" هي كالحياة إن غابت..... غابت معاها روحي💙"
فجأه كدا ختت يدها فى راسها ؛ قلت ليها: مالك !...قال لي: حاسه بدوخه ما عارفه من شنو!..قلت ليها: بتقدري تمشي قالت لي: اي ...ومشت خطوتين ووقعت فى الارض ؛ انا انصدمت وبقيت بس بعاين ليها...ناديت امي جات جاريه ؛ حاولت تصحيها كتير بس ما نفع ؛ كلمنا اهلها...وركبنا اقرب عربيه ومشينا المستشفى عملو ليها الفحوصات حتى بعد داك فتحت عيونها وصحت ؛ كنت خايف شديد اني خسرها لاني عارف اني بدونها ما بقدر ؛ بعد نص ساعه النتيجه طلعت...وطلع عندها ورم خبيث فى الدماغ ؛كلنا اتصدمنا كيف بت ال 17 سنه ما كملتها يجيها مرض ذي دا !..
والمصيبه انو الدكتور قال : اذا ما عملو ليها استئصال عاجل للورم ح تموت ؛ كان ضروري شديد يعملو ليها العملية... وعشان العمليه دي هي سافرت لمكان بعيد ومن اليوم داك تاني ما شفتها ؛ امها عندها قريبها اخصائي مخ واعصاب بس هو كان مقيم فى امريكا...ما عارف ليه بس هم قرروا يعرسوها ليهو ؛ وانا صراحه ما كنت قادر اكون جنبها فى مرضها دا لاني كنت عارف اني ح اضعف قدامها وانا ما عايز كدا ؛ ما مشيت ليها الا قبل ما تسافر بيوم...وكانت متغيره شديد هي نهائي ما مأب صحبتي ؛ حتى ملامحها اتغيريت وبقت باهته شديد..ما كنت قادر اشوفها بحالتها دي قلبي بوجعني شديد عليها ؛عاينت ليها لأخر مره وقلت ليها: خلي بالك من نفسك انتي ح تبقي كويسه وح ترجعي وانا ح استناك ما تخذليني ؛ ابتسمت لي وقالت لي بصوت مرهق: مهند!...قعدت جنبها وقلت ليها: انا جنبك قولي ؛ دخلت يدها تحت مخدتها براحه براحه وطلعت لي المنديل دا قالت لي: هاك...قلت ليها: دا شنو!..قالت لي: دا ليك ؛ شلتو منها..قالت لي: معليش يمهند ما قادره اتكلم مرهقه شديد ح انوم ؛ قلت ليها: طيب وطلعت منها ؛ بليل ما قدرت انوم وانا بفكر كيف ح اكمل من غيرها!... الصباح ما طلعت من غرفتي نهائي لاني ما ح اقدر اودعها هي اخر زول اتوقعت اني فى يوم ممكن اودعوا ؛ كنت مفتكر انها ح تواصل معاي للنهايه ...لكن قدر الله ما شاء فعل ؛ ومن اليوم داك ولغاية يوم الليله ما عارف الحصل معاها ؛ ما عارف هل عمليتها نجحت !..ولا هي حيه او ميته ؛ ولو حيه هل هي متذكراني !...قلت ليهو: مهند!..
عاين لي قلت ليهو: اذا هي شافتك وانت ضعيف كدا ح تزعل منك ؛ وهي وين ما كانت اكيد هي متذكراك...معاك ولاعه ؟!.
قال لي: ولاعه ليه !..قلت ليهو: معاك بس!..قال لي: اي ؛ قلت ليهو: طيب جيبها وتعال وراي شلتو منو المنديل وطلعت من العربيه وهو طلع وراي...قال لي: عايزه تعملي شنو؟!...قلت ليهو: ما انا انت ال ح تعمل ؛ مشيت وقفت جنبو وقلت ليهو: احرق المنديل دا...قال لي: هو اخر لي ذكري منها احرقوا ليه !..قلت ليهو: انت بنفسك قلت لي انك ما عارف هل حيه ولا ميته ؛ ينفع تعيش على اواهم ما عارف نهايتها وين؟!..احرقها سرعها ؛ شالو مني وقرب المنديل من الولاعه بس ما قدر يحرقوا ؛ قلت ليهو: اذا ما حرقتو من هنا ما ح تتحرك...اخد نفس وقربهم من بعض وقبل ما يبعدهم من بعض تاني ضغطت على الولاعه وحرقتو ليهو وجدعتو فى الارض ؛ قلت ليهو : يلا عاين ليهو واتخيل انو كل ذكرياتك معاها اتحرقت مع المنديل دا...قال لي:ولاء يخ دي شنو حركات الشفع دي!..قلت ليهو:نفذ قال لي: طيب؛ وركز بعيونو على المنديل لما اتحرق والهواء شالو بعيد ؛ قلت ليهو: نفس الهواء الشال المنديل بعيد دا شال كل ذكرياتك معاها ؛ انا ما طالبه منك تنساها لا بس بطل تعيش فى اوهامك دي ؛ وعيش كإنسان طبيعي وصدقني مأب ما مشت بعيد ؛ هي قاعدة جواك ... كل ما تحس نفسك اشتقت ليها ادعي ليها كتتير بالطريقه دي ح ترتاح شديد💙...قال لي: ما عارف اقولها ليك كيف بس انا هسي حاسي نفسي احسن بكتير كان نفسي احكي لزول ولقيتك شكرا ليك💙 ؛ قلت ليهو: صحي انا نسيت انا جيت عشان اقول ليك شكرآ على النقاب كان نفسي شديد يكون عندي واحد بجد يعني شكرا ليك شديد شديد شديد💙..وقبل ما يقول لي شي تلفوني رن وكانت دي شهد قلت ليهو: يلا شهد مستنياني وقبل ما امشي عايزه اقول ليك: كل زول فينا عندو ماضي بس ما ينفع انو كل زول يدمر حاضرو ومستقبلو عشان ماضي ما ح يرجع...فكر فى كلامي يمهند واطلع من الدوامه الإنت فيها.
