فهمتي ي شهد؟وضحت كدة ي شهد وضحت؟؟
قال الكلام دة بنبرة حادة وانا واقفه بعاين ليهو مسافه مصدومه طبعاً ابداً م خطر في بالي كدة💔
قلته ليهو وانا بتمتم ك ك كيف يعني ابوك معرس على امك ديل كلهم؟انت جادي؟قال لي عايزة إثباتات؟اتصل ليك تتأكدي؟طلع خلى لي الغرفه وهو غضبان،طلعته وراه مسكتو قلته ليهو م قصدي كدة ي ماهر انا بس متفاجئة علشان كدة،لييييهه م حكيت لي عن الموضوع دة من الأول انت؟
كان متضايق شديد
قلته ليهو انا اسفه وحضنتو،
بعد مسافه إتفك مني ودخل الغرفه، دخلته وراه على طول دخل الحمام ،بعد فترة جا طالع وهو ساكت وانا واقفه بعاين ليه وصل تلفونو في الشحن وشال المصلايه فرشها،بسرعه دخلته الحمام اتوضيت واقرب توب شلتو وفرشته المُصلايه وراه م عارفه هو كان في الركعه الكم بس واصلته معاه،صليت معاه ركعتين والركعتين صليتهم براي وهو لسه كان قاعد في المصلايه وبهمس ب"ي وكيل الغافلين،ي مهون هون"
ختيت يدي على كتفو وضغطته عليهو قلته ليهو ماهر،
م رد
قلته ليهو حبيبي❤ قربته منو ومسكته يدو وشبكته صوابعي مع صوابعو وانا ضاغطه عليها وقلته ليهو"حبيبي اياً كان البنمر بيهو حيعدي اكيد زي م قدرته تتخطى حجات كتيرة حتقدر تتخطى دة برضو الله يخليك م تبقى مهموم كدة،بقى يعاين مسااافه ومسك يدي ورقد في رجولي ولف يدي حوالين صدرو وهو ساكت م نطق ولا حرف م كنت حاسه غير بضربات قلبو ونفسو الحار في يدي،إحساس الزول المرهق شديييد للدرجه الما عندو حيل يتكلم بيها حتى دة بس كان شكل ماهر،وبحكم إنو زول كتوم وم بعبر عن الجواهو ولا الشي الهو عايشو الموضوع كان معقد شديد بالنسبه لي م عارفه اقول ليهو شنو ولا قادرة اسالو سؤال واحد حتى واخد وادي معاه في الكلام ولا قادرة اخفف عنو،حاساهو عايز ينفجر ويقول كل الجواهو بس م قادر عشان هو اصلاً م اتعود يشارك زول الشي العايشو،بس رقدتو في رجولو ومسكتو لي بالطريقه ديك كأنو كان بستنجد بي وبقول لي خففي عني ي شهد م قادر ،إحساسو كان واصل من غير م ينطق💔
.........
كيف يعني داخليه؟هو قال ليك كدة؟
اي ي امي قال كدة تخيلي؟،يعني كلامو دة م داير يدخلكم في بيت ابوكم نهااائي صح؟نفس العملو لي خالد اخوك داير يعملو ليك انتي؟
والله شكلو كدة ي امي رغم اني م اتوقعته ابداً يقول لي تقعدي في داخليه،
وانتي ليه م قلتي ليهو م بقعد في داخليه ي بت؟
ي امي اقول ليهو شنو يعني؟
تقولي ليهو داخليه شنو البقعد فيها وابوي بيتو براهو ساحه تفحيط انتي متخلفه ي بت؟تسكتو ليهم كدة وتخلوهم ياكلو في حقكم كدة لمتين؟
اتصلي لي عليهو كدة
،ي أمي عليك الله خلاص كدة لمن اسجل اول،
لا م بتسجلي أول دة موضوع م بتسكت عليهو ابداً ي بت انتي م واعيه انا م بخليك تتحركي من هنا شبر مالم اضمن قعادك في نص بيت ابوك ولو قعدك في داخليه زاتو غير داخليه حجار م بتقعدي بدون نقاش اتصلي لي عليهو سرعه،
اووووف طيب دقيقة،هاك ،
تلفونو مقفول ارجعي لي خالد كدة سرعه الحراميه ديل الله لا بارك فيهم،
هاك ي امي هاك..
