#امستردام20
في مساء احد الايام ..
شمس كانت بتتمشى في الحديقه الخلفيه وبتتكلم بصوت واطي كانها بتحفظ في حاجه .. بسمه كانت بتعاين ليها من غرفتها ..
عاينت وراها وابتسمت بهدوء لما شافت شهاب جاي عليها ..
شهاب: مالك لسه صاحيه
شمس: ما جايني نوم قلت انزل اشم هواء وانت
شهاب: امم ، نفس الشي ما جايني نوم
شمس اكتفت بالابتسامه ..
بدو يتمشو مع بعض ويتونسو بصوت واطي بسمه ماقدرت تسمعو .. كانت بتحترق من جواها المرة دي .. ماقدرت تقاوم وبدت تبكي ..
اما شهاب ما كان شايف غير شمس ..
شهاب بتردد: عاوز اقولك حاجه ..
شمس: اتفضل
شهاب: اااا ..
قاطعهم صوت علاء ..
علاء: شهاب تعال بسرعه ..
شهاب: وين ؟
علاء: تعال بس حتى انتي يا شمس تعالي يلا..
علاء سبقهم .. وشمس فضلت تعاين لشهاب وهو نفس الشي باستغراب .. لحقوهو لجهه الصاله ...
الكل كان متجمع عدا اهلهم ..
وكلهم انتبهو لدخول شهاب وشمس مع بعض ..
شهاب: خير في شنو متجمعين!!!
نجمه: انت ناسي ولا شنو ؟
صهيب بنعاس: ما تمعطونا قولو في شنو ؟
وضاح اتلفت حوليه: وين بسمه يا اثار؟
اثار: فوق
وضاح: ناديها بسرعه
جات بسمه نازله وواضح انها كانت بتبكي: انا هنا ..
وضاح: طيب كدا اكتملنا صح
نجمه: اي
صهيب عاين لشهاب: واضح انها عمليه سطو ..
شهاب بضحك: ما بعيد
علاء: اي ناقصه ظرافتكم صح
صهيب: يا إلهي طيب قولو الزبدة شنو
نجمه: لا انتو بالجد ناسيين انو بكرة ميلاد جدو؟
شهاب: شتتت
صهيب: شتت ناسي والله
اياد كان ماسك تلفونو وبيلعب: معليش دا الشغل الكتير
صهيب: طيب انتو جهزتو ل شي ؟
علاء: لا ودي المشكله ..
شمس: وين المشكله في لسه في زمن ..
علاء: اي بس احنا المرة دي عاوزين نعمل حاجه تانيه عكس كل سنه ..
نجمه: اي زي ما قال علاء
اياد: عندي فكرة
نجمه: يلي هي ؟
اياد سكتت مسافه: ثواني والله نسيتها ..
وضاح: اياد خليك في تلفونك ما تفكر ولا تفتح خشمك
اياد: اي يلا فكرو انتو
صهيب: رايكم شنو نعمل برزنتيشن لصورنا كلنا وصور عمي فياض الله يرحمو اتوقع حينبسط شديد
علاء: فكرة ظابطه اتعلم يا اياد
شهاب: لا طبعا انتو عارفين انو جدو بيتأثر لمجرد انو يسمع اسم عمو فياض
نجمه: دا كان زمان يا شهاب بالعكس في الفترة الاخيرة دايما كان بيتكلم عنو
شهاب: انتو شايفين كدا ..
ردو كلهم: اي
شهاب: طيب تمام ..
شمس استدركت انو فياض هو نفسو الكانت صورتو في غرفه مقداد ..
بدو يخططو كلهم مع بعض وبسمه كانت بتراقب بعيونها وما اتكلمت ابداً عكس البقيه ..
بعدها كلهم رجعو غرفتهم عدا بسمه .. كانت قاعدة من سكات وواضح انها بتفكر في حاجه .. رفعت راسها لما سمعت صوتو ..
شهاب: بسمه؟
بسمه: اي
شهاب: ليه ما طلعتي غرفتك
بسمه: اي شويه وحطلع..
شهاب قعد جنبها: انتي كنتي بتبكي؟
بسمه ابتسمت: يهمك؟
شهاب: اي اختي ومن حقي اعرف المزعلها ..
بسمه: ما اختك ، عندي اخ واحد اسمو وضاح ..
ووقفت عشان تمشي ..
شهاب مسكها من يدها وسحبها عليهو: البتعملي فيهو دا غلط انا فاهم اي حاجه
بسمه: لا ما فاهم شي وما شايف غيرها اصلا
شهاب اخد نفس: لمتين حتكوني غبيه كدا
بسمه: جاوبني!!!! لحقت تحبها ؟؟
شهاب سكتت للحظه: اي
بسمه سحبت يدها منو بسرعه وبعدت ، عيونها بدو يغرقو في دموعها .. اتمنت انها ما سألتو اصلاً .. طلع بخطوات سريعه واتوجههت لغرفتها من دون ما ترد عليه .. عزاها الوخيد انها ترمي نفسها في مخدتها وتبكي ..
