#حب_في_ازقة_بغداد
للكاتبة ام مصطفى
البات الخامس والعشرين
سارة..بيوم منتهى خابرتني تبجي تكول مرت كرار رايحه لبيت اهلها والجوارين عازميهم على عرس اقربائهم واثناء ماياخذون العرس ظربوا طلق واسماء متصوبه وهسه بالمستشفى كرارتخبل اتصلوا عليه وطلعلهم من الدوام.
ساره..لااله الااالله انشاالله مابيها غير العافيه يارب يشافيه ظليت ادعيلها تكوم بالسلامه خطيه بعدها صغيره امي سمعت انقهرت هوايه عليها كالت هذا كرار مشلوع كلبه من يومه..خطيه منتهى ظلت يم ابوها وكرار بالمستشفى وحالت اسماء كانت حرجه واخوانها ولد عمها كل واحد شايل سلاحه
بليل ادهورت حالتها وتوفت الى رحمه الله وكرار كان مصدوم زوجته ماتت بدون ذنب قتلها شاب متهور يتباها من شايل السلاح ويرمي على الناس والله شنو ..عرس ولازم يرمون طلق ..
اخوها واولاد عمها كول واحد شايل سلاحه ويردون يهدون على اهل الشاب الي كان يرمي بالعرس هوايه مثل حاله اسماء، شباب واطفال راحوا ضحيه اطلاق النار اذا فرح واذا حزن مااعرف شوكت يتركون هاي السوالف ماادري..
منتهى كالت بعد اسبوع صير الكعده مال العشيره ..عشيره اهل اسماء وعشيره كرار باعتبار زوجها وعشيره اهل الولد الي رمى بالعرس ..
اهل اسماء حسب كلام منتهى يحبون الماده وراح يطالبون بملايين اما كرار يستحرم ..والظاهر صار اختلاف بين كرار واهل المرحومه علمود شغله الفصل .
منتهى بيوم الفصل اجتي يمي كالت ابويه تغدى واخذ علاجه ونام بت خاله منتهى كانت قريبه على اهل اسماء الله يرحمها وظلت منتهى على تواصل وياها حتى تعرف شنو الي راح يصير بالفصل ..
بعد اكثر من ساعه منتهى راحت تشوف ابوها ورجعت كالت بعده نايم كتلها منتهى احتمال فضت الكعده اتصلي على بت خالتج خلي نفتهم شنو الصار. ....
وفعلا منتهى اتصلت هي تحجي واني اسمعها تكول كرار تنازل على الفلوس بس طلب قسم يمين معظم تقسمه اهل عشيره الولد بكافه شيوخها وشبابها ان ميرمون بعد لا بفرح ولا بحزن ..وعشيره الولد كامت اتشكرت من كرار هوايه اما اهل اسماء صفى الفصل مالتهم خمسين مليون.والخمسين مليون الثانيه كرار تنازل عنها.. ..منتهى تحجي واني اسمعها الى ان شفت منتهى انتفضت وكالت...المن فصليه؟؟
ال كرار..يعني كرار راح ينطوه مره فصليه؟؟
كلبي كام يوجعني..ليش كرار تاخذ فصل مره ..اذا انت مستعجل على الزواج عندك بنات خالتك هوايه تكدر تزوج وحده منهن شنو ذنبها هاي البينه..يمكن طالبه وبطلوها من المدرسه وراح يزوجوها الك ..ويجوز طفله صغيره متعرف شي وراح ياخذوها من حظن امها ..
شوكت نخلص من هذا نظام الفصليه شنو ذنب البنيه تروح لبيت ناس متعرفهم وتزوج ابنهم وتظل عايشه بمظله طول عمرها .. منتهى رجعت لبيت اهلها
واني ظليت وحدي ..بغرفتي افكر بهاي البنيه الفصليه..
رنا..كان عندي امتحان وكنت اراجع بالكليه منزله عيني على الملزمه واقرا كنت كاعده على مصطبه ومندمجه حسيت شخص وكف مقابيلي وقدملي عصير رفعت عيني..شفت ولد شكله موغريب عليه بس مااذكر وين شايفته
.تفضلي هذا العصير منتبه عليج صار ساعه تقرين ومرفعتي راسج من الملزمه
حظرتك تعرفني ؟؟ومنو كالك اريد عصير ..من رخصتك عندي امتحان واريد اراجع الماده..
