اما اسي ف إنتي بيتي وانا كائن بيتوتي جداً...❤🌻
ماهر خلاص كفى بطل تتزكر اي حاجه سيئه عدت عليك في حياتك انا م بحب تتزكر الحجات البتضايقك حتى ولو بعدها حتقول كلام حلو وبتعبر لي عن الجواك م بحب اسمع الحزن البكون في نبرة صوتك دة م بحب وانا هنا دائماً عشانك❤🌻
طيب شـايفه الدنيا دي كلها. ؟
ايوه
أنا م عايز منها اي حاجة غيرگ❤🌻
................
بعد مرور شهر..
ي ماهر
اي ي عمي مساء الخير،مشغول شويه برجع ليك تمام؟
لا استنى م تقفل طمني على اخوك حالتو كيف ان شاءالله استقرت؟
اخوي؟؟
وين انت؟
دقيقه فهمني في شنووو؟
م كلموك انو اخوك مهند دة ضربتو عربيه امس قدام البيت؟
مكالمه جاتني وانا شايل مشوار ،م عارف اتفاهمته مع الزول كيف ولا عارف وصلته المستشفى كيف،من فترة م طويله وانا بحكم المشغوليات والضغوطات مقصر في حق مهند شديد وم متابع اخبارو اول بأول💔وصلته المستشفى لقيت امي بس المعاه،كان نايم ،في الفترة القليله الغبتها دي شكلو إتغير رسمي،بقى انحف م يكون وهزيل حتى في شكلو
كنت متمالك اعصابي لغايه م سألتها وقولته ليها مالو؟
ضربتو عربيه قدام البيت
كيف يعني ضربتو عربيه؟الطلعو شنووو؟؟
ما تجوط وتعلي صوتك حوالينا ناس
ضربته الدرج من غير م احس وانا بقول ليها "م تقولي لي م تجوط ،قادرة تعيلي اولاد الناس م قادرة على ولدك؟الحنيه دي خليناها ورمينا طوبتها منك م قادرة تعملي حق ربنا بي ضمير؟؟؟
اااااسكت م تتكلم انت اوعى نهاااائي م بتحاسبني انت سكته ليك بما فيه الكفايه بدل م تحاسبني م تعمل البتطالبني بيهو دة انت مالك؟اخوك بغلبك؟كان قلبك عليهو صحي م كان خليتو في مكان ومشيت اترميت في مكان تاني التقول بتسأل منو ولا جايب خبرو م تعمل لي فيها قلبك عليهو اكتفيت انا من قله ادبك دي اوعى تاني تحاول تحاسبني او ترفع صوتك دة علي م والدني انت عشان تحاسبني..
السلام عليكم ي أم مهند
اهلاً ي دكتور اها ان شاءالله بتخرجونا اليوم؟اي إن شاءالله لي بكرة كدة بتطلعو اها الشاب دة كيف؟اخد ادويتو ؟
الحمدلله م عليهو شي اي الممرضه جات وم قصرت
الحمدلله 🌻
.......
بري يختي البخليني فقران وحالتو بالبلاء شنو انا اطلع من فقر وادخل في فقر بري بري اقع بيهو وين يختي كفايه ابوي على امي بقى عليهو فقر وسكر طلع زيتها وعزبها في دنيتها دي، عايزة لي واحد مرطب وعندو قروش يبني لي عمارة اسكن امي واخواتي في طابق وانا اسكن في طابق والباقي أأجرها مالي ومال الدقو وشالو حقو ...
