#خالاتي_والجارة_السحارة
الحلقه الرابعه
للكاتبه : Salma Elshwehdi
_____________________________________________
ثاني يوم الصبح
نضت وكنت دايره راسي من راس اللعبه اللي في المطبخ في الصبح كانت معلقه نشوفلها ، وبعد الغداء جيت نشرب في اميه وبعدها قربت منها شويه كانو عيونها يتحركو ويبانو زي الحقيقيات مسكتها وقتلها : انتِ من ؟ انتِ حيه؟
وبعدها قعدت نضحك علي روحي كيف صدقت كلام موده ومؤيد ونتكلم مع لعبه
وقتلها : هه حتي انا حماره انتِ مجرد لعبه مستحيل تقدري تتحركي و وتضحكي انا الغبيه اللي صدقت
وفجأه قبل مانكمل كلامي
بؤبؤ العين متاع اللعبه كبرت وقعدت كيف بؤبؤ عين القطوسه بالضبط وابتسمت كيف ماقلتلكم ابتسمت لكن ابتسامتها كانت تخوووف بكل عزقتها من يدي وطلعت نجري جلست قدام التلفزيون جنب خالاتي
ريان : ليش تجري شن فيه ؟
ياسمين : شي مافيش ولا حاجه
وسكتت خالتي وقعدت اتفرج علي التلفزيون الواضح من الموضوع انه خالاتي تعودوا علي الوضع ومعش يخافو منهم نهائي كانو يعانو واجد بسببهم لكن مع المحافظه علي قرأت القرآن والآذكار الجن معش قرب منهم وولا جاهم لكن التبس في الشقه نفسها
كنا لما نجو انا وموده ومؤيد وامهاتنا نرقدو مع خالاتي نسمعو في خالتي ريم تتكلم وكأنها تتعارك مع حد قدامها وتبدا تقوله نحنا شن مدايريلك ليش تبي تقتلهم ليش ادمرلنا في حياتنا اقتلني انا بدالهم ، وفي اوقات تقعد تعييط كأنه في واحد منا بيموت ، كان الجن اللي متلبس في خالتي ريم يأثر حتي علي خالتي ريان
يعني لما الجن يقعد يتكلم مع خالتي ريم او يتكلم علي لسانها تقعد خالتي ريان تتوجع وتتألم وترجع في دم حشاكم ، كانت مرات لعند ماتدوخ علينا ومرات ما تنوضش الا بعد ثلاث ايام ، وريم لما يتكلم الجن علي لسانها يبدو عيونها يتقلبو وتقعد تهزز بقوه ومانقدروش نهدوها لين نقرو عليها قرآن
ووقتها كنت مانصدقش بالجنون والسحر نحساب خالاتي مريضات نفسياً ونجي نقعد عندهن نرجعو لموضوعنا 👇🏼
لما جلست جنب خالتي ريان قالتلي : خودي امية الرقيه وبخيها في الدار الكبيره
صبيت وخذيت معايا موده لما خشينا للدار كنت كيف مكمله تسييقها وتلميعها بدينا نرشو في الميه متاع الرقيه بس المفاجأه انه ريحة الدار قعدت تقول محطوط فيها جثه ، طلعنا انا وموده ودايرات الحوله درنا روحنا ماشمينا شي .
وبعد اذن المغرب بالضبط
اللعبه اختفت معش لقيتها دورت دورت بس بدون اي اثر لها ، فتحت دار النوم الكبيره وخشيت لقيتها راقده علي السرير مشيت بناخدها تسكر الباب ورايا وحسيت بضيق نفس ، وكأن في واحد قاعد ورا رقبتي مايبينيش نتنفس رجليا ثقلو معش قدرت نحركهن كأني لعبه وبعدها اللعبه قعدت تضحك في ضحكه تخوووف بكلل
معش حسيت بشي وقتها قعدت نشوف في ظلام بس وضبابه سوده غمت عليا وما حسيتش الا باللعبه طاحت وصوت خالتي ريم جايه وتقرا في قرآن وبعدها معش فطنت لي اي شي ومعش نذكر شن صار
لعند ثاني يوم الصبح ...
نضت ثاني يوم ومشيت نجري للمطبخ لقيتها معلقه علي الساس عادي جداً ، وخالتي جنبها تغسل في المواعين جيت مسكتها وقعدت نعيط ونقول هنقتلها لازم تموت وعزقتها من الروشن
ريم انصدمت : ليش عزقتيها انجنيتي
ياسمين : هيا السبب في كل شي يصير في الشقه هذي
كنت نحسابها خلاص مش هترد من جديد !!؟
_____________________________________________
#يتبع
ديرو فولو بنات لأيميل روايات الرعب علي الانستغرام👇🏼
https://instagram.com/salmas_novels?igshid=mo7rp4nesrg1
