#حب_في_ازقة_بغداد
للكاتبة ام مصطفى
البارت الثامن والعشرين..
هوايه نحاول مانسمع كلام الكلب ونضاهر بالنسيان لكن بااوقات الليل تهجم علينا الذكريات ونظل نذكر كل حدث صار وكل كلمه سمعناها واثرت بينا ..
احاول ابين النفسي اني نسيت كرار وصدكت روحي مثل الي يكذب كذبه ويصدكها حتى فلوس العمليه مال الانابيب كانت محاوله فاشله اثبت النفسي نسيان حب قديم لكن حب كرار مثل البذره الي نمت بتربه خصبه وامتدت جذورها الى ما لانهايه ...
من سمعت كرار موافق على الفصليه كأنما سهم نبت بااحشائي لااكدر اصيح من الالم ولا اكدر اسكت من طلعت مني منتهى وراحت لبيت اهلها ظليت ابجي احاول اخفف من وجع كلبي بالدموع سبحان الله كلما تقصر المسافه بيني وبين كرار القدر يفرقنا كأنما حبنا خطيئه لاتغتفر بالتوبه او بلدعاء ولا بالتسبيح..نمت بفراشي احاول ابعد طيف كرار عني لكن هيهات..
كرار... بعد موت اسماء الله يرحمها حسيت بفراغ كبير جكد حاولت اسعدها واراضيها لكن كانت عنيده ومتسرعه ..مااذكر بيوم اجيت من الدوام حتى ارتاح كل حياتها صياح وعياط ومشاكل من اتفه الاسباب خاصه من عرفت عندي علاقه قديمه رغم ربي يشهد عليه كل متحاول تسالني اجاوبها جواب الي يرضيها واخذها بحضني واكولها الله عرضني بيج ..لكن دون جدوى..
الله يرحمها ويغفر الها العشره متهون عليه.
اهلها طلبوا بفصل واني استحرم لكن بااثناء الفصل طلبت من عشيره الولد يأدون قسم معظم ماكو بعد اي اطلاقات ناريه لا بفرح ولابحزن لكن اهل اسماء اخذوا نصف الفصل والي هو ٥٠ مليون بااعتبار ال ٥٠ المليون الثانيه اليه بس مااخذتها
اخو اسماء كان طماع لدرجه كبيره وظل يتعارك ويايه شلون تنازلت عن الفلوس،واساسا هم طالبوا بمبلغ كولش جبير لكن العشره قللت منه الى ان صفى على المبلغ المطلوب وهناك طالب اخوها بدل دم اسماء الي راح ياخذون بنيه فصل والعشيره كالت من حقه وهو مزوج وعنده ٥ اطفال يعني راح ياخذها خدامه والي عرفته الولد عنده اثنين خوات وحده مزوجه والثانيه طالبه ....وكفت بنص المضيف وكلت الفصليه من حقي اني الي زوجتي نقتلت وتنازلت عن الفلوس فالفصليه اني احق بيها فعشيره اسماء وعشيرتي كالوا هذا حقه زوجته الي ماتت وانت (على اخو اسماء)رجال مزوج وعندك خلفه وقرروا ينطوني بنيه فصل بعد ماعرفت عنها هي طالبه وعمرها اقل ١٨ سنه..
اخو اسماء ظل صافن وعيونه تريد تطلع غضب عليه طبعا معحبه الوضع واني بيني وبين نفسي كلت يهدا الوضع اخذ الشيخ لبيتهم اتنازل عن الفصليه بحجه اريد اسافر بدون علم اهل اسماء وفعلا انتهى الفصل وشيخ عشيره الولد كال رتب امورك وتعال اعقد واخذ البنيه ...عدت ايام رحت لشيخ عشيرتنا وكتله اني من طالبت بالفصليه مجنت رايدها بس اخو المرحومه نفسه دنيه وطالب بشي مو من حقه وهو مزوج وعنده عائله لهذا رددت انهي طمعه وقبلت بالبنيه بس ياشيخي اريدك تجي ويايه لبيتهم ننهي السالفه وخلي البنيه تشوف طريقها ..