شوفي عليك الله ي شهد الهبله الجاهله دي تفكيرها كيف؟رتاج عارفه انو تفكيرك دة ممكن يرميك رميه بنت كلب والله خليك عارفه كدة اتكلمته معاك في الموضوع دة كتير وتعبته منك ومن احلامك الما منطقيه دي،
زي م قالت ليك سمر مافي راجل بعمل كدة 💔
والله في البعملو وانا الحمدلله جسم واسم م ناقصني شي وسوقي حار اها البخليني اعرس لي راجل ناقص شنووو؟بري والله م بعرس واحد فقران غايتو بالنسبه لي انا مع البدفع اكتر فيني زي م بتقول امي😌❤✅
رتاج هو ممكن يكون م ناقص قرش بس ناقص عقل،ناقص رجوله،ناقص اي شي م تختي القرش مقياس للراجل علشان م تضيعي نفسك ساي صدقيني💔
كلميها ي شهد والله انا خايفه عليها والمخوفني اكتر خوفي من دخله الجامعه لأنو اذا هي من اسي بتفكر كدة لو شافت مجتمع الجامعه والفيه حتعمل شنووو؟إيييييك عقلها صغيره يخخ
انتو ليه شايفين الموضوع من جانب سيء؟عادي هو ممكن يكون سمح ومرطب وعندو قروش وشاريني انا واثقه انو حظي زي وشي دة حيكون❤
نحن معاك في دة وم ضدك بس افهمي نحن ضد العقليه البتفكري بيها ي رتاج يعني انتي عايزة تتزوجي راجل لمجرد انك عايزاه يحسن وضعك ليه م تغيري تفكيرك وتبدي تشتغلي على نفسك و تحسني وضعك ووضع اهلك انتي براك ؟انتي بس شايفه ابوك كان زول فقران وسكران بس م شايفه انو لغايه اللحظه هو زول كويس شديد معاكم وحنين عليك وعلى اخواتك على فكرة هو برضو ممكن يكون غنيان وسكير وفيهو كُل العبر السيئه يبقى ليه انتي تختي نفسك في حتات زي دي ؟انتي زوله لسه صغيرة ياخ اجتهدي واشتغلي وحققي العايزاه بحريتك ❤الزواج دة إعتبريه حاجه كماليه في حياتك بس م اكتر❤🌻
وبعدين اضافه لكدة انتي م سلعه علشان تقبلي المزايدات بتاعه امك؟ يعني شنو انا مع البدفع اكتر دي؟انا سمر دي وضعنا في البيت م اقل من وضعكم شوفي انتو ساكنين ملك ونحن إيجار وامورنا اوقات كتيرة بتكون جايطه،وبتقدمو لي كتيرين ماشاءالله عليهم وضعهم المادي تمام واحد منهم سفيان عارفه حكايتي معاه خليتو عشان بمنعني الشغل وكان بقول لي "المرتب البدوك ليهو انا بديك ضعفو بس م تشتغلي" بس برضو م حصل فكرته اني اعرس عشان ارتاح من ورا ضهر راجل سفيان دة خيرني عديل ي انا ي الشغل قلته ليه الشغل وفصلتها منو رغم اني عارفاه بحبني شديد وعلاقتنا 3سنه مع بعض 💔
خلاص م تعملو لي فيها مُصلحات اجتماعايات و تملوني فقر 😒😒💔
خلاص طيب اذا انتي عايزة تعرسي واحد عشان يسكنك في عمارة ويسكن امك واخواتك عرسي سعد ود خالتك مش هو دايرك؟اهو يكون غطى قدحو😒✅
بري يختي البخليني اعرس سعد شنو انا ناقصه خلايق بكرة اجيب لي عيال نصهم كيف كيف واتدبس زي حبوبه اقع بيهم وين؟والله م اعرس من أل "مقبوله"كان أقعد بايرة كدة💔هو انا كان عرسته زاتو م بعزمهم عرسي
طاخ،
واااي مالك ضارباني ي حيوانه؟
م اسمهم خلايق اسمهم مُعاقين ودي خلقه ربنا لو سمحتي م حاجه انتي بترفضيها بمزاجك وديل اهلك البتتكلمي عنهم ديل ودي مشكله جينات في اسرتك على فكرة يعني انتي شايلاها حتى لو عرستي الغريب احتماليه انك تجيبي واحد شايل الجينات دي كبيرة علشان دي حاجه وراثيه في اسرتك ف م تطولي لسانك علشان الحاجه دي م عيب خلي عندك اسلوب تعبته منك ومن جهلك انا😒✅💔
بالبلدي عندنا اسمهم خلايق اها مالك ي سمر اهلي وخلايق وانا حُرة فيهم ✅💔
وبمعنى اصح وادق ما خلايق ولا معاقين هم اسمهم اصحاب الهمم❤✅
خلاص م تتفلسفو وتصدعو بي اسمهم خلايق عندنا✅✅✅
رتاج واحدة من صحبات سمر في الحي بيتهم في شارع البيو ،في الفترة الاخيرة دي سمر بقت تجيني على طول وتسلم علي وهي بتجي معاها واتعودو على انهم يجوني دايماً،بت اهلها بسيطين شدييييد وعلى قدر حالهم امها وابوها منفصلين وامها هي المتحمله مسؤليتهم شغاله في مصنع ملابس وبتصرف عليهم ،ساكنين في بيت ورثه جدها مع ناس حبوبتها،اهل امها عندهم مشكله في جيناتهم والحاجه دي مخليه جزء منهم معاقين بس م كلهم💔 بت سمحه شديد بس بحكم عقليه الحواليها وطريقه تفكيرهم وتأثيرهم الكبير عليها خلت تفكيرها هي كمان ضحل ونظرتها ضيقة شويه للحياة ويمكن الظروف الإتربت وعاشت فيها ليها دور في كدة💔💔
..........
