#الحب_وحده_لايكفي
#الكاتبةورودالخالدي
البارت2
فاتن::::
طبعا من كال هلو وصعد اني دنكت لان حسيته تجاهلني فمردت ابين اني حاسه بهالتجاهل لهذا دنكت بس خالو حس بسرعة كلي:
ليصير بخاطرج خالو تره خطية جاي من المخازن مهدود حيله من التعب وميصدك يخلي راسه ع المخده ..
رفعت راسي كتله:.
هااا..لا لا عادي خالو مصار شي براحته
وبقينا كاعدين بالصاله ام هشام كعدت بيدها قصناع مركبه بيه قماش وردي واطرز بيه والبنات يسولفن وحدهن بالكوردي وخالي دك تليفونه ودخل جوة يسولف على بضاعة وطلبيات..حتى اموري يلعب ملتهي ويه تيم صدوك لكه واحد من صنفه وانسجمو بسرعة اني ساكته بس اباوع بعيوني بعدين جلنار انتبهت:
اشو ساكته فاتن..شعجب من شفتج حسيت انتي حيل اجتماعيه مو مال سكته!
هااا..مو انتن مشغولات تسولفن واني بصراحة مدا افهم كلا مجن حتى اشاركجن الكلام!
صدوك متعرفين كوردي بس عادي نعلمج شويه شويه جنا نسولف ع الشغل وع انواع الاصباغ والشانيلات!
ليش انتن تشتغلن!
اكيد نشتغل عدنا صالون نسائي اني ونيران..
الله شكد حلو شغلجن بس شعجب عمو يقبل تشتغلن بصالون الي اعرفه انتن خريجات اثنينجن
يمعوده هي وين الوظيفه بهالايام بعدين ليش بابا ميقبل..
تره كل انسان بهالدنيا لازم يشتغل ويحقق فد انجاز حتى يحس بكيانه ويحس هو فد شي فعال مو جامد
لا العفو موقصدي بس احس انتو ممحتاجين للشغل فليش اتعبن يعني!
صح ممحتاجين احنا منشتغل ع مود الماديات كتلج نشتغل حتى نحقق وجودنا بشي مفيد..
ها..فهمت.
اويلي شكد خجلت من حجيت وياها حسيت نفسي جفصت بالحجي بس هي استقبلت كلامي بروح رياضية وبقت تشرحلي شكد مثقفات وشكد عقليتهن واسعه وعدهن اهداف بحياتهن يعني عايشات بهالبيت الجنه..قصر وابوهن واخوهن يشتغلون واكيد ممقصرين وياهن وبرغم ملكن وظيفة حكومية ..حققن اهدافهن وفتحن صالون حتى يحسن هنه ديقدمن شي لنفسهن خو ما مثلي جامده ومنتظرة ماما تصرف عليه لو تقاعد بابا كل شهر..صح تخرجت بس متأكدة مراح الكة وظيفة لان ماكو تعينات جان تعينو القبلي متخرجين صارلهم سنين..فصار عندي مثل الحماس فكتلها:
يعني شغلجن بالصالون يتعب!
اكيد يتعب ومو بس تعب يرادله خبرة وممارسه وانتباه غير امزجة الزبونات ولغوتهن!
هااا هيج.. اذا اتعبن اكدر اروح وياجن اساعدجن صح ما اعرف شي بشغل الصالونات بس اتعلم شويه شويه
هههه..تكول اتعلم....حبيبتي مو شغله تتعلمين بس كولي وين اشغلج واني عندي 3عاملات..بالصالون وصارلهن 3
سنوات يشتغلن عدنا ويعرفن شغلنا وكل زبوناتنا معاميل عدهن..شايلات الصالون على روسهن حتى منكدر نحاجيهن عبالك احنا نشتغل عدهن مو هنه..ههههه..
لهلدرجة..
اي والله منكدر نستغني عنهن
ها لعد الله يوفقهن ويوفقجن ويرزقجن!
شكرا حبيبتي..
طبعا نيران اول مره تحجي..سمعتها تحجي بالكوردي ويه خاله ام هشام..مفهمت شي بس خاله كالت:
بكيفها تريد تنام يمجن لو تريد غرفة وحدها هي اموري!
عرفت ديحجن عليه..فجلنار كالت:
ها شكلتي ..تنامين يمنه لو غرفة وحدج عادي لتستحين بيتنا بي كومه غرف فارغة..
هااا..يعني انتي ونيران تنامن سوه..
لا..كولمن غرفتها بس ماما قصدها تنامين يمي لو يم نيران لو تردين وحدج..لو انتي واموري بغرفه وحده..
فكرت كلت اني واخويه بغرفة احسن حتى من انام اكدر انزع حجابي اخاف اذا بقيت يم وحده من البنات اخوهن يتقيد وميكدر يدخل يمها..ع الاقل اذا غرفة اني واموري هو ياخذ راحته يكدر يدخل يم اخواته يسولف وياهن براحته.. واني هم اسد بابي عليه براحتي فكلت:
اذا غرفة اني واموري احسن لان هو مرات يكعد بالليل حتى ميضوج البنات..
ها براحتج..راح اجهزلج غرفة فوك..انتي..واموري..
