بقلم : دنيا زاد
قاعدين في المحاضرة والمعط بتاع الدكتور فجأة لزتا لي قدام
:هيييي خلينا نطلع ياخ انا ما قادرة استحمل
دلال:فضل خمسة دقايق البطلعك شنو
ريان:ياخ الدكتور دا زعاط ياخ خلينا نطلع
دلال:يا ريان انتي قاعدة ليك ساعة ونص وساكتة هسي بس دايرة تطلعي لمن المحاضرة قربت تخلص اتلمي بس .
الدكتور طبعاً انتبه ليهم. لانو دلال انفعلت وصوتها كان عالي وقبل عليهم وطردهم:انتو الاتنين برا .
ريان:بصوت واطي ايوووي
دلال:ما قادرة اصدق وقبلت على ريان والله ما اخليك وريان كتمت الضحكة وطلعو الاتنين.
اول من ما مرقو ريان طوالي فكت الجرية في نص الجامعة ودلال ما دايرة تجري بقت تسرع شوية وتكورك ليها: تعالي خلاص ما دايرة اعمل ليك حاجة
ريان:صدقتك والله اخر مرة، قلت لي كدا كان في الثانوي
دلال:اها وبعدين
ريان:قطعتي لي شعري ،وانا من يوما ما بثق في جملتك دي
دلال: تعالي ياخ والله ما المسك
ريان رجعت ،دلال:ما الليلة لكن لمن تنسي بتسدا فيك.
ريان:انتي لي حاقدة كدا ما بتنسي
دلال:نهائي
ريان: تعالي نفطر
دلال:ارح ي بقرة
ريان:هيييي بقرة انتي ما شايفة نفسك سمينة كيف
دلال:قولي امين ي غبية ما دايرة تسمني
ريان:ريان اتخلعت كدا وباعلى صوت اميييييبن يا رب
دلال قعدت تضحك فيها ومشو الكفتريا
في الكفتريا:
دلال:عاني ديك لميس
ريان:ياها
دلال:امشي سلمي عليها وجيبي انا اشتري ليك
ريان:يا سلام عليك يا عسل انشاء الله دايما كدا
دلال: عشان الكفتريا فاضية بس
ريان:يلا طيب اشتري لي البتشتريو انتي ونحنا بنقعد ليك في الكراسي ديك،ومشت لي لميس
ريان:لموس العسل
لميس:ريااان ازييك صباح الخير
ريان:صباح الخير؟ الساعه اتنين ونص يا لميس وانتي جاية هسي لي زاتو المحاضرة انتهت
لميس:عارفة يا بيبي جاية عشان اجهز لليوم الثقافي
ريان:لميس اليوم الثقافي فضل ليو شهر كامل يا بتي
لميس:ياخي انا زولة منظمة بجهز ليو من هسي انتي مالك
ريان:نو كوممنت طيب هو الناس كلهم شغالين ولا انتي بس
لميس:والله كلههم عشان السنة الفاتت جهزو قبل اسبوعين والزمن ما كفاهم عشان كدا قالو يبدو بدري
ريان:ايوااا انتي قولي كدا طيب
دلال:لموس المستهترة البتجي بعد المحاضرة كيفك
لميس عاينت لي ريان شتان ما بينك وبين صحبتك دي
ريان:هيي دي تومتي ما فيها كلام
لميس عاينت لي دلال بطرف عينها: والله كلها كلام
دلال:شنو وقرصتا عيدي تاني ما سمعتك
لميس صرخت:اييي اييي خلاص بهظر معاك دي شنو العنيفة دي
دلال :عشان تاني تمسكي خشمك
ريان :هييي بنات انا بعد دا ماشة البيت
دلال مصدومة:انتي اقسم بالله منفسنة خليتيني اشتري ليك لي لو مادايرة تفطري
ريان:ياخ دايرة افطر في البيت انتي مالك
دلال:ما تاكلي في البيت طيب لييي جايبانا الكفتريا
ريان:امي حتقول لي اعملي اكل براك ما حتعمل لييي
لميس :وانتي عمرك كم يعملو ليك
دلال:اصلا هي خايبة ما بتهبش حاجة في المطبخ
