد يا ولدي دايما اتحصن ،الناس الجاهلين كتار ما توقف الاذكار حتى لو طلعت البت دي من حياتك ممكن زول تاني يسحرك، للاسف الحاجة دي منتشرة وماف قانون يحاربا مع انو السحر دا اكعب حاجة والساحر يقتل حدا ولا يستتاب يعني من شدة ما هو موذي في القصاص ربنا ما مديهو فرصة يتوب اصلا والعياذ بالله لكن نقول شنو بس الناس ما بتمشي بي قوانين ربنا لو بتمشي بيها كان حياتهم اسهل من كدا
ماهر :استغفر الله العظيم الله يكفيك شرها مرة ابوك دي
احمد: آمين يا رب اها يعني ما حتضيفني امشي اعمل لي عصير ولا جيب لي مويه ولا اي حاجة
ماهر:طلع 10جنيه امشي الدكان جيب لي روحك براك
احمد شال العشرة:تافه خلاص انت
ماهر:طيب شايل القروش مالك
ماهر كان بتكلم وبركب في البلي ستيشن و بعد خلصو فتحو وبقا بلعب هو واحمد
فتحو اول لعبه سباق سيارات وفاز فيها احمد طبيعي لانو ماهر جبان و ما بحب يسوق بسرعة، بتخلع لمن عربيتو تضرب الحيطة واحمد خلاهو يمشي الدكان يجيب ليهو البارد عقابا ليهو عشان خسر وعشان ما ضيفو ولعبو لعبات قتال وبرضو احمد فاز وبقا يضحك في ماهر ويقول ليهو انت ناعم ساي ما بتقدر على اللعبات الزي دي طبعا دا لو كان واحد تاني كان هاج فيهو لكن ماهر بطبعو بارد وما بشتغل بي كلام احمد كتير هم اصلا اصحاب من الثانوي و متوكل كان معاهم في نفس المدرسة لكن ما كان صاحبهم اتصاحبو في الجامعة لمن كانو في الثانوي كانو بتغاظو منو شايفنو مفتري وماهر كان بقول كدا دايما كان بغير منو لانو سمح ،ماهر سمح برضو لكن متوكل اكتر منو بس ماهر نضيف ومهتمي بنفسو شديد اكتر منهم الاتنيين لمن جو الجامعة ماهر هو الإقترح على احمد انو يصاحبو متوكل واحمد استغرب لانو كان بكرهو في الثانوي فسالو لي يعني بقيت ما شايفو مفتري و ماهر قال ليهو ببساطة:لا لسا شايفو مفتري لكن سمح بلم لينا البنات (المنحرف)،والخطة فشلت للاسف للانو متوكل طلع ما بتاع بنات اصلا بس هم انبسطو منو لانو طلع زول حبوب شديد والافترا دا في شكلو ساي لانو سمح وما اجتماعي شديد اي زول بفهمو كدا ، المهم هم بقو أصحاب شديد واحمد فجأة اتذكر متوكل وقال لي ماهر يضرب ليهو عشان يجيهم ويمشو يصيعو سوا
ماهر ضرب لي متوكل وكملو لعب لحدي ما متوكل جا فتحو ليهو الباب وطلع جايب معاهو اخوهو حسن اخوهو الكبير
بعد السلام وكدا
ماهر :اتفضلو اتفضلو قعدهم ومشا المطبخ واحمد قعد معاهم يتونس
ماهر جا جايب موية وعصير وحلاوة
احمد:يا كلب انا لمن جيتك ما ضيفتني هسي تجيب لي متوكل
متوكل :هههههه يا عوير ما عشاني هو خجلان من اخوي
ماهر:اسكتو ما تفضحونا
احمد:بنفضحك انت بس
حسن:لالا ياخ تفضحو شنو ياخ ماهر دا ابو الزوق زاتو
متوكل واحمد عاينو لي ماهر عشرة عشرة لانو عارفينو لو ما حسن قاعد ممكن يرسلهم هم يجيبو ليهو البارد عادي
متوكل وحسن شربو العصير واحمد شرب معاهم قال لي ماهر يجيب ليهو بما انو عامل فيها مودب
وماهر جاب ليهو وعاين ليهو بنظرة بطلعو من عيونك بعدين البارد دا "طبعا حاقد زي دلال ما بنسا"
بعد خلصو قعدو يلعبو كوشتينة ولعبات جماعية لي العشا كدا تقريبا بعديها قالو يطلعو يشربو جبنة في الشارع الجنب بيتهم قعدو مع ست الشاي وحسن حلف الا يعزمهم و يدفع الحساب، شربو جبنة زابطة و قعدو يتونسو لي الساعة عشرة ونص بعديها اي زول مشا رجع البيت واحمد مشا البيت وهو فرحان طلع من موضوع مرة ابوهو دي.