شهد❤
حبيبي وينك؟
في المستشفى انا
ليييه مالك؟في شنوووو؟انت كويس؟؟اي مستشفى؟
اهدي انا كويس الحمدلله بس مهند دة ضربتو عربيه امس قدام البيت واسي انا معاه في المستشفى
م جادي ي ماهر هو كويس؟اي مستشفى؟ قول لي اجي عليكم💔
لا م تجي الزمن إتأخر الساعه12،خليك في البيت هو كويس الحمدلله م فيهو شي شويه رضوخ بسيطه بكره حيطلع من المستشفى❤
طيب حبيبي انت متأكد انو كويس؟ايوة كويس ي شهد الحمدلله❤طيب وانت؟
انا تمام،اقفلي على نفسك الباب كويس وخلي بالك لغايه بكره تمام؟❤
حاضر وانت كمان خلي بالك من نفسك انا حأجي عليكم بكرة الصباح ان شاءالله❤بحبك شديد❤
وانا كمان يلا م تنسي تقفلي الأبواب كويس وم تخافي ماف شي لو حسيتي بي شي او خفتي تحت اي لحظه اتصلي علي طيب حبيبي❤
حاضر وانت كمان م تساهر وترهق نفسك حاول نوم طالما وضعو مستقر❤🌻
اخخخخخخخخ ي ماهر والله قلبي بيوجعني من كتر م المصايب بتقع على راسك نفسي تعدي عليهو فترة وبالو يكون مُرتاح بس نفسي😭💔
م قدرته انوم ابداً صحيت من اذان الصبح جهزته ليهم فطور وشاي وجهزته لماهر ملابس وانتظرته الشمس طلعت بفارغ الصبر ،وصلته المستشفى ماهر إستقبلني،وشو كان متغير وهزيل شديد سبحان الله كأنو هموم الدنيا عليهو بين يوم وليله بس💔قال لي انتي كويسه قلقته عليك💔
قلته ليهو انا تمام وانا كمان قلقته عليك💔
وصلنا الغرفه امو اول م شافتني استلمتني بالحضن قالت لي عروستنا السمحه وكعبه زعلانه منك وعتبانه عليك شديد لا بتسألي مني ولا بتزوريني حال مرة السواد والرماد💔
عاينته لماهر لقيتو مركز في تلفونو💔
محتارة طبعاً هي بتعاملني بلطافه شديدة كدة💔
قلته ليها م كدة والله بس
قالت لي م تشيلي جفا راجلك دة اوعى ي بتي💔
لساني في اللحظه دي بقى تقيل الغرفه ضاقت بي على طول قلته ليها "مهند كيفو ان شاءالله بقى احسن؟
قالت لي الحمدلله الليله بخرجوه ان شاءالله اسي بعملو ليهو في ال فحوصات
قعدتهه فترة لغايه م مهند جابوه وعلى طول رقد في السرير وغطى نفسو بالكامل بالغطى حتى وشو💔الحركه دي خلتني اتحسس شديييد حسيت انو عمل كدة عشان انا معاهم💔بعد مدة طلعته من الغرفه علشان ماهر طلع لقيتو ماسك تلفونو واظنو كان متضايق،قلته ليهو حبيبي انت تمام؟
قال لي الحمدلله❤
قلته ليه ممكن اقول حاجه؟
قال لي احكي
قلته ليه ممكن نسوقو معانا بيتنا؟اصلاً نحن عندنا غرفتين فاضين ممكن نجهز ليه غرفه يقعد معانا فترة على الأقل يغير جو وكدة
بقى يعاين لي
قلته ليه لأ؟
قال لي انتي عارفه مهند وضعو غير وانا كل الوقت بكون برة البيت و..
