#امستردام3
صباح اليوم التاني
الساعه 10:00 صباحاَ
رجعت شعرها بتعب بعد ما رتبت دولابها ، وبدت تعاين لرسوماتها وتصاميمها الكانت مرميه في السرير وبتفكر تختهم وين .. ما طولت في التفكير وراحت لجهه الشبال وابعدت الستاره .. شافت تلاته اولاد كانو في الحديقه الخلفيه للبيت وواقفين جنب المسبح .. ابتسمت لا إرادياً لانهم كانو بيهظرو وبيضحكو مع بعض ووقفت تعاين ليهم ..
وضاح: انت مجنون يا اياد ؟ عايزني انزل المسبح في الجو دا
اياد: والله دا العندي يا اما تشتري لي ال 90 تشيرت القلتهم ..
علاء عاين لوضاح بضحك: انزل انزل ارحم
اياد: وانت برضو وفر ضحكك لانك حتنزل معاهو
علاء: منو وانزل وين انت عوير
وضاح: اياد بطل حركاتك دي المسبح متلج عايزنا نموت ..
اياد: ياخ امس مش لعبنا واتفقنا انو الحيفوز حيطلب العايزو يلا انا ما قصرت معاكم واديتكم خيارين ..
علاء عاين لوضاح وغمز ليه: ظابط ظابط حننزل
اياد: ايوااا كدا كلام الرجااال
وضاح: طيب اسكت عشان نشوف حننزل البتاع دا كيف ..
اياد: انا حقعد هناك وبسرعه مافي وقت ..
المسبح كان شبه متلج وما بيسمح للسباحه ..
وضاح نزل تدريجياً وبيشتم في اياد بصوت عالي وونفس الشي علاء .. اول ما نزلو وضاح بقا بحاول يطلع ويمسك في علاء ..
علاء: اياد تعال وضاح شكلو اتشنجج
اياد: ماااا علي الحركات دي
ووضاح كان بضرب في المويه بايديه ويرجف ونفس الشي علاء ..
علاء: ايااااد ما وقتك تعال بسرعه
اياد وقف تصوير وجا عليهو: جيبو علي وانا حطلعو ..
علاء بقا ماسك وضاح واول ما اياد مسك يد وضاح علاء مسك ايدو التانيه وجروهو جوا المسبح .. طلعو بسرعه وخلوه يشتم فيهم وهم بيضحكو وبيرجفو في نفس الوقت .. جا طالع وراهم وبحاول يضربهم بس بدون جدوى التلاته كانو بيرجفو ..
شمس بقت بتأشر وبتقول: ديل عاوزين يموتو ؟؟
اتوجهت للباب وفتحتو بسرعه عشان تنزل ليهم .. وما حست بنفسها الا وهي واقعه بسبب زول دفرها وهو كمان وقع ..
- انتي ما بتشوفي ؟
شمس: انا برضو الما بشوف في زول بجري كدا ..
عاين ليها وسكت وقف وصلح ساعتو بدون ما يسألها انتي منو لأنو كان واضح انو اول مره يشوفها بس شكلو كان مستعجل ..
شمس عاينت ليهو لحدي ما اتخطى الممر اتلفتت لما سمعت صوت بقول ليها : خير لي واقعه كدا ..
شمس وقفت وعاقده حواجبها بإشمئزاز بس قررت تفرد وشها لانو البت الكانت بتتكلم معاهت ابتسمت
شمس: لا بس في واحد جا وضربني و ..
نجمه: معليش اكيد دا شهاب اخوي دايماً مستعجل ..
شمس ابتسمت ومن جواها مغيوظه: عادي
نجمه: انا نجمه ..
شمس: ايوا سلمت عليك امس بس ما لحقت اعرفكم
نجمه: طيب استاذنك لانو عندي دورة تدريبيه بعدين نكمل كلامنا
شمس: اتفضلي بس معلش لو عاوزه انزل الحديقه اللي ورا امشي ب وين ؟
نجمه وجهتها وطلعت باستعجال ...
شمس كانت واقفه وبعدها اتحركت بنفس وصفها .. طلعت الحديقه الكانت واسعه نوعا ما .. قربت منهم وهم ما كانو منتبهين ..
شمس: هيي ..
التلاته انتبهو وعاينو ليها ..
اياد: اسمها السلام عليكم او صباح الخير
شمس: اسفه بس العملتو دا غلط انتو كدا حتمرضو ..
وضاح عاين لعلاء واياد عاين ليهم الاتنين باستغراب ..
اياد: وانتي كدا جايه تورينا الغلط والصاح ؟
وضاح ابتسم ليها: ما تركزي معاهو لسانو متبري منو علاء: شكرا ليك اصلا كنا داخلين نغير ..
شمس حست انها غلطت: اسفه لاني اتدخلت .. ورجعت دخلت البيت ..
علاء عاين ليها لحدي ما دخلت ورجع عاين لاياد: ما ضروري تتطاول لسانك مع اي زول ..
اياد: انا ما فاهم جدو كيف يجيب بت غريبه البيت ..
وضاح: صراحه ولا انا ..
علاء: ما موضوعنا ، خلونا ندخل لانو فعلا حنمرض ..
علاء ووضاح اتحركو عشان يدخلو واياد وراهم ..
اياد: بس والله ما نسيتكم وحردها ليكم الحركه دي
علاء عاين ليه وضحك ..
__
في اكبر غرفه في البيت ..
كانت ميمونه زوجه مقداد بتعاين لجهه الشباك وسرحانه في البحر والسفن البترسي ..
ميمونه: ما مطمنه للحيحصل يا مقداد
مقداد: وكلي الامور لربنا ..
ميمونه: ونعم بالله بس ..
باب الغرفه طرق ..
مقداد: اتفضل
سيف الدين: صباح الخير
ميمونه: تعال تعال يا سيف ..
سيف: خير يا امي مالك ؟
مقداد عاين لميمونه والاتنين عاينو ل ولدهم ..
ودار حوار طويل ونقاش حاد بينهم ..
يتبع