حاول الشيخ يقنعني ارضى بيها وباجر تخلفلك طفل وتعوضك عن المرحومه ..بس اني بقيت مصر ورحنا لااهل البنيه وكتلهم اريد اسافر والبنيه حره ..كام ابوها حظني وباسني وكال والله من يوم الفصل الى هسه البنيه مريضه ولااكل ولاشرب حتى مدرستها بطلتها منها
عمي اني مااريد فصليه بس من سمعت اخو مرتي رادهاكتلكم اني اولى بيها لان هو مزوج وعنده خمس جهال اكيد راح صير عنده خدامه من غير الذل والاهانه وهاي اني اجيت بنفسي حتى انهي الموضوع راح ابوها وجاب شيخ عشيرتهم وشيوخ اثنين شواهد ..وانتهت السالفه حسيت حمل وانزاح من كلبي..
البيت كئيب ومنتهى خطيه عدها ولاده ومتكدر تجينا مثل قبل جماعتي من المنطقه كالوااكو مره تشتغل بلبيوت امينه حيل جيبها تنظفلكم وتطبخ ..رحبت بالفكره واتفقت ويه ام غايب تجي ثلاثه ايام بالاسبوع تطبخ وتنظف خطيه حتى تركب الي وتخلي بالمجمده اجي بس احمي ..دوامي الحمد لله صار يومي ماابات بالدوام وهاي كلها دعوات الوالد الله يحفظه اليه الشيبه بالبيت بركه ..قبل كم يوم بيت ابو سعد دزوا ثواب بيد ولد صغير مجرد مااشفت الاكل عرفت منو طابخه مستحيل انسى ...كولشي بيها اعرفه وحافظه مثل اسمي كلامها ظحكتها طعم الاكل والترتيب الي سوي ..هم يجي يوم ياساره والله يجمعنا سوى؟؟
مرت خمس اشهر على وفاه المرحومه اصدقائي بالمنطقه كانوا يعرفون بيه اريد ساره وخاطبها اكثر من مره شجعوني اتقدم مره ثانيه بس بصراحه خفت لا سعد يرفض مره ثانيه ويفشلني حلفت هلمره اخلي طلقه براسه واخلص منه سعد شخص باطل شكد حاولت وتوسلت بي ومقبل رحت لعمامي كتلهم على موضوع ساره هم مقبلوا كالوا اخوها احتمال يرفضنا مثل قبل قررت ادز منتهى عليهم واشوف ردهم ..اذا قبل خير على خير واذا مقبل ادز على عشيرتنه وعشيره البنيه الي هدوها الي لان رادوا يخدموني بااي طريقه واسويها جاه من عشيرتين من بدايه الفرع لنهايه وخلي اشوف سعد افندي شلون يرفض هلمره ..
منتهى حيل رحبت بالفكره كالت ساره ازوجت ومتوفقت بزواجها وانت هم مرتاحيت وانشاالله تكون من قسمتك ونصيبك واحد يشفي جرح الثاني
راحت منتهى وحجت وية ام سارة وكالت امها بينة حيل فرحانة بس كالت الامر بيد سعد انشاالله انطيه خبر والله كريم
سارة..منتهى فتحت الموضوع مرة ثانية وكالت كرار يريد يتقدم ومنتظر منكم كلمه...امي كالت الله كريم بس الامر بيد سعد .
اجه سعد بليل واني مطلعت من غرفتي كأنما مسويه جريمه وخفت لاسعد يرفض واصير كدامة ويبين علية شي
مرت نص ساعة صاحني سعد رحت الغرفتة وكلبي ايدك ١٠٠٠ كال سارة اني ضلمتج مرة وماريت اضلمج مرة ثانية بصراحة عمي حجة وياية كال ثائر ايريد ايرجعج على ذمتة هو هسة استقام وترك الشرب ودائما يسأل عليج شنو رائيج؟
صرت مثل واحد الواكف مكان واسع تجي ضربة على راسة ميعرف منين..... اني عبالي ياخذ رأي بكرار طلع ايريد ايرجعني الثائر ضليت صافنة علية الى ان كال سارة وين رحتي مو احاجيج ؟
سعد شتريد مني اكولك عمي من اجة خطبني الثائر كال ثائر يشرب ؟
كال عندة مكسرات وكل يومية وية وحده شكل ؟
كال مدمن مخدرات ؟
كل هذا محجة بي عمي لو واحد بمواصفات ثائر خاطب وحدة من بناتة جان قبل ؟ طبعا لا
ليش اتريد ادمرني سعد اني مصدكت خلصت منة اتريد اترجعني للعذاب واللة حرام عليك
سعد ..منو كلج اني وافقت لعد ليش اخذ رايج بس موضوع كرار انسي ماعدنة مرة الة نزلت راسي وكتلة الامر بيدك والشور شورك طلعت من الغرفة احس روحي مختنكة صعدت الدرج ودخلت الغرفتي بعد منزلت ابد حسيت الصبح امي واكفة يمي وتصيح سارة شبيج يمة عيوني ما اكدر افتحهن ومحسيت بشي الا واني بلمستشفى بيدي مغذي وضغطي صاعد حيل
وسعد يمي يباوع عليه وينزل راسه الا ان الدكتوركتب خروج ..ورجعت للبيت..