قلته ليه حبيبي عاين م حيحصل شي إن شاءالله❤
رغم اني كنت خايفه شديد لأني عندي موقف مع مهند دة من زمان وصعب اتجاوزو بس كان لازم اعمل كدة عارفه ماهر م حيقدر يقول لي "اجيبو البيت"علشان هو عارف انو انا عندي معاه موقف وفي نفس الوقت حيكون شايل همو وم حيكون مرتاح ابداً حتى لو م بين الحاجه دي💔
ي استاذ لو سمحته..
ايوة اتفضلي!
انت اخو المريض اللي في الغرفه دي؟
ايوة
الفحوصات طلعت اتفضل استلمهم من المعمل
طيب تمام شكراً
فحوصات؟
فحوصات بسيطه كدة طلبته تتعمل لي مهند دقيقة وارجع ليك
بعد 3دقايق
حأدخل الدكتور تدخلي معي؟
ماهر جا راجع وشايل ظرف في يدو
قلته ليه ااااا طيب تمام ..
السلام عليكم ي دكتور
اهلين ي إبني اهلاٌ اهلاً اتفضلو
دي الفحوصات طلعت
فحوصات الشاب مهند ،طيب طيب دقيقة بس
بعد 10دقايق صمت وتركيز الدكتور
الزول دة انتو بتدوهو شنووو؟
كيف يعني م فهمت؟"ماهر"
يعني بتدوهو علاج شنوو؟
والله ي دكتور علاج كدة بيديه ليه الدكتور بتاعو المتابع معاه وهو اساساً م هنا في الإمارات
بعد كم دقيقة صمت وتركيز في الورق وتغير في وش الدكتور قال ليهو انت متأكد؟
ماهر قال ليهو متأكد خير ي دكتور؟
قال ليهو لأنو حسب م ظاهر في الفحوصات الزول دة م بياخد علاج هو بياخد منشطات ودي هي سبب الإكتئاب والإضطرابات النفسيه البمر بيها دي مافي مريض توحد بياخد منشطات دكتور بصرف منشطات لمريض توحد دة الا يكون دكتور قاري مع الغنم💔
بقينا في حاله صمت وصدمه وماهر بقى يعاين للدكتور حسيتو لسانو تِقل
،
اول م طلعنا من الدكتور مسكتو قلته ليه ماهر م تتهور وتعمل مشكله مع امك اهدى يمكن غلط الدكتور الهناك ،الله يرضى عليك بالهداوة بس كل شي بتعرف وبتحل،قال لي يتعرف شنو ي شهد؟انا عارف الدكتور كان بكتب ليهو شنو بالظبط انا كنت بمشي معاه الجلسات وباخد ليه الادويه بءات نفسي وانا من شوفتو شكيت انو م طبيعي حتى تعامل م قادر يتعامل معي زي زمان عشان كدة طلبته تتعمل فحوصات افتكرت انو عيان بس م اتوقعته انو يكون الدواء البياخدو سبب في كدة،اصلاً الناس دي وصلته معاهم الحد انتي فاهمة؟
قلته ليهو فاهمة الله يرضى عليك اهدى حبيبي💔
بعد تحنيس ومحاولات قدرته اهديهو،رجعته البيت عشان اجهز لي مهند الغرفه وانا كل تفكيري في انو كيف ممكن الناس دي تعمل كدة ومصلحتهم شنو من الحاجه دي؟بالذات امو يعني اكيد مصلحتها في انو يبقى كويس م في انو حالتو تتراجع وتزيد سؤ طيب ليه بعملو كدة؟مستحيل يكون غلط من الدكتور بتاعو بس م قدرته اقول لماهر كدة علشان عارفاه متهور 💔
.......
