❤صُدفه💜

1

كتابة وتأليف......هبه😉

حياتي اتغيرت بعد ما قابلتوا. شخصية دخلت حياتي صدفة و غيرتها للاجمل. شخصية خلت الابتسامة ما تفارق وشي.حاحكي ليكم تجربتي مع الحب لما خبط بابي وانا ما كنت حاسبة ليهو حساب ولا كان بيخطر علي بالي أساسا.......🙄

-انا ملك عمري 24 سنة قريت إدارة أعمال و نجحت الحمدلله وعملت الماجستير ......
-طولي متوسط شعري قصير مليانة حبة وعايشة مع اختي مي خريجة طب اكبر مني بي3 سنة عمرها 27 سنة شغالة في مستشفي للعلاج طبيبعي كسور و كدة.
-امي وابوي اتوفوا ربنا يرحمهم و ما بقي لي زول غير مي وانا و هي مدبرين احوالنا المهم الليلة ماشة اول مقابلة توظيف لي وقفت تاكسي وركبت مشينا مسافة فجأة التاكسي وقف
قلت للسواق:في شنو لي وقفت؟!؟!
قال لي:في زحمة والطريق مقفول.
انا طبعا ما تشوفوني كدة شمشارة جنس شمشرة مشيت اول الشارع اشوف في شنو لقيت ليك واحد بس اقول عنو تافه موقف الحركة و بيتشاكل مع السائق بتاعو ما عرفت سبب الغضب و الهيجان دا كلو شنو بس الفهمتو انو السائق نسي حاجة استنتجت تدريجيا انو الولد دا عصبي +دقيق في كل شي +لئيم+تافه لكن سمح جنس سماحة ولا شعروا والبدلة الرسمية ياااه بس مشكلتوا عصبي المهم مشيت وقفت قداموا في البداية خفت منو لان طويل بالنسبة لي ممم..ممكن تفتحوا الشارع ولا عبرني ولا كأن في قرد بينطط قداموا قدر ما حاولت اتواصل معاهو قلت احتمال هو اطرش جربت بالاشارة ولسة هو مكمل مع السائق قبلت علي السائق برضو تم سفهي المهم ناسكم كملوا شكلتهم وركبوا عربيتهم ومشوا زي الما حصل شي وانا واقفة جاتني "سدمة" فجاة اتذكرت المقابلة جريت علي اول تاكسي في وشي كان دا الكنت راكبة فيهو ولا لا ما بعرف المهم أصل🤣 تم بحمد الله وصلت.
موظفة الاستقبال: اهلين انتي جاية لوظيفة السكرتيرة صح.
انا: ايوة.
الاستقبال: اتفضلي اقعدي لحد ما يجي المدير.
انا في اللحظة دي بفكر يا ربي الولد والسائق ديل عندهم شنو. تشخيص مرضهم شنو. بعد شوية كدة سمعتهم بنادوني دوري جا وانا داخلة علي المكتب البت الفي الاستقبال بالتوفيق ما عليك إلا تصبري انا بقيت بفكر في كلامها و انو اليوم دا مالوا غريب كدة و فيهو ناس غريبين ما تميت كلامي ظهرت المفاجأة التالتة المدير طلع الولد بتاع العربية🤦‍♀️بقيت بسأل فيهو لي ما رد علي المهم كلامي كتر باعلي صوت عندو هرشني لمن سكتت وقعدت في الكرسي وقال لي: ياخ انتي ما بتعرفي تعملي حاجة غير تتكلمي 24 ساعة لوك لوك لوك ما بتتعبي خشمك ما بيوجعك كان ما بتخافي علي روحك خافي علينا لما نسمع كلامك الكتير دا بيجينا تلوث سمعي ياخ اختصري الكلام و اديني السيرة الذاتية حقتك عشان اشوف حاشغلك ولا لا و ما تفتحي خشمك دا.
مديت ليهو الملف وانا ساكتة فجأة الولد قلب لطيف
وقال لي: واو ماجستير خلاص اتوظفتي لكن لو كترتي كلام بفصلك.
انا قلت الولد عندو انفصام في الشخصية ولا حاجة بالشكل دا المهم مشيت البيت برضو بفكر في طريقة كلاموا وكيف فجأة بيتغير بلمح البصر اختي جات سالتني الليلة مالك ما علي طبيعتك ما اكلتي حاجة ومن جيتي في اوضتك ما طلعتي منها🤨طلعتها من الأوضة وقلت ليها عايزة اقعد برأي ما قدرت احل اللغز قررت انوم و بكرة اشوف الحاصل شنو قمت من 6:00 لبست و مشيت المكتب انتظرت و انتظرت ما جا مشيت سألت البت بتاعت الاستقبال
قالت لي: انو الليلة الشغل عندو في البيت.
قلت ليها: لكن ما كلمني عشان اعمل حسابي.
