نيران قلبي

part 16

نيران قلبي
بقلم هدى
البارت السادس عشر

---------

شمم ..

التفتت عليه شفته اسير !!

- ليش سديتي؟

- ها هيج

- اهااا

مر من يمي وكعد مقابيلي
فتحت فوني وحطيت راسي بي
اكيد مشاف شي وين ينتبه هو

شويه وضلت تجيني رسائل والحظ مسوية الصوت عام !
دخلت عليهن شفتهن منه رفعت راسي شفته يباوعلي
ضحك مُستهزأ وبقى يدز

احس وجهي صخن من الموقف سديت الفون وكمت من مكاني
وكفت بالمطبخ ارتب المواعين
سمعت صوت رساله فتحت الفون لكيته داز

- نتعرف يـ حلوه؟

جان مكان كعدته مقابيل المطبخ،
التفتت شفته يضحك خزرته وكملت شغلي والدمعه بعيني

كملنه العشه وكعدت بالمخزن او الممر
تعودت كلما اجي لازم اكعد بي

- شنو معنى هالتصرف

- بالغلط دزيت ، وبعدين اني مكلت بس هلو

- جنتي تعرفيني مو

- لا لا والله طلع الحساب بالصدفه
قرب مني وكال

وشنو اليثبت كلامج

- اذا متصدك شسويلك

كمت مُسرعة اريد اطلع وهوَ حاصرني

- جيبي جهازج

- وخر عني ماانطي

- ليش شعندج

- معندي شي بس مااحب احد يفتح فوني

- اهااا

- اسير وخر

ابتعد عني وطلع
رجعت للهول لكيت اهلي يردون يرحون

همست رنيم بفضول
- وين جنتي شميمه

- بالمخزن الوره

- اممم سالفتج مو خاليه كلما نجي تكعدين هناك

- لاتكعدين تحللين خل نروح واكلج

- يلا امشي

رجعنه للبيت مشي وتمار اخذ السياره
الجو جان كلش حلو وبي بروده
بنهاية شهر 12
صارلنه 3 اشهر ببغداد تعودنه عالعيشه هنا
بس مرات نشتاق لبيتنه القديم

- وين رايحه ولج

- هنا وين يعني

- متشوفين روحج طلعتي كبل

انتبهت لنفسي عابره البيت وتمار لاحكني

- ياااا حظي ولا انتبهت

- درجعي رجعي

رجعت وفتت للبيت واني اغم نفسي على الغباء المتكرر