انا حأسوق مهند معي البيت لو قاعدة عشان تسوقيهو م تنتظري احسن
اي بيت؟
حيكون اي بيت؟
اتكلم معي عديل لما اتكلم معاك انا م تتنفخ فيني للمرة المليون
لما انتي تبقي أُم عديله قولي لي اتكلم معي عديل تمام؟
سايقو وين؟انت قدر مسؤليتو ولا ساي؟م كفايه العملو في بت الناس دي قبل كدة تاني موديهو ليها بيتها عشان يسل روحها؟
م كان معاك انتي بقيتي قدر مسؤليتو؟؟؟؟على العموم انا م عايز اخد رايك انا بكلمك عشان لو قاعدة عشانو تكسبي زمنك،
م بتسوقو معاك الكلام دة منتهى انا امو انت م حتكون احن عليهو مني ولا حتكون فاضي ليهو اساساً كان بتفضى ليهو كان بتجي تسأل عليهو على الأقل اوعى تجي تناقشني في الموضوع دة
بعد ساعه من الكلام دة هي طلعت من الغرفه وانا ابتديت اجهز مهند عشان في الحالتين بي رضاها او لأ حأسوقو عيوني فجأة وقعت على علامات غريبه في جسمو،كأنها اثار ضرب او سيطان،من الخلعه بقيت بسألو مهند دة شنوو؟دة شنو ي مهند الفي جسمك دة؟؟كدة بقيت افتش فيهو وهو ساكت،جسمو ضهرو وبطنو واكتافو ويديهو عبارة سيطان 💔
استغفر الله العظيم ي رب في اللحظه دي انا رددته العبارة دي اكتر من 5مرات عشان كنت حاسي انو لو هي جات داخله م ضامن نفسي حأعمل شنو ك رد فعل،
طلعته من الغرفه مشيت للممرضين سألتهم من الدكتور الاستلم مهند اول شي،قالو لي موجود في مكتبو،قلته ليها نادي لي عليهو،قالت لي خير في شي؟
قلته ليها ممكن تنادي عليهو؟
قالت لي طيب،شويه كدة جات قالت لي حيجي شويه كدة،بعد ربع ساعه قلته جا ،قال ليها في شنووو؟قالت ليهو الاستاذ دة عايزك،
قال لي السلام عليكم،قلته ليهو وعليكم السلام،
قال لي اتفضل
قلته ليهو المريض الاسمو مهند دة طلعته ليهو اورنيك 8؟
قال لي اي
قلته ليهو السبب؟
قال لي ضارباهو عربيه
قلته ليهو متأكد انو ضارباهو عربيه؟
انت زول مؤدي قسم جاوبني متأكد انو ضارباهو عربيه؟ولا اوصل الموضوع دة لإدارة المستشفى والأكبر منك؟؟؟
بقى ساكت وبعاين لي مخلوع
قلته ليهو شوف اسي تعمل لي تقرير بالحاصل ليهو بالنقطه والشوله اسي دي من غير اي نقاش عشان م تخليني اعمل معاك موقف م ظريف قدام الكادر الطبي بتاعك وانت زول كبير في العمر لو عايز تنستر انستر معي✅
بالفعل طلع لي تقرير تاني واورنيك جديد م طالبتو بأي تبرير لأني عارف البير وغطاه،وعارف انو دي واحدة من امور امي ،قدر الحقد الموجود في الدنيا دي وفي قلوب الناس انا اتولد جواي تجاها اضعاف💔
جهزته مهند ،جات داخله لقتني منزلو من السرير،قالت لي مودي وين؟
م رديت عليها
قالت لي ي ولد بتكلم معاك انا !!!
رفعته ليها قميص مهند وانا ساكت بعدها قلته ليها بنتفاهم بعدين✅✅
سوقته مهند معي وخليتها في مكانها .
.....
