أمستردم

الجزء 29

#امستردام29

بعدها ب اربعه ايام ..
بشرى وروضه وايمان كانو بيدردشو مع بعض وكانو مستمتعين ، خصوصا بعد الفترة الكانت مليانه بمشاكل ، بشرى انتبهت لتلفونها البرن وشالتو بسرعه لما شافت الدكتور المسؤول عن حاله واهب هو المتصل ، كانت خايفه ترد بس ايمان الحتت انها ترد وتعرف الحاصل ..
بشرى: الو
الدكتور: كيفك بشرى
بشرى: الحمدلله ، واهب كويس؟
الدكتور: ايوة ايوة اطمني ، وعلشان كدا اتصلت ، واهب حالتو استقرت كتير ومستعد يرجع البيت ..
بشرى ابتسمت ابتسامه عريضه: بجد ؟ طيب هو وينو ؟
الدكتور سكت للحظه: هو كويس ما تخافي ، اتصلت على سيف الدين بس تلفونو مغلق
بشرى: انا حكلمو ان شا الله
الدكتور: ان شا الله ..
انتهت المكالمه

ايمان: قال شنو ؟
بشرى: واهب اتحسن وبعد كدا بيقدر يرجع البيت ويعيش معانا عادي
روضه: ياريت والله انا فاقدة نكاتو وضحكتو هو الوحيد المحلي البيت

شهاب وصهيب كانو نازلين مع بعض ..
صهيب:دا منو المحلي البيت غيري كمان يا امي؟
روضه: مافي غيرك طبعا
صهيب: ضحك ، واهب كيفو يا خالتو
بشرى: احنا اصلا كنا بنتكلم عن واهب ، الدكتور اتصل وقالو انو حالتو استقرت وبيقدر يطلع
شهاب: احلفي ؟
بشرى:الحمدلله انا دعيت كتير والحمدلله ربنا استجاب
صهيب: وبفضل شمس بعد ربنا ، اتخيلو انها ما كانت بتشبه نيفين
بشرى: ما حنسى معرفوها دا عمري كلو
شهاب: طيب منتظرين شنو خلونا نمشي نجيبو
بشرى: طيب يلا ..

..

في المعرض ..

سيف: يعني انت لسه مصر ؟
مقداد:اي ولا انت عندك رأي تاني
سيف: لا بالعكس زمان كان عندي رأي بس حاليا دا الافضل
مقداد: دي اقل حاجه حقدمها لشمس ، وفي الاخر البيت حق فياض واماليا يعني بيتها
سيف: طيب انت ارتاح وانا حكمل باقي الإجراءات ..
مجاهد طرق الباب ودخل: صباح الخير
مقداد: تعال يا مجاهد
سيف: صباح النور
مجاهد: اجلو اي حاجه عاوزين تقولوها انا حاليا شايل احسن خبر ممكن تسمعهو وبالذات انت ي سيف!
سيف: خير خبر شنو؟
مجاهد: دكتور واهب اتصل وقال انو واهب حالتو استقرت وحيطلع الليله
سيف حضن مجاهد بفرح وباس راس ابوهو ، بعدها طلعو وكلهم وصلو المستشفى ، سلمو على واهب ومبسوطين انو حيطلع ..
واهب كان منتظر شمس تجي تسلم عليهو بس ما جات مع معاهم ، كان شارد معظم الوقت .. اول ما وصلو مقداد وسيف ومجاهد ، واهب بعد منهم بعيد .. سيف اتراجع وما سلم عليه ، رغم انو زعل من حركه واهب بس انبسط اكتر انو واهب اتحسن .. واهب سلم على جدو وعمو .. وركب مع شهاب في عربيتو ..

مع انو اتحسن بس كان بيكره الاصوات العاليه والزحمه ، اول ما وصلو البيت كان عاوز يطلع لنفس غرفتو بلهفه كبير بس بشرى وقفت قصادو ..
بشرى: حترجع لغرفتك انت وشهاب وصهيب
واهب: لو عاوزني اتحسن سيبيني اطلع لغرفتي
بشرى: واهب ما تعمل كدا انا ماعاوزة افقدك تاني
واهب ابتسم بخفه: ما حتفقديني ، وطلع لغرفتو الفي الطابق التالت من دون ما يتعاطى مع اي زول ..
مقداد: ما تنزعجو ، احنا نحمد ربنا انو هووحاليا حويس وبيقدر يتكلم معانا لانو واهب في وقت من الاوقات ما كان قادر يمشى على رجولو ولا قادر يشوف الضوء ولا يتعاطى مع زول صح ؟ فاحنا نحمد ربنا انو اتخطى المرحله ديل
سيف: انا خايف انو يرجع لنفس المرحله دي
مقداد: المرة دي جا دورك انك تمنعو وما تهملو ..
مجاهد ختا ايدو في كتف سيف وطلع مع ابوهو ورجعو المعرض ..
شهاب و صهيب لحقوهم . ..
اما بشرى كانت بتفكر في ولدها والممكن يخصل معاه لو عزل نفسو مرة تانيه ، وما كان قدامها غير شمس ، شمس هي المنقز الوحيد ل واهب ..