#خالاتي_والجارة_السحارة
الحلقه السادسه ماقبل الآخيره
للكاتبه : Salma Elshwehdi
_________________________________________
لما ركزت في كلامها فعلاً لقيت يديا كلهن خبوش وعض وضهري يوجع فيا ، وخطر علي بالي كلام القطوسه
صبيت نجري للدولاب نشوف فيه حولت اللصقه وفتحته مالقيتهش قلبت الدولاب فوقي لوطي مافيش اي اثار لها
طلعت بنقولها لخالاتي رن جرس الباب طلعت خالتي ريم وموده يفتحو الباب ، معش سمعنا صوتهن
ياسمين : خالتي من اللي علي الباب
ريان : والله ماني عارفه قاعده جنبك انا
ياسمين : شكلهم ضيوف بنطلع نشوف
ريان : هيا هنطلع معاك حتى انا
طلعنا ولقينا خالتي ريم واقفه في مكانها ماتتحركش وموده ترعش وتبكي
ياسمين : خيركم ؟ شن فيه من علي الباب
شفت الباب ولقيت القطوس السوده اللي في الحلم قدام الباب وقالت بصوت مرا كبيره وتضحك : مش قتلك هنرجع اهو رجعت
ريان : لا إله إلا الله ، لا إله إلا الله
ومشت سكرت باب الشقه عليها وهيا برا ، وبدت تقرا في اذكار وقرآن وخالتي ريم ترش في امية رقيه
قعدنا نسمعو في القطوس تعيط وبعدها سمعنا صوت تخبيط قوي عالباب وعلي سطح العماره والغريب ان مافيش حد من الجيران سمع الأصوات الا نحنا ؟
وخالتي ريم قعدت ترش في ميه والملح وتعاود لين حست انه مش هينفع فزادت فتحت قرآن بيش الوضع هدا خلاص
مشت خالتي ريان سمعت انه في شيخ شكلها واخده رقمه من النت رنت عليه وحكتله
لما وصل الشيخ كان لابس سوريه ورديه وجينز بيج ويدخن تخايلو شيخ ويدخن ؟
هذا الشي اللي خلاني نشك فيه
ومن اول ماخش الشقه وهو يتكلم مع الهواء ، وبعدها قاللنا اطلعو وخلوني بروحي ، طلعنا وقعدنا نرجو فيه بعدها قال تعالو وقعد يتكلم مع روحه اخرى وفي كلام مش مفهوم وانا اللحظه هذي تأكدت انه مش شيخ ؟
واللي أكدلي قال لخالتي جيبي اميه وفتح شنطته وطلع حاجات خلطهم وجاني انا طول هيا اشربي هي بسم الله اشربيها في مره وحده ، وكان فيها حاجات مش مفهومه ومنظرها احرف من المجاري (حشاكم).
عطيته نضره من فوق للوطه وقتله : اشربها بروحك ماناقص الا نشرب امية مجاري انا
وبسرعه خود قشيشك واطلع برا وسلملي عاللي دازك
وهو ساكت وفي حالة صدمه
ريم : عيب يا ياسمين هذا شيخ اسمعي الكلام
ريان : كمل ياشيخ ماتعدلش ، هيا مش قصدها تلزك
ياسمين....
انا هنا عيطت وخديت شنطته والحاجات اللي جابهن وعزقتهم برا وقتله : وتوا يا بتطلع بكرامتك يا نطلعك من غيرها وبعدها ناض وطلع
ريان : حشم حالك ان شاءالله هكي اديري في الشيخ مش ديما تقولي جيبو شيخ بعد نجيبوه تلزييه ؟
ريم : انتِ مش طبيعيه يا حشمتنا وخلاص
ياسمين : خالتي ريان من وين حصلتي رقم الشيخ
ريان : لقيته علي المدخل وانا نضم من يومين
ريم : ماتتهربيش من الموضوع ليش لزيتي الشيخ
ياسمين : مش مرتاحتله وخلاص
ولان ماعنديش نيه في الكلام قتلهم مش مرتاحتله وعلشان سببي مش مقنع فحصلت هزايب سماح
واخيراً بعد قهر وسكنان خالاتي قررو يبيعو الشقه وانباعت ومازللنا فيها اخر يومين .. ............
_________________________________________
#يتبع