بعدني اريد اصعد ال غرفتي سعد صاح عليه..كال ساره اني مااريد بالدنيا شي بس اشوفج مرتاحه وصاح على امي وكال اليوم دزي خبر لبيت كرار خلي يتفضلون احنا موافقين نزلت دموعي ومكدرت ارفع راسي خجلانه من اخويه..
يارب الحمد لله واشكر اخيرا راح ارتاح ..
سعد...ساره انخطبت ال كرار وارتاحيت من ناحيتها ..ضلمتها هوايه بس والله مكان قصدي عبالي ثائر ابن عمي وحزام ظهري راح يصونها ويداريها بس بعد الصار صار اما رنا ..الى هسه مااحجي وياها لان مسمعت بكلامي ورجعت ويايه لبيت ابوها حتى اكدر انهي زواج مهند من بنيه ثانيه والعجيب هي موافقه ورايحه للخطوبه مالته ..رنا الوحيده الي الى هسه ممرتاح من جانبها احسها وحده ثانبه غير اختي الي اعرفها جنت ارزلها اضربها ساعه وترجع تضحك وتسولف ولاعبالك قبل دقائق تبجي.بس مابيدي شي اسويه الها لان هي قابله وراضيه بس الحمد لله من طلك زوجته الثانيه لان عرفت عنه ممرتاح ويايها حتى يرجع لرنا وال ابنه وهباوي هسه طالبه كليه وموظفه بشركه ويه عصام ابن عمي..
امي هوايه تلح عليه حتى ازوج واني الزواج مو بالي خاصه بعد غدر ندى اليه بس ..الى متى اضل هيج؟لازم استقر وازوج عسى ولعلى انسى حب قديم دمرني ..
اكثر من مره صير كدامي رند بنت خالتي بنيه حبابه شكلها حلوه بس مبين عليها فقيره حيل خاصه من شفتها كاعده بكفتريا ويه بنات ولد سالتها كالت مااعرف ارجع للبيت والبنات رادوا يشربون عصير بس ماادري اكو ولد..
رزلتها وصحت عليها وهي بس تبجي متكلمت بحرف واحد الى ان وصلتها لبيت خالتي وبعدين ضليت اروح عليها للكليه بين فتره وااثانيه اطمئن عليها ومره من المرت شفت رنا وياها عرفت تريد تعلمها شلون ترجع اذا ماكو خط ...خليت رند بالي وقررت اخطبها خالتي ومهند بسرعه وافقوا ورند بعد اسبوع رجعت الجواب اليه هم موافقه بلشت بتحضيرات الزواج ..بهاي الفتره كنت مثل العاده لازم اوكف بشارع بيت ندى حتى اشوفها وكنت اقنع نفسي بعد الزواج اتركها الى ان شافتني وضلت صافنه عليه وكامت تبجي اجتي للسياره سلمت وكالت..
شلونك سعد عاش من شافك صحتك احوالك..
نزلت من السياره وبيدي الجكاره وصافن عليها ..تسالني ندى شلون حالي؟؟
روحي جيبي احلى شجره بحديقه بيتكم وقلعيها من جذورها وزرعيها باارض صبخه ..ويوميه شوفيها الصبح شلون تذبل الى ان تموت ..هاي اني ندى...هسه عرفتي شلوني..
مسحت دموعها كالت مااكدر احجي وياك هنا..هذا رقمي اتصل عليه اني بيت اهلي....