ريان:هيييي هيييي انتو ما تقنعوني بانكم بتعرفو ،انتي دلال بتتعملي لكن لميس دي الشاي ما اظن
لميس :ههههههه دايراني اآزرك يعني لا حبيبتي انا حبي المطبخ
دلال:صحي والله م ظاهر عليك
لميس:كيف ياخ دي هوايتي بعد الطلعات طبعاً
دلال:تموتي في الطلعة انتي مش زي المتوحدة دي
ريان :انا بطلع لو لقيت ناس زي الناس اطلع معاهم
دلال ولميس عاينو لي بعض
لميس :وكانها قصفتنا
دلال :ايييي لسانا طال اليومين دي
دلال:خلاص لميس يلا نحنا راجعين البيت
لميس :يلا مع السلامه اشوفكم بكرا
ريان:يلا لمو حضنو بعض ومشو على الباب
وركبو الاتنين المواصلات لانهم ساكنين في نفس الحلة ما جيران لكن قريبين لي بعض فبرجعو مع بعض دايما
في بيت ريان
ريان: ماما
ماف زول ردا عرفت انو امها قاعدة عند وحده من جاراتا كالعادة امها دايما برا البت،مرة بتاعة جيهة وبوبار كدا ما عندها شغلة بيها كتير لا خير لا شر لكن بتبقى كعبة لمن اخوها يشاكلا لانها هي وابوها مقدسين اخوها اكتر من اللازم ومدلعنو دلع شديد كولد يعني والمشكلة اخوها كرييييهه لمن بهناك النوع الزي الحريم داك لا بتعب لا بعمل حاجة في البيت مايع مياعة بايخة ولو اتشاكل معاها يشبكاانا راجل البيت انا راجل البيت ،هي ما عندها اخوان او اخوات تاني عشان كدا فكرتا للاولاد سيئة متخيلاهم كلهم كدا
مشت ااوضتا وطلعت سندوتشيها واكلت وطلعت تعمل عصير جاها اخوها داخل
عمر:يا بقرة
ريان:في نفساها(علاقتي بالبقرة شنو انا دايرة اعرف) شنو
عمر:انا جبت الانبوبة امشي طلعيها فوق المطبخ ومشا
ريان: (طبعاً هي رداحة والفاظا زي وشا واصلا هي عصبية ما كانت محتاجة لجملتو المستفزة دي عشان تنفجر فيو ):تعال هنا يالباطل انت تجيبا بالركشة وانا اطلع بيها السلالم تعال شيلا براك
عمر:قلت شنو انا شنو
ريان:شيل البتاعة دي طلعا براك
عمر مسكا من شعر وبقا بجر فيو: انا شنو يا كلبة يعني ما دايرة تساعدي نهائي اتعب انا بس
ريان:انت قاعد تتعب يعني ؟قاعد تعمل شنو ؟اليوم كلو صايع برا اقصا حاجة تعملا تجدع الزبالةاصلا ما غلطان انت غلطانين امي وابوي البدلعو فيك مطلعنك مرة
فيي اللحظةدي جا داخل ابوها الذي لا يقل عن اخوها في عدم الرجولة وهو العلمو الكلام دا كلو ودايرو يطلع زييو كورك فيها ودقاها وقال ليها كيف تقلي ادبك على اخوك الكبير:ما تشيليي الانبوبة يعني بتعمل ليك شنو يعني بس يششتغل هو بس وانتي تقعدي في البيت ساي
ريان ما اتناقشت مع ابوها لانها عارفة اسلوبو كدا بس مشت شالت الانبوبة وهي كاتمة على نفسها اصلا من شدة ما اتعودت على الوضع دا بقت ما قاعدة تبكي .رجعت الاوضة وهي مقهورة ونست موضوع العصير و قامت نامت بس دا البتعملو كل ما تتعب تنوم .
صحتها امها المغرب عشان تصلي وعشان تشاكلا في شكلتا مع عمر .قامت من السرير وهي تعبانة لانها نامت على زعلة مشت غسلت وشها واتوضت وصلت المغرب بعد خلصت الصلاة جات امها تهيج فيها وقالت ليها انا اصلا ما ربيتك كويس وخسارة عمري فيك و........
