مع الحياة وجها" لوجه +18

البارت الثالث

بعد رحيل اهلي للحج كمت مااختلط بأحد  ، منعزله ، ذيج وكاحتي وشقاوتي اختفت و مدري وين راحت ، كمت ماأكل ، افتر بالبيت ،  خايفه ، أحس روحي وحيده و مكسورة جناح ، مشتاقه لابوي وأمي ، اريد اشوفهم ، اسمع اصواتهم ، كلبي يريد ينفجر  ،
يوم كنه كاعدين ناكل غده  ، دك موبايل أخوي حيدر ، طفر حيدر من الاكل وهو مصدوم ويكول شنو أهلي شبيهم 🤔🤔🤔
احلام  زوجة اخوي حيدر :- شكو شبيك ابو كرار؟؟
معتمد الحج :- مرحبا ابو كرار اني من الحمله البقاء لله ،  أمك وابوك توفوا ،  للأسف فقدناهم اثنينهم  😥😭
وهسه احنه بالطريق ياريت تتلكونه بعد أحنه كم ساعه ونوصل 😭
حوراء : - شكو حيدر ؟
وكلنه منتضرين جوابه
حيدر :- ابوي وامي توفو حضرو البيت للفاتحه 😭😭
طلع خابر اخوالي وعمي وزينب أختي  وخالاتي، من سمعت كلام حيدر ،  ضليت مذهوله صافنه واباوع وساكته ، اريد اصيح صوتي ميطلع  ، اريد أبجي دموعي ماينزلن ،  مامصدكه أهلي ماتوا ، اجن خالاتي وزينب أختي   وتلكتهم احلام مرت اخوي ، صار عياط ونلكب البيت صايح ولطم ،
خالتي تكلي ليش صافنه يمه حوراء احجي🤐 ابجي😭😭
واني مااكدر احرك ساكن ، صافنه ومامصدكه ، لبالي نايمه و أحلم 😥
لحد ما دخلت سياره بيكم للبيت شايله توابيت بيها امي وأبوي ،
  حطو التوابيت بنص البيت ، ضليت اباوع لأمي واحجي وياهة
حوراء :- يمه ليش نايمه؟
حوراء :- بابا ليش نايم؟
حاضنه التابوت واحجي وياهم
حوراء :- اني اعرف الموت والناس يموتون بس موأهلي ، ماما بابا ليش اثنينكم ، ماما اخذيني وياج😭😥😭
خالاتي وزينب يسمعن حجيي ويبجن ويلطمن😭😭
جان عمري ١٢ سنه
اكلهم محتاجتكم لاتعوفني ، ودموعي تصب عشره عشره ، يمه ولله بعد مااسوي وكاحه ولا اضوج حيدر ، 
يمه اكعدي ليش نايمه ؟
يمه صدك تعوفيني ؟
بابا صدك بعد مااشوفك ؟؟
درت وجهي كلت لخالتي خاله كلليلهم خلي يكعدون ؟
التفتت لأختي زينب فدوه كلليلهم خلي يكعدون ؟
خلي ياخذوني وياهم ، ليش يعوفوني ، منو إليه من يمشون عني ، 
يمه صدك تخليني وتمشين، يمه انت حنينه ، شلون كلبج انطاج تسوين هيج ،  يمه شلون بيه ، وين اروح ، أني منتضرتكم تجون من الحج وتجيبولي هدايا وياكم ،
يمه صرت يتيمه ، ومكسورة خاطر ، يمه ذليله صرت ، وابجي والطم وحاضنه التوابيت ،
بقيت عله هاي الحاله ، ابجي واسولف وياهم ، 
لحضات و طبو حيدر و عمي واولاده
شالو التوابيت واخذوهم 😭😭
واني مامستوعبه ولامصدكه امي وابوي راح يرحون يدفنوهم بالتراب ، وهاي هيه خلص بعد مااشوفهم ،
سوو الفاتحه وضلو اقاربنه يمنه لحد اليوم الثالث ، ورا العشه بدت الناس تروح
وعمي واولاده ،  وزينب أختي رادت تروح وياهم؟
حوراء : - زينب لاترحين وتعَوفيني اني منو  يمي يضل هنا؟
زينب : - لا يعمري حيدر يمج واحلام َوخالتج  يمج، ثاني يوم ضلت بس خالتي يمنه، حجت وي حيدر، 
خالتي: - يمه حيدر خلي حوراء تجي ويايه اني وحدي وهي خطيه صعبه عليها وبعدها صغيره
حيدر : - لا خاله هنا اني واحلام ماعدنه شي ماخليها وحدها،
خالتي:-  يمه هي متعلمه عليه وخالك بدوام
حيدر : - حوراء ماتطلع من لبيت خاطرج غالي
حوراء : خاله لاتعوفيني
خالتي : يمه اخوج مايقبل وهو المسؤول عنج  وأني اخابرج يوميه واسأل عليج ،
وراحت خالتي ، كمت ابجي وراهة، وراها كعدت بغرفة امي  ، طلعت ملابسهم ، واشم واحضن بيها والدموع شلال تنزل من عيوني ، اجت مرت حيدر اخذت الملابس وكلتلي نامي لضلين  كاعده لازم تنسين ، واني اصيح لاتاخذيهن احلام فدوه 😭😭
احلام :لج تموتين إذا ضلين هيج الله يرحمهم كلنه فكدناهم نامي ارتاحي كافي ،
نمت بس لبالك كاعده و افكر شنو راح يصير باجر بيه ؟
وشنو مصيري؟
يوم الأربعين ، اجت أختي زينب وحجت وي حيدر
