.بس فجأه كدا الخط فتح وسمعت صوت ما صوت مهند كان صوت جوطه وكوراك وقبل ما اقول اي شي قفلت الخط انا ؛
واول فكره جاتني فى بالي انو مهند بتشاكل مع حازم ؛ لاني عارفه انو حازم ما بخلي حقو....اتوترت شديد وبقيت ما عارفه اعمل شنو!...شويه كدا ومهند رجع لي ؛ ومن شفت المكالمه رديت طوالي ؛ قال لي: معليش قبل شويه كنت فى جوطه لاني مع اصحابي وكدا بس انتي ليه قفلتي الخط؟!...قلت ليهو: خفت بس
قال لي: من شنو ؟!..قلت ليهو: لما سمعت الجوطه افتكرت انو حازم جاب شلتو وجاء ينتقم منك ؛ ولو كان عمل كدا ما كنت ح اسامح نفسي نهائي ؛ قال لي: ولاء!...قلت ليهو: اها!...قال لي: ماف داعي تخافي حازم ما بقدر يسألني ولا يسألك ما تقلقي...لما سمعت كلامو دا شويه اطمنت ؛ سكت شويه تاني قلت ليهو: ح تكون مستغرب من اتصالي دا ؛ وصدقني انت اول ولد اتصل ليهو فى كل حياتي...بس عندي كلام عايزه اقولوا ليك ؛ الكلام هو ما مهم لكن...قاطعني : انجزي يبت ؛ قلت ليهو: طيب انا اول مره شفتك فيها لما جيتكم فى بيتكم بالذات خفت منك شديد ومن تصرفاتك وعشان اكون صريحه معاك كنت شايفاك انسان ما طبيعي نهائي ؛ او فيك حاجه ما تمام
واهم شي بتغاظ شديد شديد من برودت اعصابك عندك برود قاتل يخ😂...انا بتكلم وهو بضحك قال لي: اتفشيتي خلاص ؟!...قلت ليهو: اي خلاص 😂؛ قال لي: دي اول لي مره اضحك بالطريقة دي من فترهه بعيده ما حسيت بالفرح دا😂؛
قلت ليهو: يعني كلامي ما ضايقك ؟!..قال لي:بالعكس انا عارف صفاتي دي وانا بحب شديد اي زول بكون صريح معاي ؛
قلت ليهو: يلا انا بس كنت شايفاك كدا ؛ قال لي: وهسي شايفاني كيف؟!...قلت ليهو: ما عارفه هسي شايفاك كيف!..يلا انا ح اقفل بعد دا ؛ قعد يضحك وقال لي: ليه!😂...قلت ليهو: مممممم.....قال لي: ما تتمتمي اتكلمي ؛ قلت ليهو: يخ ما عارفه بس دايره اقفل 😂...قال لي: خلاص تمام وقفل😂؛ دا شنو العملتيهو يولاء دا 😭😂...سجمي 😭😂؛ لساني دا دائمآ بدخلني فى حتات ضيقه 😭😂 هسي انا لما الاقيهو بكره ح اشوفوا بياتو وش وح اقدر اتكلم معاهو كييف !.. وااي😭😂...سترك يرب ؛ خلاص انا بكره ما ح اشوف وحتى لو شوفتوا ح اتهرب منو ؛ لانو لساني الطويل دا ح يختفي اول ما اشوف مهند قدامي.
مهند هسي انت كنت بتضحك ولا انا اتخيلتا كدا ولا انت جنيت ولا الحصل شنو؟!...اي كنت بضحك يمحمد مالك متفاجئ!...لانك من 4 سنه ما ضحكت بالطريقة دي كان بالغت كنت بتبتسم لينا بس كونك تضحك بصوت ذي زمان دا بخليني اتأكد انو فى شي ؛ وحتى ما حصل مره شفتك بتتكلم بتلفون وانت مبسوط كدا وريني بس فى شنو !.واقسم ماف شي يمحمد ما تكبر الموضوع ساي 😂؛ طيب بتضحك مالك ؟!...ي صحبي حتى ملامح وشك اتغيرت ؛ محمد!😒 اختاني بالله ....الليله كان ما وريتني اصلي ما متحرك من هنا ؛ ما عندك كرامه انت !...كرامه!..كرامتي اكلتها انت زاتك😂؛ يالله منك يمحمد بطل تفاهه..تفاهه ولا برتقاله😂😂!...حسبي الله ونعم الوكيل فيك ي محمد وريني داير تعرف شنو !... بس وريني كنت بتتكلم مع بت!..