الوو؟اي ي خالد ،تمام الحمدلله سمعته اخوك الحرامي عمل شنو؟
اتخيل داير يقعد اختك في داخليه؟
كيف الكلام دة؟
والله زي م بقول ليك م دايرين يدخلوكم بيت ابوكم مستخسرنو فيكم هو وامو الحراميه ،انا اسي م بسكت ليهو نهائي كفايه سكاتي عليهم السنين دي كلها لكن بعد كدة الرهيفه التنقد حقكم دة تقلعو رجاله من عيونهم دي اختك دي تجي هناك تمسكها من يدها وتمشي بيها بيت ابوك الما مخلنكم تصلوه دة وتقعدو في قلبهم انتو زاتكم عندكم حق فيه زيكم زي البقيه وإلا قسماً بالله افتح فيهم موال محاكم وورثه اطلع منهم حق السنين دي كلها ،
لالا ي امي حقنا دة خليهو علي انا دة زي م قدرته اقلع منو العربيه دي رجاله بعرف اجيب باقي حقنا هو زاتو قال ليك فلس ومطلوب قروض وديون في البنوك والله حق سفر شهر العسل قال ليك م عندو قعد يتبكى وينبح لي عشان اديهو العربيه يبيعها لكن ويين يا والله يشوفها في الحلم خلي يصبر لي بس قروش ابوي دي اتمتع بيها بما فيه الكفايه ونحن يدينا القليل منها زي الشاحدنو💔
القال ليك منو فلس ي ولد ها؟دي امور وحركات منهم عشان م تقول داير ،الناس دي القروش العندهم النار م بتاكلها اوعى تصدق قوله فلس وم عندو دي،
لا ي امي الكلام دة انا متأكد منو المهم اسي اها إيليف إن شاءالله إتصلت على عمي الزيني وقالت ليهو على رسوم الدراسه؟وم تكون قالت ليهو ماهر حيدفع لي ؟
اي اتصلت كلمتو قال ليها برسل ليك القروش في اقرب وقت ما بين بكرة وبعدو م جابت ليهو سيرة نهااائي قالت ليهو رسوم دراستي كدة بس وهو قال ليها تمام عاااد انا عويرة اخليها تقول ليهو ماهر عارف وحيدفع لي؟ ي ولدي حقكم دة إلا تقلعوهو قلع من الناس ديل،
وبنقلعو ي امي اصبري بس الدنيا دي هي م دوارة زي م بقولو،اسي رسل ليها 60مليون قال ليها 50 حقت الرسوم وال10 خليها معاك مصاريف وشوفي نفسك محتاجه شنو للجامعه اشتري عليك الله اسي ال10مليون دي في زمتو قروش ؟بدل م يرسل ليها 15ولا20مليون؟اسي انت مصاريفك كيف ان شاءالله رسل ليك وم انقطعته؟
اي رسل لي قبل يومين كدة رسل لي 30الف قال لي 15حقت إيجار الشقه وال15التانيه خليها معاك مصاريف لأخر الشهر كدة برسل ليك تاني لكن البصبر ليهو لأخر الشهر منو؟انتظري بس اسبوعين بالكتير برسل ليهو بقول ليهو قروشي انتهت محتاج قروش،
اتصل ليهو طوالي اصلك م تمنع نفسك دة حقك وحق ابوك متى م احتجته اتصل ليهو المجنون يقدر يقول ليك لا؟عارفني لو قال لا انا بعمل شنو،
.........
فاضي اتكلم معاك شويه؟
من متين وانتي بتسألي م طبيعي بتجي داخله شمال ي لجين💔
بس المرة دي الموضوع جد ي منذر وإتعامل معاهو بجديه بليز💔
طيب احكي!!!
،هي م حكوة هي اسئله عايزاك تجاوبني عليها
طيب اسألي ي بتي
امممممم حصل مره حسيت نفسك في المنتصف؟
لا ابداً انا في البدايه ي دوب
ياخي انتظر ي منذر وافهم بعداك جاوب🙂💔
طيب اها😂💔
يعني حصل مرة جربته تكون في النص ومتناقض مع زول؟يعني عايزو وم عايزو وكذاا؟
لا ابداً م حصل انا لو عايز زول بخليه في حياتي لو م عايزو الله يسهل ليه م بقولها ليه بصريح العبارة بس وجودو وعدمو م بفرق وم حيضرني💔
طيب لو في يوم حسيت بنفسك كدة حتعمل شنوو؟حتبعد ولا حتستمر في الإحساس البايخ ده؟
هههه حأخليها على الله ي لجين وبعدين انا اصلاً م حأصل مع زول مواصل زي دي💔
ليييه م بشر؟؟!