حظرتج معرفتني؟؟
استغفر الله اخي موقت اعرفك وتعرفني كتلك عندي امتحان واريد اكمل
لازم اموري لو خالتج مينطون مجال الج تقرين بالبيت
انت منين تعرف امير وخالتي ؟؟منو حظرتك؟؟؟
اني اسمي حيدر ابن عم ايناس جنت موجود بالخطوبه شفتج واذكرتج جنتي طالبه ويانا وتركتي الجامعه اني اعرف كل زملائج وصديقاتج كنا بكروب واحد ..اسف اذا سببت ازعاج..
لا مااكو ازعاج بس عندي امتحان من رخصتك..
عفته ورجعت للقسم مالتي مرت ايام والامتحانات صعبه وكان لازم اخذ درجه زينه بنهايه السنه حيدر كان مصدر ازعاج الي دائما يستغل الفرصه اذا اكون وحدي ويحاول يفتح مواضيع ويايه كنت دائما مااطول بالكلام وياو واحاول اوكفه عند حده بس هو انسان خالي من اي احساس..
بيوم ابو الخط اتأخر علينا متصل على البنات وكال نصف ساعه واوصل البنات رجعن للكليه واني ضليت واكفه باب الجامعه استنسخ محاظرات من المكتبه كنت سارحه وعيني على الشارع سمعت صوت ليش واكفه وحدج؟؟.
مو وحدي البنات هسه يجون وعفيه للمره الالف كتلك لتتكلم ويايه وابتعد عني رجاءا
رنا اني احبج...
شنو؟؟شنو تحبني اخي اني مره مزوجه وعندي ولد وزوجي تعرفه كولش زين ..
حيدر..هواني لان اعرفه واعرف بت عمي ايناس بنيه حيل انانيه ومانعه مهند يوصل يمكم صارحتج..
اتركي مهند واطلكي وراح اخليج اسعد انسانه .
كان يتكلم ويايه بكل ثقه ماادري منين عرف هاي المعلومات ..
قررت ثاني يوم اقدم شكوى لعميد الكليه حتى بعد ميقترب مني ..وفعلا ثاني يوم رفعت شكوى للعماده وقدموا انذار بعدم التعرض وقع عليه حيدر ..خلصت منه فتره وارتاحيت .الى ان اتصل عليه رقم غريب بليل ..مجاوبت ورجع اتصل اكثر من مره فتحت خط .كان المتصل حيدر سألته منين جبت الرقم ؟؟بكل صلافه يجاوبني يكول من ايناس ..
حيدر شتريد بالظبط مكافي عاد ترى اكول ال مهند كولشي
ايباه..مهند... خوفتني بسلفستر مالتج
هو لوعنده غيره معايفج انتي وابنج علمود مشاعر ايناس
بابا شنو عايفني انت منو الي يوصلك هذا الكلام
شوفي رنا..كولش عنج اعرفه اساسا انتي ومهند زواجكم على ورق وانتي عجبتني انطي فرصه لنفسج تفكرين بيه وهذا رقم تلفوني عندي فايبر واتصلي عليه بليل من كولها تنام حتى واحد يتعرف على الثاني هم انتي وهم اني وحتى اسمع صوتج الي يجنن
سديته منه وحظرت الرقم حسبت راسي راح ينفجر شلون هاي ايناس شلون مطلعه اسراري كولها لاابن عمها وليش؟.ونطيته الرقم مال موبايل اخاف احجي ويه مهند وتصير مشكله بس احسن شي اكول الخالتي وهي تحجي ال مهند..
نزلت جوه جانت خالتي بالحديقه ورند محظره صينيه شاي وكعك واموري يلعب يمهم كعدت وصبيت شاي اجه مهند يبتسم كال صار هوايه مكاعدين هاي الكعده رنا صبيلي شاي ..
مهند اعرفه شلون يحب الشاي نص كوب وشكر قليل ظلينا نسولف ذكرياتنا ومواقف هوايه مضحكه خالتي دخلت جوه كالت اريد اتصل على امج صار هوايه ممتصله عليها ورند دخلت تكمل قرايتها ضلينا بس اني ومهند بالحديقه وامير كاعد بحظنه ..سألني مهند شلونج بالكليه ..
ردت اكوله على حيدر بس سكتت الافضل اكول الخالتي بالاول بقينا نسولف هوايه وخاصه من جنت ابات عدهم ويجي مهند يكعدني بليل حتى اسويله اكل بدون متعرف خالتي لان متحب واحد يكعد بليل ياكل ومره طلب مني اسويله طماطه تكلاه ..كملتها اله اجه حتى ياخذ الطاوه بغرفته وياكل براحته طلعت خالتي من غرفتها وهو ظم الطاوه وره ظهره بعده يريد يمكل مشي لغرفته انكلبت الطاوه عليه هي والدهن والطماطه واحترك ضهره
وخالتي كالت حيللل هاي حوبتي لان متسمع الكلام ظلينا نضحك هوايه الى ان سمعت صوت ايناس ..