وااااي لكن ربنا يكتب عافيتو ان شاءالله ي رب❤
امين ي سمر والله ماهر من امس معاهو في المستشفى لكن اسي حيجي ويجيبو معاه❤
اها تمام احسن عارفه حيغير جو مريض التوحد دة سنستيف شديد يخخخ💔
الجرس بضرب شكلهم وصلو دقيقة عن إذنك ي سمر❤
فتحته الباب لقيتهم بالفعل ناس ماهر،قلته ليهم اهلييييين حمدلله على السلامه
ماهر بقى يعاين لي ومهند كمان،
ماهر قال ليهو يلاااا تعال❤
دخلو البيت،قال لي جهزتي اي غرفه؟قلته ليه التالته ديك"واشرته ليهو عليها"
سمر وقفت لما شافتهم،ماهر قال ليها السلام عليكم،قالت ليهو اهلين ي مراحب وحمدلله على سلامتو❤
قال ليها تسلمي يديك العافيه وعلى طول واصل مشيهو للغرفه مع مهند،
قالت لي واااااي ي حليلو يكسر الخاطر وااااي الله يكتب عافيتو ي رب❤
قلته ليها امين،
دخلنا المطبخ جهزنا العصير وجهزت معي الغداء حتى مشت،
ماهر عدة كم ساعه مع مهند في الغرفه حتى جا طالع قال لي مهند نام م حيصحى اسي لأنو اخد الدواء انا حأمشي البيت اجيب ليهو ملابسو وغياراتو واحتياجاتو كلها واجي،
قلته ليه ماهر لأ لأ م تمشي انا عارفه انو مشيتك دي م على خير،
قال لي زي م قلته ليك ماشي اجيب ليهو احتياجاتو انتي بتحبي تكبري المواضيع وم عاين لي اساساً وطلع،بقيت بتصل عليه تلفونو مقفول💔
.....
اعصابي كانت كأنها في جمر ،جسمي دة م كان بنزل منو عرق لا مويه نار بتاكل في لحمي حاسيها،وصلته البيت م لقيت اثر لي زول غير امي،
م اتكلمته معاها مشست على غرفه مهند فتحته الباب اول م دخلته الغرفه الصدمه كانت إنو لقيت جنزير مُربوط في سريرو بالإتجاهات الأربعه يعني كان بتربط بالجنازير ك عقاب زي م كانو بعملو معي ،مهند اخوي كان بحصل معاه كدة وانا اخر من يعلم💔طلعته م شايف قدامي مشيت مكان م امي قاعدة كأنها منتظراني قلته ليها راجلك وين؟
سكتت
قلته ليها تمام م عايز منك جواب✅
...........
ي ماهر،
اي ي إيليڤ كيفك؟
تمام الحمدلله انت كيفك ي اخوي؟
الحمدلله،
امممممم برسل ليك في الواتسب بس شكلك م داخل
اي فعلاً م داخل
طيب كنت عايزة اقول ليك انو انا محتاجه قروش في حجات كدة ناقصاني من حجات الجامعه عايزة اشتريهم عشان لما اجي هناك م اكون محتاجه شي عارفه حجات الخرطوم هناك غاليه وامي عايزة تجهز لي حجات كدة💔
اهاااا طيب تمام عايزة كم!؟وحتجي متين؟
3الف لسه قدامي اسبوعين تلاته كدة
طيب تمام بتصلك شويه كدة
................
وانا في الغرفه برتب لي ماهر في ملابسو في الدولاب وهو في الحمام فجأة جا طالع مسكني من يدي وخته الملابس في الدولاب قال لي تعالي عايزك قعدني في السرير ورقد في رجولي،
سكتت مساااافه حتى قال لي بصوت مبحوح تعبان ي شهد تعبان شديد ،الحياة دي ادتنا كل شي واخدت مننا كل شي، حسيت بدمعتو جاريه في يدي ،قال لي حنتابع مع اخصائي المخ والأعصاب بالنسبه لمهند حدد ليهو مقابله اسبوعيه،حأزيد ساعات الشغل يمكن اشتغل لأخر الليل بالعربيه عايزك تستحمليني شويه الفترة دي عارف انو زودتها عليك بسس..
قلته ليهو حبيبي❤م تقول كدة ياخ وربي حأزعل،انا وانت واحد تمام،وانا كمان حأخلص ليك الشغل الناقص باللابتوب يعني خلص البتقدر تخلصو والما بتقدر عليهو انا بتمو ليك وبكدة شغلك م حيقيف أصلاً اليد الواحدة م بتصفق فترة وحتعدي اكيد❤
ي ريت تعدي ي شهد ي ريت❤
حتعدي وانا ومعاك❤🌻
اصلاً هي م حتعدي غير وانتي معاي ❤
...........
يعني سافر هو واولادو دبي صح؟
اي سافر ي مان انا م كلمتك م صدقتني،انا متأكد إنو سافر ✅
متأكد من وين ي زياد؟
ااااااا اااااااا من عزو في الشركه انت م عارف عزو دة كويز ساي وصاحب وزول عمك شديد
اهااا طيب تمام .
