كاليفورنيوم 2 (مكتمل)

الفصل الثانى "نبوت قيصر"

دخل الاوضه وقفل الباب وراه وقلع البرنيطه وقالى :

أزيك يامنصور ؟!!!!

هو صوته, شكله متغير بس صوته , صوت صمد !!!!

قولتله وانا مرعوب :

صمد؟!!!!! بس أنت مت وشوفتك وأنت بتتشنق بعينى !!!!

قرب منى فبعدت عنه , فضحك وقال :

لا أنا عايش حتى شوف كده ...

وأدانى أيده علشان أمسكها!!!

قربت أيدى من أيده ومسكتها , لقيته لحم ودم قدامى !!!

شدنى من أيدى وقومنى من على الأرض , بس أنا لسه مش مصدق أنه عايش وواقف قدامى !!
قعد على كرسى وفضلت متنح فيه , فلقيته بيقولى :

مش هتعملى شاى ولا أيه ؟!! وياسلام لو عندك بسكوت ولا بيتى فور تبقى برنس ياد يا منصور ..

قولتله :

لا عندى شاى بس

قالى :

ماشى ياسيدى ميضرش ... أعملى كوباية شاى بس ...

روحت عملت كوباية الشاى ورجعت لقيته ممدد على الكنبه
قولتله وأنا لسه مش مصدق اللى شايفه بعينى :

طيب ازاى أنت لسه عايش !!؟....... والنبى يازميلى فهمنى أيه اللى بيحصل قدامى دلوقتى؟!!!

أخد كوباية الشاى وشفط منها بوق وقال :

دى حكاية طويله أوى !!! تلخيصها أنه فيه عصابه هربونى بره السجن وزيفوا موتى .

قولتله :

أزاى !!؟ هوه فيه حاجه كده !؟ عصابة ؟! وليه !!!

قالى :

بالنسبه أذا كان فيه حاجه كده فحابب أقولك أها فيه حاجه كده .... وطلعونى ليه.....

قطع كلامه وخد بوق من كوباية الشاى

وقال :

طلعونى علشان الكرسى اللى أدتهولك ترميه !!!

اتوترت شويه وبعدين مسكت نفسى

وقلتله :

كرسى؟ !!! كرسى أيه يازميلى !!؟

فقالى وهو مضيق عينيه :

الكرسى الخشب المخروم اللى قولتلك ترميه مع الطبق أياه ...

قولتله :

أها الطبق والكرسى ...........معلش يازميلى مش فاكر أصل الكلام ده من فتره كبيره أوى يازميلى وأنا مش فاكر حاجه خالص عن الموضوع حتى مش فاكر رميته فين !!؟

قالى وهو متعصب :

أزاى يعنى مش فاكر رميته فين ؟!!!

قولتله وأنا هادى خالص :

أها والله يازميلى مش فاكر , وبعدين أنا قولتلك تعالى شيله معايا وأنت مرضتش ..

قالى :