ريان سمعت كلام امها للنهاية وبعديها قبلت عليها قالت ليها بكل برود انا ماشة لي دلال
امها عاينت ليها مسافة مستغربة فيها لي ما ردت واتلأمت معاها بعدين قالت ليها امشي
ريان لبست عباياتا ومشت لي دلال ،كانت عايزة تغير شوية من الجو الهي عايشاهو دا كل مرة بحصل كدا وكل مرة هي بتمشي لي دلال في نهاية اليوم وبتبيت عندها مرات تهربا من الواقع ومن مشاكل بيتهم الكتيرة دي،و دلال لانها وحيدة امها وابوها واهلها بعرفو اهل ريان شديد فما بسالوها لمن تمشي ليها او تبيت معاهاغير كدا هي ما بتمشي ايي حتة ولا حتى مع دلال زاتا قافلين عليها شديد لانو اخوها شايف انها ما تطلع نهائي وامها وابوها ما بعارضوهو.الممشكلة اخوها ما بخلي بت في الحلة ما بطلع معاها واهلو شايفين انوو عادي يضيع سمعت بنات الحلة بس هي ما تطلع عشان يمكن تلاقي زول زي ولدهم دا بدل ما يربوهو ويلموهو من البنات بعملو حسابهم فيها هي،اصلا هي في روحا ما بتحب الطلعة كتير وكتية بي دلال وبي بنات جيرانهم بس يعني طلعات نهاية السنة دي ولمات البنات ما بتحمسا ،هي زولا عاقلة ورزينة بس لو كانت وحدة تانية كانت غلبت امها وابوها بسبب اسلوبهم الغلط دا .الاهل ماا مفروض يمنعو اولادم الا من الحرام ومفروض يراقبو بناتهم بمشو لمنو ويعرفو اهل صحبات بناتهم لكن ما يمنعوهم خالص دا اسلوب عقيم لانو دايما حيحسو انو في حاجة فايتاهم لازم يجربوها والله اعلم يلعب عليهم منو يجرهم لطريق غغلط مستغل الحتة دي.لمن يكون الاهل بخلو اولادهم وبناتم يطلعو وينبسطو لكن خاتين ليهم حدود ومراقبنهم ومتابعنهم وشايفنهم لو عملو غلط ولا لا كدا بكونو متعودين على الطلعة والتفريقة لكن بطريقة معينةوبصاحبو ناس معينين_الاهل زاتهم واثقين منهم_وبكونو مكتفين نفسيا ما بفتشو كدا للحاجة الكعبة ولا بغيرو دربهم دا.
وصلت البيت ودقت الباب وكالعادة فتحت الشغالة .سلمت عليها ودخلت
ريان:دلاااال
زينة:دلال في الحمام بتستحتمى اتفضلي انتي نضيفك
ريان:لالا ماف داعي خليك بستناها في اوضتا
زينة:طيب
ريان بقت قاعدة منتظرة دلال وبتفكر هسي انا لو كنت وحيدة امي وابوي زي دلو دي كان امي وابوي حيكونو كعبين كدا ولا كان حيكونو زي اهلا مدلعينها للاخير ما برضو فيها حاجة،اتذكرت لمن كانت في تالتة اساس اتشاكلت معاها وحدة ودقتا لمن كبت الدم وكل الفصل كان شاهد انو البت غلطانة والاستاذة استدعت اولياء امورهم ،وهي قاعدة المكتب ام البت وابوها جو وشاكلو البت والاستاذة شاكلتا برضو وبقو قاعدين منتظرين اهلا هي وهي مستغربة اهلا ما جو لسا لييي، الخبر انتشر بين الحريم في الحلة لانو الاستاذة اضررت ترسل وحدة لي بيتها عشان تنادي امها وابوها وبرضو اهلها ما جو فجاة بعد شوية جات داخلة ام دلال المكتب نفسها قايم وشكلها خايفة شديد كانت قايلة البت المضروبة بتها لانو البت الرسلوها نست الاسم وقالت لي الحريم وحدة قصيرة كدا وهي بتها