زينب : - خويه حيدر خلي حوراء تجي يمي حاله حال بناتي واني اختها ؟
حيدر : - تردين العالم تاكل وجهي شبيه اني مااعرف اربيها هي كلها زعطوطه عمرها ١٢ سنه واحلام يمها أكثر من اختها وداريها،
زينب : حشاك خويه بس كلبي عليها ماشوف وجهه صاير اصفر وضعفت من ماتو اهلي لسه لا نوم ولا اكل
حيدر : -  زينب كلت لا يعني لا ، لاتلحين
زينب : - بكيفك خويه
بعدها بدت المدرسه وسجلني حيدر بالمتوسطه   واجرلي سايق وبديت ادرس وخالتي وزينب ماعافوني يسألون عليه ، بقيت تعبانه ورا وفاة امي وأبوي ، أحلام  سوتني خدامه الهه ولبناتهة ماعدهة رحمه أبد  ، قست عليه هواي حتى تضربني ، حوراء كنسي وغسلي ملابس البنات وكومي مسحي وطبخي ومن يطلع طبخي مو زين تكل لحيدر عليه ماعرف اطبخ  ،  استمرت القسوه و التانيب والمعاناة ويا احلام،  وي تعب شغل البيت ، ضعفت كلش و صرت عود  ،
ومااكدر احجي لأحد عن حالي وتعامل احلام وياي  ، لأن احلام كلتلي إذا احجي  لخالتي لو الزينب تكل الحيدر يبطلني من المدرسه ، وبقيت عله هاي الحاله ، دراسه  وشغل بالنهار ،  وبليل ويا بنات اخوي ،  ماالحك أقرأ ، بس لصديقتي أيوته أسولف ، جانت دائما تسمعلي  واشكيلها ، ابجي كدامها ، وهي تصبر عليه  ، تكلي لا تقرين اني اساعدج وفعلا جنت أنجح بمجهودها ،
بعد وفاة أهلي ب٨ اشهر ،
بليل جنت كاعده اشتغل ، وما اسمع إلا صوت احلام عالي ، اخذني الفضول اعرف ليش صوتها عالي، سمعتهة تحجي عله حيدر
احلام : - يااااا حيدر اسودنت البنيه مابالغه حتى دوره استوها اجتها ،
حيدر : - احلام هاي هيه فاطمه الزهراء تسع سنوات وزوجت ماعليهه ، وهو كال إذا احس بيها صغيره ومو كدها ماادنلها ،
احلام : - دخيل الزهراء ما زوجت واحد بكد ابوها ؟
حيدر : - اكلج عماد خوش زلمه وصاحب خير وراح يعيشها بدلال ،  شافني خايف عليها وشايل همها اخاف عليها ، كال اني ازوجها واعيشها بدلال والرجال مو بالعمر بالفلوس  🤔🤔🤔
احلام : - اني ماعليه لا دخلني إذا اجن خالاتك واختك اكلهم حيدر انطاها ،
حيدر : - اني لوحيد الحر باختي ومسؤول عنها ازوجها للاريده ،
بعدين حيدر انطه خبر لعمي واخوالي وخالتي ولكل مجان راضي ،  وكفو ضده بس هو تعارك وياهم وخاصه رجل اختي زينب حتى ضربه بحيث بيوم العقد مخله زينب تجي النه ،
جنت اسمع الحجي بس ماافهم شي ، وكلما اسألهم و اكلهم شكو ؟
يكلولي ماكو شي ،  وأجه اليوم الي عرفت بي ، وكان  قبل الزواج  بخمس ايام ، صاحتني أحلام مرت اخوي ، 
احلام : - حوراء تعالي اكلج انتي شفتي علا اختي شلون جانت عروس تخبل ،
حوراء : - اي والله جانت تخبل
احلام : - انتي هم راح تتزوجين وصيرين احله عروسه
حوراء : - بس أني بعدني زغيره
احلام : - لا صرتي جبيره ، والعصر أني وياج ،  نروح للسوك حيدر انطاني فلوس، راح  نشتري ذهب وملابس وبدله وكلشي تردينه ، سمعتهة بس مااعرف شنو لازم اكول،  شنو اسوي ، شنو الزواج ، هاي رغبة حيدر ألي اني اخاف منه حيل ،
المهم العصر رحنه للسوك َاشترينه شغلات هواي  وكلش حلوه ، ووياهن احلام اشترتلي ملابس مفتوحه وقصيره وأشغلات ،  اول مره اشوفها ورجعنه للبيت ، جنت فرحانه بالملابس والذهب ، مثل أي طفله تفرح لمن يجيبولهة شي جديد ، اباوع الهن واكدر بيهن عليه ، وماادري شنو ضاملي القدر ،
ثاني يوم كعدتني احلام من الصبح ، واني ماعرف السالفه،  اخذتني للصالون ، حتى يصبغون شعري ويميشوه ،  ام الصالون كالت لا ينمدرد شعرها وهو طويل ، واسود ، وهي بعدهي زغيره بس بيوم العرس اخليلها سبره خصل اطلعها حلوه ، اخذتني حفتلي وجهي ، هي  تحف وأني ابجي من الوجع ،  اتكلي اتحملي ،  خيط تبجين منه ولج ، لعد شلون بيج بليلة العرس ، واني كلشي مافهمت عليها بس وجهي كلش صار حلو تغير جذريا ،

