#أحببت_جندي (واقعية)
(الحلقة1 )
محمد : مش ح نطول عليك هلبه بس بنقولك ان صاحبي ليه فتره يتردد ع المعهد وعجبتيه وهوا راجل ومعروف وناوي الحلال وطلب مني ان نتواصل معاك ولو فيها كيف ناخد رقمك نعطيهوله
زهرة : اني مسكره موضوع الارتباط وح نعتبر نفسي مسمعت شي ✋
محمد : مش ح ناخد منك رد توا بس نستنى ف ردك قبل لاتروحي وضروري تردي ونشهد بالله ان راجل مفيش زيه وأسألي وشوفي وزي مقتلك مش ح ناخد ردك توا وان شاءالله يكون خير
زهرة : باهي ان شاءالله يصير خير
وطلعت ومشيت طول حكيت لصحباتي
سها : وافقي واضح ان رزين وعاقل ولاا مره شفته يشوف ل بنت ولا منتبهلها
ريان : اي وشخصيه وجمال وافقي وافقي
ززهرة: اما اني فقررت نفوت الموضوع مرة وحده وان مش ح ندوره كملت محاضراتي وطلعت واني راكبه للباص لقيت نفس الموقف علي ف سيارته مقابل الباص وفاتح نص الشباك وشافني لين جت عيونه ف بعض وبعدها ركبت وطلع الباص ولاحظت ان مجرد مطلع الباص طلع حتي هوا ورانا ✋💖
.......................
علي:
بعد مطلعت هي وروحت وروحت حتي اني من وظيفتي الي هيا اني نستناها لين تروح وانروح اني مع ان مفي شي بينا بس قعدت شهور من قبل لانبعتلها واني نراقب ف تصرفاتها وتحركاتها من لما تخش للمعهد لين تطلع منه قررت نتصل ب محمد ونشوف شن صار فيه
علي : خير ي قدر شن جوك
محمد: كاثرات اتصالاتك هاليومين 😂
علي : كبيده ي غالي
محمد : كلمتها البنت وزدت سألت عليها مش مرتبطه ولا عندها موضوع لكن لما كلمتها ف الاول قالت لا بعدين عششت فيها قالت توا نفكر
علي : ميه ميه منور هلبه والسماح ي غالي تعبتك معاي
محمد : عيب عاد قداش عندي عليوه اني
علي : تسلم يطيري
محمد : هي امالا ترببح توا
علي : سلام 😂😂
....................
زهرة: بعد روحت من المعهد ع طول رقدت ولما نضت كان الحوش هدوء زي كل يوم
فجأة كسر صوت الهدوء صوت اختي رحمه وهي تغني 😂
زهرة : مكانك مش هني الحق مش حاسه روحك مضلومه
رحمه : الوه الحسد الحسد 😬 حتي ف احباله الصوتيه الواحد ينحسد.
زهرة : نننننننن لا حسد لاسو صوتك يخلع 😏
رحمه : بالعكس يهبل 😍 غير انتي صايرلك جفاف عاطفي متفهميش ف الاحسااس 😂😂✊ كانك تحبي وعندك مشاعر جياشه راك قدرتي موهبتي
زهرة : ع طول اول ماقالت رحمه تحبي خطر ف بالي هوا بس برضو استبعدت الفكره وقعدت سارحه فتره لاباس بيها فيها تشوش تفكيري
واستوعبت روحي وقت ولت رحمه تغني تاني وللأمانه صوتها رائع وكان يريح فيا وكانت الاغنيه حلوة (نمسيك بالخير) وصوتها هوا الي خلاني نطلع من التوتر الي اني فيه وشوية جت فرح اختي التانيه من السوق كانت تبتت لان عرسها قريب ولهيت معاها ف بضاعتها ومعاش فكرت ف شي
...........