رجعت ذكرياتي لسننين فاتت ومضت ...ايام اسهر ليلي ..الناس كلها تغمض عيونها الا اني ..رجعت للبيت ...ساره سالتني اصبلك عشا حتى مااذكر شنو رديت عليها دخلت لغرفتي واخذت الموبايل شفت ثلاث مكالمات من رند ..رند الي من خطبتها الى هسه ممتكلم وياها كلمه وحده..حتى من صارت الخطوبه ولبستها الحلقه احس نفسي نسيت كل الكلام ..كلمه مبروك مطلعت مني..وهسه هي الي مبادره ومتصله عليه...المفروض اتصل على زوجه المستقبل الي اختاريتها او وافقت على اختيار الاهل شفت نفسي طلعت الموبايل واتصلت على ندى...
من اول رنه جاوبت عبالك منتظرتني..
الو...
الو شلونك سعد..ليش اتأخرت صار ساعه منتظره اتصالك
ليش منتظرتني اكو شي؟عندج شي تردين سوي قبل سنين ونسيتي وهسه ذكرتي ...انتي مو زوجتي وصار عندج طفل وابن خالتج احوال وعنده سياره..
شرجعج على سعد..؟؟
سعد والله اتندمت ازوجت انسان لايحس بي ولا يراعيني يوميه ويه وحده شكل من اواجهه ينكر صرت مثل المخبله الزم عليه ادله ويكول هاي وحده تركتها وهي الي مجلبه بيه ..تعبت اركض وراها وهو يوميه بحظن وحده عبالي الفلوس تخلي الانسان يستقر وينسعد.. بس لا اذا مااكو حب وموده متستمر الحياه
انت..شلونك...هاي سيارتك الي شفتك بيها؟؟
اي سيارتي وعندي مكتب حاسبات وشغلي الي بمعمل عمي تذكري اكيد..
اي اذكره بالعافيه عليك من شفتك معرفتك ..متغير هوايه طبعا للاحلى
بعدك..ممرتبط..لووو؟؟
لا خطبت بت خالتي وزواجي عن قريب..
اهااا...الف مبرووك..بس تدري الحب الاول صعب ننساه..
اي..صح كلامج صعب..بس مو مستحيل..خاصه اذا كان البديل افضل واحسن..
ظليت احجي ويه ندى..تقريبا ثلاث ساعات بليل الى ان اترخصت مني..
ظل الحال نفس ماهو..تتصل عليه ندى وتظل تسولف عن ذكرياتنا ومواقف هوايه وطول الاتصال لساعات هوايه..وبهل الاثناء تتصل عليه رند واكيد تشوفه مشغول..
الى ان بيوم كنت راجع من شغلي دخلت للبيت جانت رند موجوده سلمت عليها كانت كاعده هي وساره
دخلت للحمام سبحت وطلعت شفتها وحدها
~ليش كاعده وحدج..
ساره بالمطبخ واني اساسا اجيت اتكلم وياك..لان الظاهر موبايلك دائما مشغول..
هاا..مو عندي صديق واكع بمشكله واني..اا
لتكلم سعد اني مااجيت هنا حتى احاسبك او شي لاسمح الله بس اني اجيت الك حتى تساعدني..مثل قبل فتره من ساعدتني بدون مااعرف وشفتك بالكفتريا..
شبيج رند شكو ؟؟احجي
سعد اني من قبلت بيك زوج اليه شفتك رجال يكدر يحميني اذا صار بي شي ..مو لانه ابن خالتي ورضيت بيك لا ؟؟
شفتك بيك رجوله رغم الكل تكول عليك عصبي ..بس اني لا ..التمست منك حنينه وشهامه صعبه البنيه تلكاها بمجتمعنا هذا..
بس سعد اني مااكدر اكمل وياك..ا اريد افسخ العقد وكل واحد يروح بطريقه..
شنو؟؟ ليش،تفسخين شصاير احجي هو لعب جهال البارحه توافقين واليوم تكولين لا..
هو لان مولعب جهال اني اكولك افسخ..سعد انت متحبني ومتأكده اكو وحده بحياتك بس ليش،متقدمتلها مااعرف..لهذا زواجي مكتوب عليه الفشل من البدايه ..لهذا الافضل الي والك نفسخ هسه احسن ..
جاوبتها ...حقج عليه اني مقصر وياج من السما للكاع...
زين ليش ..؟سعد هي احلى ايام ايام الخطوبه واني مشفت منك شي حتى كلمه حلوه مسمعتها منك..اذا اكو شي كوله سعد يمكن اكدر اساعدك...
ظليت صافن عليها حجيتلها على ندى واتصالي بيها اليومي لان اريد انتقم منها..ادمرها مثل ماادمرت حياتي..