اي بتكلم مع بت بس ما....بس دا الداير اسمعو من قبيل ؛ فهمك ما يمشي بعيد ي اخوي دي بت عرفتها قبل كم يوم ياداب ما عندي معاها علاقه....والله ي مهند بعد الضحكه دي بمشي بعيد غصب عني😂.. بس وريني يمحمد انا ارتكبت جريمه لما ضحكت يعني !...يمكن ؛ محمد! ...انا شايف احسن تختاني عشان ما ارتكب فيك جريمه قتل....خلاص ماشي زاتي ؛ اي احسن يلا وريني عرض كتافك( محمد دا صاحب مهند او بالأصح الزول المكره مهند عيشتو وخارب عليهو حياتو).
يومي الليله كان طويل وملان درامات وحاجات ظابطه بجد بس فاقدة شهد 😂...مع اني حكيت ليها كل شي بس كنت مستنياها تجي عشان امعطها تاني ولما شفتها طولت اتصلت ليها: الوو شهد ي حيوانه وين انتي ؟!...مش قلتي ح تجي المساء !...قال لي: اي جايه اصبري الشفقه تطير ان شاء الله😂؛ قلت ليها: انا ما بثق فيك يمكن هسي تغيري رايك وتقرري تبيتي مع مقبل فى المستشفى...
قالت لي:امممم فكره ظابطه....قلت ليها: اوعك تفكري كدا والله اجيك واجرك غصب عنك كيف يعني تخليني براي هنا !...قالت لي: ويعني كان قعدتي براك!
المهم هسي اقطعي وشك مني لاني خلاص ركبت العربيه وسايقه؛ قلت ليها: اسرعي عملت لي بييتزا من الموت اذا اتأخرتي بأكلها براي...قالت لي: عملتيها انتي ؟!...اشك انها تطلع حلوهه ؛قلت ليها : يلا شميها قدحه تاني يمعفنه وقفلت الخط😂.... شويه كدا وجاءت داخله البيت 😂؛وقفت ليها فى السلم وقلت ليها: نورتي البيت بوشك المنور😂😉....قالت لي: الغمزه دي سرها شنو؟!..
قلت ليها : نفس السر المنور ليك وشك دا ؛ زحتني من طريقها وقالت لي: انا جعانه كدي خليني اكل بعد داك بنتفاهم ؛ طلعت فوق غرفتي وانا اصلآ كنت مجهزه البيتزا وخلطت لي عصير منقه بارد حاجه كدا تفتح النفس من ماف 😂
المهم انا لحقتها وقعدنا مع بعض اكلنا واتونسنا واهم شي اتصورنا واتعولقنا ؛ وفى صوره عجبتني شديد قلت خلاص ارفعها استوري وموضوع انو انا سجلت رقم مهند دا طار من راسي 😂؛ المهم رفعت الصورة استوري وختيت تلفوني فى الغرفه وشلت العده وديتها المطبخ واول ما بديت اغسل العدهه كدا طق اتذكرت اني رفعت صوره ظاهر فيها وشي واني سجلت رقم مهند ؛ فكيت ليك العدهه وجريت ذي الزول الطقاهو كهرباء الليله سجمك يولاء دا شنو العملتيهو دا ؛ مسكت تلفوني وفتحت الواتس والاستوري ولقيت انو هو اول زول شاف الصورة ؛ ووووبعلييي الليله😭😂...بس برضو ما علق لي عليها ؛ زعلت شويه انو ما علق لي....تاني قلت لنفسي : يعني انا فارق معاي اذا سفهني ولا لا!...وانا ليه زعلت كدا لانو بس ما علق لي عليها!...قعدت افكر شويه كدا فى النهايه حذفتها ؛ وحردت الواتس وقفلت التلفون ونمت 😂.
واليوم التاني كالعاده من الصباح بدري شهد صحتني ؛ عشان نمشي والمشكله انو من بعد الصبح مباشرة 😂...صليت وشربت الشاي وهي واقفه لي فى حلقي ارح ارح ... المهم مشينا لقينا البيت فاضي ما فيهو غير جوليا ؛ استنينا شويه كدا ناس خالتو سوسن جو...دخلوا مقبل البيت وبدوا موضوع الضبيحه والجوطه
والحمدلله مهند كان بهناك مع الرجال ونهائي ما شوفتوا ؛ وتاني انا زاتي انشغلت ونسيت الموضوع...يومي كان ح يعدي من غير احراجات بس للاسف لطالما انا فى بيت ناس مهند ح يتمسح بكرامتي الارض عارفه؛ المهم خالتو سوسن نادتني وقالت لي: امشي الصالون رتبيهو قبل الضيوف ما يجو ؛ قلت ليها: سمح ومشيت....لقيتو محتاج مسح جبت جردل المويه والسياكه ورفعت نقابي وبديت امسح وانا عندي عاده سيئه وهي اني بحب اغني لما اكون بعمل فى شي...المهم شغاله بمسح وبغني بمزاج ع اساس انو ماف زول ح يجي وكدا ومندمجه مع الاغنيه بكلو ؛ شويه كدا سمعت صوت زول قال:....
يتبع.....