لا بس انا عارف حدودي وعارف نفسي بعمل في شنووو❤💔
لو حصل كدة؟افرض فرض انو حصل معاك كدة حتعمل شنووو؟
هعمل جكهه😂😂💔مالك ي لجين ياخ ارح انا طالع 😂😂💔
بطل سخف بس برضو م جاوبتني او انا م قدرتهه اوصل ليك سؤالي بطريقهه صح ،يعني احساس انو زول يكون قريب من قلبك شديد وفي نفس كل الوقت قربك منو دة م مُريحك نفسياً كدة يعني على قدر محبتك ليهه حاسي نفسك انسان لزج وفارض نفسك عليه حتعمل شنو في الحاله دي؟ 🙂💔
المهم لو جاك الاحساس البايخ دهه مع زول بتحبو حتعمل شنووو 🙂💔💔
😂😂😂😂😂😂😂😂😂😂
لا م ح يجيني والله ي لجين
لو جاك؟🙂 لو افتراضاً بس.يعني 🙂
هععمل شنو يعني؟؟ولا شي
اممممم يعني حتبعد؟؟🙂
لا م حأبعد حاشوف نهايتو بس
حتى لو الحاجهه دي متعبهه بالنسبه ليك وبتخليك تجي على نفسك بس علشان انت بتحبو ؟+تنتظر شنوووو؟انو يقول ليك بصريح العبارة انا م بحبك ☹️🙂💔
حتى لو انا بحبو؟
انا بشوف نوع العلاقه البيني وبينو كانت عبارة عن شنو عشان م أظلمو لو بحبو
تاني شي اذا هو أدانى امل بصارحو و بشوف ردو شنو
تالت شي ممكن احافظ على العلاقة معاهو و م اعمل شي و اخليها على الله و احترمو و احترم نفسي اذا ما في تلميح أو أي سنقل في الموضوع 😁
تصارحو وهو بتبارد معاك ومحسسك انك لتخ وثغيل؟☹️انت كدة زدتهه الطين بلا + واذا في سنقل 🙂💔
خلاص معناها هو م عايزك و تفهما بشكل تلقائي وم تهبل بروحك إمكن هو بحب غيرك😂💔❤
طيب معناها في الحالهه دي تبقى اهبل لو م اخدته بعضكك عملتهه Left من العلاقه البتربطك بيهو صحح؟؟
ممكن اكون قاعد بس من بعيد م شرط اعمل Left دي مشاعري انا م بعاقبو عليها اذا م بادلني فيها
طيب انت كدة لفيت ورجعتهه لكلامي الأول حتسمح لنفسك تكون في النص؟
لا ح انسحب لأنها صعبه💔
صححح دي النقطهه الانا عايزهه اصلها🙃
طيب لو انت كنت مكان الطرف التاني دااك حتزعل لو الزول دة عمل كدهه؟يعني لو انسحب وخلاك بدون اسباب واضحه حتزعل؟
على حسب قوة علاقتي انا بيهو بس لو انسحب يبقى غبي💔💔
لييييهه غبي؟م ممكن تلتمس ليهو العذر وانو هو م قادر يتحمل الحاجه دي؟لأنو كل شي لييهه حد وقوة تحمل صح؟ وهو يمكن وصل الحد خصوصاً لو كنت انت اول تجربهه ليهو ؟؟ م يمكن الانسحاب يكون في مصلحتو علشان م يفضل متعلق بيك سااااي وهو اخر اهتماماتك ويريحك منو ومن عتابهه ونفسنتو صح؟
اسألك سؤال ي لجين؟ انتي ليه بتساليني انا إلا سئله دي كلها؟؟😂😂💔
لو ركزتهه فيها الاسئلهه دي م هتحتاج اجاوبك على السؤال دهه ابداً🙃💔
جد؟؟
انسى واتخطى ي سيدي اساساً فهمها او عدمو م فارق🙃
طيب نسيت❤✅
اسوأ حاجه ممكن تحصل معاك انك تخطي خطوة عشان تأكد بيها صحه إحساسك وتتأمل إنها تكون غلط وتتصدم بي إنك فعلاً صح والما عاوزك مهما بينته ليهو إحساسك ولمحته ليهو م حيفهمك م عشان هو غبي وم بفهم عشان هو رغبتو انو م يفهمك ابداً💔
..........