الوكت داك صغنتوتة فاتهجمت وجات جارية طوالي،وريان امها وابوها عاملين رايحين من المدرسة في النهاية ام دلال قالت ليهم حتكلم امها هي ورجعتا البيت ومن يومها بقو بعرفو اهل دلال،والبضحك في الموضوع انو امها شاكلتا ودقتا وقالت ليها تاني ما تشاكلي مع زول ،دي كانت اول مرة هي تنجرح كدا وتستوعب انو اهلها ديل ما عندهم ليها حاجة حياتهم كلها لولدهم بس وكانهم جابوني يالغلط،مرات حقيقي بشك في نسبي يمكن اضطرو يربوني ساي وانا ما بتهم. انتهت من ذكرياتها دي لمن شافت دلال جاتها، دلال عاينت ليها كدا وبعدين سالتا :اتشاكلتي مع المعولق داك
ريان ضحكت:كالعادة والسعادة
عمر اخوها بحب دلال لكن هي مدياهو في وشو لانها شايفاهو ببعمل لي ريانن كيف وهي بتشوف انوالما فيهو خير لاهلو ما فيهو خير للناس،اكتر زول بفشي ريان فيهو هههههه
ريان:الليلة انا نايمة معاك بكرا الصباح نرجع البيت البس ونمشي الجامعة
دلال:ظابط ي زولة
قعدو يتونسو لي 12كدا بعدين نامو لانو الجامعة بدري.
الوم التاني :
:دلااااااال قومي ياخ انتي بتصحي كيف كلو يوم وتجي الجامعة اول وحدة دي المرة الخامسة اصحيك
دلال:هاه
ريان باعلى صوت :اتزفتي قومي
دلال:طيب طيب امشي اشربي الشاي وانابكون قمتا
ريان:دلال....... انا لابسة جزمتي من كتر ما بتغشيني بجملتك دي قومي انتي بس اتاخرنا والله
دلال بزهج :هوووف،وقامت:كلو منك انتي بتسهريني كدا وبعدين تصحيني تاني ما تجيني بعد الساعة ١١
ريان: الساعة 12سهر لاحول ولا قوة الا بالله ولا دقيقة نسيت انا انتي ما جدادة وبتنومي من المغرب
دلال حمرت ليها كدا ومشت اتجهزت
وركبوا المواصلات الحتة كانت زحمة عشان مشو متاخر وريان خلت دلال تحجز ليها بالغصب عشان هي السبب وطبعاً اتاخرو نص ساعة عشان دلال ما بتعرف تحجز (دلوعة البت دي)
لحسن حظهم لمن وصلو لقو الدكتور ما دخل لسا
مشو يسلمو على لميس وهدى
ريان:لموووس العسل
لميس:وييين ياااااا مشتاقين عديييييل كدا
دلال:كانكم ما لاقيتو بعض امبارح
لميس: يعني ما اسلم عليك شفتيني امبارح بركة وفرتي علي
دلال: تصحيح وفرت على نفسي
الشلة كلها: هههههههههه
هدى:واااي لكن ختتك في فتيل
ريان :هدو كيفك وكيف القراية انتي عارفه طبعا انا معتمدة عليك تراجعي معاي،مننن هسي حجزتك
هدى: والله ي اختي على حسب السعر
لميس:هم يدفعو وانا مجان يعني احساس صحبتك وكدا
ريان ودلال :بالله
هدي:صحبتي بخفض ليك حبا
لميس: استغفر الله اي شي عندك بالقروش ما دايرة منك حاجة اصلا مالي ما بعرف اقرا ولا ما بعرف اقرا
دلال:قولي كدا وبعدين يوم الامتحان تعالي ادردقي لينا هنا نقريك
لميس:البت دي انا ضرتا وانا ما عارفة بس اقول كلمة تهب فيني
البنات: ههههههههههه
فجأة جوهم بتين وحدة فيهم شكلها كدا بشوشة بشوشة وجنها ضحك بعرفو شكلها بس لانو الدفعة كبيرة والتانية عكس تماما حياتم ما شافوها بتضحك او تتكلم مع زول غير المعاها دي ودايما صارة من غير سبب
