حَيَاَتِيِ مَعَهُ {بِاَلْلّهْجَةُ اَلْجَزَاْئِرِيَةُ}

PART 04

رحلة كاملة وانا نڨصر مع كنزة ولميس ونسيت ڨاع أيهم ومبعد رقدت ومافقتش الا على صوت كنزة وهي تنوض فيا شفت منا ومنا لقيت الطيارة فارغة اووو وراهو لمتكبر هذاك رحت نجري خرجت نحوس عليه فالمطار 🤔 وبسيف باه لقيتو ياربي حسبت تبحرت....شاف عندي وعينيه حمورة ويبان مقلق رحت ليه وانا ميتة بالخلعة راح ركب الطوموبيل وانا رحت نجري موراه وديمارا بسرعة البرق
كان الليل وحنا مزال نمشيو وانا نتأمل فخلق ربي من الكارو حتى نحس الطوموبيل حبست شفت عندو صبتو مزال منيرفي افففف وشبيه هذا نزلت وطيشلي لمفتاح من الكارو
أيهم: هايليك الدار ادخلي واغلقي لباب موراك
مخلانيش مام با نهدر وعاود ديمارا تقوشي يحاحيو فيه لكلاب المهم انا هزيت فاليزاتي ودخلت للدار
واووووووومايڨاد .....كيما تع المسلسلات لي نتفرجهم بعد حلمي نعيش فدار كيما هاذي اخيرا تحقق
رحت درت دورة فالدار اوكل ومبعد خيرت شمبرة فالايطاج الدوزيام فرزت قشي ودخلت دوشت ولبست بيجامة وقعدت نكونيكتي هكاك وحد ساعة ساعة ونص بدات كرشي تغنيلي هبطت للكوزينة وبديت نقرعج فالفريجيدار وكليت ڨاع وش كاين فيه حتى تفلقت وجيت راجعة لشمبرتي بكل سعادة حتى نسمع لباب تحل وعاود تغلق عرفتها بلي جا المنارفي كملت طريقي حتى وليت نسمع صوت تع ضحكات ولأنو الفضول ياكلني رحت جيهة لباب باه نشوف شكون ويا ليتني مارحت حبست فبلاصتي مقدرتش نتحرك ولا نهدر الدمعةةطاحتلي....لهاذ الدرجة؟.. عالاقل يحتارمني ويحتارم بلي راني وليت مرتوو علابالي بلي مابغاش هاذ الزواج مي مش هكا... كان مش ڨاع فوعيو باين عليه شرب ويبوس فطفلة مبعد شاف عندي وضحك ضحكة تع تمسخير وشد هذيك الطفلة ولا مانقولش عليها طفلة بسك كانت لابسة المعري كثر من المغطي وكان عاجبها لحال وراح ماقيمنيش مام با وماحسبنيش اذا من ليوم اللول هكا يادرا كيفاش باقي الايام...للحظة فكرت نخرج من لباب لي مقابلني...بصح وين حانروح راني فالغربة ومنعرف حد الا هو الور لازم عليا نڨعد ....رحت لبيتي غلقت لباب وخليت دموعي يهبطو وحدهم علاه راني نحس هكا علاه....توحشت بابا وماما....توحشت ندى ولارمي تاعها..علاه هكا علاه حياتي هكا وش درت فحياتي انا
ستغفرت ربي ومسحت دموعي نضت توضيت وصليت ودعيت ربي ومبعد رحت رقدت

صباح جديد:

نضت مخنوقة وعينيا حومر من لبكا رحت توضيت وصليت ومبعد هبطت للتحت رحت للكوزينة طيبت لحليب وقعدت نشرب وحدي وأيهم مكاش حسو اففف وش دخلني فيه انا كملت شربت ومبعد نضت نغسل لكاس تاعي لي شربت فيه حتى نسمع صوت تع طفلة