#تاني يوم
علي: نايض بكري وكأن عندي دوام رسمي ومقرر ان نكون ف المعهد قبلها لان مستاحشتها مع ان مصارش بينا لقاء باش يصير الشوق بس هذا الي حس بيه
.........
زهرة: وصلنا للمعهد ونزلت لقيت سيارته لكن محبيتش نركز لان مصكره الموضوع وكانت عندي المحاضره التانيه ف يعني الاولي كلها بنقعد برا
سها : زيزو شوفي من مقابلك وبياكلك بعيونه
ريان : اي اي بخوت ي كبدي 😏
زهره : اي باهي فهمننا فوتو وافتحو اي موضوع نلهو فيه
سها وريان: غبيه 😡😡
زهرة : احسن شي نمشي ونخليكم ف اوهاكم
مشت زهرة ومشو البنات صحباتها معاها ولحقهم علي طبعا والمعهد كله ف هاليومين لاحظ ان علي يتبع في البنات لان قبل كان من بعيد بس لكن توا دارها واضحه
..
وبعدها جت بنت وقفت جنبهم وقالت تشوفو فيه الي واقف غادي هذا موطني ميقرب منه حد هذا خطيبي
زهرة : هاه شفتو انكم تتوهمو اهو طلع خاطب تخيلو سمعت كلامكم ووافقت شن بيكون منضري
سها : اي حق باهي الي متسرعتيش
ريان : بس غريبه خاطبها ولامرة شفته واقف عليها وحتي توا يتبع فيك انتي وهي مش معبرها .
زهرة :مليناش علاقه بيهم✋ وهي نخشو لمحاضرتنا القروب الي قبلنا طلع وقالو ان المحاضره ف المسرح
مشو البنات لمسرح وخدو اماكنهم وبدت المحاضره
زهرة : فجأة تلفت جت عيني ع الباب كان مرش ويبان كان فيه حد واقف ولقيته هوا واقف ويشوفلي وكأن سرحان فيا
سها : هذا شن يبي توا مش خاطب ولاه
زهرة : قوتي مدوريش وركزي ف المحاضره توا شوي ويمشي
وفعلا ركزنا ف المحاضره ومعاش تلفتت جيهة الباب نهائي لين تمت المحاضره وبنطلع ننصدم ان قاعد واقف نفس الوقفه ونفس النظره والباين ان تقريبا حتي الرمش مرمشش
زهرة: اول مرة نحس بالتوتر بس محبيتش حد يلاحظ عليا حتي صحباتي بينت روحي طبيبعه قدامهم
طلعت وخليته واقف ع باب المسرح
ولما طلعت لقيت نسخته التانيه واقفه ف الساحه الا مالملابس تختلف 😨
قعدت مركزه وقررت ان مش ح نتزحزح من مكاني لين نعرف من هذا
وبعدها جي علي وقف معاه واني هني صارلي ستك من الشبه بينهم
.. ...
جلال : عليوة شوف الكبيده عيونها مرشوقات هني
علي : تعبتني وربي بباهي الي قامت حتي عيونها فيا
عبدالمهيمن : ت وينها مرت خوي وريهالي
تلفتو هما التلاته وشافو جيهة زهرة
..........
زهرة : وقت شافولي التلاته حسيت روحي ان عيوني منزلوش عليهم واستوعبت روحي ونحيت عيوني عليهم ومشيت من المكان نهائي
سها : حي ع الشبه الي بينهم تقول توأم
ريان : اي الجمال والشخصيه وكلو كلو 💖💖😍
زهرة : نحس فيهم خوت او بالاحري اكيد خوت لان عليهم حتي نفس الدم
وسرحت شوي حسيت روحي كأني بديت نهتم نبي نعرف هلبه حاجات بس لما اذكرت البنت الي قالت موطني نحيت كل هالأفكار من دماغي وفتت الموضوع .
وحتي هاليوم فات زي باقي الأيام وجي وقت ان نروحو واليوم حتي هوا لقيته ف سيارته ويشوفلي بس مهتميتش
وروحنا ووصلنا كالعاده روتيني ثابت لان سكني بعيد ع المعهد ففنوصل تاعبه لنوم طول 😂✊
............