حبيبي،ماهر،قوم خلينا نطلع السرير،
حبيبي يلا خلينا نقوم❤
م عارفه فضلنا كم ساعه في الارض وهو راقد في رجولي ،كنا ساكتين هو نام وانا كمان جاتني غفوة وختيت راسي في كتفو ونمت وم انتبهت حتى💔
صباح اليوم التاني صحيت لقيتو مافي جمبي ،قلته يمكن طلع البقاله او غيرو،غيرته ملابسي وطلعته حسيت بحركتو في المطبخ دخلته لقيتو مجهز الشاي والفطور وخاتي لي وردة جمب السفره وخاتي حجاتنا الجبناهم امس بالليل ومعاهم مكسرات في سكريات بشكل حلوو وريحه عطرو فايحه وماليه المطبخ وشكلو كان مركب سماعات م انتبه لوجودي،إحترته في امرو طبعاً هو كيف قادر يكون كدهه؟ انا م فاهمة شي بس المهم هو عامل حاجه حلوة شديييد بي جو ظريف شديد مشيت عليه وقفته وراه وحضنته وانا لافه يدي حوليني قلته ليهو صباحو حبيبي❤كان بقلي في صوابع بطاطس طفى النار واتلفت علي على طول وخت يديهو في خدودي وباسني مساااافه وقال لي صباح الورد على الورد القصير،عيونو لونها متغير من الإرهاق ،بقيت اعاين ليهو بعدين قلته ليهو انت م زعلان مني صح؟
إتلفت ورجع يقلب في البطاطس وقال لي حتحرق بسببك،اتحرك من جمبي شال الصحن وجا راجع ختاها فيهو قال لي كنت حأصحيك على فكرة يلا تعالي نفطر❤
قلته ليهو حبيتها الوردة شديييد شااااديد 😍❤قال لي قطعتها من شجر سور العمارة الجمبنا دة هل تعتبر سرقه 😂😂💔
قلته ليهو حتى لو سرقه هي سرقت قلبي وكفى 🙈❤
قعدنا قلته ليهو انا شكلو ربنا بحبني شديد علشان كدة اداني راجل حلو ومرتب وكمان بدخل المطبخ وبعمل حجات ظابطه🙈🙈🙈❤قعد يعاين لي ويضحك بعدها قال لي بس م تتعودي😆💔اثناء م نحن بناكل فجأة لقيتو بعاين لي بي سرحهه كدة مسك يدي وباسها من الكفهه مسااافهه حتى بقى يعاين لي ورجع باسني فيها مره تانيه وهو مغمض وبحنيه وخته كفه يدو في خدو مسافه حتى نزلها وختاها في صدرو ضغط عليها في جمبه قلبو بالظبط وبعد سرحه قال لي لو وريتك إحساس الطمأنينه البحسو وانا معاك وشايفك قدامي كدة حتعرفي قدر شنو انا محظوظ م إنتِ💔أنا زعلان منك؟ينفع ازعل منك؟انا زعلان عليك ي شهد يعني فوق م إنك قبلتي تعيشي مع واحد مُنفسن كمان م قادر...
قاطعتو وقلته ليهو ماهر انت لو بالجد عايز تزعلني كمل كلامك دة،اذا في حاجه حتضايقني بجد هي عدم مشاركتك لي في الحاصل معاك،مش نحن متزوجين؟مش المفروض نحن سند لبعض؟اذا من البدايه م شايفني كفايه للدرجه البتخليك تشاركني همومك هتشوفني متين؟قول لي 💔
انا معاك للأبد في اسوا حالاتك وفي أفضلها حتى لو م شاركتني انا بحس بيك ي ماهر م محتاجه إنك تصارحني ابداً💔
فضل ساكت وتاني م اتكلم لغايه م خلصنا اكل،بعدها دخلته الغرفه لقيتو ماسك اللابتوب حقو ومركز فيهو كأني م قدامو ولا حواليه ،طلعته خليته شغلته التلفزيون في الهول وقعدته اشاهد،فجأة طالع من الغرفه وعلى طول جا رقد في رجولي وهو ساكت،حرفياً هو بتصرف زي الطفل بس طفل كئيب 💔شلت الريموت وقعدته اقلب فجاة قال لي"ابوي لما اتزوج م كلم امي ابداً بحكايه انو متزوج غيرها دي،وقبل م يموت ي شهد جابني وختاني وحكى لي بيهم التلاته حتى بتزكر المصريه دي كانت ي دوبها حامل عندها كم شهر قال لي ديل اخوانك عشان انت بقيت زول كبير وعاقل وراجل والمفروض تعرف انو