مع الحياة وجها" لوجه +18

البارت الثاني

ليش الايام الحلوه قليله بحياتنا..؟
وليش تمشي بسرعه ؟
وليش من نتذكرها نبجي ؟

كانت احلى أيام حياتي هي أيام الابتدائيه ، أيام البراءه ، كنه زغار ، لاهموم ولامشاغل ، مانعرف شي غير بس نلعب ، نتزاعل شويه ونرضه ، كانت أيام حلوه ، هواي أحن واشتاق ألهه ، من أتذكرها ابجي واتمنى كون ترجع من ذيج الايام ولو ساعه وحده بس هيهات؛؛؛
رحت أداوم بالمدرسه واخذت وكاحتي وياي ، شايلتهة مثل كتبي ودفاتري ، أرادد بالكلام ماأسكت ، أغلب وقتي اكضي ويه صديقتي أيوته ، كانت تجيب وياهة أكل طيب من بيتهم ، كنت أكله منهه ، كنت احبها صديقتي واغار عليهة ، مااريد وحده غيري تصادقها وتمشي وياهة ، مره بنيه شفتهة تمشي ويه أيوته، زعلت وضربت البنيه بالمسطره على وجهها طلع دمها وخيطوها ، وفصلوني من المدرسه، بس راحت خالتي للمديره ورجعتني لأن امي مريضه ماكدرت تجي للمدرسه ، جنت معروفه بوكاحتي على مستوي المدرسه كلها والمعلمات كلهن يعرفني ، كنت اروح للحمامات شوكت مااريد بدون ما استأذن ، حتى إذا اكو مشرف عدنه بالصف ، رغم وكاحتي كنت أنجح ، واخوي حيدر مرات ينطيني فلوس من اجيب الشهاده واني ناجحه ، وامي وخالتي يفرحون بيه من أنجح و أبوي يجيبلي هدايا ، أبوي حنين كلش ويحبني، مره صخنت وودوني للمستشفى ، ضل واكف علراسي بالمستسفى لصبح رغم انو هو رجال جبير ومريض ، أبد مابخل عليه بشي أريده ، كل الي أريده جان يجيبه أليه ،اني كلش احبهم هيج يفيضون حنان وعطف ، من اجي ألهم بالعطله اركض واشبك أبوي حيل وهو يشبكني ، بي ريحه عجيبه مثل ريحة المسك والعنبر ، أحس بالامان بحضن أبوي ، وأمي مااشبع منهة ، انام بحضنهة وعله رجليها ، هيج تلفني تحت عباتها مثل الحمامه من تخلي اجناحها على زغارها، تمسح على شعري وتسولف وياي لمن اغفه ، ماكو حنيه مثل حنية الأم، كانو خيمه على راسي بيهم اتنفس ، يحموني ويدافعون عني ، ماكنت أتخيل لحضه يروحون عني ويتركوني لوحدي،
قدم اخوي حيدر ألهم للحج وطلعت أسمائهم صار ان يروحون ووصلت لحضات الوداع ، قبل لايرحون ، سمعت أبوي وصى اخوي حيدر :-
بويه حيدر مااوصيك على اخواتك زينب وحوراء ذني مالهن غير أنت ولله ، ذني أمانة لله عندك .
حيدر :- كله ان شاء لله درب السلامه.

امي :يمه زينب احلام حوراء تعالن اوصيجن واحجي وياجن
زينب :اي يمه سولفي
احلام :كولي خاله
حوراء : جنت نايمه علرجله وتلعب بشعري
كلت أني :- ها يمه كولي

امي :احنه رايحين بطريق ومانعرف شنو اليصير علينه أوصيجن بناتي، ديربالجن على ارواحجن وومااوصيجن علحيدر 😭
يمه اخيجن هذا ومالجن واحد غيره،
أمي :- هاي حوراء امانه بركبتكم مااوصيكم عليها يمه احلام😭
احلام :أن شاء الله خاله قابل وين ضاله ترحون وترجعون بسلامه لالتخافين عليها..؟
زينب: ترجعون بسلامه يمه
اني شفت امي تبجي وتتلفت وراها وتباوع علينه اني وزينب سالتها :-
يمه ليش تبجين..؟
امي :ماكو شي يمه اريدج أصيرين سباعيه وتبطلين وكاحه
ويمه اخوج شيكلج كليله اي لاشلعين كلبه سمعتي يمه ؛؛؛
حوراء :صار يمه لاتبجين ميخالف

😪😪راحو اهلي للحج
من طلعو ، كمت اباوع وراهم ، لمن بعدو وبعد مااشوفهم وراهه ، حسيت صدري ضاك ، وأختنكت ، وكلبي كام يدك حيل ؟
كلت يمكن لان مامفاركه امي وابوي ؟؟
قبل دائما اشوفهم بلبيت ، من اجي يتلكوني ، خفت ، حسيت بشي غريب ، ماعرفت شصار بيه بس بعد فتره عرفت ليش ضاك صدري وكلبي عليمن يدك؟😔😔😔😔