أنا صمد الدوسرى .... السفاح ... واللى مصر كلها كانت بتطالب بأعدامه ....
يوم الأعدام جاللى واحد ببرنيطه وسألنى سؤال وقاللى لو جاوبت عليه فى عشر دقايق هعيش !!!
أجابة السؤال كانت "كرسى"
بس لاسف جاوبت بعد العشر دقايق ماخلصوا ,فسابنى ومشى ومقاليش هيعدمونى ولا لأ!!!
عدى أول يوم من غير ماحد يدخلى الزنزانه , بتمنى أن باب الزنزانه يفضل مقفول على طول , لانه لو أتفتح فيه أحتمال كبير يعدمونى !!!
اليوم التانى الصبح باب الزنزانه أتفتح , والراجل أبو برنيطه وقف قدام باب الزنزانه
وقتها قعدت أترجاه مايموتنيش وقلتله انى أنا بس اللى أعرف أوصله للكرسى.
فلقيته رمى عليا شطنتين بلاستيك !!!
شنطه فيها بدلة لواء !!!والتانيه فيها صابونه وليفه ومقص ومكنة حلاقه !!!
وقاللى :
أستحمى وأحلق وغير هدومك , الحمام هتلاقيه أخر الطرقه على أيدك الشمال.
ومشى وساب باب الزنزانه مفتوح !!!
خدت الشنط البلاستيك , ومشيت ناحية باب الاوضه وأنا ضهرى متنى وبجرجر فى رجلى , طلعت بره الزنزانه , لقيت شاويش واقف بره الزنزانه , أول ماشوفته أتخضيت بس هو ماداش أى رد فعل.
سألته على الحمام , فشاورلى عليه من غير مايتكلم
مشيت فى الطرقه و وصلت للحمام , أستحميت وحلقت ولبست بدلة اللوا وطلعت من الحمام , لقيت أبو برنيطه واقف مستنينى على باب الحمام.
أول ماشافنى ببدله اللواء , قاللى وهو مبتسم :
يخربيتك ياصمد شكلك لواء فعلا !!!
فأبتسمت وقولته :
هو أنتوا هتخرجونى ... صح ياباشا !!!
فقالى :
لا.... هنوديك دريم بارك .. أمشى ورايا ياصمد وهفهمك كل حاجه بعدين.
مشيت وراه وكان كل اللي بيعدي قدامهم بيدوله تعظيم سلام , عسكرى , ضابط , لواء !!!
مكنتش عارف رتبته أيه بالظبط!!!
خرجنا بره السجن , كان في عربيه بى أم سودا بسواقها واقفه قدام باب السجن مستنياه.
ركبنا جمب بعض ورا وطلع السواق على طريق أسكندريه , طول ماأحنا فى الطريق مأتكلمناش خالص !!!
وصلنا الساحل الشمالى ووقفت العربيه قدام شاليه فخم بيطل على البحر مباشرة , ومفيش جمبه اى شاليهات تانيه!!!
السواق نزل وفتح الباب لابو برنيطه , اللى نزل من العربيه وشاورلى انزل
أبو برنيطه قال للسواق :
أطلع أنت ولما أعوزك هكلمك , السواق أداله تعظيم سلام وركب العربيه ومشى.
بعدها بصلى وقالى وهو مبتسم :
أنت تقرأ
كاليفورنيوم 2 (مكتمل)
Action3 شبان يعثرون علي كرسي يحتوى بداخله علي مادة الكاليفورنيوم (ثانى أغلى مادة على وجه الأرض) يقررون بيعه علي الديب ويب ويتورطون مع عصابات خطيرة