انت ومهند م براكم اولادي،كأنو كان حاسي انو حيموت،كأنو كان بوصيني عليهم،ابوي كان صحبي شديد قدر م اقول ليك صحبي م اقدر اوصف ليك علاقتي بيهو على عكس امي الكانت معيشانا في جحيم ومشاكل طبيعي وطبيعي منعزلين كل واحد فينا في غرفه او طلع خلى البيت عشان يفرق،اما ابوي على قدر م كان بحب القعدة معانا على قدر م كان بتهرب من البيت بسبب كترة نقاشاتها الما بتخلص يمكن دي واحدة من الأسباب الخلت مهند اخوي يكون متوحد وم يقدر يتعالج وواحدة من الاسباب الخلت ابوي يتزوج من وراها،رغم معرفتها بمرض مهند ومدى إحتياجو للهدؤ والدعم النفسي للعلاج كانت بتتعمد تخلينا في حاله تفكك أسري وعُزله وبعد،بدون مبالغه؟كنا بننبسط شديد لما تسافر اهلها لأنو الجو بخلى لينا مع ابوي ف بنقعد وبنخلق جو سمح شديد وبنقضيها طلعات وبرامج وموالات زي دي،ابوي زول سمح شديد ي شهد عمل كل البطلع بي يدو عشان نحن م نتأثر بالجو الحوالينا ولا نتأثر بي توتر علاقتهم لدرجه انو كان بجي يسوقنا يسافر بينا اي دوله عشان نغير جو وبنسافر بدونها ي شهد،اوقات كتيرة كنت بتمنى انهم يكونو منفصلين بالباب كدة واي زول عايش حياتو بالطريقه الهو عايزها بدل م يكونو عايشين ومعيشننا في جحيم معاهم💔مره في نقاش ليهم مع بعض بعد م خلص النقاش وقال ليها لو ماشه بيت اهلك امشي م بمنعك ،وبالفعل طلعت من البيت ،حوالي الساعه 11 كدة جات لقتنا كلنا قاعدين مع بعض وبنشاهد انا وبابا ومهند،بدون مبالغه ي شهد رشت علينا بنزين وحلفت بالذي م خلقها إنها تحرقنا؟قالتها ليه بصريح العبارة"بحرقك انت وأولادك ولا اسفاً عليك لاقيه منكم شنو انا"💔وبسبب الحاجه دي مهند تعب شديد لأنو عندو حساسيه ورقد في المستشفى اسبوع
في مرة اتناقشو اتكلمته مع ابوي براحه ومشيت ليها هي برضو وحاولته اتكلم معاها بالهداوة زي م عملته مع ابوي واقول ليها انو المشاكل ممكن تتحل بالهداوة وانهم مفروض يحترمونا ويعاينو لينا نحن وكانت النتيجه انو ضربتني بالطبله في راسي وخيطوها لي اكتر من كم مرة
شايفه العلامة دي؟فتح لي ضهرو،قال لي دي مرة معانا ضيوف قالت لي ابوي جيب اكل جاهز مشى جاب ليها خضار وجا،اثناء م هي شغاله دخلته المطبخ قلته ليها انا جعان+جيبي اساعدك عشان تخلصي سرعه وكان نصيبي إنها شالت الملعقه البتقلي بيها وهي بي زيتها وحارها ولصقتها لي في ضهري وقالت لي هاك💔
مرة الشغاله بتمسح جيت ماري وقعته ويدي إتكسرت وانا موجوع اتصلت على ابوي قالت ليهو ولدك اتكسر تعال شيلو ودي المستشفى من غير م تحاول توديني حتى اقرب مركز جمبنا💔
مرة مهند اخوي عيان ووضعو صعب شديد وانا بس معاهو ابوي مسافر وكان عندها عرس قالت م بتأجل العرس عشانو م ودتو الدكتور جابت ليهو ادويه غلط وخلتني معاهو وسافرت اسبوع وفي الأخير بقى بين الحياة والموت لدرجه انو رقد شهر في المستشفى💔
م بتحب تسوقنا معاها اماكن عامة سواء اعراس اهلها او غيرو من زمان عشان بتخجل من حاله مهند اخوي مرة ابوي بتكلم معاها قال ليها م تخليهم وراك سوقيهم معاك المناسبه قالت ليهو انا م ناقصه عشان اسي دة يقعد يتجنن فيني هناك ولا ناقصه كشف وشيل حال "كانت قاصدة مهند لأنو م بتحمل الإزعاج"