البت الاولى:ما عرفتونا يا لميس ديل منو صحباتكم ديل
لميس:وانتي الشمار ليك شنو
البت:وانتي الفول ليك شنو هههه
لميس:شنووو
البنات اتفقعو بالضحك
ريان ابتسمت:انا اسمي ريان ودي دلال انتو اسماءكم منو؟
البت:انا اسمي ميمي المزة لكن امي وابوي بقولو لي منى ما عارفه ليييي (البنات ضحكو على هبالتا)ودي هديل صحبتي اتشرفنا يا بنات بشوفكم كتير انا لكن ما بعرف اسماءكم،حافظة اشكالكم بس
هدي:ما عشان دفعتنا الكتيرة دي
دلال:نمل بس
ريان:وييي ي بت ما تطقينا عين
هدى:خليها تطقنا عشان ننقص
ريان:وافرضي نقصتي انتي
هدى بي خلعة:هي صحي قفلي خشمك دا يا دلال
منى:ههههههههه جبانة
لميس:هييي ي بنات دايراكم تساعدوني في اليوم الثقافي
دلال:متين هو
لميس:هو بعد شهر كدا تقريباً لكن نحنا من هسي بنجهز ليهو
ريان:اي يوم دايرة تشتغلي كلمينا بنجيك
منى:ايوة ونحنا برضو
لميس:تمام بس بعدين ما تزوغو لانو الشغل كتير
ريان:ههه شايلة هم شديد ماف زول حي....قطعت كلامها لانو الدكتور دخل مشت هي ودلال قعدو في الحتة الحجزوها بعد ودعو البنات
ريان بصوت واطي بتتونس مع دلال مسافة يركبو البروجكتر وكدا:البت الاسمها منى دي عسللل خلاص حبيتها
دلال بابتسامة :ايي مجنونة مجنونة كدا
ريان: لكن التانية دي ما بحبها مخوفاني دايما صارة
دلال:انا ما عارفاها معانا اصلا
ريان:معانا ي بت بس بتمشي مع منى دي دايما ما داخلة في الناس كتير
دلال:شكلها انطوائية شديد
الدكتور بدا المحاضرة وريان ودلال سكتو
بعد المحاضرة ريان مشت شالت من منى رقمها وشالت من هديل برضو عشان انحرجت بس ودخلتهم في قروب الواتس البجمعهم الستة (ريان دلال لميس هدى منى هديل) قروبهم اسمو المحاميات لانهم بقرو قانون وقررو يسموهو كدا عشان دايما يتذكرو طموحوهم دا ويجتهدو وينجزو عشان يحققوهو
طبعاً يادوب في تانية عشان كدا ما بعرفو بعض شديد .
ريان ودلال رجعو البيت لانو ما كان في محاضرات تاني والباقين برضو وريان رجعت بيتهم رايقة الليلة عشان اتعرفت على البنات الجداد ويومها كان حلو عموماً .غيرت هدوما ونامت لحدي العصر كدا بعدين مشت اتغدت وقعدت تحضر في التلفزيون بي مزاج لانو الفقر الاسمو عمر ماف وبعد كملت مسلسلا رجعت الاوضة صلت المغرب وقرت حبة ،ابت تطلع من الاوضة تاني نهائي عشان ما تخرب مزاجها مع ناس البيت، بعد زهجت من القراية فتحت التلفون واتونست مع البنات شوية كلهم كانو داخلين ماعدا هديل ،بعداك صلت العشا ونامت كان يوم مثالي بالنسبة ليها اتمنت كلو يوم يكون كدا وحست بانو اهلها ديل هي مركزة معاهم شديد لو طنشتم واهتمت بي حياتا ونفسا كان وفرت على روحي كتير بدل التعب والهم المن غير فايدة هي ما بتقدر تغيرهم لكن بتقدر تغير نفسها وما تشتغل بيهم تاني وتنبسط لاصغر شي تعيشو في حياتها الخاصة،دي كانت اخر فكرة فكرت فيها لانها نعست ونامت
https://www.facebook.com/روايات-نور-ولجين-108149510945200