ولاء وين انتي ؟!..انا منتظراك ؛ قلت ليها : انا جنبك خلاص ؛ شافتني وقالت لي: كنتي وين؟!..قلت ليها: مع مهند😂قالت لي: انتي ومهند بتحبو بعض من وراي ؟!..24 ساعه مع بعض ؛ انا غيرت الموضوع وقلت ليها : وين امي وخالتو سوسن ؟!...قالت لي: رجعو مع ابوك عشان انا عايزاك تمشي معاي ؛ اشتري حاجات للجامعه...ما تنسي انو الجامعة بعد بكره ؛ قلت ليها: طيب ح نمشي وين؟!...قالت لي: ح ندخل عفراء تاني نشتري كل شي محتاجنو ؛ قلت ليها : طيب ...دخلنا وفضلنا نلف ونلف وشهد ما خلت شي ما اشترتو قروشها محرقاها بعد 3 ساعات لف حتى شهد زهجت وقالت لي: يلا نرجع 😂...وقبل ما نطلع من عفراء قلت ليها: نفسي فى بيتزا ؛ قامت اشترت لي بيتزا وعصير شلتهم ومشينا ؛ وانا كنت جعانه شديد والحمدلله انو عربية شهد مظلله رفعت نقابي واكلت وشربت عصيري بمزاج ؛ ولما وصلت البيت لقيت نفسي كملتها كلها 😂؛ دخلت البيت ولملمت الهدايا بتاعتي واكتر هدية عجباني هدية مهند المهم دخلتهم وصليت ونمت كالعادة😂( عشقي الابدي النوم والاكل😂💙)...
نمت من بعد الضهر ما صحيت الا بعد العصر...صليت العصر ونزلت تحت لقيت ماف زول ؛ طلعت فوق غرفة شهد لقيت امي معاها وشهد بتجهز فى ملابسها قلت ليهم : هيي فشنو ؟!..شهد قالت لي: الليله خطوبتي ؛ قلت ليها: انتي اصلآ مخطوبه
قالت لي: بس ما لبسنا بعض الخواتم ؛ قلت ليها: طيب فهميني هسي ال ح يحصل شنو😭😂!...قالت لي: خالتو سوسن ومقبل ومهند ح يجو المساء وامي وشهاب ح يجو بعد شويه ؛ عشان ح نلبس الخواتم هنا ؛ قلت ليها: طيب ليه ما صحيتيني ؟!..قالت لي: ما هان علي اصحيك شكلك كنت فترانه شديد ؛ المهم هسي انتي عارفة بعد المغرب ان شاء الله ح اتخطب لمقبل ؛ وااي ي ولاء ما قادره اصدق...قلت ليها: اشمعنا الخطوبه الليله!..قالت لي: لانو امي وشهاب ومقبل ح يرجعو بكره المساء ؛ قلت ليها: مقبل من جاء ما تم اسبوع ؛ قالت لي: هو اصلآ جاء عشاني وهسي ح يرجع عشان الشغل ؛ كلها كم سنه وينقل شغلو هنا...قلت ليها: كلها كم سنه وتعرسيهو😂😉؛ قالت لي: بالظبط كدا؛ وتاني انشغلنا بالتجهيزات وما انتهينا الا بعد المغرب صلينا ولبسنا ؛ وبقينا منتظرين ناس خالتو سوسن يجو؛ شويه كدا وجو داخلين وانا ما ركزت مع زول غير مهند لابس الجلابيه يحردوها ليهو😭😂...حاولت اتجاوزو وما اركز معاهو بس ما قدرت وكتير كان بقبضني وانا بعاين ليهو وبعمل نفسي رايحه😂💔.
المهم يلا قعدوا شويه كدا مشيت المطبخ جبت ليهم العصير اديتهم كلهم ولما جاء الدور على مهند ؛ وقفت قدامو ومديت ليهو العصير عاين لي فى عيوني لما اتلبشت وقربت اوقعد الصينيه 😂ختيتها سرعه سرعه وطلعت فوق عشان انزل شهد لقيتها جاهز ؛ قلت ليها : يلا يعروس مقبل منتظرك تحت...نزلتها تحت وقعدت جنب مقبل ولبسوا بعض الخواتم وصورتهم واتصورت معاهم كتير ؛ وتاني جاء وقت العشاء رصيتو ليهم وقعدوا كلهم يأكلو الا انا قلت ليهم ما دايره شلت لي كباية شاي ومشيت قعدت برا عندنا ذي حديقه كدا بس ما فيها كراسي كلها نجيله ؛ المهم قعدت هناك وبديت اشرب الشاي...فجأه كدا حسيت ب......
يتبع.....