دايماً قدام اهلها واولادهم وحتى الغرباء كانت بتناديني بي ي فيل،ي تور، ،ي قلاب،عشان انا قوامي ضخم م عشان باكل كتير بس بنيتي اصلاً جايه كدة واهلها واولادهم معظمهم كانو بضحكو علي ولما تكون ماشه محل وعارفه نفسها حتشيل تقيل كانت بتسوقني عشان بس تشيلني الحجات م عشان هي عايزة كدة💔
قلته ليهو وانا دموعي جاريه "ماهر كفى خلاص"
قال لي بي صوت مبحوح ولسه دة بسيط من قليل كان بحصل وكنت بسمع اعظم من كدة من شتايم لي غيرو،انا كنت بنضرب لمجرد إنها اتناقشت مع ابوي كانها كانت بتعاقب ابوي بي انا💔م شوفته لي حنيه الأم شي م بعرف للأمومه طعم انا عشان كدة م بلقى لي مبرر لي تعامل ببدر مني تجاها،دايماً كانت بتحسسنا إنها نافرة مننا للدرجه الخلتنا ننفر منها نحن زاتنا وم خلت جوانا ذرة إحساس تجاها،إستنزفتنا بالعماله الجافه ي شهد💔وبعد وفاة ابوي كان ولا كأن شيئاً لم يكن حتى حق ربنا م عملتو زي الناس رغم انو الطريقه المات بيها ابوي كانت سيئه شديد بس الحاجه دي م هزت فيها رمش يمكن الناس م كانت ملاحظه بس انا كنت ملاحظ م طبطبت علي زي م كل النسوان بعملو مع اولادهم م واستني م احتوتني،اتدهورت شديد وفي عززز السؤ الانا كنت عايش فيهو داك وافقت على انو عمي يعقلها اقنعت الناس كلها انو الكلام دة لمصلحتنا بس هي م كانت بتعرف لمصلحتنا شنو؟هي حتى وابوي عايش م عرفت شي لمصلحتنا حتعرفها وهو ميت؟
ماهر حبيبي الله يرضى عليك كفى خلاص بطل تحكي وتتذكر 💔
إتلاعبت بي أوراق البيت هي وعمي وملكت نفسها البيت دة غير كل القروش الأبوي خلاها وراهو م اتعرف ليها أثر ،ومحلات الإسبيرات والورش الهو فاتحها عمي قال هو كان شريك معاهو فيها بالنص وجاب ليهو اوراق بتثبت كدة وبحكم انهم م عارفين انو ابوي متزوج وعندو اولاد تانين انا كلمتهم وحكيت ليهم بالحاصل اتواجهته بالضرب وقالو انا كذاب بس م اكتر والأسوأ من دة كلو وبالنسبه لي م بتغفر ابداً إنها قالت واقنعت اعمامي كلهم انو ابوي كان لافي وسفيه ساي وم خلا ليها ولا قرش وانو قروشو كان مضيعها في اللف والدوران والفارغه وإنو كان مقصر منها ومننا في كل شي حتى مصاريف م قاعد يديها وانو كان بسكر وبضربها وانو هي كانت بتسكت وم بتتكلم رغم انو كان حاصل عكس كل القالتو دة ،وبالنسبه لموضوع البيت قالت إنو ابوي الله يرحمه كان مطلوب ديون تقيله عشان كدة شال منها دهبها كلو عشان يغطي بيهو الديون دي وسجل ليها البيت دة مقابلو،
ماهر خلاص انسى💔
انا ممكن العالم كلو يجمع على إنو انا ولد عاق صح بس العالم دة م بقدر يشوف الاسباب الوصلتني وخلتني ابقى ولد عاق ابداً ي شهد...💔
#إقتباس
بصدفه كان صديق بكثير من الضحك وجبر الخاطر تحفها دعوات صادقه والكثير من الاحاديث التي تضج بحكايات ، حتي اصبحت الصدفه نعمه معقوده بدعوات تجمعنا،تحولت الراحة في الحديث المبعثر الي طمأنينه منمقه محببه اكثر ،سادت محل الضحكات الضجه الساخره ابتسامه صامته بها الف معنى، تحول من ملجى كل الحكاوي الي "مصدرها كان دعائي دائما اللهم اترك لي ما تبقى لي به من صديق"
#شيراز_عثمان
💭💜
هند الهنداوي قالت ف كتابها الشهير "العلاقات"
"اكترر علاقات الزواج بتدوم هي يلي الطرفين فيها بكونو اصحاب قبل الزواج"
Shiraz Osman
يتبع.....