هاي انت هنا واني انتظرك شعندك كاعد كول عندي مره بالبيت اروح اشوفها ..
مهند..صاح عليها وكالها شبيج مسلمين هسه اجيت اني ..فرت ايدها معاجبها وراحت صعدت فوك
مهند اترخص وصعد وراها
الى هسه اكلهم اني اسوي ويجي مهند ياخذ صينيه الغدا ومرات العشاهم هدومه ينزلها ال رند حتى تكويها بس خطيه هي دراستها صعبه لهذا اتكفل اني بالمهمه اكويها ويجي ياخذها .ثاني يوم كانت ايناس مموجوده معزومه عند اقربائهم على عرس ومهند كان شايل بيده بنطلون وقميص طلب من رند تكوي عنده موعد ويه ولد صديق..رند كان عدها امتحان فااخذته كويته اله وكملته ووكفت بصف الدرج اصيح عليه حتى ياخذ هدومه..بس ماكو رد..رجعت اصيح بعلى صوتي هم ماكو رد..اجتي خالتي سألتي كالت منزل..مهند كتله لا..طلبت مني اصعدله خاف نايم ويفوت عليه الموعد..كتلها اصعدي انتي كالت رجلي توجعني مابيه حيل اصعدي
وانطي الهدوم وانزلي..
صعدت ووصلت للباب ظليت اصيح مهند..وماكو جواب دخلت للبيت ادور بالصاله بالمطبخ ماكو كانت باب الغرفه مال النوم مفتوحه صحت بصوت عالي جاوبني.نعم اجيت..
يمعود وين صرت صار ساعه اصيح
جنت خال هتفون بااذني
تفضل هاي الملابس مالتك وبدل هذا العطر موطيبه ريحته اررجع
على بلو دو شاينل اطيب واحلى..
جاوبني اي والله بس لان العلبه خلصت استعملت هذا ردت اترخص جان يكول لحظه رنا......دخل للغرفه وطلع .وكال هاي فلوس مصرف الج وال امير صار هوايه ممنطيج مصرف بس والله جنت مطلوب فلوس والحمد لله وفيت ديني
شكرا مهند والله محتاجه الراتب مال مرحوم تحت تصرفي وسعد هم ممخليني بحاجه ..
رنا..انتي مسؤوله مني انتي وامير وتفضلي هاي الفلوس اشتري بيها ملابس كم مره اشوفج بس بهاي الجبه اشتري وحده ثانيه للكليه
رنا..اني عندي ملابس بس هاي الجبه ارتاح بيها
مهند اصر اخذ الفلوس ولزم ايدي وخلهالفلوس بيها وكال لتفشليني اخذيها بروح المرحوم
سمعت صوت ورايه شدسوين هنا
شفت ايناس..كتلها سلامتج هاي هدوم رجلج كويتها وصعدتها
وليش مو رند تصعدها؟؟
رند عدها امتحان وثانيا هاي مسؤليتج هدوم زوجج انتي المسؤوله عليها المفروض،ملابسه مغسوله ومكويه ومن يجي من الدوام يلكه شي ياكله حتى ميحس نفسه عايش بفندق بس للراحه حسيت بيها تريد تاكلني ومن نزلت سمعت صوت مهند وهو يصيح مره ثانيه ملابسي انتي تغسليهن وتكويهن الكاهن نظيفات ومكويات بالكنتور
حسيت الحرب بدت بيني وبين ايناس بس مجنت اعرف راح تكون حرب قذره ..
ايناس كامت تنزل بيت خالتي اعتذرت مني وباست خالتي ومره من المرات مهند اتأخر طلبت مني الموبايل مالتي حتى تتصل بي اخذته ودخلت للغرفه وبعد ربع ساعه رجعته مكنت منتبهه علىىالاتصال واساسا مموجود اي اتصال ظليت مستغربه بس مهتميت
كنت دائما اشوف ايناس متمرده على مهند وصوتها اعلى من صوته مرات يصيح عليها ومرات يسكت والكلمه الاخيره الها..الى ان سألتها خالتي وكالت ليش مسوين طفل شعجب مراجعتي دكتوره ..
جاوبتها وهي رافعه رجل على رجل كالت اني سويت سونرات وتحاليل والدكتوره كالت مابيج شي بعد لتراجعين بس مهند سوى تحليل طلعت نسبته حيل ضعيفه وهسه بدا بالعلاج كملت كلامها وطلعت من البيت رافعه خشمها ..
هسه عرفت ليش تصرف وتحجي بخشم عالي ويه مهند...
وللحكاية بقية ام مصطفى