وصل البيت و جا داخل فرحان وهو مجهز كذباتو لي امو بس وقف مصدوم لمن لقاهم كلهم متلمين في الحوش امو واختو واخوهو و.... لا لا ابوهو ومرة ابوهو واولادا برضو قاعدين لييييي
الاب:كنت وين انت ضربنا ليك ما بترد
احمد:كنت مع ماهر ي ابوي
الاب:ولي ما جيت بدري انا مش قلت ليك نحنا جايين
ماهر:كان عندنا بحث وبسببو تلفوني قطع كهرباء واشتغلنا بي حق ماهر وتاني ما اتذكرت و ياداب انتهينا
ابوهو صدقو ونسا اصلا موضوع التحدي بتاع الحصل الصباح، بس كان مقلق عليهو عشان اتاخر
احمد:انتو بايتين؟
الابو:اييي العربية عطلت لينا بكرة بنرجع بي حقتك
احمد سكت بس وبقا بعاين لي مرة ابوهو محروق.
جاتو ورد شايلة اخوها من ابوها وبتوريهو
ورد:بيشو قول احمد
بشير:اهمد
ورد:هههههههه قول ورودة
بشير:ووودا
وبقت بتلعب معاهو وتضحك
ابتسم احمد لمن شافها مبسوطة وبتضحك كدا دايما الاطفال ايجابين وبشوفو الحاجة الحلوة بس يعني من المشكلة الحصلت ليهم بسبب مرة ابوهم وخراب بيتهم ما ركزت الا في انو بقا عندها اخوان صغار وحتى ما حقدت عليهم او غارت منهم مع انها بتحب ابوها شديد لكن ما حسدت اخوانها الصغار فيهو ،الاطفال ديل بريئين شديد ،عاين ليهم كدا وفكر انو هو لي بكرهم هم كمان هو ما بغير منهم طبعا لانو مخو كبير لكن يمكن عشان متخيل انهم حيطلعو زي امهم وحبوبتهم مادام حيربوهم لكن لا استغر الله دي ما قاعدة يحكم بيها عليهم وهم صغار كدا يعني في النهاية سيدنا موسى نبي مع انو رباهو فرعون وبعد العظمة والجاه الكان عايش فيهم عند فرعون هو خلاهو وقرر انو يكون زول صالح ما يكون ظالم زيو، يعني هم ما شرط يطلعو زيها ،في الحقيقة انا المفروض اقيف معاهم وما اخليهم يبقو كدا .
عاين ليهم كدا بي شفقة انهم صغار ومساكين ما عندهم يد في امهم دي ولا عارفين الراجيهم منها شنو ودعا في نفسو الله يبعد امكم وحبوبتكم ديل منكم يا رب
انتهى اليوم على خير في النهاية احمد ما سلم على مرة ابوهو زي ما كان عايز مع انها نامت معاهم لكن هو راقبا كويس وما عملت حاجة ورقد نام هو كمان.
