#امستردام21
صحى بصوت تلفونو ، الغرفه كانت خافته شويه ، عاين لجهه ميمونه بس ما كانت في الغرفه ، شال تلفونو وعاين للرقم ( شهاب) .. استغرب تماماً شنو المخلي شهاب يتصل عليهو في الوقت دا !!!
ردا: خير يا شهاب في حاجه؟
شهاب: اي في ، تعال بسرعه تحت..
وقفل الخط
اياد: دا شنو يا غبي! كدا حيشك
شهاب: حقول ليهو شنو بالليل كدا مثلا
نجمه: خلاص خلاص انا حقيف لو جا حأشر ليكم بأيدي
اياد: تمام يلا
ميمونه: لو كان وريتوهو من الاول مش احسن
اياد: ميمونتي نوريهو شنو !! دي المفاجاءة زاتها
نجمه: اشششش
كلهم فضلو مترقبين نجمه الكانت واقفه جنب المدخل ..
نجمه بصوت خافت: جدو نازل ..
اول ماقفل الخط استغرب .. بعدها ادرك انو ممكن يكون مقلب لأنو اتعود على مقالبهم الفي الطالعه والنازله بس ما كان قدامو غير انو ينزل يشوف ويطمن قلبو ..
جا نازل بخطوات بطيئه .. والدنيا ضلام .. كان في نور بسيط جاي من جهه الحديقه .. اتقدم وفتح الباب على وسعو .. وبسرعه ختا يدو في قلبو متأثر بالصريخ والمفقرعات والالوان الجات من كل حته .. ابتسم وبعدها ضحك .. جو عليهم كلهم وحضنوه عدا شمس .. سيف ومجاهد من بعيد بعايدوه ب سنتو الجديدة ..
جات شمس عليه: كل عام وانت بخير وعافيه يارب ..
ومدت ليه هديتو ..
جا عليها وبدون ما يحس بنفسو باسها في جبينها.. والكل في حاله تأهب .. رجعت لوراء وابتسمت ..
- نفس الشعور الكنت دايما برسمو وسط لوحاتي ، التمني الدائم ، والبحث عن الانتماء ، يمكن امستردام ترجع ترد فيني الحياة ..
( شمس )
علاء: 69 سنه يا عجوز !
اثار حضنت جدها: والله مافي عجووز غيرك جدو لسه في عز شبابو
مقداد باسها هي كمان: اتعلم منها
اصال واصيل جو ليه وباسوهو وعايدوه برضو .. وبعدها ميمونه وايمان وزوجات اولادو ..
شهاب عاين ل صهيب وصهيب فهمو طوالي ..
رجع خطوات لوراء واختفى فجاءة ..
الاضواء انطفت فجاءة وبسرعه اشتغلت انعكس ضوء في جدار البيت .. صورة ورا صورة .. مقداد اتقدم ببطئ لجهه الشاشه المعروضه دي ..
ميمونه كانت بتعاين وبسرعه عيونها لمعو ..
اترحمو كلهم بصوت خافت لما شافو صور فياض بدت تظهر في الجدار ..
كل صورو بدت تتسلسل ، في شبابو وصور في السودان وشويه صور في المعرض وفي صور مع اطفال .. وفي الاخر انكتبت جمله ( فياض في مكان حلو جدا باذن الله)
كلهم دمعو عدا مقداد الكان مبتسم .. عكس ما اتوقعو انو يبكي وينهار بعد يشوف صور فياض ..
شهاب جا عليه: الله يرحمه
مقداد: دة عملتو انتو ؟
شهاب:ايوة
مقداد: انتو عارفين انو دي احلى هديه قدمتوها لي طول حياتي ، انا بجد كنت محتاج احس انو فياض لسه عايش وانا حاليا حاسي انو هنا وبيناتنا ..
شهاب: هو فعلا بيناتنا ..
مقداد عاين لشمس: ايوة فعلا ..
بعدها رجعو يضحكو ويعلقو ..
قعدو كلهم في دايرة كبيرة وبيقو يتبادلو في الحديث والونسه وبعض الكيك ..
بعد دقائق انتبهو كلهم انتو البروجكتر اشتغل مرة تانيه ، بس المرة دي بدا يعرض صور لفياض مع بنت .. بنت واضح انها اجنبيه وغالباً هولنديه .. الصور كانت ليهم مع بعض في اماكن عامه ومطاعم وواضح انهم كان مبسوطين ..