#في حوش علي
نورية : عليوة
علي : نعم ياغالية💖
نورية : شن صار وليدي ف البنيه الي قلتلي عليها مش هوا هضاكه كان تبي تخطب
علي : ت اما خطبه ي حاجه هي غير ترضى حتي تكلمني قبل ☹💔
نورية : وعلاش وليدي متبيش تكلمك شن ناقصك
علي : مانقصني شي غير تتغلا كنتك 😍
نوريه : مدامه غير غلا بس خلي تتغلا عليك 😂✊
علي : عيب ي حاجه راني ولدك
نوريه : 😂😂 ربي يحفظكم كلكم ويعطيك مافي بالك ياوليدي
علي : امين يارب
نيزك : الدعوات والرضا والجو ل عليوة بس احني لا
عبدالمهيمن : اي حق بالك مش تبعك حني قوليلنا خلي ندورو ع اهلنا وناسنا
علي : ومن شر حاسد إذا حسد
نورية : كلكم ولادي زي بعضكم حطو عقولكم ف روصكم حتي انتم ودورولي كناين توا تحصلو زيه
نيزك وعبدالمهيمن : كان غير هادي مفيش اسهل منها 😂😂😂😂
علي : عبدالمهيمن اني طالع مع جلال ومتعشي برا اهم مفاتيح السيارة خليهم عندك
عبدالمهيمن: تمام 100%
نيزك: ابعتلي كرت وراصك ياغالي غير مش طالع اني توا وبندور ل امي كنه 😂😂😂✋
علي : تم تم 😂
....................
زهرة نضت من النوم نتكاسل
لقيت عندنا بنات عمي 😍😍 قداش نحبهم ونستريحلهم
زهرة : هلا هلا ليكم وحشه 💛💛💛
ميس : ليك اكثر حبي
ميسم : اهلين زيزو وينك معاش مبينه
زهرة : هاني قاعده بين المعهد والحوش ونفخ وخلاص
رحمه : نسيتي النوم مفروض قلتي بين المعهد والحوش والنوم 😏😏
زهرة : بنرقد اني شن واجعك انتي
ميسم : خلاص خيركم 😂 تقول ضراير مش خوات
ميس : زينا 😂😂😎 غير نكابرو قدام الناس 😂
ميسم : اس بلا فضايح 😂
واستمرت هدرزتنا ومحسيتش بالوقت لين روحوالبنات وتعشينا ومريت ع شيتاتي مرة ورقدت
نضت تاني يوم ع صوت المنبه جهزت نفسي ونزلت
صبحت ع بابا وماما وخوتي وفطرت وطلعت للباص
طول الطريق نشتت ف تفكيري منبيش نفكر هل بيجي ولا وشن يبي مني وهوا خاطب لهيت مع البنات لين وصلنا كانت عندي محاضره اولى يعني من الباص ل المحاضره ع طول خشيت ع طول للمحاضره ووقت طلعت جتني بنت خالتي
جنات : هلا زيزو شن جوك تعالي معاي بناخد حاجات من الكفتيريا وبعدها نبيك شوي
زهرة : فكيني منحبش زحمة الكفتيريا امشي خودي شن تبي وتعالي تلقيني هني
جنات : لا لا بتمشي معاي هي من غير نقااش
زهرة : نمشي معاك وامري ل الله وف خاطري نقول ( توا بنشوف صاحبه ويقولي شن ردك )
جنات : هي ✊
مشينا ووصلنا للكفتيريا ووقفت جنات ع شباك الكفتيريا
جنات : هاني جبتهالك لاعندك وتفاهمو منبيش نكون مرسول
زهرة: تكنطيت من محمد صاحب الكفتيريا وجيت بنهزبه لكن انصدمت لما لقيت ............ # يتبع
