أبو عائشة

البارت الثاني

. 🐓كوكووكووعووووو🐓

شرقات شمس جديدة على دوار حد السوالم ..نورات الدنيا بنور سيدي ربي وتجمعو العيالات على الواد الكبير يصبنو وفامهم محلولة،مخلاو فاش دواو وختموها بسيرة عيشة اللي زمطاتهم، كلا مرة تهضر وحدة وتفش گلبها بالتحاشيمة اللي حكات ليهم الضبرة وزادو كرهوها كتر كاهي واحلة ليهم فالحلق

.. اما ولاد الدوار عاداو بعضياتهم عداوة كابعدها عداوة..رجع اللي داز من حدا لاخر كايبدا فالتخنزير والسلام ديال ربي هو اللخر مايگولوهش وواخا هاكاك والشوهة اللي دار ليهم بوبكر باقين طامعين فعويشة كزوجة المستقبل وباقي حاطين عليها العين

.. هاد الاخيرة اللي ففراشها مخشية وعلى احلامها الوردية باقل عاسة.. تاتحل الباب وتم داخل سي بوبكر بفوقية زرقة مخططة وطربوش گري شافها ناعسة وبدا يعيط

بوبكر: عوييشة..عوييشة

تملمات بكسل: همم

بوبكر: يااتي نوضي..نوضي ابنتي نگولك فيقي معاايا

حلات عينيها تترمش وگلسات شاد فيها النعاس: با ؟؟

بوبكر: ايه بوك.. گلسي گلسي نداكرو شوي انا وياك ونگولك شي حاجة غاتفرحك راباقي تابعيني شي شغال

رفرف قلبها ودغيا توگضات: الله يسمعنا خبار الخير

....دخلات هنية لدارها طالقة البشرة ..فيدها هازة طرح تالمسمن وجايبة معاها جارتها اللور لالة عبوش..مرا كبيرة فالعمر خانتها الصحة وولات على عكازها محنية..معدها لا ولاد لاتالي لاوالي ولكن عطاها ربي الفطنة والعقل الحكيم والكلمة الرزينة

هنية: زييدي اخيتي مرحبا ههه

لالة عبوش: ههه الله يكبر بيك ابنيتي..وراكي مصبحة حالة فمك اش تما اهنية

طلقات ضحكة عالية وردات: اييوا الهضرة كتييرة اجارتي..نوجد نيت الفطور ونعاود لك

لالة عبوش: اييه مگلتي عيب ..اح الله

...گلسات لا عبوش وهنية عمرات المقراش لآتاي وبدات توجد الفطور وتهضر فنفس الوقت: ايوا اختي هههه البارح جوايه الصباح گالسين كانداكرو انا وسي بوبكر ..شوية تدق الباب.. عرفتي شكون؟

......................

وساعو عينين عيشة بعدم تصديق وغوتات بلهفة: حلللف ابابا حللف؟؟؟

بوبكر: ااويلي على حللف علاانا عمري تمالغت معااك

عائشة: هههه "طارت عنقاتو هو كايضحك ويدوز على ضهرها" ربي يخليك ليا ابابا شكرا بزااف عهه