عشق الطفولة الممنوع 🔞

الجزء 20

- يعني اكو شي !!!! بمروتج كولي

ام ساره :  بنتي اخذيها نصيحه مني لتدققين بلي فات انتي مزوجه هسه والي عرفته رجلج يحبج لتركضين وره ماضي يخرب عليج

- حجيج يخوفني بالزايد خاله الله يخليج اعصابي مامتحمله احجي و ريحيني

جرت نفس كالت  : اكيد تعرفين نوار بيوم من الايام جان يريد ساره

قاطعتها : خطبها وابوها مانطاها لان شيعه و نوار سني بعد ؟

ام ساره : ابد مو هيج ابو ساره انسان متعلم و مثقف مايفكر بهالتخلف

- بس اني ما كلولي هيج

سكتت تباوع بالكاع تحاول تجمع الكلام

- خاله نشف دمي احجي ابوس ايدج

ام سارة : مره جنه كاعدين بالهول سمعنا صوت عياط و ضرب طلقات بالشارع هوسه زلم مافهمتنا فلمها
ابو ساره دخلنا للغرف كال لحد يطلع اروح افتهم شصاير بره
راح نص ساعه رجع دايخ سئلته طلعت مشكله زلم ببيت نوار ابو ساره و كم رجال من الشارع كدرو يفاككوهم

ولد متحارش ببتهم نريمان عايفلها شغله مثل الهديه بالكاع
من دتغسل الكراج بباب الشارع طالعه شايلتها من الكاع ورجعت بالكراج
ابوها راجع بسيارته توه لايف بالفرع و شاف هالمنظر
دخل للبيت كتل ومكتول اخوانها شايلين موبايلها مدورين بي لكو رقم الولد و رسائله حجي ماينلبس عليه ثوب و اعتقد متشاوفه وياه ابو ساره فهم هالشي من كلامهم بالعركه
خاليها تخابره يجي للباب مره ثانيه بحجه اهلها ماكو ما اذكر شنو خططو بالضبط
الولد بس اجه طلعوله من الحديقه جنزو من الكتل حاول يقاومهم
شال شي كزيز ضربه براس نوار نزل دمه اخوانه هاجو ركضو شالو سلاح طلعو ركض ناوين عليه خلاص بهالاثناء ابو ساره و الزلم لحكو يصيرون بالنص ونزلو سلاحاتهم
شويه واجه ابو الولد فهم السالفه تعذر منهم هوايه جانو ناوين يرفعون دعوه عالولد و تهجمه ع نوار
بس الاب تلافه الموضوع يبوس براسهم و يتوسل يطوون السالفه
اخوان نوار طردو الولد وابوه
السالفه طولت ساعات لما هدء الوضع