أبو عائشة

البارت الثامن

بلال زير فمو كايضحك وخالد بسم بروح رياضية وقال: اهانية والله راه الحياة كلها محاولات الواعرة هي انك متستسلمش من اول رفض 

 

رد: ههههه شناهية؟

 

خالد: هادا راه هو الدرس التاني اصاحبي..لنفترض دابة گلتي ليها كانبغيك.. وهي خنزرات وگالت لك انا لا.

ااش غادير!

 

جمع الضحكة وفيساع خنزر فيه بشوفات ديال القتيلة: خالد..كاتقلب عليا نقبرك

 

خالد: وادابة خلينا فاللوجيك اصاحبي حط گااع الاحتمالات قدامك بلش ماتصدمش من بعد

 

بلال: ديك الساعة حفر قبرك حسن لك.. قلب عليا هاد السوجي الله يرحم باك ولا غانقلب وجهي

 

خالد: لا لا لا غاابقا هاكاك حسن

 

هز القهوة كايشرب منها وبلال وضور وجهو للجنب كايفكر ومع دماغو كايبلاني..والى كانت هي مكاتبغيهش؟..والى أول حب ليه كسر قلبو اللي بدا ليها كاينبض؟..الى كانت اصلا مشايفاهش كفارس أحلامها؟

تنهد وهضرة خالد كتاكل فيه وتهيج نارو..ندم حتا جبد معاه الموضوع وحتا سمح ليه يزرع الشك داخلو..طلع فيه شوفة مخنزرة وهو تايشرب القهوة

 

خالد: مالك

 

بلال: ندمت تادويتك حق الرب

 

خالد: اهانية هانية تمشي عايشة تجي نهى تمشي نهى تجي سكينة تمشي سكينة تجي مريم، هاانية والله "شاف واحد البنت دايزة وبس بس عليها تاضارت وبسم ليها قائل" كانبغيييك

 

خرج ليه راجلها من الجنب صلع قد السلوم وعريض عرض الباب جامع التخنزيرة حتا قالو حجبانو باراكة: نعاام الخااوة شگلتي

 

هبط قلبو بين رجليه بالخلعة وبدا يتمتم: ه ها ل لا لا و والو اخويا ا الله ينوركم ماشاء الله موااتيين

 

جا شوق عليه: تابحالا سمعتك گلتي لمراتي كانبغبيك ولا؟ "شاف فمرتو بنص عين" قووودي نتي للطوموبيل انا

 

تعوجات بميوعة ومشات مخليا خالد غايبول فسروالو وبلال حاضي الفيلم باستمتاع: ل لا لا اخويا ر را والله ماهاكاك "شاف فبلال بغا يكبي" خويا بلال اعتق عتق