سلاسل ذهب

البارت التاسع ج2

سلاسل ذهب
بقلمي #فاطمة_العبادي
قرائة ممتعه كيكاتي 🖤

شيفيد العمر من يگضي بس بلـ يا حيف 💔

مريم ..
أعصابي مضغوطه ، نفسيتي بدأت تتعب شيء فـ شيء
كل ما تقرب عدة احلام تخلص كل ما اختنك اكثر .
و گلبي شايل حمل الشاهد الله اثگل من حمل الجبال

اني منا ما عولت استقر بحياتي و الگة الأنسان الي أعيش ويا بحب و أمان تالي هيج يصير بيه ؟
بس ما اقبل مستحيل ارضى زوجي يصير لوحدة غيري .

چنت كاعده اصحح دفاتر الدور الثاني ، وهم ما ادري شلون اكملهن بس اكعد طلعت عمتي تصيح لابدة بغرفتهة .

و منا طايح حظي اقرأ بلأجوبه الخارقه ، حتى راسي يضل يفتر
عمتي تعبر من يم باب الغرفة و تشمر حجي
و اني صافنه بلدفاتر

احلى شي بلموضوع وية عياط عمتي طلعتلي وحدة حاجية عن مرض ( الكوليرا )
( مرض يصيب جسم الأنسان عن طريق الخضراوات ، الفجل ، و الكرفس ، و الريحان ، تسببه فايروسات تشبه حرف الواو ، و ، )

بقيت اضحك و لازمة راسي من الدوخة ، الكوليرا لو تعرف شلون هاي الطالبه كاتبه عنهة جان كتلت روحهة

ضليت اصحح كلت ما أكوم اذا ما اخلص ، لأن بلمدرسه ما لحكت اكمل

عمتي طكت روحهة من تشمر الحجي فدخلت للغرفه و كالت :- بعد ٣ ايام و احلام تكمل عدة

باوعتلهة و اني رافعه حاجبي :- اي زين ، بس ليش تگليلي عمه و اني شعليه .

ام حسين :- ياااا ، غير حسين يعقد عليهة

مريم :- منو كلج قبل بيهة هسه .

ام حسين :- يقبل ابني زلمة سبع و يكدر يدير بيتين ليش حتى ما يقبل ؟

تنهدت و انتبهت الهة تحجي بثقه و ثبات :- زين و احلام معقولة هيج بهاي السرعه زوجهة ما صارلة اكثر من اربع اشهر من توفه و تقبل تتزوج ؟ شنو مشايفه ؟

ام حسين :- اووو المرة تريد زلمة أليستر عليهة و يحفظهة و يداريهة وبعدين انتي ليش هيج ما عاجبج ؟ هذا اخوج شاهين مو هلـ خذة مرة ثانيه و سوت الأهلج طركاعه .

مريم :- عمة ترا فرق جبير شاهين علمود ابنه خذاها .

ام حسين :- عيارة ابنه ترا الحجي كلة وصلني عود هاي فاطمة تريد تعرس جايتلهة قسمه زينه و حمودي ابن اخوج مچلب بيهة و تمرض و ضال يشيل روحه و يطكهة بلكاع و حتى متأذي
گايم اخوج يتردد علي هواي بس هو الطفل روحه متعلكة بخالته و هي هم حقهة تريد تعرس و تشوف حياتهة و الزلمة ما يرضى تجيله و تجيب وياها واحد ثنين

نفس الحال ينطبق ع حسين يعني اذا احلام رادت تتزوج ميه بلميه الياخذهة ما يريد جهالهة و لا احنه نرضى ننطيهم الجهال بهاي الحاله شلون ؟