مقداد وقف وعاين ل ميمونه: الصور دي!!! دي لقيتوها وين ي شهاب!!!؟
شهاب عاين لصهيب: لا .. الصور دي ما كانت ضمن الصور العرضناها !
صهيب: اول مرة نشوفها
اثار بهمس: ماما دي منو ؟
روضه: هششش
مقداد: كيف ماعارفين!؟
شمس عاينت للبت الكانت مع فياض! ، كانت لابسه فستان قريب ل بتاع شمس يمكن نفس اللون ، كان في شبه كبير بينها وبين شمس .. بس يمكن شمس ما لاحظت ..
شهاب: جدو اهدأ ، بجد ما عارفين وصلت هنا كيف
كانو كلهم في حاله استغراب وصمت وتساؤلات!!
مقداد كان واضح انو منفعل ومتضايق .. طلع غرفتو من دون ما يردف كلام ..
بسمه: دي منو يا ميمونه!وليه جدو زعلان
ميمونه: دي!!! .. ولاشي يلا تصبحو على خير
كلهم دخلو من سكات وفضلو الاولاد والبنات ..
بسمه عاينت لشمس: اكيد دي صحبتو اكيد
نجمه: ايوة يعني شنو لو صحبتو؟
شهاب: الصور دي جات هنا كيف اصلا
صهيب: علمي علمك
اثار: اتوقع دي نفسها الكانو بيتكلمو عنها ماما وخالتو بشرى صح ي نجمه
نجمه: ماضروري تعرفي اي حاجه يا اثار
بسمه:ليه لا وبعدين جدو زعل لشنو؟ مش كان مبسوط؟
علاء: في حاجه غلط بسمه كلامها صاح
وضاح:لا م صاح يا محقق كونان
اياد: يعني كل التعب دا وجدو ما انبسط؟
نجمه: انبسط طبعا بس انت عارف جدو بيزعل لاتفه الاسباب ..
شمس: عن اذنكم !
صلحت شالها وطلعت غرفتها بهدوء .. مع انو الموضوع ما كان بخصها لكن شغل بالها لدقائق .. رقدت في سريرها بعد م غيرت ملابسها وبسرعه غطت في النوم ..
..
والبقيه رجعو غرفهم واصطحبوا معاهم تفكيرهم في الموضوع ،، بس سرعان ما اتنساو ..
في غرفه سيف ..
بشرى: البحصل دا حيضيع البيت البت لازم تعرف الحقيقه ..
سيف: جدو ماعاوزها تعرف
بشرى: لا هي حتعرف كدا او كدا
سيف: حبيبتي ، انتي عارفه انو شمس دي غلطه فياض الوحيدة وهي ممكن لو عرفت ما تتقبل ..
بشرى: انتو
عايزين يحصل معاها ذي الحصل مع ..
سيف قاطعها: بشرى ، انا نعسان وبكرة عندي شغل ممكن تقفلي الموضوع دا
بشرى عاينت ليهو وهو بتغطي وبديها ضهرو ..
فضلت تعاين ل جهه الشباك الكان عاكس ضوء القمر ، اتنهدت بضيق كأنها اتزكرت حاجه او زول ..
( بشرى كانت حتقول اسم منو ، واتزكرت شنو ؟ )
حنعرف
اما مقداد رجع غرفتو وهو متوتر شديد .. ميمونه بتحاول تشيل منو التوتر عشان اعصابو والضغط العندو..
مقداد: شمس! .. ميمونه انا ماعاوز افقدها بعد ما لقيتها
ميمونه: اهدا يا مقداد حاليا هي ما عرفت حاجه ..
مقداد:حتعرف
ميمونه: معناها احسن تعرف مننا
مقداد:يارب الصبر ..
ونزل راسو بخيبه ، اتزكر كل الفات مرة تانيه ، اول مرة يتخوف ، والسبب انو اول مرة يشوف البت الكانت مع فياض قبل 20 سنه للمرة الاولى بعد موت فياض ..
* مشهد من الحلقه الجايه *
بسمه: بكرهك ، ياريتك ما دخلتي بيتنا وياريتك متي مع امك ..
وضاح بصوت عالي: بسسسمه !!!!
بسمه: انت ما تدخل ، انا اختك وهي لا ليه بتدافع عنها لي دايما بتقيف ضدي !
شمس اتناست باقي حديثهم وكلامهم وعلقت في جمله بسمه ( ياريتك متي مع امك )
قربنا
يتبع