ظلت رند صافنه بوجهي وكالت..
سعد هذا مواانتقام..وعلى شنو تنتقم قسمه ومصارت ..المفروض تنسى لان هي ازوجت وعاشت حياتها.. انت هم تعيش حياتك بعدني احجي وياها اتصلت ندى..ظلت رند صافنه رادت تعوفني وتروح..لزمت ايدها واشرتلها لحظه وحده..
فتحت خط..
اول متكلمت كتلها ندى قبل فتره كلتي الحب الاول صعب الانسان ينساه..واني جاوبتج كتلج صعب بس مو مستحيل..
راح اسالج سؤال..
انتي طالبه الطلاك من زوجج وعرضتي عليه نرجع سوى ونزوج بعد متكملين العده..
بس اني خاطب بت خالتي والي اخوها صاحب المكتب مال حاسبات يعني شراكه اني بعملي وهو براس المال عندج استعداد تزوجني ونبدي من الصفر لان اكيد اذا افسخ خطوبتي راح ننهي الشراكه والمكتب نبيعه...
لاحبي سعد ليش تنهي كولشي اني وياك ..بس خلي الزواج بالوقت الحالي سر محد يدري بي بس اهلي وانت ازوج بت خالتك وبعدين حاول تحصل المكتب الك وحدك وطلك.. حتى نصفى بس اني وياك سعد حبيبي..شنو رائيك.؟؟
رائيي انتي وحده بلاشرف لان تتكلم ويه شخص ثاني وهي على ذمه زوجها ..وانسانه ماديه حيللل ومتفكرين بس بالفلوس ..اني كتلج قبل وهسه اكولها .الج اذا كان الحاظر افضل من الماضي نكدر ننساه بكل سهوله والحمد لله اني الحاظر مالتي بت خالتي الف واحد يتمناه والحمد لله صارت من قسمتي..
سعد الله عليك لتعوفني اني لان تعلمت على الراحه والفلوس حجيت وياك هيج بس عادي اذا ماعندك اني قابله اهم شي يكون زوجي ميخوني..
راح تشوفين الخيانه يوميه بعينج وتسمعيها بااذنج وانتي عاجزه متكدرين تسوين شي..لان من البدايه اختاريتي الفلوس..
رقمج راح احظره واذا حاولتي تتصلين بيه من رقم ثاني محادثاتج كوله يمي اجي لبيت اهلج واشوفه الهم..
سديت التلفون ورند صافنه عليه كتلها..رند اني مكدرت اعبش حياتي وعندي ماضي مكدرت لاانساه ولا اتركه بس الحمد لله ..واجهته وتركته برغبتي وبدون مااحد يظغط عليه..
واذا رجع الماضي بييوم من الايام؟؟
اسد الباب بوجهه لان حاظري احلى واجمل..
هبه....اثناء دوامي بالشركه كان عصام يحاول دائما يقترب مني اساسا كان شكله ينرفزني بالاضافه الى امه الي مشيته وحجايتها على الكل دائما اشوفه بنظري انسان مهزوز بلاشخصيه مااعرف ليش،اخذت هذا الانطباع عنه كان دائما يقدملي كوب شاي اوعصير او وجبه فطور اعتذر منه بس هو يلح ويايه وانجبر اخذها ..عصام هو المسؤول عني بالشغل اني وويايه خمس موظفين بينهم اثنين بنات ...بيوم كنت اراجع اوراق مال الشركه .سألني عصام هاي الاوراق انتي مراجعتها قبل يومين فااني كتله اعرف بس حتى اقضي وقت فراغ الى ان يحين دوامي بالكليه طلب مني خمس دقائق كال عندي موظوع مهم وياج..جاوبته. اتفضل ..
كال اني من زمان معجب بيج وبصراحه ماالكه وحده مثلج اكمل حياتي وياها انتي بت عمي واتشرف بيج شنو رائيج؟؟ حاوطتني ذكرياتي ويه مهند بسرعه قاتله واذكرت غدره بيه وحتى ساره شلون تعذبت ويه اخوه ثائر وامه الي تباوع النا من طرف خشمها كل هاي الاشياء ترجمت لكلام مع الاسف كان غير مهذب وبنفس اللحظه حسيت نفسي انسانه غبيه الكل يضحك عليها..
وللحكاية بقية ام مصطفى