اما شهاب وقف ورجع شعرو لورا بايدو: غبيه ..
____________
صباح تاني يوم ..
الهواء كان قوي .. بدأ شعرها يطاير في وشها وهي بتبعد فيهو بتعب .. كانت نايمه ومتغطيه والجو بارد .. قامت مفزوعه بصوت الشباك الانفتح فجاءة وبقوة بسبب الهواء ..
وقفت واتوجهت لجهة الشباك عشان تقفلو .. رجعت رمت نفسها في السرير بتعب .. اتقلبت يمين شمال بس بدون فايدة واضح انو النوم طار من عينها وماحتقدر ترحع تنوم ..
دخلت اخدت حمام وغيرت ملابسها .. عاينت لتلفونها وشالتو عشان ترد ..
شمس: ايوه ي نجمه
نجمه:جاهزة ؟
شمس: اي
نجمه: طيب يلا تعالي ..
قفلت الخط ..
وبسرعه لبسه طرحه وشالت شنطتها وطلعت .. لاقت نجمه في الممر ..
نجمه: علاء منتظرنا تحت ..
نزلو تحت ولاقتهم ميمونه ..
ميمونه: على وين ؟
نجمه: امم عندنا مشوار مهم
ميمونه: بدون ما تفطرو تعالو افطرو يلا
شمس: لما نرجع بنفطر طيب ..
نجمه: اي اي يلا
طلعو باستعجال وخلوها واقفه مستغربه .. ما كان في زول عارف حاجه غيرهم ..
علاء: اهلا واخيراً جيتو
شمس: اسفين
علاء ابتسم: عادي اطلعو يلا ..
نجمه: اول وجهه حتكون وين؟
علاء: حنطلب الاكل كلو جاهز ومن مطعم واحد حتى الحلو والكيك وحنستلمهم المساء ، وضاح واياد راحو
يجيبو الزينه وشهاب وصهيب واثار حيكملو موضوع المفاجاءة
نجمه: اي كدا يادوب ارتحت ..
شمس: في محل لوحات في طريقنا
علاء عاين ليها: اي في
نجمه: عاوزة تشتري لوحه لجدو؟
شمس: اي
ابتسم وكملو كلامهم ..
تدريجياً خلصو كل حاجه العليهم واتلاقو في حديقه البيت ..
ا
لساعه كانت 11 مساء ..
كل واحد كان شغال بجهد عشان يخلص العليهو ..
وضاح: فضل ساعه يا جماعه بس
نجمه عاينت ل جهه الباب: كويس انهم ما حسو ولا جدو كمان ..
وضاح:اي
علاء: طيب يلا حنمشي نجهز كلنا و طبعا كلكم عارفين الخطه
ردو كلهم: اي
علاء غمز ل شهاب ودخلو كلهم ورا بعض ..
شهاب وقف للحظه وعاين للمكان الكان شكلو حلو وهادي في نفس الوقت .. ولأسم جدو وللزينه الماليه المكان .. ابتسم بهدوء واتوجهه لجهتهم عشان يلحقهم ..
__
بعد ربع ساعه تقريبا ..
وقفت في المرايه .. عاينت للفستان الاشترو مع نجمه الصباح .. كان بسيط وحلو .. ( لونو خردلي ، قصير الايدين ، وقصير من تحت شويه ، ومعاه وشاح شتوي ابيض كبير نوعا ما حنزل صورتو تحت )
حست انها غريبه شويه .. سرحت شعرها ضفيرة وجابتها على جهه كتفها الشمال .. اتعطرت وكانت منتظرة الاشارة الاتفقو عليها ...
باب غرفتها انفتح بهدوء ..
نجمه جاتها داخله: شمس؟
شمس ابتسمت ..
نجمه: طالعه حلوة شديد
شمس: حتى انتي
نجمه: شكرا ، ننزل بعد كدا الكل تحت ..
شمس: طيب يلا ..
طلعو ورا بعض لحدي ما وصلو مدخل الحديقه ..
نجمه دخلت ووراها شمس ..
لفتت انتباهم كلمهم .. شكلها كان حلو فعلا ومريح للعين .. عكس ما اتعودو عليها لامه شعرها او لابسه واسع دايماً ..
بسمه كانت بتعاين لشهاب الما شال عيونو من شمس .. اتمالكت نفسها وعاينت لاثار الكانت بتعاين ليها برضو ..
بسمه كانت لابسه فستان احمر طويل وايده قصيرة وسايبه شعرها .. اما نجمه كانت لابسه فستان اسود واسع شويه وايديه قصار برضو ..
علاء: فضل 5 دقايق يلا ... وعاين لشهاب ..
شهاب شال تلفونو وكلهم كانو مترغبين بحماس ..
* ما راجعت الاخطاء *
يتبع ..