قالت لي: المدير الانتي اشتغلتي عندو دا تكتشفي الفي راسو براك ممكن يغير رأيو في إي لحظة بدون سابق إنذار دا ممكن في يوم عرسوا رأيوا يحصل فيه تغيرات...
انا اتوترت من كلامها دا وفي البداية خفت من شغلة البيت دي لكن تاني استجمعت شجاعتي و مشيت لما وصلت عاينت لي البيت اقصد الفيلا من برا قلت خلاص البيت دا عايشة فيهو العائلة كلها ولمن دخلت شفت شخص تاني تماما عن الشفتو في المكتب في البيت حاجة وفي المكتب حاجة تانية تماما مع ان الفيلا كبيرة بس عايشين فيها ثلاثة أشخاص بالإضافة ليهو اربعة
)حبوبتوا) و دي الاهم دي اول حاجة في حياتو بالنسبة ليهو هي النفس.
أخوه (أحمد) و اختو (إسراء) و ديل عاملين زي الاكل والشراب بالنسبة ليهو .
بيعاملهم بطريقة كأنهم جزء منو بيخاف عليهم بطريقة خرافية ما بتتصدق.
المهم طبعا انا قطعت لحظاتهم السعيدة ودخلت طبعا انا ما بعرف اسمو ما عرفت اناديهو بي شنو بقيت اقول يا استاز يا استاز المهم قدام اخوانوا وحبوبتو مسكين لكن أول ما دخلنا المكتب فك فيني واحد هرشة اتاخرتي لي و بتاع وضيعتي لي وقتي وكلام فارغ زي دا.
قلت ليهو: اصلا انت ما كلمتني بالشغل في البيت وانا ما عراف ولا بعلم بالغيب عشان اكتشف.
قال لي: عايني لي هنا ايا كان اسمك لما شغلتك هنا شغلتك عشان تنفذي و تسمعي ما تطلبي و تسألي و بعدين انا ما قلت ليك ما تكتري الكلام.
قلت ليهو : اولا انا اسمي ملك ثانيا لي حق اسأل لأن شغلك مربوط بشغلي ثالثا ما بتقدر تتحملني ما كان تشغلني من البداية.
ما عرف يقول شنو غايتو اتلاشي من وشي.
مشيت بي وراهوا خفت اقعد في المكتب يقول جات تنوم لف البيت كلو و ما عرف يقول لي ولا يشغلني شنو بعد شوية استسلم قال لي امشي البيت.
انا استغربت اول يوم دوام لي و ارجع بدري كدة غايتو مشيت البيت طوالي رقدت نمت ماقمت إلا 8:30 الليلة وقعتك السودة مع مديرك سجمك يا ملك غايتو لبست اول حاجة لقيتها في وشي و طلعت وصلت متأخرة الصراحة لقيتهم فطروا مشيت المكتب طوالي لقيتو في وششي
سألني:الساعة كم يا ملك؟
قلت ليهو :10:30 لي في حااجة حاولت اعمل رايحة.
قال لي : وانا قلت الدوام كم😠
قلت ليهو: والله انت ما قلت لي لكن حسب تقديراتي الفكرية و حساباتي و استنتاجاتي طلعت معاي 8:00 ظابطة😁
حسيت بيهو جاتو جلطة وقتية وراحت الحمد لله.
طبعا اهم نقطة في الموضوع انو بيشرب قهوة كل دقيقتين ذكرني الابطال في الافلام الواحد يكون عندو هوس اسمو قهوة 😂🤦‍♀️
قال لي: خلاص امشي جيبي لي جدول الاجتماعات.
حاضر استاز..
ماشة ناداني تعالي بعدين شنو كلمة استاز المعلقة فيها دي و بتلحنيها و تجرجريها كمان.
قلت ليهو : ما وريتني اسمك و لا اي شي داخل بتصرخ مارق بتصرخ لو ممكن كان ممكن انت ونايم تصرخ و ما مستبعد تكون بتعملها😒
اصلا ما اظن يكون عندك اسم ما بتجي معاك الاسماء زاتو شخص عجيب.
ما جاي معاك إلا اسم çoffee man🤣
طنشني و قال لي:اه حضرتي للاجتماع .
عشان اغيظوا :ااي يا استاز ...
اتنفض وقال لي: ياخ اسمي عمر عمر ما صعبة عين ميم راء عمر🤦‍♀️
يلا الاجتماع يا استاز عمر.
دخلنا الاجتماع .....خلص.
حبوبتوا نادتوا...أكتر ما بيضحك في الموضوع انو حبوبتوا و اخوانوا بينادوه عموري🤣
خلاص انا دوامي انتهي انا ماشة يا عموري 💔🤣💔🤣💔🤣
قال لي:هوي اخد لي نفضة و نفش ريشوا انا ما اسمي عموري ااسمي عمر وانتي بالنسبة ليك استاز عمر .
مصرة اغيطوا:قلت لي شنو يا عموري
اتفجر من الغضب وقال لي.......

يتبع..............