ماهر في كلام كتير عايز اقولو ليك ياخ لكن م عارف ابدأ من وين
احكي،لا دي دايرة ليها قعدة دقيقه اضرب لي منذر الموضوع كبير وجايط شديد ،
خير ان شاءالله؟
والله م خير نهائي بس الصبر نلم في منذر دة
........
اي ي شهد
حبيبي وين انت؟
قريب من شارع النيل جاي على البيت مهند كيف؟
تمام الحمدلله نايم غايتو،علشان الزمن إتأخر قلته اشوفك لو قريب علشان لو بعيد انا سمر معي لسه ممكن اخليها تفضل معي لغايه م انت ترجع..
اي م بعيد شديد م بتأخر خليها معاك لغايه م ارجع لو اهلها برضو م تقعدي براك💔
طيب تمام خلي بالك من نفسك حبيبي طيب❤
حاضر يلا في امان الله🌻❤
قال م حيتأخر خليك معي لمن يرجع لو ممكن ي سمر❤
تمام م عندي مشكله اصلاً لو رجعته البيت حأقعد اساهر في التلفون وعولاقو ساااي💔
والله ي سمر م عارفه بدونك اليومين دي كنت حأعديها كيف يخخخ بجد💔
طيب م تتعودي عشان احتمال كبير انزل شغل قريب🙈😂💔
بجد؟شغل شنوو مش انتي شغاله؟
شغاله تسويق إلكتروني وكذااا بس مقدمه لشغل في مستشفى انا اصلاً قاريه تمريض لو ظبط معي وشالوني حتكون حلوة معي علشان حيكون عندي كم راتب وانا جد محتاجه للشغل دة عشان اساعد بيهو بابا شويه في موضوع الإيجار عارفه الظروف بقت م ظابطه وماما ناس المدرسه كلو بيدوها 2الف تخيلي بس والله بتخلص في اقل من اسبوع وبابا شغلو حيلحق ليهو على إيجار ولا مصاريف بيت ولا مصاريف اخواني في المدرسه ولا شنووو بس💔💔 واخواتي ي شهد م بحسو والله رغم انهم عارفين وضعنا وعارفين بابا قدر شنو بتعب عشانا مرة مرة بعد فترة حتى يجيبو لي قروش وم طوالي وطبعاً بابا محزرنا نهائي من انو نطلب منهم ونحن اصلاً مستحيل نطلب منهم بس والله ي شهد احياناً بخجل من ابوي لما اشوف التعب البتعتبو 💔عشان كدة بشتغل تسويق وبتطلع لي عمولات ومرتبات حلوة بساعد بيها في مصاريف البيت وبخفف عليه،قلت شغل المرتب بتاع المستشفى دة اساعدو بيهو في قروش الإيجار لو ظبط طبعاً لو م ظبط مقدمه لشغل تاني بتاع شركه لكن دة مختلف حبتين ي ريت واحد فيهم يظبط❤💔
حبيبي ي سمر إنتي حلوة شديد ياخي ربنا يوفقك ويفتحها عليك ي رب❤🌻
جد انا م لاقتني واحدة بجمال سمر يعني إنسانه حيويه ونشيطه وهميمة وساعيه ومسؤله وعاقله وكل شي بتفتشو في البت دي ممكن تلاقاه فيها...❤🌻
..........
الوو السلام عليكم؟
وعليكم السلام
انتو طالبين رحله من مطار الخرطوم للرياض انا جمب الموقع بس حددو لي مكانكم،اول م تدخل المطار على يدك الشمال بعد صاله السهم الذهبي بتاعه تويوتا نحن في نادي اسمو AGC
ايوة طيب عرفتو خلاص تمام
طيب خليك نحن لما نطلع حنديك خبر ❤
اوكيييه
بعد 10دقايق،
الووو؟
نحن طلعنا انت وين؟
انا في ....