زينب: شكون نتي( بالتركية)
درت عندها لقيتها نفس الطفلة تع لبارح كي شفتها عاود رجعلي السيناريو لي صرا بيناتهم شديت الدمعة بسيف ودرت روحي ماشفتهاش وكملت نغسل وكي خلصت جيت رايحة حتى يقابلني أيهم وكان يخزر فيا خزرة مافهمتهاش ڨاع مي ماعطيتوش قيمة وجيت رايحة حتى نحس يدو حبستني سييت نحيها مي هو زاد زير عليها وهدر مع الطفلة هذيك بالتركية ومبعد هي راحت وحسب مافهمت من هدرتهم وطبعا بفضل المسلسلات التركية لي تفرجتهم قالها روحي تروحي ومنعرف ومبعد دار عندي
أيهم: اصبري نهدر معاك
براءة: منهدرش بعد عليا
أيهم: قتلك اصبري
براءة: وانا قتلك اخطيني
ايهم: ماتخلينيش نتنا...
ماكملش هدرتو انا جبدت يدي بكل قوة وهربت نجري لشمبرتي خليت دموعي يطيحو بعد وش دار جاي يهدر معايا بكل وقاحة

___________ أيهم يحكي: __________
بعدما وصلنا للترك عيطلي فؤاد صاحبي قالي الشركة تاعنا خسرت صفقة مربحة بالبزاف وعندنا خسائر وديون لازم نسلكوها والا رح نأفلسو وانا بسبة هذا تنارفيت ڨاع وليت مانشوفش قدامي لدرجة قريب نسيت لمهبولة هذيك فالمطار وحدها رجعت ليها لقيتها دور وهازة لفاليزات بسيف شافتني جات عندي ركبت وديمارينا وصلتها للدار وطيشتلها لمفتاح تع الدار ورحت طول للبار لي مالف نروح ليه وبديت نشرب كاس مور خوه حتى خلاص راح عقلي مافهمتش كيفاه حتى جبت معايا طفلة من البار وديتها معايا للدار نسيت ڨاع بلي راني مزوج ذرك المهم جوزت الليلة هاذيك مع زينب حتى نضت الصباح لقيتها راقدة قدامي وطالقة روحها عليا نوضتها بالزربة لبست وهبطت ومبعد لبست انا وهبطت لقيتها مع براءة وبراءة حالتها ماتعجبش ڨاع كيفاش رح تكون ردة الفعل تاعها كي دخلتلها عاه‍رة للدار من اول يوم....اففف وانا وش دخلني فيها قتلها من اللول بلي زواج عالورق برك كل واحد يعيش حياتو كيما موالف
قلت لزينب تروح وسييت نهدر معاها مي رايها يابس وماحبتش وراحت لشمبرتها قعدت شوي ومبعد رحت ليها لقيتها تبكي وكي شافتني مسحت دموعها بزربة وناضت

براءة: علاه جيت اخرج شكون قالك ادخل
أيهم: ماكنتش فوعيي كي جبتها
براءة: وانا وش دخلني فيك بغيت تجيب حتى عشرة يخي زواجنا عالورق برك ومنا على ست شهر نطلقو وكل واحد يروح فطريق اصلا مايشرفنيش نكون مرت راجل كيفك رخيس ومايحشمش يجيب عاهرات يجوز معاهم ليلة ماشي راجل علابالك وطحان ور....

ماحسيتش حتى ضربتها كف طاحت فاللرض
أيهم: شكون نتي باش تهدري معايا هك اه شكون اصلا وش دخلك فيا يخي مش زواج حقيقي وندير وش نحب ونجيب شكون نحب هاذي داري انا ونتي راكي مجرد خدامة عندي حتى نطلقو فهمتي
وخرجت وخليتها علابالي كان نزيد كثر رح ندير حاجة نندم عليها حياتي ڨاع رحت للشركة تاعي نحاول نحل البروبلام لي فيها

يتبع........💙