بعدين رحنه  نختار بدله للعرس ، مالكينه ، كلهن ميصيرن عله كدي ،  لان ضعيفه وزغيره ،
المهم رهمن عليه بدله ، شلون ماكان ، خصرنها ، عد الخياط ،  لونها ابيض ومنفوخه ،

وبيوم العقد أو الزفه الصبح اجت خالتي وخابرتني زينب
زينب : - حوراء كولي لحيدر ماريد ازوج
حوراء : -اي
اجه حيدر حتى ياخذني اني وخالتي للصالون كلت الحيدر
حوراء : - حيدر اني ماريد ازوج
حيدر : -  شنو ولج ماكو متردين🤬🤬
واذا سمعج تكولين بعد أله اخنكج واطمج يم اهلج
خالتي : - يمه شكالت البنيه هذا من حقها
حيدر : رحمه لوالديج خاله لاتدخلين أني أعرف  مصلحتهه ،
وصلنه الصالون ولكل تباوعلي ، وتكل الخالتي يا شجاكم متوازبن عليها 🤔😥
والي تكول يا هاي شنو زغيره👧
بعدها ، طلعنه  من الصالون
وصرت حلوه ،  طفله حلوه ،
مابيه أنوثه ولاملامح العروس ، ألي تجذب النضر ،
رجعنه للبيت ، وياريت ما رجعنه ، لكينه  احلام محضره كرسي يم باب البراني وطشت بي
ياس ، كعدوني عالكرسي وخلو رجليه  بالطشت ،
خالتي بس تبجي ، واني كلش مختنكه ،  ومهضومه ، اريد واحد يحميني ، يسمعني ، يخلصني ، تمنيت أمي تجيني بذيح للحضه ، يمه وينج ، تعاي شوفي شجاي يصير بيه ، يمه محد ألي ، أحس روحي غريبه ببيت أهلي ، لبالك حمل عله كلوبهم ، يريدون يذبوني ويخلصون مني ، وسط كل هذا 😭
صاح حيدر اجه الشيخ يالله حضروا ارواحكم ،  حجه كلام
وبعدين كالي إذا  موافقه قولي '' نعم انته وكيلي ''
خالتي:-  تأشرلي و تهز برأسها تكلي لاتوافقين
احلام اجت كالت كولي نعم انت وكيلي
سكتت ، رد الشيخ مره ثانيه ، بويه وين الموافقه واني بس ابجي ،  لان خالتي وزينب يكللي لاتوافقين ، معناها اكوشي مو زين هذا 
احلام تضغط عليه لج احجي
راح يجي حيدر يموتج 🤬🤬
ومااحس الا وحيدر فوك راسي خنزر عليه بعيونه اني خفت وكلبي كام يدك حيل من الخوف ، دنكت راسي ودموعي بللن بدلتي وكل شسوي 😭😭😭
كال الشيخ بابا إذا موافقه قولي نعم انت وكيلي
وإذا مموافقه كولي مموافقه ،
حيدر اشرلي علركبته بيده يعني اذبحج كولي موافقه ،  كلت نعم انت وكيلي😭😭
مثل مكلتلي احلام
وياريت َمكلت ذيج الكلمه ، صارت مناحه ، أني وخالتي كمنه نبجي ،
واحلام بكل صلافه تكلي  لاتبجين ولج ، خربتي المكياج ، شبيج عليمن تبجين ،
مو زين محصلة رجل صدك ثوله إنتي ،
جان حيدر يصيح يالله اجه العريس ياخذ عروسته
تفضل تفضل عماد......

حبايب فدوه متابعة لماممسوين متابعه سوو متابعه وسوو تصويت للقصة من النجمه 👇👇👇 حتى انزل البارت الرابع