طيب نحن كمان واقفين قدامها م شايفنك
طيب دقيقة خليك معي ،
دة انت البتكنتك بالكروزر دة؟
ايوة
خلاص جاين عليك✅
هاااااي
وعليكم السلام
بزمتك في زول سايق عربيه زي دي بدخلها ترحال؟ما چادي طبعاً💔
ههههه في البلد دي اي شي ممكن
من الزوق إنك تنزل تفتح لينا باب العربيه م ممكن بعد سماحتك دي م تكون چنتل 💔
هههه ابشري م طلبتي شي
الخلق دي على حسب م إنها م جديدة علي م ركزته مع الحاله الهم فيها كتير نزلته فتحته ليهم باب العربيه بعد م ركبو قالت لي إستنى عندنا صحبتنا چايه م حتتأخر
قلته ليها طيب جداً
ي بت وين انتي؟نحن منتظرين ياخي ،طيب يلا اسرعي وخلصينا هو لو م حيوان حيوصلك وم حيقول ليك اطلبي ترحال يرحلوه من سابع سما💔
عارفه العولاق الاسمو طارق دة معاط ياخي وعامل رهيب وهو غاشيها وهي مصدقه الهبله
اصلاً ي بت هي مخلوعه عشان كدة ليها الحق تصدق انتي فاهمة حركات الأولاد والواحد لما تعجبو واحدة اها هي اسي مجنناهو فترة كدة و ركب ليها مكنه وهي ماعطانا قايمه طارق وقاعدة طارق والله يركبها السمبك ويخليها اصبري بس
م علينا في الأخير لقينا لينا زول لما نزهج وناسنا يغيبو ويفصلونا وم نلقى زول يطلعنا بنلقاهو هو الفرحان بتاع البنات دة بسببها تاني عايزين شنوو؟
هههههه على قولتك يلا م علينا😂😂✅💔
الووو؟
اي ي شهد اها طمنيني البت لسه معاك؟طيب حلو م قصرت وانا راجع على البيت لقيت مشوار وصلتو واسي وانا راجع برضو لقيت مشوار لكن خلاص بس المشوار دة واكون معاك في البيت،مهند م صحى صح؟
طيب حاضر حبيبي❤🌻
ي شباب صحبتكم دي لسه؟
والله نحن زينا زيك 💔
بعد 20دقيقه انتظار بعد مكالمه وجوطه مع بعض بقو يقولو ليها عربيه بيضاء كروزر انتي شن فهمك وعرفك بالعربات اسمع كدة كنتنك ليها ،شايفه العربيه البتكنتك او بتنور دي؟بس تعالي عليها،شايفنك نحن معاك اللصقه يلا تعالي طيب😑💔
بعد دقيقتين بالظبط ظهرت قدامنا بت لابسه فستان في طولو تحت الركبه بشويه وهو حاجه لاصقه شديييد في الجسم لمن شفافه و مقسم كل مفاتنها ، فاكه شعرها وجادعه طرحه صغيره كدة في كتفها وماشي معاها واحد وماسكها من يدها وكل م يمشو خطوتين يقيفو يتكلمو ويضحكو بصوت عالي حتى يجو علينا خطوة،انا كنت متضايق جداً لأني مربوط بزمن ومستعجل على شويه كنت حألغي الرحله وامشي💔
فضلته وانا مراغب ومتمالك اعصابي لغايه م وصلو ركزته نظري مرة واتنين و3 و4 وعشرة و100 م بين المرات دي سمعته البتقول ليها م بدري ؟؟والبتقول كفاكم خلاص و...الخ،بعد فترة من محاوله الإستيعاب دي تلقائياً نزلته من العربيه وفي لحظه صدمة وعدم توازن لقيت روحي بقول إيليڤ؟؟؟...💔
#إقتباس
كل شي ضاق بروحي كنتي انتي اتساعه وكل خطوه هزتها الحياة تثبتت بك وكل نظره منك كانت تحتوي
الرحمه لي من كل معاناة، وكل ضوء توهج في طريقي
كنتي انتي، كنتي امي واختي وابنتي وحبيبتي وكنتي
لي في صديقة عمري زوجتي تقبلتي عيوبي وتعايشتي مع وجعي وعشقتي غموضي فتحتي باب قلبي الذي
اصدأت اقفاله واسكنتي فيه كل الطمأنينه والحب والامان والراحه "كنتب العهد والوعد والميثاف المقدس لي" ❤🔕
#شيراز_عثمان
💭💜
يتبع....
